جەتى باستى جالماۋىز
دەپۋتات بولىپ سايلانسام، پارلامەنتكە مۇشە بولسام دەيتىن، ءتىپتى ەل باسقارۋدان دامەسى بار ۇمىتكەرلەردىڭ باعدارلاماسىنا قايىرا ءبىر كوز جۇگىرىپ كورىڭىز، قالا بەردى ءوز قاسىڭىزداعى ۇلتىڭىز بەن جۇرتىڭىزدىڭ جاناشىرى قاتارىندا جۇرگەن دوس-جارانداردىڭ اڭگىمەسىن تىڭداڭىز، — بارلىعى دا ءبىر اۋىزدان بۇل كۇندە ەلىمىزدە ابدەن ەتەك الىپ بولعان كوررۋپسياعا (سىبايلاس جەمقورلىق، جەڭ ۇشىنان جالعاسۋ دەيسىز بە، باسقاشا اتايسىز با، — ءوزىڭىز بىلەسىز) قارسى اياۋسىز كۇرەس قاجەت ەكەنىن زىعىرداندارى قازانداي قايناتپاق ءسوز ەتىپ جاتادى. ول ول ما، ءتىپتى قازىنا مۇلكىنە كوز سۇعىن قاداۋعا بەيىم، سوعان مۇمكىندىگى دە جەتكىلىكتى جەمىرلەر، جەمقورلار، جىرىندىلار مەن جۇلىمىلاردىڭ وزدەرى دە ءارتۇرلى مىنبەلەردەن ايقايلاپ ايتىپ: "زاڭسىزدىقتارعا جول بەرمەۋ، قارعىس اتقىر سىبايلاس جەمساۋلاردىڭ كومەيىنە قۇم قۇيىپ، قۇلقىنىن تىعىنداۋ كەرەك" دەپ جاتاتىندارىن ەستىپ تە، كورىپ تە جۇرگەن جوقپىز با؟! ولار ءتىپتى بۇل جايلى باسقالارىمىزدان دا اسىرا، "اشىنا" ايتاتىنىن قايتەرسىڭ. كورىڭىز دە تۇرىڭىز، كۇنى ەرتەڭ سايلاۋ قارساڭىنداعى كەزدەسۋلەردە ايتىلاتىن دەپۋتاتتىقتان ۇمىتكەرلەر ءسوزىنىڭ، ۋادە-بايلامىنىڭ نەگىزگى كوزىرى دە سول ءبىر جەڭ ۇشىنان جالعاسۋعا قارسىلىق جايلى بولارى ايدان انىق. ولار جۇرت الدىنا تىر جالاڭاش شىقسا شىعار-اۋ، ءبىراق سىبايلاس جەمقورلىققا قارسى تۇرامىز دەگەن سول باياعى قۇرعاق ءسوز، جالعان ۋادەسىز اتتاپ باسا قويماسى بەسەنەدەن بەلگىلى.
بۇل جەردەگى ەڭ باستى كەسەل سول، ءتىل-جاعىنا سۇيەنىپ سۋىرىلا سويلەۋشىلەردىڭ وزدەرى دە، ولاردى "ۇيىپ تىڭداپ" وتىرعان بىلايعى كوپشىلىكتىڭ ءبىرازى دا "وسىنىڭ ءبارى مۇمكىن-اۋ" دەگەن ويعا يلانۋعا بەيىم، وكىمەتتىڭ قولى ۇزىن، ۇرى-قارىڭدى تىرپ ەتكىزبەي جەگەنىن جەلكەسىنەن شىعارىپ ءبۇرىپ ءبىر بەرەر، "ءاي، بالەم، سوندا..."
ءيا، سوندا نە بولا قويار دەپ ويلايسىز؟ ارعىسىن ايتپاعاندا، ەگەمەن ەل بولعالى بەرگى تاريحىمىزعا عانا ءۇڭىلىپ كورىڭىز، قازىنا مۇلكىنە سۋىق قولىن سۇققانداردىڭ بەتىنە قارا كۇيە جاعىپ، اعاش اتقا تەرىس مىنگىزەردەي سىنادىق، قۇلاتتىق، جىلاتتىق، اششى ءتىلىمىزدى سۇقتىق، ءبىرازىن تۇرمەگە دە تىقتىق. ۇرى-قارىعا ءبىرجولا تيىم سالا الدىق پا، ءبىراق؟ قوعام ءىشىن ابدەن جاۋلاپ العان وسىناۋ ءبىر سوزىلمالى دەرتتەن از دا بولسا ايىقساق كەرەك ەدى. تۇيىردەي بولسا دا ايتەۋىر ساباق الار ناتيجەسى بولسا كەرەك ەدى. جوق، تيىم دا جوق، ساباق، بولار ناتيجە دە جوق. ورىسشا ايتار بولساق، ءولى كۇنگە تاس قاراڭعى ۇيدە كومىردەي قارا مىسىقتى قۋالاپ جۇرگەن سىڭايىمىز بار. بيلىك باسىندا ۇرى-قارى كوبەيىپ كەتكەنىن، كەز كەلگەن ۋاقىتتا كەز كەلگەن ءىرى شەنەۋنىكتى جاۋاپقا تارتۋدىڭ دالەلى بارى جايلى وزگە ەمەس، ەل پرەزيدەنتىنىڭ، ءوزى ايتقان. ءبىراق سول جەڭ ۇشىنان جالعاسۋ، پاراقورلىق، جەمقورلىقپەن (ماسەلە اتىڭدا ەمەس، زاتىڭدا) كۇرەس ەشقانداي ناتيجە بەرمەي كەلەدى. ەسەپتەن ۇتىلمايتىن، ەشقاشان تۇتىلمايتىن جەمىرلەر كوبەيگەن ۇستىنە كوبەيە تۇسۋدە. قانشاما ءسوز، قانشاما قارجى جەلگە ۇشتى. كۇرەسەمىز دەگەن قارەكەتتىڭ ءبارى بوس دالباساعا اينالىپ بارادى. ەندەشە، جۇرتتى بەكەرگە ەمەكسىتىپ، ەلەڭدەتە بەرمەي، وسى ءبىر شارۋانى ءبىرجولا جىلى جاۋىپ قويساق تا بولا ما، قالاي؟
مەن ۇرى-قارىلارعا، اسىرەسە جەڭ ۇشىنان جالعاسىپ، ەل بايلىعىن سۇلىكتەي سوراتىن قاناعاتسىز قارىن، ىندىنى كەپكەن وبىرلارعا قارسى كۇرەستى مۇلدەم توقتاتايىق دەپ وتىرعان جوقپىن. كۇرەسۋ كەرەك بولعاندا قانداي، ءتىپتى باسقاسىن بىلاي قويعاندا، قوعام مۇلكىنە قول سۇققاندار اۋىر جازالانۋعا ءتيىس دەيتىن قىلمىستى ىستەر كودەكسى دە قاتاڭ ساقتالۋى كەرەك ەمەس پە. وعان قوسا حالىق تا ءوز مەملەكەتىنىڭ قول قۋسىرىپ بەكەر قاراپ وتىرماعانىن، ءبىرجولاتا قۇردىمعا كەتىرە قۇرتا الماسا دا، ۇرى-قارىنى اجەپتاۋىر اۋىزدىقتاي الاتىنىن كورىپ، "الدا رازى بولسىن" ايتىپ وتىرماس پا ەدى.
ءبىراق جوعارىدا ايتقانداي، شەگىنەن شىعا اسقىنىپ، ەم قونباس سوزىلمالى دەرتكە اينالعان سىبايلاس جەمقورلىققا بۇل دا داۋا بولىپ جارىتپاق ەمەس. از كۇنگە عانا بەبەۋ قاقتىرا سىزداعانى باسىلىپ، كوز شىرىمىن الدىرۋعا عانا جارار جاراسا. جەتى باستى جالماۋىزدىڭ ءبىر باسىن عانا شابارمىز، قالعان التاۋى بۇرىنعىدان دا اششى ىزامەن قوماعايلانا تۇسەرى، وبىرلىق-جەمىرلىگىن ۇدەتە تۇسەرى حاق.
م.ە.سالتىكوۆ-ششەدرين بە، جوق سول دەڭگەيلەس ورىس بىرگىرلەرىنىڭ باسقا بىرەۋى مە، ەسىمە تۇسىرە الماي وتىرمىن، ايتەۋىر: "يا نە سكاجۋ، چتو ۆسە گوسچينوۆنيكي كازنوكرادى، ا ۆسە كازنوكرادى — گوسچينوۆنيكي، چتو توچنو!" — دەگەنى بار ەدى. قازاقشالاساق — "مەملەكەتتىك شەنەۋنىكتىڭ ءبارى قازىناعا قول سۇعار ۇرى-قارى دەپ ايتا المايمىن، ال ءبىراق قازىناعا قول سۇعار ۇرىنىڭ ءبارى — مەملەكەتتىك شەنەۋنىك ەكەنى انىق" بولىپ شىعار ەدى.
وكىمەت جاعى بىلە مە، جوق پا، قايدام، ال ءبىزدىڭ كوبىمىز سول شەنەۋنىكتەردىڭ جەمىرلىگى نەگىزىنەن زاڭدى تۇردە، تولىق زاڭداستىرىلعان تۇردە جۇزەگە اساتىنىن بايقاي بەرمەيمىز. قازىرگى تاڭداعى كرەديت، ليزينگ، تەندەر، ليسەنزيا، بيۋدجەتتىك قارجىنى بولۋ، ءارتۇرلى مەملەكەتتىك تاپسىرىستار، ءتۇرلى دارەجەدەگى جەڭىلدىك، اينالىمداعى جىلجىمايتىن مۇلىكتەر ءتۇپقازىعى نەگىزىنەن سول شەنەۋنىكتەر قولىندا، جوعارى دەڭگەيدە زاڭداستىرىلعان، قانداي قۇيتىرقىعا بارىپ، ءارى قاراي قالاي بۇرمالايمىن دەسە دە ءوز ەركىندە، قولىن قاعار، جولىن بوگەر ەشكىم جوق. سونى جەتە مەڭگەرىپ العان، "قايدان قۇلاق شىعارۋدى"ءوزى عانا بىلەتىن شەنەۋنىك وزىنە جۇكتەلگەن رەسمي مىندەتىن "ابىرويلى" وتەۋمەن بىرگە، قاي جەردە قالاي جىمقىرىپ قالۋعا بولاتىنىن، قاي تۇستا جاۋىردى جابا توقىپ، جاسىرىنا ءبىلۋدى دە مەڭگەرىپ الادى. سىرت كوزگە ونىكى ۇرلىق تا ەمەس، ويتكەنى زاڭ جۇزىندە ءبارى دۇرىس. سوندىقتان دا ۇرى-قارى شەنەۋنىكتى ۇستاۋ دا وڭاي بولا قويمايدى، ولار دا "ۇستالماعان ۇرى ەمەسىن" بىلگەن سوڭ، ەشتەڭەدەن، ەشكىمنەن ايىلىن دا جيمايدى، سىناپتاي سىرعىپ قولعا دا تۇرمايدى. جىمقىرا بىلمەيتىندەرگە مۇسىركەي قارايدى.
ايتالىق، مەن جاسى ءبىرازعا كەلگەن قازاقتىڭ اقىنىمىن. ءاتى-جونىم دە اينالاما ءبىرشاما بەلگىلى شىعار-اۋ دەپ ويلايمىن. سويتە تۇرا 5 ادامدىق وتباسىممەن بىرگە كووپەراتيۆتىك 3 بولمەلى پاتەردە (كەڭەستەر وداعى كەزىندە ساتىپ العانمىن) تۇرىپ جاتىرمىن. ايتارعا دەمەسەڭ، تارلاۋ، ارينە. ايەلىمىز ەكەۋمىز ۇيىقتايتىن قۋىقتاي بولمەنىڭ ءبىر بۇرىشىندا جازۋ ستولىم ءتۇر. ءتۇننىڭ ءبىر ۋاعىڭدا جازۋدان شارشاڭقىراپ كەرىلىپ-سوزىلىپ وتىرعاندا جارىقتان بەتىن كولەگەيلەپ قويىپ، شىرت ۇيقىدا جاتقان ايەلىمە شىنتاعىم ءتيىپ كەتىپ، سوگىس ەستيتىن كەزدەرىم دە از ەمەس. ءبىراق امال قانشا، باسقاداي بارار جەر، باسار تاۋ جوق.
ال بەسىكتەن بەلى جاڭا شىققان دەرلىك، ءبىراق الدەنە سەبەپتەرمەن مەملەكەتتىك قىزمەتكە ەرتەرەك ىلىككەن 25-35 جاستىڭ و جاق، بۇ جاعىنداعى جىگىتتەر پاتەردەن پاتەر اۋىستىرىپ جاتادى. ەبىن تاۋىپ، ەسەبىن تۇگەندەپ اينالاسى ات شاپتىرىم، اۋلاسى اۆتوكولىككە تولى ساراي سالدىرىپ الادى.
ۇيىندە ەكى-ۇشتەن ءۇي قىزمەتكەرىن، اسپاز، باعبان ۇستايدى. جۇرتتىڭ ءبارى كورىپ-بىلىپ وتىر-اۋ دەپ قىمسىنبايدى. ولاردى ءبىر قاراعاندا "ۇرلىق ءتۇبى — قورلىق" دەپ بىلەتىن بىرەن-ساران ارى تازا، اق ادال قىزمەتكەردەن اجىراتىپ الۋ دا قيىن. سىرتقا سىرىن بىلدىرمەي، مايلى مۇرتىن ءبىر سىيپاپ قويىپ، ەركىنسىپ جۇرە بەرەدى. "يەكتەگى ساقالىن نادان بولىپ وسىرگەن" بىزگە تاناۋ شۇيىرە توبەدەن قارايدى. اسىرەسە سوت، پروكۋراتۋرا جاعىندا جۇرگەندەردىڭ تال تاڭى شەكتەن شىعىپ بارادى. اتاسىنان مۇراعا قالعان دا تۇگى جوق، ايلىعى دا جۇرت قاتارلى عانا بولۋى مۇمكىن. سوندا ولار قاراجاتتى قايدان الادى؟ قايدان الاتىنىن ءسىزدىڭ ءىشىڭىز سەزەدى، ارينە، وزدەرى دە جاقسى بىلەدى، ءبىراق ايىل جيا قويمايدى.
قازاق ءۇشىن ۇرلىقتان اسقان سوراقىلىق جوق ەدى ءبىر كەزدە. باسقا امالى قۇرىعاندا ولگەن مالدىڭ ەتىن جەسە جەر، ال ۇرلىق مالدىڭ ەتىن جەمەيتىن ەدى ءبىزدىڭ قازاق. بالا-شاعانى دا سول ءبىر ۇلتتىق، بەكزات قاسيەتتى بويىنا سىڭىرە وتىرىپ تاربيەلەيتىن ەدى. ءقازىر ىشىپ-جەم، مىنەر كولىك، كيەر كيىم، باسپانا، — ءبارى دە ۇرلىقپەن كەلىپ جاتقانىن بەسىكتەگى بالا دا بىلەدى، ۇلكەندەرىنىڭ ەتى ۇيرەنىپ كەتكەن. ولاي بولسا، ەل ىشىندە ۇرى-قارىنىڭ كوبەيۋى باقىلاۋدىڭ جوقتىعىنان نەمەسە وسالدىعىنان، جازانىڭ اۋىر-جەڭىلدىگىنەن ەمەس، قازىرگى ەرەجە-ۇستانىمنىڭ تەحنولوگيالىق السىزدىگىنەن ەتەك الىپ وتىر دەپ ءبىلۋ كەرەك.
بۇل السىزدىكتى دە كەزدەيسوقتىققا اپارىپ تەلي سالۋ قيىن. ءبارى دە ارىدەن ويلاستىرىلعان، سول شەنەۋنىكتەردىڭ ءوز قولدارىنان وتكەن زاڭعا نەگىزدەلە قۇرىلعان. ويتكەنى ءالى دە سول باياعىشا بىردە-بىر مەملەكەتتىك ۇستانىمنىڭ شەنەۋلىكتىڭ تىكەلەي ارالاسۋىنسىز شەشىلمەۋ جاعى جەتە قاراستىرىلعان، سول قاعيدا ءالى دە قاتاڭ ساقتالۋمەن كەلەدى.
سىبايلاستىق اتالاتىن جەتى باستى جالماۋىزبەن كۇرەسۋ ءۇشىن قۇر ايقاي، جەڭ ىشىنەن جۇدىرىق كورسەتە جاپپاي كىجىنۋ ازدىق ەتەدى. ودان گورى قۋاتتىراق باسقا امال، الۋەتتى ءادىس قاجەت سياقتى. ويتكەنى شەنەۋنىك بار جەردە سىبايلاستىق قوسا جۇرەدى. كەز كەلگەن شەنەۋنىكتىڭ وزىندىك زاڭدى قۇقىعىن پايدالانا وتىرىپ، ءوز دارەجەسىنە لايىق كەز كەلگەن ۋاق-تۇيەك ماسەلەنى شەشۋگە ءتيىس جەردىڭ بارىندە ول ءسات سايىن، ساعات سايىن تۋىنداپ، قاۋلاپ ءوسىپ-ونىپ، جەتىلە، جەتىسە ءتۇسىپ وتىرادى. ەندەشە شەنەۋنىكتىك ۇرلىقپەن كۇرەستە جازانىڭ اۋىر-جەڭىلى پالەندەي باستى ءرول اتقارماسا كەرەك. بۇل جەردە زاڭدىق كۇشى بار جالپى ەرەجە-تارتىپ اتاۋلىنىڭ قاي-قاشان مۇلتىكسىز ساقتالۋىن قاتاڭ قاداعالاۋدان وزگە ءتيىمدى جول كورىنىپ تۇرعان جوق. ونداي باقىلاۋدىڭ تۇپكى ماقساتىنىڭ ءوزى شەنەۋنىك بىتكەننىڭ "ايتتىم — ءبىتتى، كەستىم — ۇزىلدىگە" ساياتىن "ءوزىم بىلەمىنە" تيىم سالۋ، تيىم سالا الماعانىنىڭ وزىندە بەلگىلى ءبىر كەزەڭگە تەجەي ءتۇرۋ دەپ بىلگەن ءجون. كەز كەلگەن ساپاداعى، كەز كەلگەن كولەمدەگى الىس-بەرىس، اكتيۆ اينالىمىنىڭ تاعدىرىن شەشۋ تەك قانا بەلگىلى ءبىر شەنەۋنىكتەر قولىندا بولماۋىن قاراستىرۋ كەرەك. ولاردىڭ اشكوزدىگىن وياتىپ، مەشكەيلىگىن ۇستەي تۇسەر جولدى قايتكەندە تارس بەكىتىپ، سىنالاي كىرەر تەسىك بىتپەندى تارىلتپاي بولمايدى. ۇلكەن بە، كىشى مە، ايتەۋىر امىر-بيلىك قولىنا تيگەن شەنەۋنىك زاڭدىق كۇشى بار قۇقىعىن پايدالانا وتىرىپ بىلايعى ۇرى-قارىمەن بىرگە ءوزى دە كەرەگىنشە قارپي اساپ قالۋعا تىرىسارى بەلگىلى. ونىڭ ءبىرى كوپە-كورنەۋ كوزگە ۇرىپ تۇرسا (قولىنداعى بيلىكتى قالاي پايدالانامىن دەسە دە ءوزى ءبىلىپ، ءبارىن ءوز ىڭعايىنا قاراي بيلەپ-توستەۋى)، ەندى ءبىر قىرىن ءبىز كورمەيمىز دە بىلمەيمىز. سودان بارىپ ۇرى-قارىنىڭ ارانى اشىلا تۇسەدى، كەلە-كەلە ءوز قۇلقىنىنىڭ قۇلىنا اينالادى. ونىڭ ەندىگى تۇيەنى تۇگىمەن جۇتار كەڭسابا كەڭىردەگىنەن نە ءوتىپ، نە قويىپ جاتقانىن ءبىر ايىرسا تەك زاڭدى بەس ساۋساقتاي بىلەتىن كانىگى كاسىپكەر، كوپتى كورگەن كونەكوز زاڭگەر عانا انىقتاپ بەرە الادى. ءبىز تەك سىرتتان جورامالداۋمەن تىنامىز. بيلىك باسىندا ەكى-ۇش جىل بولعان مەملەكەتتىك شەنەۋنىكتىڭ باياعى 12 قاقپالى بۇحارا قاقپاسىنداي تاس قامال قورشاۋ ىشىندەگى ءۇش قابات، بەس قابات ءۇيىن كورىپ كۇيىنىپ، تالتاڭ-تالتاڭ جۇرىسىنە كىجىنە قاراۋمەن شەكتەلىپ قالا بەرەمىز. سونداي شەكتەن شىعۋشىلىقتى تەزگە سالىن وتىرار، اسقانعا توسقان بولار دەيتىنىمىز — رەسپۋبليكا پارلامەنتى ەدى. وندا دا ءقازىر كەشەگى وبكوم حاتشىلارى، بەرتىندەگى اكىمدەر، مينيستر، قالتاسى قالىڭداعان قوماعاي شەنەۋنىكتەر وتىر. "قارعا قارعانىڭ كوزىن شۇقىمايدى" دەيتىن ورىس ماقالىن ولار بىزدەن گورى جاقسى بىلەدى، جەرىنە جەتە مەڭگەرگەن. ەگەر پارلامەنت تەك قانا ساڭلاق تۋعان ساناۋلى جاقسىلاردان، قارا قىلدى قاق جارار اق ادال تۋرا بيلەردەن تۇزىلسە، مەملەكەتتىك قىزمەتكەرلەر ءبىر جاعى سولاردىڭ باقىلاۋىنا تاۋەلدى بولسا، پارلامەنت ەل ىسىنە جەدەل دە ءجىتى ارالاسىپ وتىرسا، جۇرت ۇستىنەن كۇن كەرەتىن قۋلارمەن كۇرەس تە بەلگىلى ءبىر ارناعا ءتۇسىپ، جاقسى ناتيجە بەرە باستار ەش. مەملەكەت، ارينە، ءوز شەنەۋنىكتەرىنىڭ ەل ءىشىنىڭ، ەل ءىسىنىڭ ءبارىن قامتىرلىق قاۋقارلى بولۋىن قالايدى، اناعان دا، مىناعان دا سولار باس-كوز بولسا دەيدى. سودان ولاردىڭ سانىن دا كوبەيتىپ، جالاقىلارىن دا ۇستى-ۇستىنە كوتەرىپ، اسپەتتەپ-اق جاتىر. بۇل كۇندە كەيبىر دارەجەدەگى مەملەكەتتىك شەنەۋنىكتەردىڭ ايلىق اقىسى 2-3 مىڭ اقش دوللارى مولشەرىندە، بۇل دا بولسا ولاردىڭ جەڭ ۇشىنان جالعاسىپ، وندى-سولدى جىمقىرعاندارىن، قوعام مۇلكىنە قول سۇعۋىن قويار ما دەگەن نيەتتەن تۋىنداعان بولسا كەرەك. ءبىراق ءبىر اشى.لىپ العان اران وعان بولا تويىم كورىپ، تولاتىن با ەدى. قولدان كەلىپ تۇرعاندا قونىشتان باسىپ، زاڭنىڭ ءوزى مۇمكىندىك بەرىپ تۇرعاندا قاربىتا اساپ قالماي بولا ما!
امال نە، ازىرگە ءبىزدىڭ قوس پالاتالى پارلامەنت ەل مۇددەسى ۇدەسىنەن شىعا الماي جاتىر. ونى ءبارىمىز دە كورىپ، ءبىلىپ وتىرمىز. پارلامەنتتە قابىلدانعان، قارالىپ جاتقان زاڭداردىڭ كوبى سول قولىندا امىر-بيلىك بار شەنەۋنىكتەردىڭ قاربىتا اساپ قالۋى، اساي بەرۋى ءۇشىن ادەيى ويلاپ تابىلعان سياقتاناتىنى بار. وعان مىسال ىزدەپ اۋرە بولۋدىڭ قاجەتى دە جوق، سول جەر تۋرالى كودەكس، جەكەشەلەندىرۋ جونىندەگى جاڭا قاۋلى-قارارلار، ۆاليۋتالىق باقىلاۋ دەيسىڭ بە، ايتەۋىر ءبارى دە جايىن اۋىز، كەڭ قۇرساق شەنەۋنىكتەردىڭ ۇڭگىپ اساپ جەي بەرۋىنە قولايلى جاعداي تۋعىزىپ-اق تۇر.
...قالتاسىندا كوك تيىنى جوق سىپايى سىرداڭ ءبىر جىگىت قىزبەن قىدىرىپ كەلە جاتسا كەرەك. قىز بالا جىگىتىنە نازدانىپ: "تاكسي ۇستاشى، شارشادىم" دەمەسىن بە. جىگىت تاكسي ۇستاماق بولىپ قىزى تۇرعان جاقتاعى قولىن كوتەرەدى ەكەن دە، ەكىنشى قولىمەن توقتاي بەرگەن تاكسيگە "كەتە بەر، توقتاما!" دەپ ىمدايتىن كورىنەدى.
تۋرا سول سياقتى ءبىزدىڭ ءقادىرلى وكىمەت تە ءبىر قولىمەن جەتى باستى جالماۋىزدى (سىبايلاس جەمقورلىق) قۇرتپاق بولىپ ارەكەتتەنەدى دە، ەكىنشى قولىمەن ونىڭ امان-ەسەن قالىپ، جەمساۋىن تىعىنداي بەرۋىنە كەرەك جاعدايدىڭ ءبارىن جاساپ، وت پەن سۋىن مولايتىپ، ءورىسىن كەڭەيتە ءتۇسىپ كەلەدى. ەندەشە جەتى باستى جالماۋىزدىڭ ازىرگە قاۋىپتەنەر تۇگى جوق، الاڭسىز عانا جاساي بەرەدى، قوماعايلانا قاربىتىپ اساي بەرەدى...
You Might Also Like
-
تۋعان جەر قاي پەرزەنتىنە ىستىق ەمەس، جۇرتتىڭ ءبارى سەكىلدى ءبىز دە ءوزىمىز تۋىپ-وسكەن ولكەنىڭ، كىر جۋىپ، كىندىك كەسكەن ءوڭىردىڭ تۇرلەنە تۇلەپ، گۇلدەنە ءتۇسۋىن تىلەيمىز. تىلەپ قانا قويماي، قولىمىزدان كەل...
-
ولەڭ ءسوزدىڭ ەل مويىنداپ، جۇرت تانىعان شەبەرلەرىنىڭ ءبىرى ساكەن يماناسوۆتىڭ ادەبي جولى سوناۋ وتكەن عاسىردىڭ 60-جىلداردان باستاۋ الادى. ادەبيەت تابالدىرىعىن وزىنەن ءسال بۇرىن، نە وزىمەن بىرگە اتتاعان ءۇ...
