ەرجۇرەك دارحان ماراپاتقا بولەندى
حالىقارالىق بالالاردى قورعاۋ كۇنىنە وراي ەل اۋىزىندا «باتىر بالا» اتانىپ كەتكەن 13 جاستاعى ماڭعىستاۋلىق دارحان ءامىرحانعا قۇرمەت كورسەتىلدى. سوڭىنا ەرگەن ءبىر ءىنىسى مەن ءۇش قارىنداسىن ورتتەن امان الىپ شىققان 7 سىنىپ وقۋشىسىنا بەلەسەبەت، باعالى سىيلىقتار جانە توتەنشە جاعدايلار دەپارتامەنتى باسشىسىنىڭ العىس حاتى تابىستالدى.
شاراعا «نۇر وتان» پارتياسى، «جاس وتان» جاستار قاناتى، دەپۋتاتتار، اسسامبلەيا مۇشەلەرى جانە ب ا ق وكىلدەرى قاتىستى.
وقيعا وسى جىلدىڭ 26 ساۋىردە ءتۇپقاراعان اۋدانى سايىن شاپاعاتوۆ اۋىلىندا ورىن العان. بەس بولمەلى ۇيدە تۇرعان بولاتوۆتار وتباسى ەكى ەر جانە ءۇش قىز بالا تاربيەلەپ وتىر. سول ءتۇنى اكەسى مەن اناسى ۇلكەن ۇلى دارحانعا بالالارعا باسكوز بولۋدى تاپسىرىپ، وزدەرى جۇمىستا بولعان.
«تۇنگى مەزگىلدە ءۇيدىڭ ءىشىن قايتا-قايتا ارالاپ، قۇددى ءبىر توتەنشە جاعداي ورىن الاتىنىن جۇرەگىم سەزگەندەي بولدى. ءبىر ۋاقىتتا ۇيىقتاپ كەتىپپىن. تۇسىمدە ءتىلسىز جاۋمەن ارپالىسىپ جاتقان ەكەنمىن. ۇيقىدان ويانسام كوز الدىمدا ءۇيدىڭ ءىشى قارا ءتۇتىن بولىپ جاتقان ەكەن. سوعان قاراماستان ءىنىم مەن ءۇش قارىنداسىمدى ۇيدەن امان الىپ شىعىپ، كورشىنىڭ ۇيىنە اپارىپ تاستاعان سوڭ، بىردەن ءورت ءسوندىرۋ قىزمەتىنە حابارلاستىم»، - دەيدى باتىر بالا دارحان ءامىرحان.
ءورت سوندىرۋشىلەردەن بەلگىلى بولعانداي، شاقىرتۋ 02:12 ۋاقىتىندا تۇسكەن. ماماندار ءتىلسىز جاۋدى تەز ارادا اۋىزدىقتاعان.
دارحاننىڭ اكەسى باقىتجان بولاتوۆ ءبىر كاسىپكەردىڭ كولىگىن جالعا الىپ وتىر ەكەن. وقيعا بولاتىن ءتۇنى ول جۇمىستا بولعان، ال كولىگى ىستەن شىققان. ال اناسىن بالاباقشادا تۇنگى كەزەكشىلىككە جۇمىسقا شاقىرتقان. ءسويتىپ ۇيدە ۇلكەن 13، ال كىشكەنتايى 3 جاستاعى بالالار وزدەرى قالعان.
«الدىمەن اللا، سودان سوڭ بالام دارحانعا ريزامىن. كىم بىلەدى، ولار ۇيدەن شىعا الماي قالعاندا بەس بالامنان ايىرىلىپ قالۋىم مۇمكىن ەدى. بالامنىڭ باتىرلىعىنا ءتانتى بولدىم. مەن قايسار بالاممەن ماقتانامىن»، - دەپ اعىنان جارىلدى دارحاننىڭ اكەسى باقىتجان.
«نۇر وتان» پارتياسى موف ءتوراعاسىنىڭ ءبىرىنشى ورىنباسارى نۇري تۋمىشيەۆ بولسا باتىر بالانىڭ اكەسى باقىتجان بولاتوۆقا العىس حات تاپسىردى.
ال ءورتتىڭ سەبەبى ناقتى نەدەن ەكەندىگى ازىرگە بەلگىسىز. ماڭعىستاۋ وبلىسى توتەنشە جاعدايلار دەپارتامەنتىنىڭ ءورت ءسوندىرۋ جانە اۆاريالىق قۇتقارۋ قىزمەتى مەملەكەتتىك مەكەمەسىنىڭ باسشىسى ەرلان ماۋلەنوۆ بولسا، توقتىڭ قىسقاشا تۇيىقتالۋى دەگەن الدىن-الا بولجام جاساپ وتىر. سونىمەن قاتار ءورت ناتيجەسىندە كەلتىرىلگەن ماتەريالدىق شىعىن مولشەرى دە جاقىن كۇندەرى بەلگىلى بولماق.
ايتا كەتۋ كەرەك، ورتكە ورانعان ءۇيدىڭ ىشىندە قۇران كىتاپ عانا جانباي قالعان، باسقا زاتتاردىڭ بىرەۋىدە پايداعا اسپايدى.
ءقازىر بولاتوۆتار وتباسى ۋاقىتشا ساراي جالداپ تۇرىپ جاتىر. ورتكە ورانعان بەس بولمەلى پاتەردەن تۇك قالماعان. وتاعاسى بولسا ءۇيىن جاڭادان تۇرعىزۋعا كىرىسىپ كەتكەن. مۇمكىندىگىنشە اۋىل اكىمدىگى، كورشى-كولەم، تۋىسقاندارى جانە حالىق بارىنشا كومەك قولىن سوزۋدا. قاسيەتتى رامازان ايىندا كوپبالالى وتباسىعا جاڭا ءۇيدى سالۋعا كومەك كورسەتىلسە نۇر ۇستىنە نۇر بولارى ءسوزسىز.
كامشات ءىزباساروۆا
ق ر جۋرناليستەر وداعىنىڭ مۇشەسى
اقتاۋ قالاسى
You Might Also Like
-
قازاق ەلىنىڭ ەسكى تاريحىنان، حالىق مۇراسىنان قالعان ۇلكەن جىردىڭ ءبىرى — "قارا قاسقا اتتى قامبار" جىرى. مۇنىڭ ءمان-جايىن تەكسەرۋدەن بۇرىن اۋەلى قىسقاشا تۇردە اڭگىمە مازمۇنىن ايتىپ وتە...
-
ديككەنس مەن ءۇشىن الدىندا ىزەتپەن باس يەر جازۋشىم بولىپ قالا بەرەدى.
