InfoHub Logo

بالالاردىڭ جازدا كوڭىلدى دەم الۋى ءۇشىن، ولاردىڭ كەلەسى وقۋ جىلىنا تىڭ، جاڭا كۇشپەن كەلىپ كىرىسۋىنە ۇلكەن جاعداي جاسالىپ، بالالار ءۇشىن اۋاسى كەڭ، ورمان-توعايلارى جاقسى جەرلەردەن كوركەم لاگەرلەر اشىلدى. مەكتەپ بالالارى سول لاگەرلەردە دەم الادى.

بالالار! ارينە، بۇل سەندەرگە ىستەلىپ وتىرعان ۇلكەن قامقورلىق، ۇلكەن جاعداي. سوندىقتان سىزدەر مادەنيەتتى دەم الۋعا تىرىسىڭىزدار!

دەمالىستى كۇنى-تۇنى ۇيىقتاۋ، بولماسا كۇنى-تۇنى ويناۋ دەپ تۇسىنبەۋ كەرەك... رەتىمەن ويناپ، رەتىمەن ۇيىقتاۋ كەرەك. سونىمەن كاتار ءاربىر قىزىقتى، كەرەكتى نارسەلەرمەن دە شۇعىلدانعان ءجون.

ارينە، سەندەر ويىندى وتە جاقسى كورەسىڭدەر. اركىم، دە سىزدەردىڭ جاستارىڭىزدا، سىزدەردەي ۋاقىتتارىندا ويناۋدى وتە جاقسى كورەدى. ءبىراق ويىندا دا، ىستە دە ۋاقىتتى دۇرىس پايدالانۋ كەرەك. ال نەلەر اقىل يەلەرى: كوسەمدەردىڭ، اقىن-جازۋشىلاردىڭ، پروفەسسور، اكادەميكتەردىڭ، اتاقتى ۇشقىشتاردىڭ ءومىرىن، بالالىق شاعىن الساڭىزدار وتە قىزىق. ولار بالا شاعىنان ءبىر نارسەنى بىلۋگە، ۇيرەنۋگە اۋەس بولعان، ولار ادەبي كىتاپتاردى قىزىعا وقيتىن بولعان.

مىسالى، گۋمانيست جازۋشى ماكسيم گوركيي بالا شاعىندا كىتاپتى سونداي سۇيگەن، ول كىتاپ تالعاماي قولىنا تۇسكەنىنىڭ ءبارىن وقيتىن بولعان. ول جاستايىنان كىتاپتى ەڭ جاقىن دوس، ەن جاقىن جولداس ەتتى.

مىنەكي، وسىنداي ۇلى ادامداردىڭ بالالىق شاعىندا ىستەگەن ىستەرىن ونەگە ەتىپ وزدەرىڭىز سولارشا تاربيەلەنۋگە ۇمتىلعاندارىڭىز دۇرىس. ادەبيەت كىتابىن ۇزبەي كەپ وقىعاندارىڭىز ءجون.

سىزدەر قىس بويى وقىدىڭىزدار، مەكتەپتەرىڭىزدە ادەبيەت ۇيىرمەلەرى بولدى. سىزدەر وندا ۇيىمداسىپ جۇمىس ىستەدىڭىزدەر.

ەندى جاز لاگەرلەردە دە سىزدەر ادەبيەت ۇيىرمەسىن ۇيىمداستىرىڭىزدار. لاگەردەگى ادەبيەت ۇيىرمەسى وتە قولايلى، وتە كوڭىلدى بولادى. ويتكەنى سىزدەر ادەبيەت كىتاپتارىن وقيسىزدار. وزدەرىڭىز ولەڭ، اڭگىمە جازاسىزدار. سولاردى نۋ ورماندارداعى، اياققا جىبەكشە ورالىپ جاتقان كوكوراي شالعىن ۇستىندە وتىرىپ تالقىلاساڭىزدار، قانداي تاماشا!

لاگەردە ىلعي مەكتەپ وقۋشىلارى ءبىرىڭعاي بولىڭىزدار. سىزدەر ۇيىرمەنى مەكتەپتەگىدەي لاگەردە دە ۇيىمداستىرۋلارىڭىزعا بولادى. ۇيىرمە جۇمىسىن كوركەم جازعا، دەمالىسقا ارناڭىزدار. جاسىل ورماننىڭ سىرت كورىنىسىن، ونىڭ حوش ءيىسىن، ونداعى سايرايتىن ءانشى قۇستاردى سۋرەتتەڭىزدەر. مىنە، جاز لاگەردە وسىلاردى كوزبەن كورىپ، ەركىن وتىرىپ، ءبىراز جاسايسىزدار. جانە وعان تولىق مۇمكىنشىلىك بار.

سوندىقتان لاگەردە ادەبيەت ۇيىرمەسىن ۇيىمداستىرىپ وقىعان كىتاپتارىڭىزدى تالقىلاڭىزدار. جازعان ولەڭ، اڭگىمەلەرىڭىزدى ۇيىرمەدە تەكسەرىپ، جاقسىلارىن رەداكسياعا جىبەرىپ تۇرىڭىزدار.

دەمالىس ۋاقىتىندا، لاگەردە بولسىن، باسقا جەردە بولسىن ادەبيەتپەن شۇعىلدانۋ مەيلىنشە قاجەت، قىزىق كىتاپتاردى وقۋ ۇلكەن پايدالى نارسە.

ادەبيەت كىتابىن وقىعاننان شارشاپ دەم الا الماي قالام دەپ تۇسىنبەۋ كەرەك. ادەبيەت كىتاپتارىن تەسەلە وقۋ كەرەك، ءسۇيىپ وقۋ كەرەك. وزدەرىڭىزگە كەرەكتى كىتاپتاردى تاڭداپ الا ءبىلۋ كەرەك.

سىزدەر وقىعان كىتاپتارىڭىزدىڭ ىشىندە ۇناتقان گەرويلاردىڭ وبرازدارىن جازدىگۇنى لاگەردە، مەكتەپتە ۇيىمداسقان ۇيىرمەلەرىڭىزدىڭ جۇمىستارىن جانە سول ۇيىرمەدە تالقىلانعان، وزدەرىڭىز ۇناتقان جاقسى ولەڭ، اڭگىمەلەرىڭىزدى رەداكسياعا جىبەرىپ وتىرۋلارىڭىزعا بولادى.

---