جۇگەرى
جۇگەرى، مايس — استىق تۇقىمداسىنا جاتاتىن ءبىر جىلدىق شوپتەسىن وسىمدىك. العاش ورتالىق جانە وڭتۇستىك امەريكادا تارالعان. مەكسيكادا ءبىزدىڭ زامانىزدان بۇرىنعى 5200 جىلى شاماسىندا ەرتەدەگى ماييا مەن استەكتەر وسىرگەن.
ءدانىنىڭ قۇرىلىسىنا قاراي ۇلپەكتى، كرەمنييلى، ءتىس ءتارىزدى (ءسۇيىر ءداندى)، كراحمالدى، قانتتى، كراحمالدى-قانتتى، بادىناق (جارىلعىش)، بالاۋىز تۇستەس، جۇقا قابىقتى جۇگەرى تۇرلەرىنە بولىنەدى. قازاقستاندا 15 سورتى اۋدانداستىرىلعان. ساباعى تىك، بيىكتىگى 0،5-6 م، كەيدە بۇدان دا بيىك، جۋاندىعى 2-7 سم. جاپىراعى جالپاق، تاسپا ءتارىزدى، ساباقتىڭ ءاربىر بۋىنىنان بىر-بىردەن ەكى جاعىنا جايىلا وسەدى. دارا جىنىستى، ءبىر ءۇيلى، ايقاس توزاڭدانادى. اتالىق گۇل شوعىرى (شاشاق) ساباعىنىڭ ۇشىندا، انالىق گۇل شوعىرى (سوبىق) جاپىراق قولتىعىندا ورنالاسقان. جەمىسى — دانەك. سوبىعىندا 500-1000 ءدان بولادى. ءدانىنىڭ قۇرامىندا 1،3 ازىق ولشەمى، 65-70% كراحمال، 7-12% بەلوك، 3-6% ماي بار. جۇگەرى سۇرلەمى — مال ءۇشىن قۇنارلى ازىق.
جۇگەرى – جىلۋ جانە جارىق سۇيگىش، قۇرعاقشىلىققا ءتوزىمدى جازدىق داقىل. ءوسىپ-ونۋ كەزەڭى 100-180 كۇن. جۇگەرى دانىنەن جارما، ءۇن، كراحمال دايارلانادى، سپيرت، سىرا، قانت، گليۋكوزا، ت.ب. دايىنداۋ ءۇشىن پايدالانادى. نەگىزگى زيانكەستەرى: سىمقۇرت، جالعان سىمقۇرت، كەمىرۋشى جۇلدىزقۇرت، ت.ب.؛ اۋرۋلارى: بورتپە جانە توزاڭدى قاراكۇيە، باكتەريوز، فۋزاريوز.
You Might Also Like
-
ەلىمىزدىڭ ءبىلىم جانە عىلىمي مينيسترلىگى ۇستازدارعا سىيلىق جاساۋدىڭ زاڭدىلىعىنا قاتىستى رەسمي تۇسىنىكتەمە بەردى.
-
جاندىكتەر، ناسەكومدار — بۋىناياقتىلار تيپىنە جاتاتىن ومىرتقاسىز جانۋارلار كلاسى. قازبا قالدىقتارى ديەۆون كەزەڭىنەن بەلگىلى. فيلوگەنەتيكالىق شىعۋ تەگى كوپ اياقتىلارعا جاقىن، ارعى تەگى ساقينالى قۇ...
