جاستاردىڭ قۋاتى – ءبىلىم بىلىگىندە
مەن ءبىلىمدى بولعىم كەلەدى. بولاشاقتا ءوزىمدى جان-جاقتى، كوزى اشىق، بىلىكتى ازاماتتاردىڭ قاتارىنان كورەمىن. بۇل مەنىڭ عانا قالاۋىم ەمەس، ۇستازدارىمنىڭ جانە اتا-انامنىڭ دا قالاۋى. ساباقتان بوس ۋاقىتىمدا عالامتوردان، تەلەديداردان ەلىمىزدە بولىپ جاتقان كەي جاڭالىقتاردى وقىپ، تىڭداپ وتىرامىن. ارا-تۇرا ءشاي ۇستىندە اكەم ەكەۋمىز مەملەكەتىمىزدە بولىپ جاتقان وقيعالاردى تالقىلايتىنىمىز دا بار.
جۋىردا مەن قازاقستاننان وتكەن جىلى 300 مىڭ ادامنىڭ شەتەلگە تۇراقتى تۇردە جۇمىس ىستەۋگە كەتكەنى تۋرالى اقپارات وقىدىم. ەلىمىزدەن كوپتەگەن جاستاردىڭ كورەيا، تۇركيا، امەريكا، رەسەي سەكىلدى شەت مەملەكەتتەرگە جوعارى جالاقى ءۇشىن كەتىپ جاتقانىن بىلەمىن. ءبىراق ءبىر جىلدا 300 مىڭ جاستىڭ بىردەن شەتەل تۇرعىنىنا اينالىپ كەتۋى مەنى ءبىراز ويلاندىردى. «سوندا بارلىق جاستار، اعا-اپكەلەرىمىز باسقا ەلگە جۇمىس ىستەۋگە، سوندا ءومىر سۇرۋگە وسىلاي اعىلىپ كەتە بەرەر بولسا، قازاقستاندا كىم قالادى؟ ۇلكەندەر بولاشاق جاستاردىڭ قولىندا دەيدى. ولاي بولسا بولاشاعىمىز نە بولماق؟» دەگەن ويعا قالدىم.
ءوز باسىم، مەن مۇنى قولدامايمىن. شەتەلگە كەتپەي-اق، قازاقستاندا دا جايلى ءارى جاقسى ءومىر سۇرۋگە بولادى. ول ءۇشىن ەلىمىزدە بارلىق مۇمكىندىك بار. جوعارى ءبىلىم العىسى كەلەتىندەر ءۇشىن جاقسى دەڭگەيلى وقۋ ورىندارى جەتەرلىك. جىل سايىن تالاپكەرلەرگە سان مىڭداعان گرانتتار بولىنەدى. ءار جاقسى وقىعان ستۋدەنت شاكىرتاقى الادى، جاتاقحانامەن قامتاماسىز ەتىلەدى. كاسىپ باستاپ، تابىس تاپقىسى كەلەتىندەر ءۇشىن دە جەڭىلدىكتەر بار. ءتۇرلى مەملەكەتتىك باعدارلامالار نەگىزىندە ءوز ءىسىن باستاعىسى كەلەتىن جاستارعا قارجىلىق قولداۋ جاسالادى، بيزنەس باستاۋدى ۇيرەتىپ، ونى وقىتاتىن كۋرستار دا از ەمەس. ەلباسىمىز نۇرسۇلتان نازاربايەۆ جاستارعا كوپ كوڭىل ءبولىپ كەلدى. بيىلعى جىلدىڭ «جاستار جىلى» دەپ اتالۋى دا وسىنىڭ دالەلى. ول كىسىنىڭ سىندارلى ساياساتىن جالعاستىرىپ جاتقان قازىرگى پرەزيدەنتىمىز قاسىم-جومارت توقايەۆ تا جاستاردىڭ رۋحىن كوتەرىپ، ولاردى بىلىمگە، ەڭبەككە شاقىرۋدا. ياعني، ەڭبەك ەتكىسى كەلەتىندەرگە ەلدە ەشكىم كەدەرگى ەمەس. ەلىمىزدە بەيبىت، مامىراجاي زامان ورناپ تۇر. سوعىس، قىرعىن-جويقىنداردان اۋلاقپىز. وسىنىڭ ءبارىن بىلە تۇرا جاستارىمىز نەگە جات مەملەكەتكە كەتە بەرۋ كەرەك دەپ ويلايمىن. شەتەلدىكتەردىڭ ءبىزدىڭ ەلدىڭ ازاماتتارىنا قانشالىقتى قوناقجايلىق تانىتاتىنى دا بەلگىسىز جاعداي. ونسىز دا ول جاقتا جاستارىمىزدى قارا جۇمىستان باسقا ەشتەڭە كۇتىپ تۇرماعانىن ەستىپ-بىلىپ ءجۇرمىن.
جاستاردىڭ قۋاتى – ءبىلىم بىلىگىندە. سوندىقتان بىزدەرگە وقۋ كەرەك، بىلگەندى كوڭىلگە توقۋ كەرەك. ءبىلىمنىڭ كەرەكتىسىن، پايدالىسىن الۋ قاجەت. جوعارى وقۋ ورنىن ءبىتىرىپ، ماماندىق الۋ – مىندەتىمىز. سول ارقىلى بىزدەر ەلگە پايدا اكەلەمىز. ءقازىر ءتىپتى وقۋعا مۇمكىندىگى بولماعان جاندار دا ديپلومدى قاجەت ەتپەيتىن SMM مامانى، ينتەرنەت-ماركەتولوگ، كوپيرايتەر سەكىلدى ماماندىقتىڭ جاڭاشىل ءتۇرىن وزدىگىنەن ىزدەنىپ، مەڭگەرە الادى. بۇل – زامانۋي ماماندىقتار. وسىنىڭ ءقايسىبىرى بولماسىن، ونى ەل يگىلىگى ءۇشىن پايدالانۋعا بولادى. ءبىلىم جۇرگەن جەردە بىلىكتىلىك تە قاتار جۇرەدى. ال مامانى بىلىكتى ەل قاتاردان قالمايتىنى بەلگىلى. ءقازىر عىلىم-بىلىمگە قۇشتارلىق تانىتقان، دامىعىسى كەلەلتىن ادامعا بارلىق مۇمكىندىك جاسالعان. كىتاپحانالاردىڭ بارلىعى زامانعا ساي ۇلگىدە قايتا جاساقتالدى، ۇيدە دە، مەكتەپتە دە عالامتور قوسىلعان، مۇعالىمدەر دە كەز كەلگەن سۇراعىڭا جاۋاپ بەرۋگە دايار. قاي نارسەگە قىزىعۋشىلىق تانىتساڭ دا سول تۋرالى ۇيرەنىپ، بىلۋگە كەدەرگى جوق. سولاي بولا تۇرا نەگە بىزدەر العان ءبىلىمىزدى، بولماسا كۇش-جىگەر، ەڭبەگىمىزدى شەتەلدىڭ قازىناسىنا قۇيۋىمىز كەرەك؟ كەرىسىنشە، ولاردان پايدالىنى ۇيرەنىپ كەلىپ، ەلىمىزدىڭ قاجەتىنە جۇمساعان الدەقايدا دۇرىسىراق بولار ەدى. باستىسى – ەرىنشەكتىكتى قويىپ، جالقاۋلىقتى جەڭۋ كەرەك. «ەڭبەك ەتسەڭ، ەرىنبەي، تويادى قارنىڭ تىلەنبەي» دەگەن اباي اتامىزدىڭ ماقالى دا بەكەر ايتىلماعان.
ءقازىر كوپشىلىك دوستارىم عالامتوردا ويىن ويناپ، ۋاقىتتارىن تەككە وتكىزىپ جاتادى. مەن دە عالامتوردا وتىرامىن، ءبىراق مەن ءوزىمدى قىزىقتىراتىن، ءتۇرلى دەرەكتەر مەن دايەكتەرگە تولى اقپاراتتاردى كورىپ وتىرامىن. ءبىزدىڭ ەلدىڭ حال-احۋالىن باسقا مەملەكەتتەرمەن سالىستىرىپ قارايمىن. تاريحىمىزعا ۇڭىلەمىن. تاۋەلسىزدىك جىلدارىنان بەرى ەلىمىزدە قانشاما العا جىلجۋلاردىڭ بولعانىن بايقايمىن. وتىز جولدا ويداعىداي جەتىستىكتەرگە جەتە الدىق، دەمەك تاعى بىرنەشە جىلدا وزىق مەملەكەتتەرمەن قاتارلاساتىنىمىزعا نىق سەنىمدىمىن. وسىندايدا بۇگىنىڭ مەن كەشەگىڭدى سالىستىرۋعا مۇمكىندىك بەرەتىن قانداي دا ءبىر اقپارات ىزدەسەڭ دە الدىڭنان شىعاتىنى قۋانتادى.
بولاشاقتا مەن دە جوعارى ءبىلىم الامىن. سودان سوڭ ءوز ەلىمدە، تۋعان جەرىمدە حالقىما قىزمەت ەتەمىن. جيعان-تەرگەن ءبىلىمىمدى قازاقستاننىڭ يگىلىگى ءۇشىن، ونىڭ دامۋى، كوركەيۋى ءۇشىن جۇمسايمىن دەگەن ماقساتىم بار. ويتكەنى بۇل ەلدە مەن، مەنىڭ اتا-انام، باۋىرلارىم، تۋىستارىم، دوستارىم تۇرادى. سولاردىڭ ءبارى دە، سونداي-اق، بارشا قازاق حالقى جاقسى ءارى جايلى ءومىر ءسۇرۋى ءتيىس. مەن سوعان بارىنشا كۇش سالامىن. اتا-انامنىڭ، ۇستازدارىمنىڭ ءۇمىتىن اقتاۋعا مىندەتتىمىن. ەگەر دە ءاربىر جاس ءبىلىمدى بولۋعا ۇمتىلسا، وندا كەلەشەكتە جاستارىمىز شەت ەلدەرگە قارا جۇمىس ىستەپ، جات ۇلتقا قىزمەت قىلۋ ءۇشىن ەمەس، ديماش قۇدايبەرگەنوۆ، روزا رىمبايەۆا، يليا يلين، تاعى دا باسقا اعا-اپكەلەرىمىز سەكىلدى ونەرىمىز بەن مادەنيەتىمىزدى الەمگە اسقاقتاتۋ ءۇشىن، ەلدىڭ اتىن شىعارۋ ءۇشىن عانا باراتىن بولادى. سوندىقتان ءبىلىم بيىگىنە بىرگە قول جەتكىزەيىك، دوستارىم!
سەبەبى بولاشاق ءبىزدىڭ قولدا.
قىزىلوردا وبلىسى، ارال قالاسى
№2 وبلىستىق دارىندى بالالارعا ارنالعان مەكتەپ-ينتەرناتىنىڭ 8 سىنىپ وقۋشىسى
جاڭبىرباي اسەل جانبولات قىزى
You Might Also Like
-
ءۇي تاپسىرمالارىن ورىنداپ بولامىن دا، تىسقا شىعامىن. پودەزد الدىنداعى ۇزىن اعاش ورىندىقتىڭ ورتا تۇسىندا اپ-ادەمى بوپ، اپپاق كيمەشەك كيگەن اجەم وتىر. مەن ونىڭ قولىنداعى تاسپىسىنە قارايمىن. ءار تاستى ...
