“جىل ون ەكى اي” – بالدىرعاندار سىرلاسى
التىن كوپىر
بالالار اقىنى، بالالار جازۋشىسى جۇرەككە جاقىن، كوڭىلگە قونىمدى وسى ءبىر ءسوز تىركەستەرى كەڭەستىك كەزەڭدە ومىرگە كەلدى. سول تۇستا بالالار ادەبيەتى “ادەبيەت” اتتى قارا شاڭىراقتان ەنشىسىن ءبولىپ الىپ وتاۋ تىككەنى بەلگىلى. ال ونىڭ قاز باسقان قادامىنىڭ ارماندى ادىمعا اينالۋىنا قازاق سوۆەت ادەبيەتىنىڭ ىرگەتاسىن قالاعان بەيىمبەت مايلين، ماعجان جۇمابايەۆ، جۇسىپبەك ايماۋىتوۆ ت.ب. اقىن - جازۋشىلار ەلەۋلى ۇلەس قوستى.
قۇنارلى توپىراققا تۇسكەن ءتۇيىر تۇقىم ءدال دارياسىنا اينالاتىنى سياقتى سودان بەرگى كەزەڭدە قازاق بالالار ادەبيەتى سان - الۋان ءوسۋى وركەندەۋ باسپالداقتارىنان ءوتتى. ءسويتىپ، قازاق بالالارىنىڭ سان بۋىنى وزدەرىنە ارنالعان جاۋھار جىرلاردى وقىپ، جاتتاپ ەسەيدى، تىلدىك قورىن، وي ءورىسىن دامىتتى.
ەسەيە كەلە، ولاردىڭ كەيبىرى وزدەرى ولەڭدەرىن وقىپ وسكەن اۋزىنان اق مارجان توگىلگەن اقىن اعالارى مەن اجەلەرىنە ەلىكتەپ جىر جازۋعا اۋەستەنەدى. قيال قاناتىندا قالىقتاپ، ءومىر تانىمىن ارتتىردى. تالماي تالپىنىپ، اللانىڭ بەرگەن ازدى - كوپتى تالانتىنىڭ ارقاسىندا سولاردىڭ كەيبىرى ارقالى ەلگە ايگىلى اقىنداردىڭ ساناتىنا قوسىلدى. الدا قانشاسى ماڭگى سونبەس جىر شىراعىن جاعىپ، جىر قىپ اسقارالى اسپانىنا قانات قاعادى دەسەڭىزشى.
ال سول بالالار اقىندارى مەن جازۋشىلارىنىڭ وزدەرىنىڭ بالدىرعان وقىرماندارىمەن بۇكپەسىز سىرلاسىپ، ولاردىڭ بالعىن جۇرەكتەرىنە جول سالۋىنا دانەكەر - التىن كوپىر ول، ارينە، رەسپۋبليكالىق بالالار باسىلىمدارى عوي. ول - “بالدىرعان”، “پيونەر”، “اق جەلكەن” جۋرنالدارى، “قازاقستان پيونەرى”، “ۇلان” گازەتتەرى. ولاردىڭ ساناتىن 2001 - جىلدان بەرى جارىق كورە باستاعان “جىل ون ەكى اي” جۋرنالى تولىقتىردى.
ادەبي- تانىمدىق كۇنپاراق سودان بەرى كەڭ بايتاق رەسپۋبليكامىزداعى بالدىرعان بالاعا دا، كوپتى كورگەن كونە كوز داناعا دا قىزىقتى ورتاعا سالار ورالىمدى ويى، تارتار تاعىلىمى، ۇسىنار ۇلگىسى بار ورتاق باسىلىم ەكەنىن تانىتتى. ءسويتىپ، رەسپۋبليكاداعى بالالار باسىلىمدارى اراسىنان ويىپ ورىن الىپ، ەندىگى جەردە جۇرتتىڭ ىزدەپ ءجۇرىپ وقيتىن سۇيىكتى باسىلىمىنا اينالدى.
ال 2007 - جىلى بالالارعا ارنالعان باسىلىمدار اراسىندا قازاقستان جۋرناليستەرىنىڭ ەڭ مارتەبەلى سىيلىعى “التىن جۇلدىزدى” جەڭىپ الدى. جۋرنالدىڭ باس رەداكتورى، جازۋشى تالعات ايتباي ۇلى: “ءاربىر ءۇيدىڭ تورىندە، ءاربىر ۇلاننىڭ قولىندا جۇرەتىن جۋرنال”، - دەدى وسى قۋانىشقا وراي جازعان ماقالاسىندا. بۇل شىندىق. وعان كوز جەتكىزۋ ءۇشىن ەندى ءبىراز وتكەن جىلداردا جارىق كورگەن جۋرنال بەتتەرىن اسىقپاي پاراقتايىق.
اتاقتى اقىندار دا اينالىپ وتپەگەن
استانا مەن الماتىنى كىم ءبىلسىن “ەل ءىشى” اتاناتىن اۋىل، اۋدان، وبلىس ورتالىقتارىندا تۇراتىن جۋرناليست، اقىن- جازۋشىلاردىڭ كەيبىرى ءوز ورتامىزدان شىققان ءمۇباراق جامانبالينوۆ، مارقۇم ەسەنتاي ەربوتيننىڭ شىعارمالارى تۋرالى ءسوز بولا قالسا “ە، ءتايىرى - اي ولار بار بولعانى بالالار اقىنى عوي دەۋدەن ءارى اسپاس ەدى. وسىندايدا بيىكتە ءىلۋلى تۇرعان ەتكە قانشا ۇمتىلسا دا الا الماي تۇڭىلگەن مىسىقتىڭ ءارى جاسىن، ءارى ساسىق سول ەتتى جەمەي - اق قويدىم” دەپتى - ءمىس. بۇل دا سوعان جاي عوي، ويتكەنى قازىرگى قازاق ادەبيەتىنىڭ ساۋساقپەن سانارلىق ابىزدارىنىڭ ءبىرى مۇزافار الىمبايەۆ بالالار ادەبيەتىنىڭ كوكجيەگىن كەڭەيتكەن الىپتاردىڭ ءبىرى ەمەس پە؟
مۇراعاڭ “بالدىرعان” جۋرنالىنىڭ باس رەداكتورى بولعان جىلداردا بالالار ادەبيەتىنىڭ بوساعاسىن اتتاعان جاس قىرانداردىڭ توماعاسىن سىپىرىپ، قاناتتارىنىڭ قاتايۋىنا ۇشان - تەڭىز ءسىڭىردى ەمەس پە؟! سول مۇراعاڭنىڭ اتالعان جۋرنالعا باسىلعان “مۇنداي سوزدەردى بىلەسىڭ بە ؟” اتتى توپتاماسىنىڭ بىرەر شۋماعىن وقىپ كورەيىكشى:
دەپ ەدىم - كۇردەل ءمانىن انىقتارىن،
قاراسى ەكەن جاس ءتول مەن ارىق مالدىڭ
وقتان قۇدىر شوشىنعاننان،
ىرعىدى وردان شۇعىل كەپ.
بۇعى تەكتەس كىشىرەك ال،
اتالادى قۇدىر دەپ. -
“كۇردەل”، “قۇدىر” اتاۋلارىنىڭ ءمانىن تۇسىندىرۋگە ارنالعان بۇل ولەڭ جولدارى حالقىمىزدىڭ عاسىرلار بويى قالىپتاسقان سوزدىك قورىنان سىر سۋىرتپاقتاپ، جاس جەتكىنشەكتى ءتىل مايەگىمەن اۋىزداندىرادى. حاس شەبەردىڭ قالامىنان تۋىنداعان بۇل شۋماقتار بالا ساناسىن تانىمدىق تەرەڭدىككە باستايدى.
قالىڭ قازاق وقىرمانىنا ءاۋ باستان - اق ماحاببات جىرشىسى رەتىندە تانىلعان مەملەكەتتىك سىيلىقتىڭ يەگەرى تۇمانباي موللداعالييەۆ بالالاردى دا اتالىق ماحاببات، سۇيىسپەنشىلىك شۋاعىنا بولەپ وڭى مەن سولىن تانۋىنا، ءسويتىپ ەلىن سۇيگەن ۇلكەن جۇرەك يەسى بولىپ وسۋىنە جول نۇسقايدى، ۇلگى ۇسىنۋدى، كۇرمەۋى كۇردەلى تىرلىك ءتۇيىنىن ءتۇسىندىرۋدى ازاماتتىق، اتالىق پارىز دەپ بىلەدى. ماسەلەن، اقىن ءوزىنىڭ “ءبىزدىڭ زاڭ” اتتى ولەڭىندە زامانىمىز، ءبىزدىڭ جولىمىز، سول زاڭمەن ءوسىپ ەر جەتەمىز دەي كەلىپ
سول زاڭمەن ءوسىپ سانامىز،
قۋاتى بەرەر بار قانداي، - دەپ ساۋال تاستاي وتىرىپ،
ءبىز ونىڭ ءتىلىن الامىز،
انانىڭ ءتىلىن العانداي، - دەپ وي تۇيىندەيدى.
ءسويتىپ، ونى ءبىزدىڭ نەگە ارداق تۇتىپ، نەلىكتەن اينامىز سانايتىنىمىزدى وسى ءتۇيىن ارقىلى ۇعىندىرادى. وسپانحان اۋباكىروۆ. ونىڭ ەسىمى قازاق وقىرماندارىنا ساتيرا ساردارى رەتىندە جاقسى تانىس. ال سول وسپانحاننىڭ بالالار ادەبيەتىندە دە ەلەۋلى ءىز قالدىرعانىن بۇل كۇندە بىرەۋى بىلسە، بىرەۋى بىلە بەرمەيدى. ويتكەنى 2005 - جىلى الماتىداعى “قازعۇرت” باسپاسىنان بار - جوعى 2000 - دانا بولىپ جاريالانعان “اناۋ مەن مىناۋ” جيناعىنىڭ مەكتەپتەردىڭ كىتاپحاناسىندا بولۋى ەكىتالاي. سول ولقىلىقتىڭ ورنىن “جىل ون ەكى اي” حال - قادارىڭ تولتىرعان.
ءسويتىپ، اقىننىڭ “بىتبىلدىق نەلىكتەن” اتتى ولەڭدەرىن جاريالاعان. جىلى يۋمورعا تولى وسى ولەڭدەر وقىعان بالالاردىڭ ەزۋىنە كۇلكى ۇيىرەرى تالاسسىز. ماسەلەن، “نەلىكتەن” اتتى ولەڭدە سەرىك اتتى بالاعا “شىراعىم، نەلىكتەن جۇمىس ىستەيمىز” دەگەن ساۋال قويىلادى. سەرىك سول سۇراققا “جۇمىس ىستەمەسەك تاماق ىشپەيمىز” دەپ جاۋاپ بەرەدى. سەرىكتىڭ وسى جاۋابى ارقىلى اۆتور “ەڭبەك ەتسەڭ ەرىنبەي، تويادى قارنىڭ تىلەنبەي” دەگەن قاناتتى ناقىلى بالا ۇعىمىنا مىنە وسىلاي سايكەستەندىرەدى.
“ال سول كىسى جۇمىس ىستەمەيدى نەلىكتەن” - دەگەن ساۋالعا،
- جو... جوق... ول كىسى جۇمىس ىستەگەن. وتىز جىل بويى كومبايىننان تۇسپەگەن، - دەي كەلىپ، ونىڭ زەينەتكەر ەكەنىن ايتادى.
ال اقشانى قايدان الادى؟
پەنسيا الادى.
نە ءۇشىن الادى؟
ەڭبەگى ءۇشىن الادى، - دەي كەلىپ ەڭبەكتىڭ تاۋسىلماس، سارقىلماس قازىنا، ىرىس ەكەنىن ءسوز ەتەدى.
تاڭاتقان - اۋ، تاڭاتقان،
ويىن مەنەن تاماقتان
قولىڭ تيمەي ۇنەمى
ەكى الاسىڭ ساباقتان
- اي، اي تاڭاتقان
ەكى الاسىڭ ساباقتان.
وسى ءبىر “مازاقتاما” دەپ اتالاتىن ولەڭنىڭ اۆتورى قازاقتىڭ ايگىلى اقىندارىنىڭ ءبىرى ءابدىراشتىڭ جاراسقانى. ولەڭ ايتقان ءسوزدى ۇقپايتىن، تۇسكە دەيىن ۇيىقتايتىن جىلاۋىق ناس بالا تۋرالى. بۇل تاقىرىپتى، ياعني جالقاۋ، جىلاۋىق، شالدۋار بالالار تۋرالى قالام تارتپاعان اقىندار شامالى بولار. ءبىر سوزبەن، جاراسقاننىڭ جىرلاپ وتىرعان تاقىرىبى تىڭ تاقىرىپ ەمەس. سوعان قاراماستان اقىننىڭ:
مازاقتايمىز
قويمايمىز،
تۇزەلەر دەپ ويلايمىز...
تۇزەلمەسەڭ
ءبولىنىپ،
ءوزدى- ءوزىمىز وينايمىز.
اي - اي، قويمايمىز
ءوزدى - ءوزىمىز وينايمىز، - دەپ ءتۇيىن جاساۋى بالا وقىرماندارعا، اسىرەسە، جالقاۋ، جىلاۋىق، ۇيقىشىل بالالارعا وي سالىپ، ءسويتىپ، ولاردىڭ ءتۇزۋ جولعا تۇسۋىنە ىقپال ەتەدى. وتكەنى ولەڭ كەيىپكەرىنە ۇقساس بالالار تەك مازاق بولىپ قانا قويماي، بىرتە- بىرتە دوستارىنان كوز جازىپ، جەكە قالاتىنىن اڭعارتادى. ولەڭنىڭ ءار شۋماعىندا ويناقى “اي - اي” ءسوزىن قايتالاي قولدانۋى ارقىلى ولەڭدە ءسوز بولىپ وتىرعان ماسەلەگە نازار اۋدارۋعا تىرىسادى.
بىزدىڭشە، اقىننىڭ بۇل ءتاسىلى ءوزىنىڭ جەمىسىن بەرگەن، بەرە دە بەرمەك. اقيىق اقىن قادىر مىرزا ءالىنىڭ ولەڭدەرىن مەكتەپتەگى بالا دا، ۇلتىنىڭ ماقتانىشىنا اينالعان ءبىرتۋار دانا دا جاتقا ايتادى.
قازاق ءتىلى - ارىڭ بۇل،
ۇياتىڭ بوپ تۇر بەتتە.
وزگە ءتىلدىڭ ءبارىن ءبىل،
ءوز ءتىلىڭدى قۇرمەتتە.
وسى ءبىر شۋماق ولەڭىمەن - اق ۇلتتىق پوەزيامىزدى اسقار بيىككە كوتەرىپ، قازاق ءتىلى الدىنداعى ۇرپاق پارىزىن تايعا تاڭبا باسقانداي انىقتاپ، وزگە ءتىلدىڭ ءبارىن ءبىل، - دەۋ ارقىلى ءقازىر دە ءۇش تۇعىرلى ءتىل اتاۋىنا يە بولىپ وتىرعان مەملەكەتتىك باعدارلاماعا دا بۇعان سانداعان جىلدار بۇرىن ءۇن قوسقان. كورەگەندىك تانىتقان دەسە دە جاراساتىنداي.
مەملەكەتتىك سىيلىقتىڭ لاۋرەاتى قادىر اعا شىعارماشىلىق جولىن بالالار ادەبيەتىنەن باستاعان كەزىندە بالالارعا ارناپ، بىرنەشە جىر جيناقتارىن شىعارعان. سيرەك تە بولسا قادىر اعا “جىل ون ەكى اي” جۋرنالىنا دا اتسالىسىپ تۇرادى ەكەن.
ەسىن بىلە باستاعان بالانىڭ قارىنداش ۇستامايتىنى، قاعاز شيمايلاماي -تىنى جوق. بىرتە – بىرتە سول بالعىن بوبەك ءارىپ تانىپ، ءتۇرلى - ءتۇستى قارىنداشپەن ءوزىنىڭ بالعىن قيالىن تەربەگەن سان - الۋان كورىنىستى قاعاز بەتىنە تۇسىرۋگە تالپىنادى. قازىرگى قازاق پوەزياسىنداعى ەلەۋلى تۇلعالاردىڭ ءبىرى - ۇلىقبەك ەسداۋلەتوۆتىڭ “قارىنداشتار” اتتى ولەڭى مىنە وسىنداي تالاپتى بالالارعا ۇلگى بەرەدى، جول نۇسقايدى.
مىناۋ سارى قارىنداش،
مۇنىمەن كۇندى بويايمىن.
مىناۋ قوڭىر قارىنداش،
مۇنىمەن قۇمدى بويايمىن.
مىنە وسىلاي ءتۇرلى - ءتۇستى قارىنداشتاردىڭ ءارقايسىسىنىڭ قولدانىلاتىن ورنىن اتاپ ايتا كەلىپ،
مەن سۋرەتشى بولامىن،
قارىنداشتى الامىن.
اق مامامنىڭ سۋرەتىن،
اق بوياۋمەن سالامىن،
- دەيدى. ال اناسىنىڭ سۋرەتىن سالۋ بەسىكتەن بەلى شىعىپ، وڭى – سولىن تاني باستاعان ءار بالانىڭ وي ارمانى عوي.
اقىن سونى بالعىن كەيىپكەرىنىڭ اۋزىنا سالۋ ارقىلى ەستە قالارلىقتاي تاماشا جىر تۋدىرعان. سونىمەن قاتار بالعىن وقىرمانداردىڭ دۇنيەتانىمىن كەڭەيتىپ، تالعامپازدىققا باۋليدى بۇل ولەڭ. سول اقىننىڭ “ەسەن ساباعى”، “جاڭبىر” اتتى ولەڭدەرىنىڭ ءارقايسىسى ءتورت تارماق، ءبىر شۋماقتان تۇرادى.
ءبىرىنشى ولەڭدەگى قول كوتەرىپ ەرلەنىپ تاقتاعا شىعىپ، تورتكە بەستى قوسا الماي تەرلەگەن قوسانبايدىڭ قىلىعى وقىرمانىن كۇلدىرگى، بۇلتتىڭ نەگە اۋاتىنىن، جاڭبىردىڭ قاشان جاۋاتىنىن تۇسىنە، بىلە الماي دال بولعان بالا كەيىپكەردىڭ:
شولدەدى عوي اعاشتار،
شاڭ باستى عوي اۋانى، - دەۋى ونىڭ اعاشتىڭ شولدەگەنىنە، اۋلانى شاڭ باسقانىنا الاڭ بولۋى ەل مەن جەردىڭ بولاشاق يەسى ويلى ازامات بولىپ ءوسىپ كەلە جاتقانىن اڭعارتاتىنداي. بۇل اتى اتالعان اقىندار ۇلكەندەر پوەزياسىنىڭ ءىرى تۇلعالى وكىلدەرى بولا تۇرا بالالار ادەبيەتىنىڭ اجارلى دا، بازارلى بولۋىنا قىرۋار ەڭبەك سىڭىرگەن، ءسىڭىرىپ كەلە جاتقان اقىندار.
كىتاپحانالار جابىلىپ، باسپادان كىتاپ شىعارۋ مۇڭعا اينالعان مەرزىمدى باسپاسوزگە جازىلۋ باعاسى شامادان تىس شارىقتاعان جىلداردا وقىرمان سۇيىكتى اقىن - جازۋشىلارىنان اقىن – جازۋشىلار وقىرماندارىنان كوز جازىپ قالعانداي بولعان تۇستا ءبىز ءسوز ەتىپ وتىرعان اقىنداردىڭ بالالارعا ارنالعان جىرلارىن قال - قادەرىمەن باسىپ، جارىققا شىعارۋى قۋانارلىق، قۇپتارلىق ءىس ەدى.
“كوزدەن كەتسە، كوڭىلدەن تاسا” دەمەكشى وسپانحان، جاراسقان ت.ب. ومىردەن وزعان اقىنداردىڭ شىعارمالارىن اعا ۇرپاق وكىلدەرى بىلگەنمەن كەيىنگى بۋىن وكىلدەرىنىڭ كوپشىلىگى وقىماق تۇگىلى، ەسىمدەرىن دە سيرەك ەستۋى، ءتىپتى، بىلمەۋى مۇمكىن عوي. مىنە وسى تۇستا “جىل ون ەكى اي” جۋرنالى ابىرويلى ءىس اتقاردى، اتقارىپ تا كەلەدى.
بالعىن جىرىن بالالارعا سىيلاعان
ءومىر بويى شىعارماشىلىعىنىڭ بال شىرىنىن تەك بالعىن بوبەكتەرگە ارناپ، بالا بولىپ ۋانىپ، بالا بولىپ جۇبانىپ، بالا بولىپ ويناپ، بالا بولىپ ويلايتىن اقىنداردىڭ ءبىر توبىن بىلايعى جۇرت بالالار اقىندارى دەپ اتايدى.
سول اتاۋعا ساي ۇنەمى بالالارعا ارناپ قالام تەربەپ، بالالار ادەبيەتىنىڭ كوسەگەسىن كوگەرتۋمەن كەلەدى. سولاردىڭ ءبىرى بالالار اقىنى، حالىقارالىق الاش سىيلىعىنىڭ لاۋرەاتى – ەسكەن ەلۋبايەۆ. وتكەن جىلى اقىننىڭ “بالالارعا بازارلىق” اتتى جىر جيناعى جارىق كوردى. نەگىزىنەن بالالارعا ارناپ جازاتىن اقىن اعانىڭ جىر جيناعى تۋرالى وي - پىكىرىمىزدى ورايى كەلگەن تۇستا ايتا دا جاتارمىز.
ال ازىرشە اقىننىڭ ءوزىمىز ءسوز ەتىپ وتىرعان بالالاردىڭ سۇيىكتى باسىلىمىندا جارىق كورگەن “ارىپتەردىڭ ايتىسى” اتتى ولەڭىن ويعا ازىق، تىلگە قازىق ەتىپ كورەيىك. بىردەن ايتايىق ارىپتەردى “اينالدىرماعان” بىردە - ءبىر بالالار اقىنى جوق دەسە دە بولادى. ال سولاردان ەسكەننىڭ اتىنىڭ وزعانى نە دەگەنگە كەلسەك، ول ونىڭ ارىپتەردى سان الۋان مىنەزدى بالالار كەيپىندە كەيىپتەدى.
ماسەلەن، “ا” وزىنەن وزگەنى كورەلگىسى جوق. مەن - مەن، ماقتانشاق. الدەكىمدى جامانداي قويۋعا دا كەت ءارى ەمەس.
“ا” اتتى “ڭ” جونىندە،
ونىڭ ورنى كەيىندە.
“ڭ” دەگەن بايعۇس ول،
ءسوز باستاماس جالعىز سول.
جاراتقان سوڭ ناشار عىپ،
بولا المايدى ول باس ءارىپ.
وسى جولداردى وقىعاندا دوستارىن جامانداماسا، ءىشى پىساتىن بىرەۋدى جامانداۋ ارقىلى ءوز ءقادىرىن اسىرعىسى كەلەتىن الدە ءبىر تانىسىڭ ەسىڭە تۇسەدى. اقىن بالالاردى ماقتانشاقتىقتان ساقتاندىرادى.
بولعانمەن شەتەلدىك،
بەدەل مەندە جەتەرلىك.
دەدىڭ،
نە جاسقانام.
ءسوز كوپ ءوزىم باستاعان – دەپ، “ڭ” ايتپاقشى تالاپتى جاسقا ايتار ءسوز دە، اتقارار ءىس تە كوپ.
سۇلتان قالي ۇلى. ونىڭ ەسىمى ءتىلى قازاقشا شىعىپ، قازاق مەكتەبىنىڭ تابالدىرىعىن اتتاعان، بۇل كۇندە ازامات اتانعان قازاق جاستارىنىڭ سان بۋىنىنا ەتەنە تانىس. “بالدىرعان” جۋرنالىندا ودان كەيىنگى كەزەڭدە “ۇلان” گازەتىندە جاۋاپتى قىزمەتتەر اتقارعان.
سۇلتان اتانىڭ قالامىنان تۋىنداعان ويلى دا، ءنارلى جىرلار قانشاما ءسابيدىڭ ساناسىنا ۇيالاپ قالدى دەسەڭىزشى. جۋرنالدا جارىق كورگەن “قىس كەتتى” اتتى مىنا ءبىر شاعىن ولەڭى دە سولاردىڭ ءبىرى.
شوكىم بۇلت جوق اسپاندا،
وسى - اۋ كوكتەم بەلگىسى،
تەرەزەنى اشقاندا،
سەرپىلدى ءبىر بولمە ءىشى.
توبەڭنەن ءتونىپ تۇرعان زەڭگىر اسپان... اينالا توڭىرەكتەن نۇرىن جارا بۇرقىراعان كوك ءيسى بولمەدەگى اۋىر اۋانى الماستىرىپ، قىر بەتكەيدەن قۇلدىراي اققان بۇلاق سىڭعىرى قۇلاققا كەلەتىندەي.
كوكتەيتىندەي تاسى دا،
نازارىم تۇر تىسقا اۋىپ.
الاتاۋدىڭ باسىنا
قوناقتاپتى قىس بارىپ.
وۋ، مۇنداي ساتتە بالا جانى قالاي بايىز تاپسىن. تىسقا شىعۋعا اسىعادى. ونىڭ جارىق دۇنيەنى سان الۋان بوياۋعا مالىپ العانداي گۇلدەنتىپ، كوركەيتىپ، جاڭا ءبىر ءار بەرگەن كوكتەم “سۋرەتىن” تابيعاتتىڭ ءار قۇبىلىسىنان ىزدەدى. تاڭىرقايتىنداي قاعىپ تامسانۋى زاڭدىلىق. “الاتاۋدىڭ” باسىنا قوناقتاپتى قىس بارىپ. اڭعال دا بايقامپاز بالا ساناسىن ساۋلەلەندىرەتىن جاندى سۋرەت.
وتكەن جىلدارداعى “جىل ون ەكى اي” جۋرنالىنىڭ بەتىن پاراقتاعاندا تۇيگەن ويىمىزدى تۇيىندەي ايتساق، جۋرنال جىلدان جىلعا “بالالار ادەبيەتى” اتتى ۇلى ايدىندى ءوز اعىسىمەن تولىقتىرا، تولىقتىرا تۇسۋدە ەكەن.
سوناۋ جىلدارى جىلاپ اققان جۇلگەدەن سىرقىراي اعار كەڭ ارنالى تاۋ بۇلاعىنا اينالا باستاعان ەكەن. بۇلاق كوزى ماڭگىلىك سارقىلماسىن، ارناسى سۋالىپ تارتىلماسىن.
(ءاۋمين).
سۇلەيمەن بايازيتوۆ
You Might Also Like
-
ۋنيۆەرسيادا-2017-دە ەل نامىسىن 168 سپورتشى قورعايدى. بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا 28ء-شى بۇكىلالەمدىك قىسقى ۋنيۆەرسياداعا دايىندىق ماسەلەلەرى جايىندا بايانداعان ق ر مادە...
