"پاراسات" جۋرنالىنىڭ سۇراقتارىنا جاۋاپ
1. ءسىز قاسىم قايسەنوۆ تۋرالى ويلاعاندا، ەڭ الدىمەن قاي قىلىعى ەسىڭىزگە تۇسەدى؟
2. ول كىسى تۋرالى ءارقيلى اڭگىمە كوپ قوي، ولاردى ءسىز دە ەستىگەن شىعارسىز. ەسىڭىزگە ءتۇسىرىپ كورىڭىزشى. ساپارلاس بولدىڭىز با؟
3. الىپ دەنەلى باتىر ادام دەگەنمەن دە، قاسىم اعانىڭ كوڭىلى بوس كورىنەدى. قايعىرسا، ەگىلىپ جىلاپ قويا بەرەدى دەيدى. سول راس پا؟
4. قازاق مەملەكەتى قاسىم اعا سەكىلدى قاي ۇلىنا قۇرمەت كورسەتە العان جوق دەپ ويلايسىز؟
5. قاسىم اعاعا كوڭىلىڭىز قالعان كەز بولدى ما؟
6. باسپاسوزدە قاي ەرەكشەلىگى كورىنبەي ءجۇر؟
1. وزىنەن جاسى كىشىلەردىڭ بارىنە قۇشاعىن كەڭ اشىپ، ءاردايىم: "وي، دوروگوي! وي، زولوتوي"، — دەپ ەمىرەنىپ، ماڭدايىنان ءسۇيىپ جۇرەتىن قاسەكەڭ كىشىرەيتىپ تەڭەگەنىمە كەشىرەر، اۋىلدى جەردە بالا كەزدە كوپ بايقاعان بالاپان باسىپ شىعاراتىن تاۋىقتى ەلەستەتەدى كوزىمە. اسپانداپ جۇرگەن قاراقۇستىڭ كولەڭكەسى كورىنسە دە، سەبەلەپ جاڭبىر جاۋسا دا، كۇن ىسىپ كەتسە دە، بارشا بالاپانىن قوس قاناتىنىڭ استىنا الىپ، قىت-قىتتاپ، قىمتاپ جاۋىپ جۇرەتىن ەدى عوي. بۇ كىسىنىڭ دە كولەڭكەسى كۇندىك جەرگە ءتۇسىپ، بارىمىزگە قامقور بولىپ، حال سۇراپ جۇرەتىنى سوعان ۇقسايدى. بىرەۋلەرگە بۇل قىراندى كۇيكەنتايعا تەڭەگەندەي كورىنەر، ءبىراق مەنىڭ شىن سىرىم وسى.
2. ۇستىمىزدەگى جىلى "جازۋشى" باسپاسىنان "پارتيزان قاسىم قايسەنوۆ" دەپ اتالاتىن جاقسى ءبىر كىتاپ جارىق كوردى. سونىڭ ىشىندە قاسەكەڭنىڭ ۇلى — كىشى ءبىرقاتار زامانداستارىنىڭ قاتارىندا مەنىڭ دە الگى كىتاپ اتتاس وچەركىم بار. سوندا ول كىسىمەن العاش تانىسقانىم، ارالاسقانىم، قۇرالاسقانىم، ساپارلاس بولعان كەزدەرىم ءبىرشاما باياندالادى. اتاقتى پارتيزان اعامىز جايلى اڭگىمەلەردى ءوز اۋزىنان دا، وزگەلەردەن دە كوپ ەستىپ، كوپ تىڭداعان اداممىن. سىراعاڭ (سىرباي ماۋلەنوۆ)، باۋكەندەرمەن (باۋىرجان مومىش ۇلى) ءسوز قاعىستىرىپ، ادەمى ازىلدەسكەن جاراسىمدى قالجىڭدارى جايلى ءبارىمىز دە بىلەمىز. ول جايلى ءوزى دە ايتىپ، جازىپ ءجۇر.
راقىمجان قوشقاربايەۆ ەكەۋىنىڭ ءازىل-قالجىڭى نەگە تۇرادى! بىردە اۋىلدان ەكى جاقسى جولداسىم كەلە قالدى دا، قوناقۇيدەن ورىن كەرەك بولىپ، قاسەكەڭە تەلەفون سوقتىم. "جۇرە قوي"، — دەدى دە، جەتەلەپ راحاڭا ("الماتى" ءقوناقۇيىنىڭ ديرەكتورى) الىپ باردى. "سولاي دا سولاي، مىنا ساكەننىڭ ەلدەن ەكى دوسى كەلىپ قالىپتى، ءبىر جايلى ليۋكس بولمە بەرە عوي"، — دەپ جاتتى. "جوق، ەشقانداي ورىن جوق"، — دەپ راحاڭ دەگەن زار قاعىپ جولاتار ەمەس. قاسەكەڭ ەداۋىر — اق جالىندى دا، ءبىر مەزەتتە بولمە ورتاسىندا تالتايىپ تۇرا قالىپ، راحاڭا قاراتا ورىس بوقتىعىنىڭ ءبىرازىن پۋلەمەتتەن اتقانداي بوراتسىن كەلىپ. "ءجۇر، كەتتىك، — دەدى ماعان. — الماتىدا بۇدان باسقا دا ءقوناقۇي قۇرىپ قالماعان شىعار" — دەپ ەسىكتى جۇلقي اشىپ شىعا بەرىپ ەدىك.
— قاسەكە، قاسەكە، ءسال سابىر ەت. تاعى ءبىر بۇرقىراتا بوقتاپ جىبەرشى ورىسشالاپ، ەڭ جاقسى ليۋكستى بەرەيىن، — دەگەنى عوي راحاڭ ءماز بولىپ.
وسى قوناقۇيگە بايلانىستى تاعى ءبىر اڭگىمە ەسىمە تۇسەدى. قاسەكەڭە اۋىلدان كەلەم دەپ حابارلاسقان دوسىما بولەك بولمە الىپ بەرىڭىز، بۇگىن كەلمەك ەدى دەپ تاعى جالىندىم. بولادى دەپ، ءاتى-جونىن، قاشان كەلەتىنىن جازىپ الدى. قۇداي اتقاندا، الگى دوسىم كەلمەي قالدى دا، ەكى-ۇش كۇننەن سوڭ جۇمىسقا كەلسەم، جىگىتتەر: "مىنانى قاسەكەڭ تاستاپ كەتتى"، — دەپ، ءبىر بۋما قاعازداردى ۇستاتا سالدى. قاراسام، ءقوناقۇيدىڭ ەسەپ — شوتى، "ءۇش-تورت كۇنگە پالەن سوم قارىز بولىپپىز، تەز تولەڭىز"، — دەگەن سۇپ — سۋىق ەسكەرتپەسى دە بار. اجەپتاۋىر قوماقتى سوما كورسەتىلىپتى. زارەم ۇشىپ، قاسەكەڭە حابارلاسايىن. "قايت دەيسىڭ ماعان، ءقوناقۇي كەرەك دەگەن سەن، ولاردىڭ برون-سرون دەگەنى بار، ايتەۋىر بوس ۇستاپ تۇرعان ءبىر بولمەنىڭ ەكى-ۇش كۇندىك قۇنى سونداي كورىنەدى عوي. ءوزىڭ تولەرسىڭ بىردەمە ەتىپ، ايتپەسە، مەن راحىمجانعا نە بەتىمدى ايتامىن؟"، — دەيدى. كۇيىپ-پىسىپ مەن اۋرە. سويتسەم، بۇل دا ماعان ساباق بولسىن دەپ جاساعان قىرى ەكەن. ەرىنبەي-جالىقپاي، الگى قاعازداردى دايىنداپ جۇرگەن ۇلكەنگە دە، كىشىگە دە جاسايتىن كىسىلىك، ءوزى ءاردايىم ۋادەدە تۇرا بىلەتىن مارتتىكتى وزگەدەن دە تالاپ ەتۋدىڭ سونداي ءبىر جورالعىسى ەكەن. وسپاقپەن جەتكىزگەنى. كەيىن ءتۇسىندىم، ءبىراق نە ىستەرسىڭ...
3. ەڭىرەپ، ەگىلگەنىن كوردىم دەپ وتىرىك ايتا المايمىن. ەت پەن سۇيەكتەن جاراتىلعان ادام عوي، پەندە بولعان سوڭ، ونداي-ونداي دا قىلىعى بار شىعار، قايدام...
4. قاسەكەڭ تىرىسىندە وزىنە تيەسىلى قۇرمەتتىڭ ءبارىن دە كوردى، كورىپ كەلدى، ءالى دە كورە بەرەتىن بولادى. قىزمەت ەت تە مىندەت ارت ۇدەسىنەن شىعۋدىڭ ءبىر ۇلگىسى دە ءوزى. ايتپەسە، ءبىز ءتىرىنى تىرىسىندە قادىرلەۋگە جوق حالىقپىز عوي. ەڭبەگىنە وراي قۇرمەت كورمەگەن وتكەندەر دە، قۇرمەتتەلمەي كەلە جاتقان قازىرگىلەردىڭ دە ەل بيلەۋشىلەرگە وكپەسى جوق-اۋ دەپ ويلامايمىن.
5. وقتا-تەكتە قاسەكەڭمەن پرەفەرانس وينايتىنىم بار. سول كەزدە مازاقتاپ وتىرىپ، "اۋىل ءۇيدىڭ اسىق ويناپ جۇرەتىن بالالارى ەكەنسىڭدەر عوي انشەيىن" دەپ كەكەتىپ كۇلىپ وتىرىپ ۇتىپ الىپ، رەنجىتىپ جىبەردى. سودان باسقا وكپەم بولعان ەمەس. بولمايتىن دا شىعار.
6. سوڭعى كەزدە قاسىم قايسەنوۆ جايلى جازساق تا، اڭگىمە ايتساق تا، ول كىسىنىڭ سوعىستاعى ەرلىگى، جەكەباس اعالىق ونەگەسى، ءتالىمى، كىسىلىك قاسيەتى ءسوز بولادى دا، شىعارماشىلىعى قاعا بەرىس قالا بەرەدى. "پارتيزان جازۋشى" دەپ قوسىپ ايتامىز، ءبىراق جازۋشىلىعىن تۇتاس پاراقتاپ اشىپ كورسەتەر، انىق تولعاپ تانىتار ەڭبەك ازداۋ ما دەپ قالام. ەندى وسىنى دا ءبىر ەسكەرىپ كورسەك دەپ ويلايمىن.
You Might Also Like
-
ولەڭ ءسوزدىڭ ەل مويىنداپ، جۇرت تانىعان شەبەرلەرىنىڭ ءبىرى ساكەن يماناسوۆتىڭ ادەبي جولى سوناۋ وتكەن عاسىردىڭ 60-جىلداردان باستاۋ الادى. ادەبيەت تابالدىرىعىن وزىنەن ءسال بۇرىن، نە وزىمەن بىرگە اتتاعان ءۇ...
