جاقسىدان شاراپات
مەنىڭ شىعارماشىلىعىما شاپاعاتى تيگەن جانداردىڭ ءبىرى — قابەكەڭ، فيلولوگيا عىلىمدارىنىڭ كانديداتى، ادەبيەتشى، زەرتتەۋشى-عالىم مارقۇم قابيبوللا سىديىقوۆ بولدى.
سەكسەنىنشى جىلداردىڭ باسى بولاتىن. بىردە تۇرىكمەنستانداعى كراسنوۆودسك اۋداندىق "جۇمىسشى" گازەتىنىڭ جاۋاپتى حاتشىسى ەسبەرگەن ءىڭىرباي ۇلى ۇيىنە قازاقستاننان اسا قۇرمەتتى قوناقتاردىڭ كەلەتىنىن ايتىپ، بىرگە بولۋعا شاقىردى. مەن وندا "جۇمىسشىنىڭ" ءبولىم مەڭگەرۋشىسىمىن.
رەداكسيامىزعا جاقىن تۇراتىن ەسبەرگەننىڭ ۇيىنە بارسام، ەكى قوناق كىسى وتىر ەكەن. ءبىرى قابەكەڭ دە، ءبىرى اعزام ىبىرايەۆ دەگەن ازامات. قابەكەڭ سول كەزدە الماتىدان ورالىپ، فورت-شيەۆچەنكو قالاسى تاريحي-ولكەتانۋ مۇراجايىنىڭ ديرەكتورى ەكەن. تانىسىپ-بىلىسكەننەن كەيىن كەزەك ادەبيەت اۋىلىنا، پوەزياعا قاراي ويىستى. بايقايمىن العاشقى پىكىرلەسۋدەن-اق قابەكەڭ ەكەۋمىز بىر-بىرىمىزگە ۇناپ قالعان سياقتىمىز. ول قاناتباي سىنىقشىعا قارالۋعا كەلگەن ەكەن. قوناق بولىپ، ەل قىدىرۋعا اسىعىس ەكەندىكتەرىن ايتتى.
قابەكەڭ سول ساپارىندا كراسنوۆودسك پەن ونىڭ ماڭىندا تۇراتىن قازاق اقىندارى — ەسەنعالي بوكەنبايەۆ، اكەلى-بالالى وتكىلباي جانە قۇدايبەرگەن كوپەكوۆتەر سياقتى بەس التى ادامنىڭ ولەڭ-جىرلارىن وزىمەن الا كەتتى. بۇرىن جەكەلەگەن ولەڭدەرىم رەسپۋبليكالىق گازەت جورنالداردا جاريالانىپ جۇرگەن مەن دە ءبىر توپ ولەڭدەرىم مەن سۋرەتىمدى بەرىپ جىبەردىم.
ارادا ءبىراز ۋاقىت وتكەننەن كەيىن ماڭعىستاۋدىڭ سول كەزدە "كوممۋنيستىك جول" اتالاتىن وبلىستىق گازەتىندە "نۇر شاشا بەر، بەيبىت كۇن" دەپ اتالاتىن ۇلكەن تاقىرىپپەن بەس-التى ولەڭىم سۋرەتىممەن جارق ەتە قالدى. قابەكەڭ جۇرەك تەبىرەنتەرلىكتەي عىپ العى ءسوزىن جازىپتى.
قابيبوللا اعا 1994 جىلى جارىققا شىققان تۇڭعىش جىر جيناعىم "بويتۇمارعا" دا العى ءسوز جازدى.
وكىنەتىنىم قابەكەڭ اعامىزبەن كوپ ديدارلاسىپ، بىرگە بولىپ اڭگىمەسىن تىڭداي المادىق. اندا-ساندا الماتىعا بارا قالعانىمىزدا ۇيىنە تەلەفون شالاتىنمىن. "ۇيگە كەلسەيشى،"-دەپ شاقىرعان كەزدەرى دە بولدى، ءبىراق ءساتى تۇسپەي-اق قويدى. ارنايى ءبىر بارارمىن دەپ جۇرگەنىمدە اعامىز دۇنيەدەن وزدى. ەندى ونى ەسكە الۋدان، ول تۋرالى ەستەلىك ايتۋدان باسقا قولىمىزدان ەشتەڭە كەلمەيتىن سياقتى.
قايران قابەكە، قابيبوللا اعا، جاتقان جەرىڭ جايلى بولسىن، تىرلىكتە وتە كوپ ەڭبەكتەندىڭ، بەينەت پەن قيىندىقتى دا از كورمەدىڭ، باقيدا جانىڭ ءجانناتتا بولىپ، نۇرىڭ شالقىسىن، ابزال اعا!
You Might Also Like
-
مۇرات مۇراسىنىڭ جارشىسى اتانعان سەرىك حارەسوۆ جاڭاوزەن قالاسىنداعى 7 ورتا مەكتەپ ءان ءپانىنىڭ ءمۇعالىمى، حالىق اعارتۋ ءىسىنىڭ ۇزدىگى.
-
سول كۇنى قوشوبا اۋىلىنان شىعىپ، ءجۇز سەكسەن شاقىرىمداي جەردەگى قارابۇعاز قالاسىنا جول تارتقان جيىرما جىگىتتىڭ ىشىندە سۇلتان دا بار ەدى. بۇل ونىڭ اۋداندىق اسكەري كوميسسارياتقا ەكىنشى ساپارى. جەتەكتەگ...
