سوڭعى جاڭارتۋ

(وزگەرتىلگەن ۋاقىتى 11 ساعات بۇرىن)
جەڭىسكە جەتۋىڭە تىلەكتەسپىز

(قازاق جانە ۇيعىر قىزدارى بەرىكبالا، حاسيەت جانە ابيدانىڭ جولداعان حاتىنان ءۇزىندى)

جاس جاۋىنگەر باۋبەككە!

ءسىزدىڭ «مەنىڭ ءومىر سۇرگىم كەلەدى» اتتى ماقالاڭىزدى باس قوسىپ شىن ىنتامىزبەن وقىدىق. سودان كەيىن دوستارىم حاسيەت پەن ابيدانىڭ ۇسىنىسىمەن وسى حاتتى جازىپ وتىرمىن. بىزدەر الماتى وبلىسىنىڭ ەڭبەكشىقازاق اۋدانىنداعى اۋىسپالى قىزىل تۋ العان «وكتيابر» كولحوزى جانىنداعى جاڭاشا ورتا مەكتەبىندە وقىتۋشى بولىپ ىستەيمىز.

ءسىزدىڭ «مەنىڭ ءومىر سۇرگىم كەلەدى» دەگەن تىلەگىڭىزگە دۇنيە جۇزىندەگى پروگرەسشىل - ادام بالاسىنىڭ ءبارى ورتاق. ونىڭ ىشىندە وكتيابر ريەۆوليۋسياسىنان كەيىن تۋعان، جاڭا

دۇنيە قۇرىپ، باقىتتى تۇرمىسقا اياق باسقان سوۆەت ەلىنىڭ ميلليونداعان جاس ۇرپاقتارى ورتاق. ءبىز دە سول جاستارمىز، ءبىز باقىتتىمىز. ءسىزدىڭ جانناڭىز سياقتى ءبىز دە قازاق حالقىنىڭ جاس جاۋىنگەرلەرىنىڭ سۇيگەن جارىمىز.

وزىڭدەي جاس دوستارىمىز مايداندا، ءبىراق ءدال ءقازىر ولاردان ەش حابار جوق. ءبىز ولاردى ساعىنامىز، كۇتىپ تە وتىرمىز، امان-ەسەن كايتىپ ورالادى دەگەن ۇلكەن ءۇمىتىمىز دە بار.

كەي ۋاقىتتا تەرەڭ ويعا باتىپ كەتەمىز. «سۋىق حابار» كەلىپ قالا ما دەپ تە ەرىكسىز ويعا تۇسەمىز. ويدى اقىلعا جەڭگىزەتىن بولساق، ولاردىڭ دۇنيە جۇزىندەگى ادام بالاسىنىڭ قاس دۇشپانى — جىرتقىش فاشيستەردى جەڭىپ كەلۋلەرىن، جەڭبەي قايتپاۋلارىن تىلەيمىز. ءبىز دە ءسىز سياقتى جاسپىز. ءبىز دە ءومىر ۇلەسىن تولىق العانىمىز جوق. ءومىر ۇلەسىمىزدىڭ ءبىرى — سۇيگەنىمىز بولسا، بۇلار ءسىز سياقتى قان مايداندا وزدەرىنىن، تۋعان ەلىن جاۋدان قورعاۋدا. ءومىر ۇلەسىنىڭ ەڭ ۇلكەن تۋعان ەلىنە — قوعامعا ەڭبەك ءسىڭىرۋ بولسا، ءبىز ءالى ايتارلىقتاي ەڭبەك سىڭىرگەن جوقپىز. سەبەبى ءبىز جاڭا عانا سوۆەت مەكتەبىن ءبىتىرىپ، ومىرگە جاڭا اياق باسقان، بولاشاقتا ۇلى باقىتتى كەزدەگەن جاستارمىز.

دوسىمىز، قۇرداسىمىز، باۋبەك!

وسى حاتتى جازىپ وتىرعاندا كولحوزشىلاردىڭ جالپى جينالىسى بولىپ، وندا پرەدسەداتەلىمىز بىلاي دەدى:

«ءبىزدىڭ كولحوز ۇكىمەتكە استىق قۇيۋ جوسپارىن تولىق ورىنداپ شىقتى. تاپسىرمادان تىس 900 سەنتنەر ءدان بەردىك، كەرەك بولسا مايدان ءۇشىن، ءوزىمىزدىڭ باقىتىمىز ءۇشىن تاعى دا بەرەمىز!»

ءبۇل ءسوز ءبىزدى شەكسىز ۇمىتكە بولەدى. سەبەبى: كەڭ بايتاق سوۆەت ەلىندە ميلليونداعان توننا استىق شىعادى، جەر قايىسقان مال وسۋدە، جەر-انامىزدان جۇمىسشىلاردىڭ قۇرىش بولات قايلالارى تەمىر، كومىر، التىن، مىس، قورعاسىندى مىڭ باتپانداپ شىعارىپ، مۇنايدى دارياداي اعىتۋدا. مىنە، مۇنىڭ ءبارى مايدان ءۇشىن، ءبارى بولاشاق، باقىتىمىز ءۇشىن جاسالىپ جاتقانى انىق.

ءبىز، وقىتۋشىلار، جاس جەتكىنشەكتەردى جاۋدان قايتپايتىن قاھارمان ەتىپ تاربيەلەۋگە تۋعان ەل الدىندا انت ەتەمىز.

«ءبارى جاۋدى جەڭۋگە، ءبارى مايدان ءۇشىن» دەگەن ۇران جالپى ەلىمىزدىڭ ۇرانى. ءبۇل ۇران مايدانداعى جاۋىنگەرلەرىمىزدى جەڭىسكە، فاشيستەردى قۇرتۋعا باستايدى. ءسىزدىڭ جاۋدى جەڭىپ، كوممۋنيستىك پارتيادان العىس الىپ، ءومىر سۇرە بەرۋىڭىزگە تىلەكتەسپىز. جاننا دوسىڭىزدى تاۋىپ باقىتتى تۇرمىسقا جەتۋىڭىزگە تىلەكتەستىك ءبىلدىرىن، وسى حاتتى جولداۋشى بەرىكبالا مۇسايەۆا.


You Might Also Like

جاڭالىقتار

جارناما