InfoHub Logo

30 جىلدىق مەرەيتويىن اتاپ ءوتىپ جاتقان «حابار» تەلەارناسى وسى كۇزدە كورەرمەندەرىنە جاڭا جوبالار مەن ەرەكشە تەلەشوۋلار ۇسىنادى. ۇلتتىق قۇندىلىقتاردى دارىپتەپ، قوعام ماسەلەلەرىن تالقىلايتىن باعدارلامالار جانە الەمدىك دەڭگەيدەگى تانىمال جوبالار ارنانىڭ 30-ماۋسىمىنىڭ باستى ەرەكشەلىگى بولماق.

«The Voice قازاقستان» – باستى جوبا

جاڭا ماۋسىمنىڭ ەڭ ءىرى جوباسى – الەمدە جوعارى رەيتينگكە يە مۋزىكالىق شوۋ «The Voice قازاقستان». تانىمال جوبا وتاندىق ەرەكشەلىكتەرگە بەيىمدەلىپ، جاڭا فورماتتا ۇسىنىلماق.
جۇلدىزدى تالىمگەرلەر:

• مەيرامبەك بەسبايەۆ

• بايان الاگوزوۆا

• باعىم مۇحيتدەنوۆا

• بايعالي سەركەبايەۆ

• TURAR

شوۋ كورەرمەندەرگە جاڭا جۇلدىزداردىڭ تۋىنداۋىن، شىنايى ەموسيالار مەن ۇمىتىلماس ساتتەردى سىيلاۋدى ماقسات ەتەدى.

ايتىستىڭ جاڭا فورماتى

كۇزدە ايتىس ونەرى جاڭا تەليەۆيزيالىق فورماتتا ەكرانعا قايتا ورالادى.

• «جەكپە-جەك ايتىس» جوباسىن ايتىسكەر امانجول ءالتاي جۇرگىزەدى.

• قاتىسۋشىلار قاتارىندا: بەكارىس شويبەكوۆ، جانسايا مۋسينا، مۇحتار نيازوۆ، ايبەك قالييەۆ، ماقسات احانوۆ.

• جوباعا «Magnum» كومپانياسى دەمەۋشىلىك ەتەدى.

• ال «التىن دومبىرا» يەگەرى مەيىربەك سۇلتانحان «ايتىس ايناسى» باعدارلاماسىندا ايتىسكەرلەردىڭ سىرىن اشاتىن بولادى.

جاڭالىقتار مەن جاڭا باعدارلامالار

قىركۇيەكتەن باستاپ «حابار» جاڭالىقتارى كۇنىنە ءتورت رەت ەفيرگە شىعىپ، بارلىق سيفرلىق الاڭداردا قولجەتىمدى بولادى. ارنا تەك اقپارات بەرىپ قانا قويماي، ماڭىزدى وقيعالارعا تەرەڭ تالداۋ جاسايدى.

جاڭا جوبالار قاتارىندا:

• «نەوسانا» – عىلىم مەن تەحنولوگيا جەتىستىكتەرىنە ارنالعان باعدارلاما.

• «ءومىر ورنەگى» – دانا نۇرجىگىت جۇرگىزەتىن ەرەكشە تۇلعالاردىڭ ءومىرىن تانىتاتىن جوبا.

• «قوعام پىكىرى» – قوعامدىق-ساياسي توك-شوۋ، اشىق پىكىرتالاس الاڭى.

تانىمال تەلەحيكايالار

كورەرمەن سۇيىكتى سەريالدارىن دا تاماشالاي الادى. تانىمال «كەلىنجان» تەلەحيكاياسىنىڭ 6-ماۋسىمى جاڭا قىزىقتى وقيعالارىمەن جالعاسادى.

30 جىل بويى قازاقستاندىقتاردى ساپالى كونتەنتپەن قامتاماسىز ەتىپ كەلە جاتقان «حابار» ارناسى مەرەيتويلىق ماۋسىمىندا كورەرمەنىن جاڭا ەموسيالار، ۇلتتىق قۇندىلىقتارعا قۇرمەت جانە قىزىقتى تەلەجوبالارمەن قۋانتپاق.