InfoHub Logo

ولەڭ ءسوزدىڭ ەل مويىنداپ، جۇرت تانىعان شەبەرلەرىنىڭ ءبىرى ساكەن يماناسوۆتىڭ ادەبي جولى سوناۋ وتكەن عاسىردىڭ 60-جىلداردان باستاۋ الادى. ادەبيەت تابالدىرىعىن وزىنەن ءسال بۇرىن، نە وزىمەن بىرگە اتتاعان ۇلكەن ءبىر شوقتىعىن بيىكتەتە بەرۋ ماقساتىنداعى اقىندىق ميسسياسىن ادال اتقارىپ كەلە جاتقانداردىڭ دا بىرەگەيى دەپ بىلەمىز. قىرىق جىلعا جۋىق بۇل ساپاردىڭ جولى ءاردايىم تاقتايداي تەگىس بولعان جوق، ايتسە دە ءاۋ دەپ اۋىزعا ىلىككەننەن بەرى كوش باسىنداعىلارمەن قۇيرىق تىستەسە ءجۇرۋ ءۇشىن دە ايىرىقشا دارىن يەسى بولۋ كەرەك-اۋ دەپ بىلەمىز.

— قۇرمەتتى ساكەن اعا، جوعارىداعى ءبىر پىكىر سىزگە دە، ادەبيەتكە سىزبەن قاتار كەلگەن زامانداستارىڭىزعا دا بەرىلەر ورتاق باعا سياقتى. ادەبيەت ەسىگىن قاعىپ كىرگەننەن باستاپ، ءبىرجولا تۇراقتاپ قالا بەرىپسىزدەر. سودان بەرى قانشاما سۋ اقتى، زىمىران جىلدار ءوتتى، ءومىر دە، قوعام دا، قوعاممەن بىرگە ادام دا وزگەردى. سول كوزبەن بۇگىنگىنى سالىستىرا قاراعاندا، قانداي ۇقساستىق، قانداي كەرەعارلىق اڭعارار ەدىڭىز؟

— ەلۋىنشى جىلداردىڭ اياعى مەن الپىسىنشى جىلداردىڭ باسىندا، ءۇيىر-ۇيىر بولىپ ۇيمەلەسە، بىر-بىرىمىزبەن كيمەلەسە ءبىر توپ بولىپ تۇتاسا كەلىپ ەدىك شىنىندا. الدىمىزداعى ساعي، تۇمانباي، قادىر، ادىلبەك، ەركەشتەرگە ەركىن ءىبىتانوۆ، وتەجان نۇرعالييەۆ، قاستەك بايانبايەۆ، تۇرسىنزادا ەسىمجانوۆ، سابىرحان اسان، ءجۇسىپ قىدىروۆ، ەسەنباي دۇيسەنبايەۆ، ماعيراش ساريكوۆالار ءبورىمىز وقۋعا دا ىركەس-تىركەس ءبىر مەزگىلدە تۇستىك-اۋ دەيمىن. بۇل كەزدە اقىن رەتىندە جۇمەكەن ناجىمەدەنوۆ، تولەگەن ايبەرگەنوۆتەر دە اجەپتاۋىر تانىلىپ قالعان ەدى. ال ادەبيەتكە ورامدى ءتىل، ويلى جىلدارىمەن كەلىپ قوسىلىپ، ءوز مۇراتىن پروزادان تاپقان قابدەش ءجۇمادىلوۆ، ءابىش كەكىلبايەۆ، ورازبەك سارسەنبايەۆ، دۇكەنباي دوسجانوۆتاردىڭ العاشقى ءبىر جاپىراق، جارىم جاپىراق شاعىن ولەڭ كىتاپتارى دا ەل قۇلارىن ەلەڭدەتە، قالام قالىپتاسۋىن جەدەلدەتە كەلگەن بولاتىن. ءبىراق گازەتتەر مەن جۋرنالدار ءبىزدى ءجيى جاريالاپ، شولجاڭ ەتىپ وسىرمەدى. گازەتكە ءبىر ولەڭ، ەكى ولەڭىمىز شىعا قالسا، توبەمىز كوككە جەتىپ، "قازاق ادەبيەتى"، "جۇلدىزدىڭ" بەتىندە كورىنگەنىمىز مەملەكەتتىك سىيلىق العانداي جەلپىنىپ، جەتىسىپ قالاتىنبىز.

قازىرگى جاعداي باسقاشا ما دەپ قالام. ءقازىر ولەڭ كوپ-اق جاريالانىپ جاتادى. قالىڭ-قالىڭ كىتاپتار دا كوپ شىعادى. قۇلاش-قۇلاش ولەڭدەرى جاريالانىپ جاتاتىن"اقىنداردىڭ" كىم ەكەنىن سۇراساڭ، قۇداي بىلەدى، رەداكسياداعىلاردىڭ وزدەرى دە ءدال باسىپ ايتا الماي، داعدارىپ قالادى. وسىدان ءسال بۇرىن: "بۇل كۇندە اناۋ دا اقىن، مىناۋدا اقىن، جەمساۋى جىبىرلاعان جىراۋ دا اقىن" دەپ جازعانىم بار ەدى. تەلەديداردان ساعاتتاپ سويلەپ، اجەپتاۋىر لاۋازىمدى اعالارى اسپانداتا ماقتاپ جاتاتىن، جۋرنالدىڭ تەڭ جارىمىنا جۋىعىنا جاسىق ولەڭىن جارنامالاپ جاتاتىن "ولەڭشىلەردى: كورىپ، كۇيزەلەتىن كەزدەرىم از بولمايدى. "تۇيە مىنگەن قازاقتىڭ ءتورت اۋىز ايتپايتىنى جوق" دەگەندەي سول شاڭ-توزاڭنىڭ ىشىنەن ساف اسىلىن كورۋ استە مۇمكىن ەمەس. كەيىنگى كەزدەردە جۇرت اۋزىنا ىلىگەرلىك جاقسى جاس اقىن بولماي كەتۋ دە سودان. ۇيقاسقان پيعىل ءسوز كوپ تە، شىنايى شىنى ولەڭ از، جازعىش كوپ تە، اقىن جوق. سوڭعى تۇيىنىنە جەتىپ بولمايتىن كوش-قۇلاش ۇزاق ولەڭدى اياعىنا دەيىن وقىپ شىعۋدىڭ ءوزى مۇمكىن ەمەس. سول ولەڭدەردىڭ 10-15 شۋماقتان تۇراتىن كەز-كەلگەن جەرىنەن كەز كەلگەن 5-10 شۋماعىن كەسىپ الىپ تاستاساڭ دا تۇك وزگەرمەيدى. وسى سەندەردىڭ گازەتتەرىڭدە دە وتكەندەگى ءبىر ساندارىندا ون شاقتى "اقىنداردىڭ" ىشكى قوس بەتتى الىپ جاتقان "ولەڭدەرى" باسىلدى. سولاردا جىل ەتكەن جالعىز جول بولسا مۇرنىمدى كەسىپ بەرەيىن. بۇعان قوسا، بۇگىن ايتىلىپ، ەرتەڭ ۇمىتىلىپ جاتاتىن ايتىسكەرلەردىڭ سوزدەرىن (ولەڭ دەسەڭ — يلەۋگە وبال) كوش قۇلاش ەتىپ قوسا جاريالاپ جاتاسىزدار. سولاردىڭ ىشىنەن تالانتتىسى قايسى، جولبيكەسى قايسى، مىقتى بولساڭ ايىرىپ كور.

ادەبي شارۋاشىلىقتى قالت جىبەرمەي قاداعالاپ وتىراتىندار ءۇشىن، ءقان-سولىن اياماي ادەبيەتتى جاساپ كەلە جاتقاندار ءۇشىن راديودان: سىزدەردىڭ تىڭدايتىندارىڭىز تۇگەنشەيەۆتىڭ ولەڭدەرى"، نەمەسە تەلەديداردان: "اقىن بالەنشەيەۆ جىر تولعايدى" دەگەن ەسۋاس حابارعا كەزىگىپ، ءتىلىن تىستەپ وتىرۋدان اۋىز جازا، سودان وتكەن سوراقىلىق بولا قويار ما ەكەن؟! وقتا-تەكتە ورنىقتى دا، ويلى ءسوزدى ءدامدى، ءنارلى جىرىمەن جالت قاراسا ءبىر كورىنىپ تۇراتىن شىنايى اقىندى وقىرمان دا، تىڭدارمان دا سارىنا كۇتىپ، قۋانا قابىل الىپ جاتار ەدى عوي، وسى قاعيدانى قالايشا ۇمىتىپ بارامىز.

— قۇپ، سولاي-اق بولسىن دەيىك، ەندى سونىڭ سەبەبىن ايتىڭىزشى. الدە جۇرت ولەڭ-جىردان جالىقتى ما، جوق ولەڭ-جىر ءوز ورەسىندە باعالانباي جابى بولىپ، جابىقتى ما؟ بالكي، زامان اعىمى پوەزيا ءۇشىن قولايلى بولماي تۇر ما؟

— بۇل سۇراعىڭا جاۋاپ بەرۋ قيىن-اۋ، بالا. تەك، مەنىڭ بىلەتىنىم ولەڭ دە ءوز باعىتىن وزگەرتۋى قاجەت پە دەيمىن. ءبىراق، قالاي بۇرىلىپ، قاي تۇرعىدا وزگەرۋى كەرەكتىگىن جانە بىلمەيمىن. ايتەۋىر، بۇرىنعى قالىپتاسقان ۇلگىمەن ءجۇرىپ، ەندى الىسقا شابا المايمىز. قازاق پوەزياسىنىڭ قاينار بۇلاعى، سارقىلماس تا ەمەس، تارتىلماق تا ەمەس. ادەبيەتكە بىزدەن كەيىن كەلگەن يرانبەك، نۇرلان، نەسىپبەك، جاراسقاندار ولەڭ ەڭسەسىن قانشالىق بيىككە كوتەرىپ تاستادى.

— ءسىز اتاعان اقىندار دا بالاۋسا بۋىنعا جاتا قويمايدى-اۋ، ءسىرا؟

لىقسىپ كەلىپ الدىڭعىسىنان اسىپ ءتۇسىپ جاتاتىن جاس تولقىن ىشىنەن جارقىراپ ءالى بىرەۋى شىعار. قازىرگى ەسەنعالي، عالىم، گۇلنارلاردىڭ دا ايتارى ءالى الدا دەپ سەنەم مەن.

پوەزيا سارقىلىپ بارادى-اۋ دەگەن ويىم جوق. ءبىراق سونىڭ تۇنىعىنان كىم كورىنگەن ات سۋعارىپ لايلاپ بىتىرە مە دەپ قورقا بەرەم. ونىڭ ۇستىنە ۇلكەن ءىرى الەۋمەتتىك جۇك كوتەرە كەلگەن ولەڭ ۇلگىسىن دە كورە الماي ءجۇرمىن. ادام ءۇشىن دە، قوعام مەن زامان ءۇي ءۇشىن دە، ءبىزدىڭ بۇگىنگى بارشا تىنىس-تىرلىگىمىز ءۇشىن دە قازىرگى ۋاق-تۇيەكتى تەرىپ كەتكەن، اسا قوراش ولەڭ-جىرلارىمىز ازىق بولىپ جاتپاي-دى. سىرت قاراعاندا ءبارى دە جاقسى سياقتى: ىرعاعى بار، ۇيقاسى بالتالاساق تا بۇزىلمايدى، جۇتىنىپ-اق تۇر، ءبىراق كوكىرەگىندە جاڭا ءبىر ساۋلە، توسىن نۇر سەبەلەمەيدى، نە ۇشىنبايسىڭ، نە تۇشىنبايسىڭ، نە ءۇشىن كىم ءۇشىن جازامىز، كىمنىڭ جىرتىسىن جىرتىپ، نامىسىن جوقتايمىز — باستى ماسەلە وسى بولارعا كەرەك. ايتپەسە، سىڭسىپ جىلاي بەرگەنىڭ دە داراقىلانىپ ماستانا بەرگەنىڭ دە قالىڭ ەلگە ءدارى اۋەس. سوندىقتان "شوڭگە دە ولەڭ، توپ تە ولەڭنىڭ" جەلەۋىمەن كەتكەن الگى جوعارىداعى ءشوپ-شالام ارالاس لاي تاسقىنعا توسقاۋىل قويا تۇرىپ، جارقىراپ ءبىر جۇلدىز تۋعانشا سابىر ەتە تۇرعانىمىز دۇرىس بولاتىن شىعار. وعان دەيىن ولەڭنىڭ قۇلاعىن اۋىرتپاي، كوپ-كوپ "اقىندار" باسقا كاسىپپەن شۇعىلدانسىن. گازەتتەر مەن جۋرنالدارعا، باسپالارعا دا وسىنى ەسكەرتەيىك.

— مۇنداي لايساڭ كەزىندە ادەبي شىعارماعا قويىلار تالاپ تا باسەڭسيدى ەمەس پە. ادەبي سىن دا، وقىرمان دا، اقىن-جازۋشىلاردىڭ وزدەرى دە كوپ-كورنەۋ كولگىرەۋگە بەل الدىرىپ، "جابۋدى جابا توقۋعا" ادەتتەنە تۇسەتىندەي.

— امال نە، سولايى سولاي. وعان ىستەر امالىڭ دا جوق. "قايتەسىڭ، زامان سولاي، ءبۇلىنىپ جاتقان ءبىر عانا ادەبيەت، ءبىر عانا پوەزيا ەمەس قوي" دەپ كولگىرسيتىنىمىز دە بار. ۋاقىت تارازى ءبارىن-بارىن ءوز ورنىنان ورنالاستىرار.

— قانشاما قايران| ەڭبەك قۇر بەكەرگە زايا كەتپەي مە؟

— ءبىر كەزدە قوعامداعى بارشا قۇبىلىسقا ات سالىسۋ قاجەت دەگەن جەلەۋمەن اقىنداردىڭ ءبارىن ءبىر قاۋىزعا سىيعىزىپ، الەۋمەتتىك ىسكە ارالاستىرۋ تۇرعىسىنان پارتيالىق تالاپتار دا قويىلىپ كەلدى. ولەڭنىڭ ءوز جولى، ءوز ستيحياسى بارى، ولشەۋگە مولشەرگە، جوسپارعا كونبەيتىنى ەسكەرىلمەيتىن. پوەزيا دەگەن شىمىرلاپ قايناپ شىعىپ جاتقان باستاۋ بۇلاق سياقتى، ءوز ارناسىن ءوزى تابۋ كەرەكتىنى نازارعا الىنبايتىن."ءومىردى زەرتتەۋ، ومىرگە ۇڭىلە ءتۇسۋ كەرەك" دەيتىن ۇراندار دا ەتەك الدى. ءومىر ءسۇرىپ، تىرلىك كەشىپ جۇرگەن اقىنعا سول ءومىردى زەرتتەۋ دە كۇلكى ەمەس پە. وندا ومىردەن تىسقارى تۇرا تۇرىپ بارىپ ، سىرتتاي باقىلاپ زەرتتەيتىن بولىپ شىقپاي ما.

— ءوزىڭىز ۇلگى تۇتىپ، ۇقساعىڭىز كەلگەن ۇستازدارىڭىز، ەلىكتەگەن اقىندارىڭىز بولدى ما؟

— مەن ادەبيەتكە كەلگەلى دە قىرىق جىلعا جۋىقتادى، وتكەننىڭ بارىنە وي جۇگىرتۋ — قيىن. ول كەزدە اتى دۇرىلدەپ قاسىم امانجولوۆ، ءابدىلدا تاجىبايەۆ،عالي ورمانوۆ، قاليجان بەكحوجين، حاميت ەرعالييەۆ، ولارعا ىلەسە جۇبان مولداعالييەۆ، سىرباي ماۋلەنوۆ، سياقتى اقىنداردىڭ ەسىمدەرى اۋىزدان تۇسپەيتىن. سول كەزدىڭ ماڭداي الدى اقىندارى دا سول ار ەدى. وسىلاردىڭ ءبارىن بىزگە ۇلگى بولعان، ونەگە كورسەتكەن قالامگەرلەر ەدى دەپ ايتۋعا ابدەن بولاتىڭداي.

ءىلياس، ماعجانداردىڭ اتىن ەستىگەنىمىز بولماسا^ شىعارمالارىمەن كەيىن تانىستىق قوي.

ءبىزدىڭ بۋىن ادەبيەتكە اسا زور سەنىممەن، نىق باسىپ، نىعىز كەلدى. ادەبيەتتىڭ ەندىگى جۇگىن ءبىز ارقالايمىز دەپ تۇيدىك. سولاي بولىپ شىقتى دا. ومىرگە ازاماتتىق، تۇرعىدان قاراعان كەزدە، جاۋاپكەرشىلىكتى سەزىنە بىلگەن جەردە سولاي بولارى اقيقات. قوعام دا، ادام دا ءبىرتۇتاس بىرلىكتە سەكىلدى ەدى.

ءقازىر ادامدار ەكىگە قاق جارىلعانداي. بىرەۋلەرگە الدەنەگە ابىرجىپ، دۇنيەنىڭ بارىنە سەكەم الا، سەزىكپەن ۇركە قاراسا، ەندى بىرەۋلەرى الەكەدەي جالانىپ، ەكى ءيىنىن جۇلىپ جەپ، ولەرمەندىكپەن وڭمەندەي تۇسۋدە. ادەبيەتتە دە سولاي. مۇنىڭ سوڭعىسى اسىرەسە پوەزيانىڭ جاۋى.قاشاننان بەرى رۋحاني ادىلدىكتى اڭساعان، تاربيەلى، يبالى، قىزداي سىزىلعان ۇيالشاق جانر الگى ولەرمەندىكتەن بوي تارتا تىكسىنىپ، جەتىمسىرەي تۇسەرى حاق.

ولەڭ جازعاندا بۇكىل ءجان-تانىڭ، قانىڭ، جۇرەگىڭ تۇگەل ارالاسىپ، ونە بويىممەن تۇتاس سەزىنبەسەڭ، ولەڭدى ءوز دەنەڭنىڭ ءبىر بولىگى دەپ تۇسىنبەسەڭ — ول ولەڭنىڭ شىقپاعانى دەپ ءبىل.

بۇل جاعىنان العاندا ءبىزدىڭ پروزا ءبىرشاما ۇتا تۇسەدى. ويتكەنى - پروزانىڭ مۇمكىندىگى قاشان دا مولىراق. سوناۋ سوۆەتتىك زاماندا دا پوەزيا كىتاپتارى كىتاپ دۇكەندەرىندە جاڭبىرعا تيگەن كويلەگىنىڭ ەتەگىن سىعىپ تۇرعان قىزعا ۇقساپ، جۋان-جۋان رومان، پوۆەستەر اراسىنان قالتىراي تۇرىپ، دىرىلدەي تۇرىپ، سىعىلاسا ءجۇرىپ ارەڭ-ارەڭ شەتكەرى ورىنعا يە بولاتىن. ءالى سول. بۇل كۇندە ءا.نۇرشايىقوۆ، ق.ءجۇمادىلوۆ، م.ماعاۋين، سياقتى ءىرى تۇلعالى قالامگەرلەر، عۇمىرنامالار جازۋعا ويىسقان. پوەزيا بۇل جاعىنان پروزاعا جول بەرىپ شەگىنە بەرەدى. ويتكەنى، ونىڭ مىندەتى بايانداۋدان بولەگىرەك.

— ءقازىر نە جازىپ ءجۇرسىز؟

— مەن ءوزىم بۇرقىراتىپ جازا بەرەتىن، كوبىك تە بولسا كوپ بولسىن دەيتىن قالامگەرلەر سانىنا قوسىلمايمىن. ەكىنىڭ ءبىرى جازا الاتىن ولەڭدى مەن دە جازىپ، مەن دە جاريالاپ جۇرە الار ەدىم. ءبىراق، بۇرىنعى بيىگىمنەن تومەندەمەي، وزگەنى دە، وزگەنى دە قايتالاماي سونى ءبىر ءورىس ىزدەمەسەڭ، ەسكى جۇرتتى تاپتاي بەرۋدىڭ قاجەتى شامالى. ياعني، جاقسى جازا الماساڭ بار عوي، سول جازباي-اق قويعان ابزال. ءوزىمدى اسا تولقىتقان جاعدايعا وراي قالام تەربەپ قويام. تىندىرىپ تاستاعانىم شامالى. سۋىپ كەتپەۋ ءۇشىن اۋدارما دا جاسايمىن.

— الداعى جوسپار جايى؟

— الدىن الا ۋادە بەرۋدەن زياندى نارسە جوق. بۇرىن بىرەر رەت ۋادە بەرىپ، الداعى ءىسىمدى جوسپارلاپ كورگەم، بىتپەدى دە ورىندالعان جوق. ۋادە بەرگەننەن دە بىردەڭە تىندىرعان ابزال. كوپتەن بەرى كوكەيىمدى تەسكەن، ويدا ءبىراز پىسكەن ءبىر پروزا كىتابى بار. جازار-جازباسىمدى قۇداي بىلەدى. بيىل تاعى تىرىسىپ كورەتىن شىعارمىن.

— كوپ ادام پوەزيا دەگەندى ۇيقاستىرعان ءسوز دەپ ۇعادى.

— وقىرمان دا (جوعارىدا ايتقانداي) ەلەندى بار جاراتىلىسى، بولمىسى، تىنىس-تىرلىگىمەن تۇيسىنە وقىماسا ءبارىبىر تۇسىنبەيدى.

سىرتتاي ءسۇيسىنۋى مۇمكىن. كوپ تالانتتى جازۋشىلاردىڭ وزدەرى ولەڭدى شىنايى اقىندارشا تۇسىنە المايتىنى سودان.

ايتپەسە، ولەڭدى جان-تانىمەن تۇگەل قابىلداپ، ۇعۋ قيىن ەمەس. ول ءۇشىن وقىعانىڭدى ەستي دە ءبىلۋ كەرەك. ەستىگەن دەگەندە داۋىستاپ وقىپ تا ەمەس، ءوز ءسوزىڭدى تىڭداۋعا بولادى عوي، ءدامىن الا، ءنارىن قابىلداي وتىرىپ تىڭداۋعا.

— اقىندارعا ايالى ءبىر الاقان قاجەت.

وركەندەيتىن، وسەتىن ەلدىڭ بارىندە ادەبيەتكە قاۋىم بولىپ، مەملەكەت بولىپ قامقورلىق جاسايدى. ويتكەنى مادەنيەتكە كوڭىل بولمەگەن ەل — مادەنيەتسىز ەل. اۆستريادا پوەزياعا ايىرىقشا كوڭىل ءبولىنىپ، مەملەكەت قامقورلىعىنا الىنعان. ادەبيەتتىڭ باسقا جانرى قيىن كەزەڭدە ءوزى كۇنىن ەزى كورۋى مۇمكىن، پوەزيا بارلىق فورماسيا تۇسىندا ساناۋلى ادامداردىڭ عانا ساناسىنا سىڭەر دۇنيە. سوندىقتان ايالاپ ۇستاماي بولماس، — دەيتىن بولۋى كەرەك.

امەريكانىڭ الەم تانىعان قالامگەرى روبەرت ۋوررەن (اقىن ءھام پروزاشى) جازعان مىنا ءبىر جايعا نازار اۋدارساق: وسى عاسىر باسىندا امەريكا ادەبيەتىندە ەڭ تالانتتى اقىن روبينسون بولسا كەرەك. سول كەزگى ەل پرەزيدەنت تەددي رۋزۆەلتتىڭ بالاسى كەرميت مەكتەپ كىتاپحاناسىنان بۇرىن ەشكىم قولعا ۇستاپ كورمەگەن ءبىر كىتاپ تاۋىپ الادى. ول روبينسون اقىننىڭ جيناعى ەكەن. كىتاپ بالاعا قاتتى ۇنايدى دا، ەندى اكەسىنەن دە وقىپ شىعۋدى وتىنەدى. اكەسى دە كەرەمەت ۇناتادى. پرەزيدەنت ءوز بالاسىنا: "وسى جىگىتتى تابۋعا تىرىسىپ كورشى" دەپ تاپسىرادى. ول جىگىت بولسا بار بولعانى بىرەر كىتاپ شىعارىپ، كۇن كورە الماي ەندى ىشىمدىككە سالىنا باستاعان ەكەن. پرەزيدەنت اقىندى شاقىرىپ الىپ: "وكىنىشكە وراي، ءبىز وركەنيەتكە ەڭبەگى سىڭگەندەردىڭ تولىق ءتىزىمى بار، سول تىزىمگە ەنگەندەرگە سىڭىرگەن ەڭبەگىنە قاراي ءومىرىنىڭ اقىرىنا دەيىن جاردەماقى تاعايىندالاتىن انگليا ەمەسپىز. ءبىز وركەنيەتتى ەل بولعاندا سونداي ءتىزىم بويىنشا مەن دە سىزگە ومىرلىك ەڭبەكاقى تاعايىندار ەدىم. ونداي مۇمكىندىك بىزدە جوق، سوندىقتان مەن ءسىزدى كەدەنگە قىزمەتكە ورنالاستىرايىن. ۇكىمەتكە قىزمەت ەتەتىن بولاسىز، ءبىراق ەسىڭىزدە بولسىن، ەكى كەمە قۇيرىعىن ۇستاۋ كيىن بولىپ بارا جاتسا، قىزمەتتى ۇمىتىڭىز دا، پوەزيامەن بولىڭىز" — دەگەن ەكەن.

شىركىن-اي، دەيسىڭ دە قوياسىڭ...

---