ساپار باتا، جولاۋشىعا باتا، تىلەك
جولىڭدى اللا قولداسىن،
جامانشىلىق بولماسىن.
سەنىمدى بولسىن جولداسىڭ،
جولىڭدى كەسكەن وڭباسىن.
ءساتتى بولسىن ىستەرىڭ،
جاقسى بولسىن تۇستەرىڭ،
جۇمساق بولسىن ىشكەنىڭ.
كورمەگەن جەردى كورىپ قايت،
ىرزىعىڭدى تەرىپ قايت.
ايدارىڭنان جەل ەسىپ،
جەلىپ بارىپ، جەلىپ قايت.
ءاۋمين!
*** *** *** ***
يا، اللا جارىلقا!
جارىلقاعاننىڭ ىشىندە ەت.
تۇگەل پالەدەن امان ەت،
ساقتاعايسىڭ سالەمەت!
كەشكى تىلەۋىن كەشىكتىرمە،
ەرتەڭگى تىلەۋىن زارىقتىرما!
اۋزى قاندى بورىدەن ساقتا،
قولى قاندى ۇرىدان ساقتا!
كۇلە كىرىپ، كۇڭىرەنە شىققاننان ساقتا،
بىرەۋدىڭ حاعىن جەپ، تىققاننان ساقتا!
توردە وتىرىپ مەكىرەنگەننەن ساقتا،
شايكىنىڭ استىنان شەكىرەيگەننەن ساقتا!
باسىڭا باقىت بەرىپ،
بۇل دۇنيەدە جيعانىڭ بولسىن،
ول دۇنيەدە يمانىڭ بولسىن!
*** *** *** ***
ۋا، جاراتقان، جارىلقا،
باق-داۋلەتىن اۋماس قىل،
جارىلقاعانمەن جالعاس قىل!
الاۋىزدى الىس قىل،
قورعانعاننان قالىس قىل!
نيەتتەرى اق بولسىن،
بەينەتتەرى پاك بولسىن!
مۇراتتارىن اسىل قىل!
قولقاسىن شاڭ قاپپاسىن،
جۇرگەن جەرىن جاسىل قىل!
*** *** *** ***
دالاقتاعان داۋدان ساقتا،
جالاقتاعان جاۋدان ساقتا!
اشىققان بورىدەن ساقتا،
قارا جەردىڭ تار كورىنەن ساقتا!
اشىنعان ۇرىدان ساقتا،
قۇلقىنى قۇردان ساقتا!
جىلاننىڭ زارىنەن ساقتا!
اياق استىنان كەزىگەر
بالە-جالانىڭ بارىنەن ساقتا!
*** *** *** ***
ءيا، قۇدايىم وڭداسىن،
وڭ جولىنا باستاسىن.
جورتقاندا جولىڭ بولسىن،
جولداسىڭ پەرىشتەلەر بولسىن.
جەر جۇزىندەگى قاتەردەن
جاپپار يەمە تاپسىردىم!
سۋدان كەلەر قاتەردەن،
ساپارداعى قاتەردەن
جاراتۋشى جان يەم،
ساقتاي گور - دەپ تاپسىردىم!
ءبىر اللاھ وزىڭە تاپسىردىم!
قايىرلى داۋلەت بەرسىن
حالىققا تاتۋلى ءومىر بەرسىن!
وتكەنگە يمان بەرسىن
تىرىگە – بەرەكە بەرسىن
جاستارعا عۇمىر بەرسىن
حالقىمىزعا بىرلىك بەرسىن!
ءاۋمين، اللاھ اكبار!
*** *** *** ***
كۇنىڭ شۋاقتى بولسىن،
كولىڭ سۋاتتى بولسىن!
قونىسىڭ ءورىستى بولسىن،
ەككەنىڭ جەمىستى،
ەڭبەگىڭ كەلىستى بولسىن!
جۇلدىزىڭ اعاڭدا بولسىن،
قۇندىزىڭ جاعاڭدا بولسىن!
جارىڭ جىبەكتەي بولسىن!
ارىڭ تۇلەكتەي بولسىن!
ونەرىڭ ورلەي بەرسىن،
ءومىرىڭ تورلەي بەرسىن!
ءاۋمين!
*** *** *** ***
جارىلقا، اللاھ، قابىل ەت،
جارىلقاۋدىڭ قامىن ەت!
ىزەت-ابىروي، باق-داۋلەت،
بەرەكە ورناپ ب ا ق قونسىن،
نە تىلەسەڭ،
سونىڭ ءبارىن قابىل ەت!
ءاۋمين.
*** *** *** ***
جاز كەلىپ كوڭىلىڭ جاي بولسىن،
كورگەنىڭ شاتتىق توي بولسىن!
ابزال دوسىڭ كوپ بولسىن،
بەرگەن باتام سول بولسىن!
ءاۋمين!
*** *** *** ***
ءاۋمين دەسەڭ ماعان،
قۇداي بەرسىن ساعان!
وڭ جاعىنا قاراساڭ،
التىننان تەرەك ورناسىن!
سول جاعىڭا قاراساڭ،
كۇمىستەن تەرەك ورناسىن!
ەش جامانداق بولماسىن،
امان بولسىن مال-باسىڭ!
*** *** *** ***
بەس قارۋىڭ سايلى بولسىن،
جورتقان جولىڭ جايلى بولسىن.
كۇنىڭ شىعىپ جارقىراپ،
ءتۇنىڭ تىنىش، ايلى بولسىن.
ىشكەنىڭ ءزامزام سۋ بوپ،
ۇرتىڭ تولى مايلى بولسىن.
ءبىر اللا ءوزى جەبەسىن،
ارۋاقتار دەمەسىن.
عايىپ ەرەن، قىرىق شەلتەن،
تيگىزسىن ءدايىم سەبەسىن.
نۇح پايعامبار الدىڭنان،
تەڭىزدە توسسىن كەمەسىن.
التىن كۇندە التى ايلىق،
ارىماي-تالماي جول العىن.
امان-ەسەن ورالعىن،
ءدال بۇگىندەي قول العىن.
*** *** *** ***
باقىتتى بول، قاراعىم،
قارا كوزىم مارالىم.
التىننان بولسىن تاراعىڭ،
كۇمىستەن بولسىن جاراعىڭ.
قۋانىش، كۇلكىڭ تىيىلماي،
جارقىراي بەرسىن قاباعىڭ.
ماقتانىشى بولا ءبىل،
اتاڭ مەنەن اناڭنىڭ.
تىلەگىڭە جەتە بەر،
وڭىڭناڭ ەسىپ سامالىڭ.
*** *** *** ***
ورالۋىڭ تەز بولسىن،
قاسقا جولدىڭ بويىندا
قىزىر بابام كەز بولسىن.
ءوزىڭ جايلى جات ەلدە
جىلى-جىلى ءسوز بولسىن.
كورە الماعان دۇشپاننىڭ،
ەكى كوزى ءبوز بولسىن.
كەتىلمەسىن تۇلپارىڭنىڭ تۇياعى،
قايىرىلماسىن سۇڭقارىڭنىڭ قياعى.
بارعان جەردە قۇشاق جايا قارسى السىن،
جاقسى ادامدار، جايساڭ جاندار زيالى.
جالپاق ەلمەن، جاقسى جەرمەن تانىسقىن،
اللا جەبەپ، ۇشقان قۇسپەن جارىسقىن،
كوڭىلىڭ شات، ات-كولىگىڭ ارىماي،
وتباسىڭمەن امان-ەسەن تابىسقىن.
ءاۋمين
*** *** *** ***
You Might Also Like
-
باتا بەرەردە اركىم «ءيا، قۇدايىم»، «ءيا، اللا»، «ءيا، جاراتقان» سەكىلدى باعىشتاۋ سوزدەرىن ءار باتانىڭ الدىنان قوسىپ ايتۋعا ەرىكتى.
-
ناۋرىز كەلىپ قار كەتتى، اق قار، كوك مۇز جۇتاتقان شارۋا ەلىنەن زار كەتتى. ناۋرىز كەلىپ جاز كىردى، جاز پەرىشتە «ءاز» كىردى كۇنەسكە توسىپ ارقاسىن، جان بىتكەنگە ناز كىردى. ارىق-تۇراق ...
