ءبىز جەتىسۋدانبىز
بىزدە بۇرىن الماتى كينوستۋدياسى شىعارعان فيلمدەردى ءسوز ەتكەندە «جاس ونەرىمىزدىڭ جاڭا تابىسى» دەگەن ايداردى الدىمەن تاعىپ الىپ، كوزگە تۇسكەن كەمشىلىگىنە دە سول «جاس قويدى» جەلەۋ ەتىپ جاۋىردى جابا توقي سالاتىنبىز-دى. ونىڭ دا مۇمكىن ءوز كەزەڭىندە سەبى بولعان شىعار. ءسويتىپ جۇرگەنىمىزدە ءوز ارامىزدان تالانتتى ءبىر توپتىڭ وسكەنىن اڭعارماي قالىپپىز.
ءقازىر بۇكىلوداقتىق ەكرانعا شىققان «ءبىز جەتىسۋدانبىز» دەگەن كوركەم سۋرەتتى ءفيلمدى سوناۋ اتاقتى «موسفيلم»، «لەنفيلمدەر» شىعارىپ جۇرگەن ەڭبەكتەرگە تەڭەپ كورسەك، سولاردىڭ ەڭ تاۋىرىمەن تەرەزەسى تەپە-تەڭ دەمەسەك تە، قۇيىسقان قاعىسۋعا جاراپ قالعانىنا قۋانباسقا بولمايدى. ەندى الماتى كينوستۋدياسى «جاستىق» دەگەن «جامىلعىسىن» سىپىرىپ، «ەسەيدىك، كامىلەتتىك اتتەستات الدىق» دەۋگە تولىق پراۆولى.
تاريحي ريەۆوليۋسيالىق تاقىرىپقا ارنالعان كينو شىعارمالارىنىڭ تاماشا ۇلگىلەرىنەن ءتالىم الا وتىرىپ، «ءبىز جەتىسۋدانبىز» ءفيلمىنىڭ رەجيسسەرلارى س. قوجىقوۆ پەن ا. وچكين ءوز تاراپتارىنان جاڭا، مول ءادىس تاپقان. مۇندا ەڭ الدىمەن كەيىنگى كەزدەرى وسى تاقىرىپتاس شىعارمالاردا ماشىققا اينالىپ كەتكەن اتىس، شابىس، كەيىپكەرلەردىڭ كوپ سوزدىلىگى، كوڭىلدەن قونىس تاپپايتىن جاساندى جالاڭ باتىرلىقتارى، ورىنسىز ايقاي-شۋ جوق دەۋگە بولادى. كورۋشىلەردى دە وسى جايتتەر ابدەن مەزى ەتكەن-دى. بۇل فيلمدە قاراپايىم ادام تاعدىرى، ونىڭ ىشكى دۇنيەسىنىڭ وزگەرۋ فاكتورى، سىرتتاي بولىپ جاتقان ءومىردىڭ كوپ قۇبىلىسىنا قارىم-قاتىناسى، ويانۋى، ءوزىن تانۋى، ساياسي ۇلكەن قوزعالىسقا كەلىپ ارالاسۋى ءسوز بولادى. نەگىزگى تابىسى — ونىڭ ءبارى زارەدەي جاساندىلىقتان اۋلاق، ءوزىنىڭ تابيعي ديالەكتيكالىق سەزىم شىندىعىمەن ءوربىپ وتىرادى. جاعىمدى كەيىپكەرلەردىڭ دە ءومىر تانۋى، مىنەز-قۇلىقتارى وزگەشە، دارا. تاعدىرى ساباقتاس جاتقان ءۇش سولداتتىڭ ءومىرى ءۇش ارناعا سايعانمەن، قايتا كەلىپ توعىسادى. ويتكەنى ولاردىڭ اڭساعانى، مۇرات ەتكەنى ءبىر. ول جالپى حالىق مۇددەسىمەن ۇشتاسىپ، سودان تىرەك، سۇيەۋ تابادى.
ەگەر ءبىز سولدات ءومىرىن مايدانعا اتتانۋ، سوعىستا امان قالۋ، ەلىنە ورالۋ دەگەن ءۇش كومپونەنتتەن قۇرالادى دەسەك، فيلم سونىڭ ەڭ سوڭعىسى — سولداتتىڭ ورالۋدان كەيىنگى ءومىرىن باياندايدى. ادەتتە كوپ شىعارمالاردا مايدان ءورتىن كورگەن ادام كەلىسىمەن-اق «كوسەم» بولىپ شىعا كەلسە، مۇندا ۇلكەن زاڭدىلىقپەن استاسىپ جاتقان شىندىق بار. نارتاي، ءازىم، پاۆەلدىڭ ورالعاننان كەيىنگى ءومىرى دە بىرىنە-بىرى ۇقسامايدى. مىنە، ۇشەۋى ءۇش جاققا ۇيلەرىنە كەتتى. اۋىل مەن انانىڭ ىستىق قۇشاعىن ساعىنىپ نارتاي كەلەدى. قۋانىشتان تۋعان اندە دە شەك جوق. شارشاۋ، شالدىعۋ دەگەن وعان جات. جەلە-جورتىپ اۋىلىنا جاقىندادى. اسەم جەتىسۋدىڭ تابيعات سىيعا تارتقان سۇلۋلىعى قالپىنشا تۇرعانمەن ەلدەن، اۋىلدان ۇسقىن قاشقان. 1916 جىلدىڭ داۋىلى ويرانداپ كەتكەن. بالا اناعا، انا بالاعا دەگەن زارلى كۇندەردىڭ ءىزى قاڭىراعان، قيراعان ۇيلەردە عانا قالىپتى. اۋىلدان وقشاۋ جازىق دالادا ولگەن جىلقىنىڭ قاڭقاسى جاتىر. مۇمكىن ول ەل ءۇشىن ەڭىرەگەن ءبىر ەردىڭ قاناتى شىعار. ايقاستا وققا ۇشىپ وماقاسا قۇلاپتى. يەسى قايدا، ونى كىم ءبىلسىن ايانىشتى-اق كورىنىس. الدەقاشان يەسىز قالعان اۋىل سۇرقىنا جۇرەگى سۋىنا نارتاي ءوز ۇيىنە كەلدى. بۇل ۇيدە دە تىرشىلىك بەلگىسى الدەقاشان جوعالعان. اڭساپ كۇتكەن عازيز انا جوق. نارتايدىڭ قۋانىشتى كوڭىلى قۇلازىپ سالا بەرەدى. نەتكەن مەيىرىمسىز ەدى تاعدىر. انادان قالعان ەسكەرتكىشتەي ءىلۋلى ۇرشىق كورىنەدى. قانداي ىستىق سول ءبىر تۇككە تۇرعىسىز دۇنيە. انانىڭ سەرىگى ەدى-اۋ ءبىر كەزدە بۇل ۇرشىق. سوندىقتان دا ول نارتاي ءۇشىن باعا جەتپەس قازىنا. نارتايدىڭ ۇمىتىندەي ءۇزىلىپ ول دا جەرگە ءتۇستى. ەندىگى جولى نە بولماق. وسى ءبىر شىنايى سۋرەتتەر كورۋشىنى تولقىتپاي قويمايدى. قانشا قايعى، قانشا قاسىرەت، قانشا پوەزيالىق سەرپىن، قانشا ءومىر جاتىر وسىنىڭ وزىندە. قاسىرەت قۇشاعىنداعى نارتاي بوسىپ كەتكەن ەل-جۇرتىن ارالاي جۇگىرىپ كەلەدى. الىستان كوڭىلدى مۋزىكا ەستىلەدى. سوعان بەت بۇردى. توي جاساپ جاتقان سارمولدا، دالا جىرتقىشى بۇلىنگەن ەلدەن جەمتىگىن تاۋىپتى. كۇشىگەندەي ءموليىپ مولداسى، بايعىزداي قاقساپ جىراۋى وتىر. بوسقان ەلدىڭ جۇرتىنىڭ سۇرقى اناۋ، كۇناكارلەردىڭ كوڭىلدى كۇيى مىناۋ، قانداي تاماشا كونتراست.
پاۆەل دا ۇيىنە جەتتى. مۇنى دا قارسى العان قۋانىش شامالى. باسپاناسىنان قۋىلعان، جابىققان جار، ناۋقاس بالا — ۇيدەگى ءومىردىڭ ءتۇرى وسى، ءازىم دە ارمانىنا جەتكەن ءتارىزدى. قازداي ءتىزىلىپ جەتى بالا جاتىر. ولاردىڭ قورعانى اشتىقتان قالجىراعان انا عانا. ءبارىن دە امان كوردى، ءازىم قۋانىشىندا شەك جوق. ول اشتىق، جالاڭاشتىقتى ويلايتىن ەمەس. باۋىرلارىن ءتىرى كورگەنىنە ءماز. ءجۇزى اتالىق شەكسىز مەيىرىمگە تولى، ءار بالاسىنىڭ بەتىنەن ءبىر ءسۇيىپ، ءبىر-بىر ءتۇيىر قانتتى الدارىنا قويىپ جاتىر. ەڭ سوڭعىسىنا جەتپەي قالدى. كەدەيلىك، قول قىسقا. كىشكەنتاي عانا دەتال كوپ سىردىڭ كۋاسى. مىنە، ءۇش سولداتتىڭ ورالعاننان كەيىنگى ءومىرى وسىلاي باستالادى. ءارقايسىسىنىڭ قايعىسى دا، قۋانىشى دا وزگەشە جاتىر. ەگەر پاۆەل ريەۆوليۋسيا جولىنا دايىندىقپەن توتە كەلسە، نارتايدىڭ بۇل جولدى تانۋىنا بارىپ ۇشتاسادى. «مەن ءۇشىن سوعىس بىتكەن جوق» دەگەن نارتاي ازىرشە ءوز باس قامىن ويلاسا، 16 جىلعى بولعان وقيعانى ەستىپ بارىپ «بۇل قورلىقتى كورگەنشە ولگەن ارتىق» مىناۋ قاڭىراعان ەلدىڭ جۇرتى ءۇشىن، جەتىمنىڭ كوز جاسى ءۇشىن، كۇناسىزدىڭ قانى ءۇشىن كەك الۋ كەرەك، حالىقتى كوتەرۋ كەرەك» دەگەنگە بەلدى بەكەم بۋادى.
ال ءازىم شە؟ ازىمگە ءازىر مۇنىڭ ءبارى جات. «اللانىڭ ارقاسىندا» بالالارى، ءۇي-ىشى امان بولسا بولدى، يتشىلەپ كۇن كورەر، اشتىق تا، جالاڭاشتىق تا، كەمشىلىك تە ءازىمنىڭ تۇسىنىگىنشە «قۇدايدىڭ ءىسى — كونۋ كەرەك». ولمەس قامدى وزىنشە بەس ۋاقىت نامازبەن دە تاپپاق. باقسا نامازدان نان تاۋىپ، قۇلشىلىق ەتۋدەن كيىم كيىپ جاتقان ءازىمنىڭ ءۇيى جوق. سوندا دا بولسا ءازىم قايتار ەمەس بەتىنەن. كۇن كورىستىڭ لاجىن كرەست جاساپ ساتقان بالاسىنا دا لاعنات ايتۋدان تانبايدى. مۇنداي «كۇنادان» ءوزىن ولتىرۋگە دە دايىن. وسى ءازىمنىڭ ويانۋىنىڭ ءوزى تاماشا ءبىر ستيحيادان تۋادى. نان ءۇشىن جۇگىرگەن بالانى ات تاپتاپ ءولتىردى. ونى وسى ولىمگە ايداعان كىم؟ كۇنى-تۇنى قۇلشىلىق ەتكەن ءازىمدى اشتان قاتىرىپ، جىلقىعا نان جەگىزىپ قويعان قۇدايدىڭ ءوزى دە قۇدايدان بەزگەن ەكەن. ءازىم كەگى وسىلاي كەش تۋادى.
فيلمدەگى نەگىزگى جۇكتى الىپ جۇرەتىن ءۇش جاعىمدى كەيىپكەردىڭ بەينەسى وسىنداي كۇردەلى پسيحولوگيالىق كۇيزەلىستەر مەن قيان-كەسكى قايشىلىقتاردىڭ ۇستىندە شىڭدالىپ بارىپ مۇراتىنا جەتەدى.
«ءبىز جەتىسۋدانبىزداعى» ۇلكەن ءبىر وزەكتى يدەيا حالىقتار دوستىعى. حالىقتار دوستىعى كورشى وتىرۋدان، ءدىني سەنىمنىڭ بىرلىگىنەن نەمەسە ۇران، ۇگىتتىڭ قۋاتىنان ەمەس، ەڭ الدىمەن تاعدىر مەن تالاننىڭ بىرلىگىنەن تۋاتىندىعى دالەلدەنەدى. ءۇش سولداتتى دا قول ۇستاتىپ، دوس ەتكەن، شابۋىلدا دا، شەگىنىستە دە ءبىر جۇرگەن ورىس، قازاق، ۋكراين، ۇيعىرلاردىڭ بىلەگىن بىرىكتىرگەن، جۇرەگىن ۇعىندىرعان مۇددە، ماقساتتىڭ، تاعدىر-تالاننىڭ بىرلىگى. شىنايى دوستىقتىڭ تۋۋىنىڭ سەبەپتەرى دە مىنە وسى.
ءفيلمنىڭ باستان-اياق قۇرىلىسى، ۇلكەن ريەۆوليۋسيالىق سەرپىنگە تولى. تاريحي شىندىقتىڭ كوپ كورىنىسىن، فيلم رەجيسسەرلارى بۇگىنگى سۋرەتكەردىڭ ويشىل كوزىنەن وتكىزىپ، مازمۇن جاعىنان بايىتا تۇسكەندىگى بايقالادى. ريەۆوليۋسيا تەك قانا قانتوگىسپەن بولمايدى، وندا حالىق تەگەۋىرىنى باستى قۋات دەگەن قاعيدانى ۇستانعان سۋرەتكەرلەر، بىزگە حالىق قايراتىنىڭ تاماشا ۇلگىسىن ۇسىندى.
وسى فيلمدە بارىنەن وقشاۋ، سوم، بەرىك جاسالعان وبراز — حالىق وبرازى. ءفيلمنىڭ ءون بويىندا حالىق بەينەسى، حالىقتىڭ كوڭىل-كۇيى، اشۋ-ىزاسى، سۇيىنىش-كۇيىنىشى ءبىرىنشى پلاندا كورىنەدى. ريەۆوليۋسيالىق تاقىرىپقا ارنالعان فيلمدەردىڭ العاشقىلارىندا كورىنە باستاعان حالىق بەينەسى جاسىراتىنى جوق كەيىنگى جيىرما جىلدىڭ ىشىندە كورىنبەي كەتىپ ەدى. وسى فيلمدەگى شەبەر جاسالعان حالىق وبرازى بۇكىل سوۆەت كينەماتوگرافياسىنىڭ بۇگىنگى تاڭداعى تابىسى دەسەك اسىرا باعالاعاندىق بولماس ەدى. ارسەنالعا لاپ قويعان حالىق كورىنىسى مەن شەگىنگەن حالىق كورىنىسىن الىڭىزشى. شەگىنىستىڭ ءوزى ۇلكەن قامالداي شەكسىز كۇش-قۋاتتى بايقاتپاي ما؟ ءقايسىبىر كادردى الماڭىز حالىق ارالاسقان كورىنىستەر تۇگەلدەي ءمىنسىز دەۋگە بولادى. سوندىقتان دا بولۋ كەرەك، ادەتتە وقشاۋ كورىنەتىن جاۋ جاعىنىڭ وكىلدەرى كولەڭكەلەپ قالعان. ونى كەمشىلىك دەپ ساناۋعا بولمايدى قايتا ۇلكەن جەتىستىك. ويتكەنى ريەۆوليۋسيانىڭ بار قۋاتىن قولىنا العان حالىقتىڭ ۇستەم كۇشىنىڭ الدىندا ازعانا شۇبار توپتىڭ قانشا جانتالاسقانمەن ءحالى بەلگىلى. ال نەگىزگى ءۇش كەيىپكەردىڭ بەينەسى دارالانىپ كورىنسە دە، ولاردىڭ حالىقپەن تىعىز بايلانىسى بار شىندىعىمەن تانىلادى. ولار حالىقسىز قاناتسىز قۇسپەن تەڭ. وقيعانىڭ جەلىسى وسىنى اڭعارتادى.
شىتىرمان وقيعانى شەبەر قيىستىرۋدا فيلم رەجيسسەرلارىنىڭ ۇلكەن مادەنيەتى مەن كينەماتوگرافيانىڭ «ءتىلىن» يگەرۋدەگى مول مۇمكىنشىلىكتەرىن اتاماسقا بولمايدى. ءبىز بۇل فيلمدە كينونىڭ تىلىمەن كوپ ويدى، پوەزيالىق سەرپىندى، ادام جانىنىڭ تىلسىم سىرلارىن بەرۋگە ەركىندىك بار ەكەنىن اڭعاردىق. ونىڭ سىرى ادامنىڭ جان داۋىلىن ءسوزسىز ارەكەت، قيمىل سۋرەتتەرمەن بەرىلۋىندە. مىسالى، ادام بالاسىنداعى پاك سەزىمنىڭ ءبىرى با-لاعا دەگەن ماحاببات بولسا، ءازىمنىڭ ۇيىنە كەلگەندەگى كورىنىستى الىڭىزشى. ءبىر اۋىز ءسوز جوق، ءار بالاسىن ءبىر ءسۇيىپ مەيىرلەنگەن اتا جۇزىندەگى ەكى-ۇش مينۋتقا سوزىلعان قۇبىلىستا قانشاما وقيعا، جان كۇيزەلىستەرى جاتىر.
ەگەر ءازىم بالالارىن وياتىپ الىپ، ارقايسىسىمەن سويلەسە باستاسا ازان-قازان شۋدان باسقا ەشنارسە بولماس ەدى. ال مىنا كورىنىستە ءتىل جەتكىزە المايتىن قانشاما سەزىم كۇيلەرى وينايدى. نەمەسە رايحان مەن نارتايدى قۋىپ كەلە جاتقان كورىنىسىن الىڭىز.
ماحاببات كۇشى قانداي ءتىلسىز بەرىلگەن. رايحان مەن نارتايدىڭ جان داۋىلى تەك ارەكەت، قيمىل قۇبىلىسپەن بەرىلەدى. شي ارالاپ، جان ۇشىرىپ كەلە جاتقان عاشىق، پەن جارالى جاننىڭ كوڭىل كۇيى كىمگە تۇسىنىكسىز. وسى كورىنىستەردىڭ ءوزىن كەرگەندە ماحاببات سيمفونياسىن تىڭداعانداي بولاسىز. دەمەك، كينو تەحنيكاسى قيمىل سۋرەتتەرمەن دە، ادام جانىن شەشەن سويلەتە بىلەدى. بۇل جاعىن مەڭگەرۋ جاس رەجيسسەرلەردىڭ تابىسى. ەكىنشى ءبىر شەبەرلىك-پارالەلنەي مونتاجدا جاتىر. كەسەك-كەسەك وقيعالاردى كونتراسقا قۇرىپ، قايتادان اپارىپ وبوبششەنيە جاساپ وتىرۋ دا ۇلكەن ونەردەن تۋسا كەرەك. فيلم كوركەمدىگىنە كوپ ەڭبەگى سىڭگەن وپەراتور تىنىشبايەۆتىڭ جەتىسۋ تابيعاتىن تۇسىرۋدەگى پوەزيالىق سەزىم كۇيىنە تولى سۇلۋ كورىنىستەرى تالانت يەسىنىڭ شابىتتى ەڭبەگىنىڭ جەمىسى. ساتىنە ساي ءار ەپيزود ءوز سان-سالتاناتىمەن كورىنەدى. باس وپەراتور تىنىشبايەۆتىڭ تابيعات اسەمدىگىن تۇسىنۋدەگى تاماشا تالعامىن، ىزدەنگىش سۋرەتكەر ەكەندىگىن وسى ءفيلمنىڭ ءوزى دالەلدەپ وتىر. ءفيلمدى كوركەمدەگەن باس سۋرەتشى قۇلاحمەت قوجىقوۆتىڭ دا ەڭبەگى ءبىر توبە. بوسقىن ەلدىڭ جۇرتى، توي جابدىقتارىنداعى ۇلتتىق كيىم-كەشەك ءۇي جاساۋلارىنداعى دەتالدار ءبارى ءداۋىر شىندىعىمەن قابىسىپ جاتىر.
ال، جەكە ورىنداۋشىلارعا كەلسەك، ەڭ الدىمەن ءازىم وبرازىن جاساعان ءا. شامييەۆتىڭ تالانتى جان-جاقتى ەكەندىگى وسى جولى مول كورىنىس بەردى. اكتەردىڭ ءاربىر قيمىلىنىڭ ءوزى ءسوزدىڭ شىندىعىمەن قابىسىپ جاتادى دا، كوپ جەردە جان جۇيەڭدى بيلەپ كەتەتىن عاجايىپ پسيحولوگيالىق تولعانىستارمەن ءازىم باسىنداعى شىتىرمان قايشىلىقتاردى شەگىنە جەتكىزە باياندايدى. فاناتيك ءازىمنىڭ ريەۆوليۋسيا جولىنا، ستيحيالىق جولمەن كەلۋىندە ەشقانداي اقاۋ جوق.
ك. قوجابەكوۆتىڭ نارتايى دا جاس اكتەردىڭ جاقسى مەڭگەرگەن وبرازى. نارتايدىڭ قايسار ءبىر بەتتىلىگى وتە نانىمدى شىعادى. سارمولدا — ق. جانداربەكوۆ، پاۆەل ر. كارنوۆيچ — ۆولۋا، الەكساندر كوزيروۆ، ب. وحرامەيەۆ وبرازدارى دا ءساتتى ەڭبەكتىڭ ناتيجەسى. ريەۆوليۋسيا مەحانيگى اتالاتىن لوسوۆ، تالانتتى ءارتيسىمىز ن. ءجانتۋريننىڭ ورىنداۋىندا جان دۇنيەسى جاساندىلاۋ، قوراش شىقتى. رايحان رولىندەگى ب. ناشاربەكوۆا، كەلەشەك ءۇمىت كۇتتىرەتىن، تاربيەلەي تۇسسە، بۇل سالادا جەمىستى ەڭبەك ەتەتىن اكتريسا. ات ايداۋشى وتەپ — ك. الدوڭعاروۆتىڭ ورىنداۋىندا تىم ءتاۋىر، وزىندىك حاراكتەرى بار كەيىپكەر. شىعارمانىڭ كوركەمدىك قۋاتىن ارلەندىرە تۇسەتىن. س. مۇقامەتجانوۆ پەن ن. كرۋكوۆتىڭ مۋزىكاسى. كومپوزيتورلار ءفيلمنىڭ رۋحىنا ساي كۇيلى ءتىل تاپقان.
البەتتە، قۋانىپ وتىرعان ۇلكەن ەڭبەگىمىزدە دە اقاۋلى جەرلەر جوق ەمەس. ءبىز ونىڭ باستى كۇناكارى سەناريستەر دەر ەدىك. سەناريانىڭ بۇرىن بىزگە تانىس نۇسقاسىندا بۇگىنگى كورگەن ءفيلمنىڭ ەمىس-ەمىس ءىزى عانا بولاتىن. ۇڭىلە قاراساق رەجيسسەرلار قانشا كۇش سالعانمەن سەنارييدىڭ، سول جورگەگىندە پايدا بولعان ۇلكەن ناۋقاسى، سوقتالى تارتىستىڭ بوساڭدىعى كەيدە ءبىلىنىپ قالادى. ءبىراق رەجيسسەرلاردىڭ شەبەرلىگىنىڭ ارقاسىندا ۇلكەن وقيعا دۇرمەگىندە حالىق وبرازىنىڭ جاسالۋى سەنارييدىڭ وسى ءبىر كەمشىلىگىن جەڭىلدەتىپ وتىرعان ءتارىزدى. ەكىنشى رايحان مەن سارمولدانىڭ ۇيلەنۋ تويىن وقيعانىڭ اياعىنا دەيىن سوزۋدا رەجيسسەرلاردىڭ ماقساتى سارمولدانىڭ زىمياندىعىن كورسەتۋ بولسا، بۇل اقتالماي قالعان. ارينە بۇل ايتىلعاندار ۇلكەن شىعارمانىڭ قۇنىن تۇسىرە المايدى. ونىڭ ۇستىنە بۇل ءفيلمنىڭ نەگىزگى جاساۋشىلارى ۇلت كادرلارى ەكەندىگىن ايتساق، قازاقستاندا سوۆەت وكىمەتىن ورناتقان بولشيەۆيك پارتياسىنا، ءبىزدى وسىنداي دارەجەگە جەتكىزگەن ۇلى لەنيننىڭ ۇلت ساياساتىنا، كۇندەلىكتى قامقورشىمىز كوممۋنيستىك پارتياعا دەگەن سۇيىسپەنشىلىك ارتا تۇسەدى.
تابىستى ەڭبەكتىڭ تۇسىندا تۋعان ءبىر پىكىردى ايتا كەتكىمىز كەلەدى. ول ستۋديانىڭ اتى جايىندا. الماتى كينوستۋدياسى دەگەن ءسوز — كەڭ-بايتاق رەسپۋبليكانىڭ بۇگىنگى تاڭداعى الاتىن ورنىنا ساي كەلمەيدى، ۇعىم جاعىنان شەڭبەرى تار جانە بىزدەگى ءتاۋىر دەگەن شىعارمالار شەت ەلدەرگە دە كورىنىپ جۇرگەنى ءمالىم. كەيبىر رەسپۋبليكالار ءوزىنىڭ كينوستۋديالارىنا ات قويعانى سياقتى ءبىز دە الماتى كينوستۋدياسىن «قازاحفيلم» دەپ اتاساق ۇعىم جاعىنان دا، مىندەت، ماقسات جاعىنان دا ءتيىمدى بولار ەدى.
1959
You Might Also Like
-
قازاق دراماتۋرگياسى تاريحي-ريەۆوليۋسيالىق تاقىرىپقا ونشا باي ەمەس. باي بولماعاندا سول ءداۋىردىڭ ءار كەزەڭىنەن قىلاڭ بەرەتىن شىعارمالاردىڭ باسى بارشىلىق. ءبىراق كوپشىلىگى جالپى جوباسى، العان باعىتى، ايتا...
-
«قازاقفيلم» كينوستۋدياسى «قىز جىبەككە» كەلگەنشە تالاي تاريحي تاقىرىپتىڭ باسىن شالدى. كينوتاريحىن زەرتتەۋشىلەردىڭ تۇجىرىمى بويىنشا «امانكەلدى» مەن «شوقان ۋ...
