InfoHub Logo

قازاقستان دالالارىنداعى جەر، سۋ اتاۋلارى قازاقتىڭ ءتول مادەنيەتىنەن، تاريحىنان سىر شەرتەتىن، تاربيەلىك باعىت بەرەتىن كوپتەگەن دەرەكتەرگە تولى ەكەندىگى اقيقات. بۇل دەرەكتەردى كونەنىڭ كوزىن كورگەن اقساقالداردان ەستىپ كەلەسى ۇرپاققا جەتكىزۋ قازىرگى بۋىننىڭ بورىشى. وڭتۇستىك قازاقستان سوزاق اۋدانى اباي اۋىلدىق وكرۋگى كەلىنشەك تاۋدىڭ ەتەگىندە ورنالاسقان. ءشامشى اتامىزدىڭ جىرىنا قوسقان وسى كەلىنشەك تاۋ اتاۋىنىڭ مىناداي اڭىزى بار ەكەن.

ەرتەدە ءبىر پاتشا قىزىن تۇرمىسقا ۇزاتقان ەكەن. جاساۋى بارلىق نارسەنىڭ ەڭ قۇندىلارىنان، ەڭ اسىلدارىنان دايىندالىپ، ءيتتىڭ تاباعى عانا كۇمىستەن، باسقا بارلىق نارسەلەر التىننان بولعان ەكەن. جول جاراعى دايىندالىپ، جاساۋى تۇيەلەرگە ارتىلىپ، قىزىن شىعارىپ سالىپ جاتقان پاتشا: «قىزىم، مەنەن رازى شىعارسىڭ، سەن ءۇشىن بارىمدى اياماي، ءسان-سالتاناتىمنىڭ ەڭ باعالىسىن بەرىپ جاتىرمىن» دەگەنىندە قىزى: «توبەتىمنىڭ يتاياعى كۇمىستەن ەكەن» دەپ نارازى سىڭاي تانىتقان كورىنەدى. قىزىنىڭ تويىمسىزدىعىنا ىزاسى كەلگەن پاتشا «تاس بولعىر، تاس بول» دەپ قارعاعان ەكەن. سودان كەلىنشەك جانە بۇكىل جاساۋى تاسقا اينالعان ەكەن دەلىنەدى.

شىنىندا دا تاۋ ورتادا بويشاڭ كەلگەن ساۋكەلە كيگەن كەلىنشەك، اينالاسىندا تۇيەلەر مەن وركەشتەرى، جاساۋى تىزبەكتەلگەن وسى كورىنىستى بەرەدى. وعان تابيعاتتىڭ ءارتۇرلى تۇسكە بوياۋى ەرەكشە اسەمدىك بەرەدى. بۇل اڭىزدىڭ تاربيەلىك ءمانى اشكوزدى بولماۋدى، بارعا قاناعات قىلۋدى،تويىمسىز بولماۋدى مەڭزەيدى. باي بولساڭ تاسىما، كەدەي بولساڭ جاسىما دەپ وتكەن بابالارىمىزدىڭ ءاربىر ءسوز، ءاربىر اتاۋلارىنان وسىنداي ونەگەلىك دۇنيەلەردى كوپتەپ كورۋگە بولادى.

---