جازعى ەگىنگە قامدانۋ
ەگىنگە قامداناتىن ۋاقىت جەتتى. مىنە، ءقازىر ناۋرىز ايى تۋدى. جاز جاقىن. ۋاقىت تىنباي ىلگەرى جۇرۋدە. ەشكىمنىڭ ەرىنشەكتىگىنە زامان توقتاپ، قاراپ تۇرمايدى.
پىسىق، كۇشتى ادام زاماننان كەيىن قالماي، مەزگىلىندە ۇلگىرىپ، تىرشىلىك رەتىندە كەرەكتى ىستەرىن ىستەپ قالادى. شابان، ءالسىز، جالقاۋ ادام زامانعا ىلەسە الماي، مەزگىلىندە ۇلگەرە الماي، ءار نارسەدەن كەم قالادى.
قازاقستاننىڭ ەلى جالقاۋ. زاماننان كەيىن، ارتتا قالعان ەل. ءبىراق سەن جالقاۋ ەكەنسىڭ دەپ، ءجۇرىپ بارا جاتقان زامان توقتاپ تۇرمايدى.
كىمدە-كىم جالپى ونەرلى ادامزاتتىڭ قاتارىنا كىرمەك بولسا، تىنباستان ەڭبەك قىلۋ كەرەك. جالقاۋلىقتى قالدىرۋ كەرەك. تىرشىلىكتىڭ نەگىزى — ەڭبەك. ەڭبەكپەن عانا ادام جاقسى تۇرمىسقا جەتپەك.
مىنە، ەندى ەگىنگە قامداناتىن ۋاقىت جەتتى. ەگىنگە ەرتەدەن قامدانۋ كەرەك. قازاقستان حالقى شابان، جالقاۋ. سول شاباندىقتىڭ، جالقاۋلىقتىڭ سالدارىنان نادان ءام ونەرلى ەلدىڭ ءبارىنىڭ ارتىندا قالعان. «شابان ۇيرەك بۇرىن ۇشار...» دەپ قازاق ماقال ايتسا دا، سول ۇيرەك قۇرلى «بۇرىن ۇشۋدى» بىلمەيدى.
ءوزى ەڭبەك قىلماعان ادامعا ەشكىم دە جاردەم قىلمايتىنىن قالىڭ قازاقتىڭ كەدەيلەرى بىلەتىن بولدى. ەندى شاباندىقتى تاستاپ، ەگىنگە دايىندالۋ كەرەك.
قازاقستان ۇكىمەتى بۇل رەتتە قولىنان كەلگەن جاردەمىن اياماس. ونىڭ قىلعان جاردەمى جالپى قالىڭ اشاردىڭ بارىنە جەتپەيدى.
قازاقستاننىڭ جەر-سۋىن باسقاراتىن كوميسسارياتى ءوزىنىڭ تاپقان سەگىز ءجۇز مىڭ پۇتتاي تۇقىمىن گۋبەرنيا-گۋبەرنياعا ءبولىپ جىبەرىپ وتىر. ماسكەۋدەن تاعى دا جەردەم سۇراپ جاتىر. جاردەم الا السا، تاعى دا گۋبەرنيا-گۋبەرنياعا ءبولىپ جىبەرمەك.
ءبىراق بۇل جەتپەيدى. قازاقستانعا 3 ميلليون پۇتتاي تۇقىم كەرەك. جالعىز جاردەم بەرەتىن ماسكەۋدىڭ وزىندە دە تۇقىم از.
مىنە، سول سەبەپتى جالپى حالىقتىڭ ءوزى ەرتە باستان قامدانىپ، تۇقىم تاۋىپ، جالعاسىپ، ۇشتاسىپ، مەزگىلىنەن بۇرىن ەگىن سالۋعا دايارلانۋى كەرەك.
«جاتقانعا جان جۋىمايدى...»، جازعى ەگىنگە قامداناتىن ۋاقىت جەتتى!
بۇل تۋرالى گۋبەرنياداعى، ۋەزدەردەگى، ەلدەگى ەڭبەكشى حالىققا شىن كىزمەت قىلامىن دەگەن ازاماتتار ەرتەرەك ويلانىپ، ەرىنبەي، تىنباي حالىققا جارمالانىپ، قولىنان كەلگەن ءتۇرلى جاردەمدەرىن، اقىلدارىن بەرىپ، جالپى اۋىل حالقىم جۇمىلا ەگىن ىسىنە كىرىستىرۋگە بارلىق كۇشتەرىن سالۋلارى كەرەك.
جالپى حالىقتىڭ شارۋاسى تۇزەلمەسە، كەڭەس ۇكىمەتىنىڭ دە ءىسى تۇزەلمەيدى. جوعارعى كەڭەس ۇكىمەتىنىڭ نۇسقاسى وسى.
بۇعان تەرەڭ وي جىبەرۋ كەرەك.
شىنداپ، ەرىنبەي ەرتەدەن ەگىنگە كىرىسۋ كەرەك. بۇل ءار ازاماتتىڭ بورىشى.
1924 جىل
You Might Also Like
-
4-قاڭتاردا قازاقستاننىڭ 4-جالپى كەڭەس جيىلىسى اشىلماق. جيىلىستا قارالاتىن ماسەلەلەر مىناۋ:
-
قوسشى ۇيىمى اۋىلدىڭ كەدەيلەرى مەن جالشىلارىنىڭ ۇيىمى. قازاقستاندا قوسشى ۇيىمى كەڭەس ۇكىمەتى ورناعاننان كەيىن، اۋەلى جەتىسۋ، سىرداريا گۋبەرنيالارىندا جاسالعان. قازاقتىڭ وزگە گۋبەرنيالارىندا قوسشى ۇي...
