InfoHub Logo

–    وسكەندە Google كومپانياسىندا جۇمىس ىستەگىم كەلەدى. اقپاراتتىق تەحنولوگيانى جاقسىلاپ مەڭگەرىپ، كوپ اقشا تابامىن. ايلىعىم جوعارى بولعاسىن وتباسىما قالاعان زاتىن الىپ بەرەمىن. ءبىراق ۇنەمدەۋ كەرەك. وتباسى بيۋدجەتىن دۇرىس باسقارسام عانا شىعىننان كىرىس كوپ بولادى.

–    مەن بولسام، الداعى ۋاقىتتا دەپوزيتكە اقشا سالامىن. بانك وعان اقشا سالعانىم ءۇشىن سىيلىق رەتىندە ماعان قوسىمشا اقشا بەرەدى. سول جينالعان قاراجاتقا Disneyland-كە بارىپ، قىدىرار ەدىم.

–    اتا-انام كۇن سايىن 200 تەڭگە بەرەدى. ول اقشاعا ءبالىش پەن سۋسىن الامىن. كەيدە تاماق ىشكىم كەلمەي، اقشا جينايمىن. ۇيدە اقشا سالاتىن قوراپشام بار. ارتىلعانىن سوعان سالامىن. وسىلايشا اناما 8 ناۋرىزعا گۇل الدىم.

سەنسەڭىز، بۇل – مەكتەپ وقۋشىلارىنىڭ ديالوگى. ءسىرا، قانداي ساۋاتتى دەرسىز. بۇرىن بالانى اقشاعا جولاتپايتىن بولساق، بۇگىندە زاماننىڭ تالابى وسىنداي. اياق اتتاساڭ – اقشا دەيتىن كەزەڭگە قادام باستىق. سوندىقتان بالالاردىڭ قارجى تۋرالى ساۋاتىن ارتتىرۋ كەرەك. وسى ماقساتتا بانك حوۋم كرەديت 2014 جىلدان باستاپ باستاۋىش، ورتا جانە جوعارى سىنىپ وقۋشىلارىنا قارجى ساۋاتى جايلى اۋقىمدى باعدارلاما ۇسىنعان ەدى. ماقساتى – حالىقتىڭ ەكونوميكالىق جانە الەۋمەتتىك ساۋاتىن ارتتىرۋعا، قارىزعا ءتۇسۋ ءقاۋپىن تومەندەتۋگە، تۇراقتى قاراجات كوزدەرىن دامىتۋعا جانە جالپى ەكونوميكالىق ءال-اۋقاتتى كوتەرۋ. وسىلايشا، قازاقستاننىڭ 18 وڭىرىندەگى بانكتىڭ بارلىق بولىمشەلەرىندە قارجىلىق ساۋاتتىلىق بويىنشا تەگىن سەمينارلار مەن اشىق كۇندەر ۇيىمداستىرىلدى.

سونىمەن بىرگە بانك حوۋم كرەديت – Global Money Week حالىقارالىق قوزعالىسىن قولدايتىن ەكىنشى دەڭگەيلى بىرەگەي بانك. وسى ىنتىماقتاستىق اياسىندا بانك قازاقستاننىڭ بارلىق ايماقتارىندا بەسىنشى رەت Global Money Weekء-تى GMW-2018 وتكىزدى. سونىمەن بىرگە وسىعان دەيىن Global Money Week قاتىسۋشىلارى سەمينارلارعا بانكتىڭ شاقىرۋىمەن قاتىسقان بولسا، ەندىگىدە ءبىلىم بەرۋ مەكەمەلەرىنىڭ تاراپىنان ۇلكەن قىزىعۋشىلىق تۋىپ وتىر. دەمەك، سەڭ قوزعالىپ كەلەدى دەگەن ءسوز. سوڭعى جىلدارى «قاراجات الەمىنە ساياحات» باعدارلاماسىنا 10 مىڭنان استام ادام بالا قاتىسقان.

Global Money Week شەڭبەرىندە كۇنى كەشە 14 مامىر كۇنى س.بەگالين اتىنداعى مەملەكەتتىك بالالار كىتاپحاناسىندا بانك قىزمەتكەرلەرى مەن قارجى ساۋاتى جايلى ترەنينگ جۇرگىزۋشى ماماندار مەكتەپ وقۋشىلارىنا قارجى الەمىنە ساياحات جاسادى. ورىس جانە قازاق مەكتەپتەرىنىڭ وقۋشىلارى اقشانىڭ شىعۋ توركىنى جايلى اقپاراتتان باستاپ، بيۋدجەت، كىرىس، شىعىن، جالاقى، حالىقارالىق ۆاليۋتالار جانە وسى سىندى وزگە دە ماڭىزدى قارجى تاقىرىبىنداعى تەرميندەرمەن تانىستى. شارا بارىسىندا بالالار ترەنەردى تىڭداپ قانا قويماي، ءوز ويلارىن دا اشىق ءبىلدىردى. ءبىر قىزىعى، ۆاليۋتالار تۋرالى كوپشىلىك جاقسى بىلەدى ەكەن. امەريكا دوللارى، جۇڭگو يۋانى، تايلاند باتى، رەسەي ءرۋبلىن سۋرەتىنەن-اق تانىدى. بيۋدجەت جوسپارلاۋدىڭ ماڭىزىن وسى ترەنينگتەن كەيىن بالالار تىپتەن جاقسى تۇسىنگەن سىڭايلى. ويتكەنى كۋرستان شىققان بالالاردىڭ جۇزىندە جاڭا جوسپار، ماقسات پەن ارماننىڭ ءىزى كورىنگەندەي. بيزنەس باستاپ، تابىس تاپقان تانىمال تۇلعالاردىڭ بەينەسىن دە كوپشىلىك جازباي تانىدى. ستيۆ دجوبس، دجوان روۋلينگ، بيلل گەيتس جانە ت.ب شارا قاتىسۋشىلارىنا مول موتيۆاسيا سىيلادى.

«اتالعان شارانى بانك حوۋم كرەديت جىل سايىن ۇيىمداستىرىپ تۇرادى. ءتىپتى يگى داستۇرگە اينالدى دەسەك، ارتىق ەمەس. س.بەگالين اتىنداعى كىتاپحانا Global Money Week حالىقارالىق قوزعالىسىن قولدايدى. وعان دالەل رەتىندە بۇل شارانى ءۇشىنشى جىل بىرلەسىپ ۇيىمداستىرىپ جاتقانىمىزدى ايتا الامىز. بۇگىندە ەرەسەكتەردىڭ ءوزى قاراجاتىن ءجوندى باسقارا المايدى. سونىڭ سالدارىنان ءتۇرلى كەلەڭسىز وقيعالارعا تاپ بولىپ جاتاتىنىمىز بار. ەندەشە، بۇگىنگى بالالار سول قاتەلىكتەردى جىبەرمەۋى ءۇشىن جاستايىنان ساۋاتتانۋ كەرەك. وزدەرە كۇندەلىكتى بەرىلەتىن اقشانى رەتىمەن جۇمساۋ، ۇنەمدەۋ، اقشا تابۋدىڭ وڭاي ەمەسىن بىلەر بولسا، ەرتەڭ ەرەسەك ومىرگە جاقسى بەيىمدەلەرى انىق» دەيدى كىتاپحانا قىزمەتكەرى ءرازيا تاجييەۆا. شارا سوڭىندا بالالارعا قارجى تاقىرىبىندا جازىلعان وقۋلىقتار تابىستالىپ، ەستەلىك سۋرەتكە ءتۇستى. كوڭىلدى كۇيمەن تارقاسقان بالالار مۇنداي شارانىڭ تاعى ۇيىمداستىرىلۋىن قالايتىندارىن جەتكىزدى. مۇنداي سۇرانىستى كورىپ، جوبانىڭ عۇمىرى ۇزاق بولاتىنىن بايقاعاندايمىز.  

---