InfoHub Logo

جاس جازۋشى گۇلجاۋھار سەيىتجانوۆانىڭ نوۆەللالار جيناعى وسىلاي دەپ اتالادى. كىتاپقا ەنگىزىلگەن ون التى نوۆەللا بۇگىنگى ءومىرىمىز، ەڭبەك ادامدارى، زامانداستارىمىز، ول اردىڭ، ارمان قيالى، ماقسات-مۇددەسى، ازاماتتىق ادامگەرشىلىگى، ءوزارا قارىم-قاتىناسى، سىرباز سەزىمى، ءمولدىر ماحابباتى، كىسىلىك پەن كىشىلىك، جاقسىلىق جايىندا جان-جاقتى ماعلۇمات بەرەدى. ءار نوۆەللانىڭ كەيىپكەرى ءوزىن كۇندە كورىپ جۇرگەن، كوڭىلىندە ۇيالاعان سىرلاسىنداي. ءبارى دە مەرەيلى ماڭعىستاۋدى مەكەن ەتكەن مەيىربان جاندار، اقپەيىل دە اياۋلى انالار. ماسەلەن، كىتاپتىڭ بەتاشارى "رۇقسات قاعاز" نوۆەللاسى اكە مەن پەرزەنت اراسىنداعى قارىم-قاتىناس، سەزىم تۇيسىك، كەيبىر ءومىر قيىندىعى، وقىرمانعا شىنايى، نانىمدى كۇيدە ۇسىنا بىلگەن. نوۆەللانى وقي وتىرىپ، ومىردە كەزدەسەتىن بۇنداي جايتقا گۇلجاۋھاردىڭ ەرەكشە كوڭىل اۋدارىپ، ادام جانىپ، ونىڭ ىشكى دۇنيەسىنىڭ قالتارىستارىن قاعىس جىبەرمەي تۇسىنە بىلەتىنىن پاش ەتكەندەي. نوۆەللانى سۇيسىنە وقىپ شىعاسىڭ. ال "ماحاببات" نوۆەللاسىندا گۇلجاۋھار سەمياداعى ەرلى-زايىپتىلار اراسىنداعى كەيبىر كەلەڭسىز جايلاردىڭ وقىرمانىنا وي سالا جەتكىزە بىلگەن. سونىڭ ىشىندە جاعىپاردىڭ ەكىنشى كەلىنشەگى مايرانىڭ كەيبىر وعاش قىلىقتارى، تۇرپايى سەزىمدەرى، ادامگەرشىلىكپەن سىيىسپايتىن پەندەشىلىگى، ءوز باسىن جوعارى باعالاپ، وزگەنىڭ جاقسىلىعىن جەتە كورە الماۋى، اقىرى زامانداس قۇربىلارىنىڭ جەتكىزە بىلگەن شىنايى سەزىمى، اسەرلى اڭگىمەسى ارقىلى ادامگەرشىلىكتىڭ، سىيلاستىقتىڭ سىپايى سىرلارىن كەشتە بولسا ۇعىمدى ۇعۋمەن اياقتالۋى نانىمدى شىققان. جاسىراتىنى جوق، مايرا سياقتى ازاماتتىڭ ازاماتتىعىن، ونىڭ تۋىسقاندارىن سىيلاي بىلمەيتىن قۇربىلار ءبىزدىڭ قاتارىمىزدا جوق پا؟ وي جۇگىرتىپ، توڭىرەگىنە زەر سالساڭ، جوق ەمەس ەكەنى بايقالادى. دەمەك، بۇل گۇلجاۋھار ءار نوۆەللاسىن ءومىر شىندىعىنان الىپ جازعاندىعىنىڭ ايقىن ايعاعى. ونىڭ "تۋعان جەر توپىراعى"، "ۇلدىڭ ورنى"، "اجە مەن اق بوتا"، "ۆاديم" تاعى باسقا نوۆەللالارىن تەبىرەنبەي، جانىڭمەن سۇيسىنبەي وقۋ مۇمكىن ەمەس.

گۇلجاۋھار نوۆەللالارىنىڭ كەيىپكەرلەرى قاراپايىمدىلىعىمەن، قايىرىمدىلىعىمەن، ەڭبەكقورلىعىمەن، ۇلكەن كىشىنى سىيلاي بىلەتىندىگىمەن ەرەكشەلەنەدى. كىتاپتىڭ سوڭىنداعى "ءوز وشاعىڭنىڭ ءتۇتىنى" اتتى نوۆەللانى الايىق — ادامدار اراسىنداعى پسيحولوگيالىق قاقتىعىس، ورىنسىز ىستەن وپىق جەگەن، ويناقتاپ ون سەگىزىندە وت باسقان جاس كەلىنشەكتىڭ باسىنداعى قيىن حال. وزگە جۇرتتان كورمەگەن وگەيلىكتى ءوز ىنىسىنەن كورگەن كەلىنشەك ارمان ماقساتىن العى كۇندەرگە ارتقانداي بولادى. اناسىنىڭ تىلىنە ەرىپ ەرى ولىسىمەن قىرىق كۇندىگىنە دە شىداماي ءوزىنىڭ ماڭگىلىك وشاعىن، ەگدە تارتقان اتا-ەنەسىن جەرگە قاراتىپ جاس بالاسىن باۋىرىنا باسىپ توركىنىنە تارتىپ بەرگەن كەلىنشەك بۇنداي ءومىر قيىندىعىنا، تۋعان ءىنى تەگەۋرىنىنە تاپ بولامىن دەپ ويلادى دەيسىڭ بە؟ استە ويلاماعان شىعار. الايدا جازۋشىنىڭ قاي نوۆەللاسىن وقىساڭ دا، ونىڭ كەيىپكەرلەرى ءومىر ءمانىن كوڭىل كوزىمەن كورە ءبىلىپ، ءتۇسىنىپ، جاقسىلىققا قاراي بەتبۇرىس جاساپ، العى كۇندەرگە اسقاق قاراي بىلەدى. بۇل قاشان دا جاماندىقتى جاقسىلىق جەڭەدى دەگەن ادامزات جاراتىلعالى سىننان ءوتىپ كەلە جاتقان شىنايى سەزىم. بۇرىن تىم ءتاۋىر ولەڭدەرىمەن وقىرماندارىن سۇيسىنتە بىلگەن گ.سەيىتجانوۆا بۇل جولى ۇسىنعان پروزالىق كىتابىمەن دە كوڭىلگە قۋانىش ۇيالاتىپ وتىر. اۆتورعا ءسات ساپار.

قوناش قالدىورازوۆ 1987 جىل

---