بۇلدىرگەن تەرە بارعاندا
ءبىزدىڭ جاقتا بۇلدىرگەن ادىردا بولادى. جارتاستاردىڭ استىنا ياكي بۇلاق بويىنا شىعادى. جىلدا بۇلدىرگەن پىسكەندە ادىرعا ادەيى اتپەن كەلىپ، بۇلدىرگەن تەرىپ قايتاتىنبىز.
بۇگىن دە بۇلدىرگەننىڭ قالىڭ شىعاتىن جەرىنە كەلسەك، قارا قوشقىل بوپ ءپىسىپ، تۇنىپ تۇر ەكەن. جانىمدا وزىممەن بىرگە وقيتىن راقتاي دەگەن جولداسىم بار. ەكەۋمىز:
— وپىراي، قالىڭىن-اي!
— بىجىناپ تۇر عوي، تەگى، — دەپ تاڭدانىسىپ، اتتان اسىعىپ-ۇسىگىپ قۇلاي ءتۇسىپ جاتتىق.
سول ەكى ارادا قالىڭ بۇلدىرگەننىڭ ارعى شەتىنەن ءبىر ەلىك كورىندى.
— ەلىك، ەلىك، — دەپ ايقاي سالدىق. ءسويتىپ ءماز بوپ تۇرعاندا، ىلە-شالا ءدال الگى جەردەن ەلىكتىڭ لاعى اتىپ شىققانى. جۇگىرىڭكىرەپ بارىپ، كوپ ۇزاماي-اق قالىڭ ءشوپتىڭ اراسىنا قويىپ كەتتى. بەس-التى مەتر جەردىڭ ءشوبى قيمىلداپ بارىپ تىنا قالدى. ەكەۋىمىز ءبىر ءسات اڭقيىپ تۇرىپ قالدىق تا، اتتاردى تاستاي سالىپ، جۇگىرىپ سول جەرگە كەلدىك. راقتاي ەلىكتىڭ لاعىن العاشقى كورگەن جەردەن ىزدەي باستادى. مەن جۇگىرىپ، ءشوپ قيمىلىنىڭ توقتاعان جەرىنە كەلسەم، ەلىكتىڭ لاعى جەرمەن-جەكسەن بولىپ، قۇلاعىن جىمقىرىپ بۇك ءتۇسىپ جاتىر. باس سالىپ ۇستاي الدىم. ەلىكتىڭ لاعى ايانىشتى داۋىسپەن باقىرىپ جىبەردى.
راقتايعا قاراپ ەدىم، ءوزى تابا الماي قالعانىنا وكىنگەندەي بوپ تۇر. سونى ءبىلدىم دە، لاقتى وعان ۇستاتا سالدىم.
— ءما، سەن-اق ۇستا. ەكەۋمىز بىرىگىپ اسىرايمىز.
راقتاي مەنىڭ قولىمنان الا بەرگەندە، ەلىكتىڭ بالاسى تاعى باقىردى. وسى داۋىستى ەستىدى بىلەم، ەنەسى شىعا كەلدى. بىزگە قاراي جاسقانباي سالىپ كەلەدى. شابۋىل جاسار ما ەكەن دەپ شوشىپ قالدىق. «ايتاق، ايتاق، ايت!» دەپ، جوق ءيتتى كومەككە شاقىرىپ، وتىرىك كۇشەيدىك، باقىراۋىن قويمادى. ءبىز قانشا ايقالاساق تا، ەلىك ۇزامادى. بالاسىمەن بىرگە ولمەك ءتۇرى بار. بارعان سايىن بىزگە جاقىنداي بەرەدى. بىرەسە بالامدى جىبەرىڭدەرشى دەپ جالىنا سۇراعانداي تىنشي قالادى، بىرەسە تاعاتسىزدانىپ، اشۋلانعانداي ءبىر ورىندا تىپىرشيدى. ءبىر رەت ءتىپتى جاقىن كەلدى. مولدىرەگەن تاناداي قارا كوزدەرىنەن جاس تامشىلارىن كورىپ قالعاڭداي بولدىم.
— بەيشارا، جىلاپ تۇر ەكەن، — دەدى راقتاي جۇلىپ العانداي. ول دا بايقاپ قالعان ەكەن.
— جىبەرسەك، جىبەرەيىك.
ەلىكتىڭ بالاسىنا قانشاما قىزىعىپ قاراعانىمىزبەن، قيماعانىمىزبەن، اناسىن اياپ كەتتىك تە، بوساتىپ جىبەردىك.
ەكەۋى شۇبىرعان كۇيى كەزەڭگە شىقتى. «بالالار، سەندەرگە راحمەت» دەگەندەي بىزگە قاراپ ءسال تۇردى دا، قىردان اسىپ كەتە باردى.
You Might Also Like
-
ەرجىگىت بۇگىن ءتۇس كوردى. تۇسىندە قيىن ءىس كوردى: مەكتەپتەن جالعىز قايتتى. ۇيگە كىردى. تىم-تىرىس. ءتىرى جاننىڭ بار-جوعى بىلىنبەيدى. قورقايىن دەدى. كۇندە ساباقتان الىپ قايتاتىن اجەسى بۇگىن بارمادى. نە ...
