InfoHub Logo

"جاقسى ءسوز - جارىم ىرىس". وسى ناقىلدى كۇندە ەستيمىز عوي، شىنىندا. ءبىراق، ءبىر وكىنىشتىسى، بايىبىنا بارا بەرمەيمىز. ءبىر ساتسىزدىككە ۇشىراي قالساق، ومىردەن ءتۇڭىلىپ، دۇنيەدە باردىڭ ءبىرىن قالدىرماي تىلدەپ وتىرعانىمىز سوسىن...

ال ءسىز ءالى كۇنگە دەيىن ءسوزدى قۇدىرەتتى دەگەنگە سەنبەيسىز بە؟ ەندەشە ءوز باسىمنان وتكەن مىنا وقيعامەن بولىسەيىن.

8-سىنىپتا ت.اۋباكىروۆ اعامىزدىڭ سۇقباتتارىن ءجيى وقيتىنمىن. سودان ەرەكشە اسەر الىپ، عارىش تۋرالى ولەڭ جازدىم. "عارىش، عارىش، ۇشىپ كەتسەم دۇنيەنى سىلكىندىرىپ" دەپ باستالاتىن.

ارادا 2 جىل ءوتتى. جازعى دەمالىستا ەدىم. جۇمىسىندا وتىرىپ، انام قوڭىراۋ سوقتى. "الماتىعا لاگەرگە بارعىڭ كەلە مە؟"دەيدى. قۋانا-قۋانا كەلىستىم. جولعا دايىندىق باستالدى.

الماتىعا دا جەتتىك. ومىرىمدە ءبىرىنشى رەت كەلۋىم. اسپانمەن تالاسقان اق باستى تاۋدى كورىپ، اۋزىم اشىلىپ قالدى. قۇددى ءبىر كارتينا دەرسىڭ. تەك تابيعات سۋرەتشىنىڭ قولىنان شىقتى دەمەسەڭ، ءبىز كورىپ جۇرگەن سۋرەتتەردەن ءبىر دە ءبىر ايىرماشىلىعى جوق.

كوپ وتپەي قالا سىرتىنداعى قالاشىققا كەلىپ، ورنالاستىق. كەلگەننەن سوڭ ءمان-جايدى بىلسەك، ەشقانداي دا لاگەر ەمەس ەكەن ول جەر. ءبىز "رەسپۋبليكالىق جاس عارىشكەرلەر مەن استرونومداردىڭ 1-سلەتىنە" كەلگەن ەكەنبىز. 

جاراتىلىستانۋ باعىتىنداعى عىلىمدارعا مۇلدە بەيىمىم جوق مەنىڭ مۇندا قالاي تاپ بولعانىم وزىمە دە بەيمالىم بولدى سول ساتتە. سويتسەك، ءبىزدى جىبەرگەن وبلىستىڭ ءوزى ءىستىڭ انىق-قانىعىنا كوز جەتكىزىپ جاتپاي، ءىرىلى-ۇساقتى سايىس-جارىستاردا كوزگە ءتۇسىپ جۇرگەن وقۋشىلاردى جىبەرە سالعان ەكەن.

ءسويتىپ، مەنىڭ الماتىداعى العاشقى ون كۇنىم ەستەن كەتپەستەي بولىپ ءوتتى. وبسەرۆاتوريادا بولدىق. جۇلدىزدى اسپاندى باقىلادىق. ەڭ كەرەمەتى، تەلەسكوپپەن عالامشارلاردى تاماشالادىق.

ەندى مەنى سوناۋ الىستان مۇندا ەرتىپ كەلگەن نە دەيسىز عوي؟ ءسوز قۇدىرەتى. وسى وقيعا بولاردان 2 جىل بۇرىن جازىلعان عارىش تۋرالى ولەڭىم. شىنىندا، استرونوميادان مۇلدە بەيحابار مىنا مەنىڭ ول جەرگە قالاي تاپ بولعانىم تاڭعاجايىپ ەمەس پە؟..

حافيز ايتادى: "ءسىزدىڭ ءسوزىڭىز ءسىز سونىڭ ىشىندە تۇراتىن ۇيىڭىزگە اينالادى". سوندىقتان، سوزىمىزگە اباي بولايىق، تەك جاقسى نارسەلەر ايتىپ جۇرەيىك، سوندا ءبارى جاقسى بولادى.

ۇيقاسبايەۆا اقبوتا

---