جۇلقىلاسۋعا قۇمارمىز-اق
ءبىز ءبىر-بىرىمىزدى نەگە ۇنەمى قاعىپ-سوعىپ، جۇلقىپ، تەۋىپ، شالىپ جۇرەمىز؟
توڭىرەگىڭىزگە كوز سالىڭىزشى. انە، ەكى جاقتان ەكى كىسى كەلە جاتىر. ءسىرا، جولداس-جورالار بولسا كەرەك، ارالارىندا ءالى دە ءجۇز مەتردەي جەر جاتسا دا، ەكەۋى دە: «و-و-و!» — دەپ داۋرىعىپ، بىر-بىرىنە قۇشاق جايىپ ءشۇيىلىپ كەلەدى. ەركىن كۇرەستە كەزدەسكەن پالۋاندارشا ەكەۋى ءقازىر القىن-جۇلقىن ۇستاسا كەتەتىن سياقتى.
ءبىزدىڭ بىر-بىرىمىزگە قانداي سىپايىگەرشىلىك كورسەتەتىنىمىزدى بايقاعانىڭىز بار ما؟ ءبىز ءبىر-بىرىمىزدى اۋەلى بەتتەن شاپاتتاپ، سونسوڭ قۇشاقتاسا كەتەمىز دە، ءبىرىمىزدى ءبىرىمىز كوتەرىپ الۋعا تىرىسامىز... قۇددى الگى... كىلەمدە العاش كەزدەسكەن پالۋاندار ءتارىزدىمىز.
ال ءبىزدىڭ قالاي قالجىڭداساتىنىمىزدى ءوزىڭىز دە بىلەتىن شىعارسىز! ءبىر-بىرىمىزدى باسسالىپ ۇستاي الامىز دا، ارى-بەرى جۇلقىپ-سىلكىپ، اياقتان شالىپ، شات-شالەكەي بولامىز.
مەن بىردە باياعىدا مەكتەپتە بىرگە وقىعان كلاستاس ەكى جولداستىڭ وتىز ءتورت جىلدان كەيىن قالاي جولىققاندارىن كوردىم. ەكەۋى دە ەگدە تارتقان، بايسالدى، سالماقتى كىسىلەر. جاستارى الپىستان اسقان. قالاي جولىقتى دەيسىز بە؟ ولار دا ءبىر-بىرىن تارپا باسسالدى. بويلارىنىڭ جەتكەنىنە قاراي ءبىرىن-بىرى بۇراپ، ىشكە تۇيگىشتەي باستادى. شالدارىڭنىڭ شالدۋارلىعىندا شەك جوق: ءبىرىن ءبىرى جۇدىرىقتاپ، تەپكىلەپ، شالىپ، ءتىپتى مۇرتتاي ۇشىرۋعا اينالدى... كەڭ زالدا ءدال ءبىر قىرىق پار پالۋان ۇستاسا كەتكەندەي استاڭ-كەستەڭ ەتتى. ەگدە تارتقانى ەسىنە ءتۇسىپ كەيدە بىرەۋى ءسال كىدىرە قالادى دا، سونسوڭ قايتادان جاعالاسا كەتەدى، اياق-قولدار تاعى دا ايقاسادى...
ال ەندى ءبىزدىڭ قالاي امانداساتىندىعىمىزدى ەسكە الايىق.
دوستىق نيەتپەن سالەمدەسكەننەن كەيىن ساۋساقتارىڭىز امان-ەسەن قالسا، — قۇدايىڭىزعا قوي ايتىڭىز! قولىڭىزدى دەر مەزگىلىندە تارتىپ الا قويماساڭىز، — امان-ەسەن قالۋى، ارينە، ەكىتالاي! ءوشى بارداي قىسىپ-مىجىپ، سىلكىپ-جۇلقىپ جونەلگەندە قولىڭدى يىعىڭمەن قوسا جۇلىپ الا جازدايدى.
نەمەسە كاسسانىڭ الدىندا بيلەت الۋعا كەزەكتە تۇرعاندارعا قاراڭىزشى: كادىمگى قىپ-قىزىل توبەلەس! ءبىرىن-بىرى يتەرىپ، بۇيىرلەپ، تۇيگىشتەپ، ۇرعىلاپ، تەپكىلەپ تۇرعان حالىق. سپورتتىق ايقاس-شايقاستان كەم بە؟ سىرناي-كەرنەيى مەن ءداۋ بارابانى عانا جەتىسپەي تۇرعان جوق پا؟!
ەندى ءبىزدىڭ قالاي سويلەسەتىنىمىزگە قاراڭىز. ءبىرىمىز ۇيدەكتەپ-تۇيدەكتەپ سويلەپ-سويلەپ الامىز دا، ەكىنشىمىزدى ىڭق دەگىزىپ ءتۇيىپ قالامىز. كىلەم ۇستىندە ءبىر-بىرىنىڭ تالماۋ جەرىن اڭدىسقان بالۋاندار سياقتىمىز!.. «وۋ، جاراندار، جاراندار، ءبىزدىڭ مىنا باتىرلارعا قاراڭدار!» — دەگەن داۋىس شىعا قالسا شارت-شۇرت ۇستاسا كەتۋگە دايىن تۇرامىز!..
ءومىر بويى وسىلايمىز!.. وسىلاي سويلەسەمىز، وسىلاي قالجىڭداسامىز، امانداسامىز، قوشتاسامىز...
ءسىز ءبىزدىڭ نەگە بۇيتەتىنىمىزدى ويلاپ كوردىڭىز بە؟.. مەن كوردىم، كوردىم دە مىناداي تۇجىرىم جاسادىم:
بىزدە بارىنە دە تيىم سالىنعان. ايتقىڭ كەلگەندى ايتا المايسىڭ، جازعىڭ كەلگەندى جازا المايسىڭ، سالعىڭ كەلگەن سۋرەتتى سالا المايسىڭ، — ونىڭ ءبارىن ايتىپ تاۋىسۋ قيىن!.. عاشىق بولعىڭ كەلگەن كىسىڭە عاشىق تا بولعىزبايدى، بارعىڭ كەلگەن جاققا جىبەرمەيدى... ەشقانداي ەركىڭ جوق، ەركىن كۇرەستە عانا ەركىن جۇرۋىڭە بولادى. ءبىز، تۇرىكتەر، ەركىن كۇرەسكە كەلگەندە بۇكىل الەمدە ءتىرى جانعا دەس بەرمەيمىز. نەگە؟ ويتكەنى، ءبىز شىر ەتىپ جەرگە تۇسكەن كۇننەن باستاپ سونىمەن شۇعىلدانامىز.
بىزگە ەركىن كۇرەستى بەرگەن قۇدايدان اينالايىن! ەركىن كۇرەسىمىز بولماعاندا ەركىندىكتەن مۇلدە قۇرالاقان قالىپ، توتيىپ وتەدى ەكەنبىز.
ورىسشادان اۋدارعان عابباس قابىشيەۆ
You Might Also Like
-
كورولمەن، شاحپەن سوتتاسۋ مەنىڭ ءۇش ۇيىقتاسام ويىمدا بار ما ەدى؟ سىزدەر فارۋق دەگەن كورولدى ەگيپەت حالقىنىڭ ەلدەن قۋىپ جىبەرگەنىن، ارينە، ەستىگەن بولارسىزدار؟ سول كورول سەن ۇل تاپپايسىڭ دەپ ايەلىم...
-
قىزمەت، ونى-مۇنى شارۋا قولىمدى بايلاپ دەگەندەي، مەن ولاردىڭ تويىنا بارا المادىم. شىنىمدى ايتسام، ونىما ءالى كۇنگە دەيىن ۇيالامىن. مەن يالگيندى و باستان جاقسى كورەتىنمىن، ونىڭ العان ايەلى دە ءبىر جاقسى ...
