ەلىمىزدە ىندەت جاعدايىندا قاشىقتان وقىتۋ قالاي ءجۇرىپ جاتىر؟
قازاقستان اۋماعىندا توتەنشە جاعداي جاريالانۋىنا بايلانىستى ەلىمىزدىڭ بارلىق ءبىلىم بەرۋ مەكەمەلەرى مەن وقۋ ورىندارى قاشىقتان وقۋعا كوشتى. تەك وقۋشىلار مەن ۇستازدارعا عانا ەمەس، سونىمەن قاتار اتا-انالار قاۋىمىنا دا تاڭسىق فورماتتاعى ونلاين وقۋ ءادىسى العاشىندا كوڭىلگە ۇرەي ۇيالاتقانى راس.
ءبىلىم جانە عىلىم مينيسترلىگىنىڭ ۇيلەستىرۋىمەن 6 ساۋىردەن باستاپ ءتورتىنشى توقساننىڭ بەينەساباقتارى رەسپۋبليكالىق «ەل ارنا» جانە «بالاپان» ارنالارىنان كورسەتىلۋدە. العاشقى ساباقتار جۇرتشىلىق اراسىندا ۇلكەن تالقى تۋعىزدى. ايتىلعان پىكىرلەر ءارالۋان. وسى ورايدا، ءبىز بەينەساباقتاردىڭ ءتۇسىرىلىم الاڭىنداعى جازىلۋ پروسەسى تۋرالى تولىعىراق تانىستىرعىمىز كەلدى.
وقۋشىلار ءتورتىنشى توقساندا قامتۋى ءتيىس 3 مىڭنان اسا ساباقتىڭ ۆيدەو نۇسقاسىن ءتۇسىرىپ، دايىنداۋدى «Bilim Media Group» كومپانياسى ءوز موينىنا الدى.
ەلىمىزدىڭ ءبىلىم بەرۋ سالاسىنا تىڭ وزگەرىستەر اكەلىپ، قاشىقتان وقۋعا ارنالعان كونتەنت ازىرلەۋدە مول تاجىريبە جيناعان «Bilim Media Group»-تىڭ قىزمەت كەڭسەسى اپ-ساتتە تەلەستۋدياعا اينالعان. از عانا ۋاقىتتىڭ ىشىندە دەكوراسيالار قۇرىلىپ، كابينەتتەر ۆيدەو ستۋديا تەحنيكاسىمەن جابدىقتالىپتى. كومپانيا ديرەكتورى راۋان كەنجەحان ۇلىنىڭ Facebook الەۋمەتتىك جەلىسىندە جاريالاعان جازباسىنا سۇيەنسەك، ونلاين ساباقتاردى ازىرلەۋ ءۇشىن ناۋرىزدىڭ 23-ىنەن باستاپ 150 ءمۇعالىم مەن 60-تان اسا قىزمەتكەر 8 ستۋديادا دەمالىسسىز جۇمىس ىستەپ جاتىر. كارانتين جاعدايىنا قاراماستان، جەدەل شىعارماشىلىق توپ قۇرعان كومپانيا مۇعالىمدەر مەن وقۋشىلاردى قولداۋ ءۇشىن ءوز تاراپىنان بار مۇمكىندىكتى جاساۋدا.
قاشىقتان وقىتۋدى قامتاماسىز ەتۋگە اتسالىساتىن مامانداردىڭ ۇزدىكسىز جۇمىسىن قامتاماسىز ەتۋ ءۇشىن، قاتىناۋ كولىگىنەن باستاپ ىستىق تاماققا دەيىن - بارلىق جاعداي جاسالعان. ەڭ ماڭىزدىسى - مەديسينالىق تەكسەرۋ مەن كومەك ۇسىناتىن دارىگەر دە بار. ماسكا، قولعاپ، قول تازالاعىش سەكىلدى مەديسينالىق بۇيىمدار مول دايىندالعان. ەلدەگى توتەنشە جاعدايعا بايلانىستى جۇمىس ورنىنداعى قاۋىپسىزدىك شارالارى قاتاڭ ساقتالادى.
توتەنشە ءبىلىم الاڭىنا اينالعان ۇجىم كوپ تەلەارنانىڭ ۇلكەن دايىندىقپەن جاسايتىن ءبىر جىلدىق جوسپارىن نەبارى بىرەر اپتادا ورىنداپ جاتىر دەسەك ارتىق ايتقاندىق ەمەس. بەكىتىلگەن ساباق كەستەسىنە سايكەس كۇن سايىن 60 بەينەساباق جانە 10 انيماسيالىق تانىمدىق بەينەماتەريال ەفيرگە شىعادى. دەمەك، وقۋشىلارعا اپتاسىنا ۇزاقتىعى 60 ساعاتقا سوزىلاتىن ەكى تىلدەگى 300 ساباق ۇسىنىلادى. بۇل كۇن سايىن تەلەەفير تالاپتارىنا ساي جاسالعان 12 ساعات مازمۇن. كارانتين جاعدايىندا بىلىكتى مامان مەن تەحنيكا سانىنىڭ جەتىسپەۋىنە قاراماستان، 2 اپتا ىشىندە 800 بەينەساباق ءتۇسىرىلىپ، ونىڭ تەڭ جارتىسى مونتاجدان وتكەن.
بەينەساباقتاردىڭ مازمۇنىنا قاتىستى كورەرمەندەر تاراپىنان كەيبىر سىن پىكىر دە ايتىلدى. بۇل تۋرالى №66 مەكتەپ-ليسەيىنىڭ فيزيكا ءپانى ءمۇعالىمى ءالىمجانوۆا گۇلدانا رامازان قىزى ءوز ويىمەن بولىسكەن بولاتىن:
ءمۇعالىم – ءارتىس نەمەسە تەلەجۇرگىزۋشى ەمەس، سول سەبەپتى العاشقى ۋاقىتتا كامەرا الدىندا ارنايى دايىندىقسىز ساباق جۇرگىزۋ قيىندىق تۋدىرعانى راس. دەگەنمەن، مۇندا بىزگە ەفير رەداكتورلارى مەن ستۋدياداعى ماماندار وتە كوپ كومەك كورسەتەدى. وقۋشىلار مەن اتا-انا ءۇشىن بۇل تەك ون مينۋتتىق ساباق بولۋى مۇمكىن، ويتكەنى ولار ءتۇسىرىلىم الاڭىنداعى قيىندىقتاردان بەيحابار. بالالاردىڭ جاڭا تاقىرىپتى تولىق مەڭگەرىپ شىعۋى ءۇشىن، ءبىز ساباق ماتەريالىن دايارلاۋدان بولەك، كامەرا الدىنداعى دايىندىقتى دا قاتار الىپ جۇرۋگە تىرىسامىز. مۇنىڭ ءوزى ۇلكەن جاۋاپكەرشىلىكتى تالاپ ەتەدى. سوندىقتان وقۋشىلار مەن اتا-انالار قاۋىمىنان تۇسىنىستىك تانىتۋىن سۇرايمىز.
ەفيردى كورۋگە ۇلگەرمەي قالعان وقۋشىلار بەينەساباقتار مەن قوسىمشا تاپسىرمالاردى، سونداي-اق ساباقتى بەكىتۋگە ارنالعان جاتتىعۋلاردى bilimland.kz سايتىندا تاۋلىگىنە 24 ساعات تەگىن «Online Mektep» بولىمىنەن قاراي الادى. كومپانيا ماماندارى سايتتىڭ وقۋشىلارعا قولايلى ءارى تۇسىنىكتى بولۋى ءۇشىن، قولدانۋعا جەڭىل، قاراپايىم فۋنكسيالاردى ەنگىزگەن. سونىمەن بىرگە، ءمۇعالىم مەن وقۋشى اراسىندا كەرى بايلانىس ورناتۋ، ءۇي تاپسىرمالارىن تەكسەرۋ مەن باعالاۋ سەكىلدى مۇمكىندىكتەردى جۇزەگە اسىرۋ تەتىكتەرىن دە ويلاستىرعان. وسىنىڭ ارقاسىندا، ءتورتىنشى توقساننىڭ ەڭ العاشقى وقۋ كۇنى سايتقا 800 000-عا جۋىق قولدانۋشى كىرگەنىنە جانە ەشقانداي تەحنيكالىق اقاۋ ورىن الماعانىنا ءبارىمىز بىرگە كۋا بولدىق.
ۇيىمداستىرۋشىلار بەينەساباقتار ازىرلەۋدە ءالى دە بولسا ولقىلىقتاردىڭ بارىن جاسىرمايدى. بۇل شىعارماشىلىق، ال كەز-كەلگەن شىعارماشىلىقتا كەمەلدىكتىڭ شەگى جوق.
ءبىز بۇل جاۋاپتى جۇمىسقا اتسالىسىپ جاتقان ۇستازدار مەن وسىنداي كۇردەلى ءىستى ءوز قولىنا العان ارىپتەستەرىمىزگە تەك ساتتىلىك تىلەيمىز!
You Might Also Like
-
— كوكتوعايعا سامولەت قاشان ۇشادى؟ — دەگەن داۋىس ەستىلدى. وتىرعانداردىڭ بارلىعى كاسسا جاققا بۇرىلدى.
-
كەيدە جامانشىلىقتىڭ ادامعا بىرىنەن كەيىن ءبىرى جامالار قاسيەتى بولادى. «باقىتسىزدىق كەلدى — قاقپاڭدى اش»—دەگەن ءسوز تەگىننەن-تەگىن ايتىلماسا كەرەك. ال ەگەر شىنىمەن ءبارى قيعاش ...
