كەلىنشەك
دەپۋتات جىگىتتىڭ قاباعى قاتىڭقىلاۋ وتىرعان. سابىرلى دا ويلى جۇزىندەگى بايسالدىلىق العاش كورگەن ادامعا سالقىن قاندى، توڭ مويىن بىرەۋ مە دەگەن كۇدىك تۋعىزىپ تاستاۋى دا ابدەن مۇمكىن. ءبىراق كوزىنە كوزى تۇسكەن ادام قالىڭداۋ قاباعىنىڭ استىنداعى قوس جاناردا بەلگىسىز ءبىر وت ۇشقىنى تۇنىپ تۇرعانىن بايقايتىن. ول جانارىن تىك قاداعاندا، بەينە الماس - شىندىقتىڭ جۇزىنە تۋرا قاراۋعا ءداتى شىدامايتىن ءبىر بەيشارالارداي، كەيبىرەۋلەر وز-وزدەرىنەن سىرعىتىپ اكەتۋگە نە تومەن قاراۋعا ءماجبۇر بولاتىن. ءبىراق كەلىنشەك ءدىر ەتپەدى نە تومەن قاراپ، سەبەپسىز بۇگەجەكتەمەدى. ءوزىنىڭ سالماقتى دا سابىرلى، ءتىپتى اينالاعا نەمقۇرايدىلاۋ قاراعان قالپىندا وتىرىپ جاي-كۇيىن باياندادى. ءاليا قارامەرگەنوۆا الماتىدان شيەۆچەنكو قالاسىنا كەلگەنىنە جارتى جىلدان اسىپ بارادى، ءوزى دارىگەر ەكەن. كەلگەن جۇمىسى - ءوزىنىڭ ۋچاستوگىندەگى اۋرۋ يۆان فەدوروۆقا ءۇي الىپ بەرۋگە قالالىق سوۆەتتىڭ دەپۋتاتىنان كومەك سۇراۋ. دەپۋتات ساعىنبەك ايتۋاروۆ ىشتەي ءارى تاڭىرقاپ، ءارى كەلىنشەكتىڭ جاناشىرلىعىنا سۇيسىنسە دە، سىر بەرگەن جوق. ەڭبەكشىلەر دەپۋتاتتارىنىڭ قالالىق كوميتەتىندە سويلەسىپ، كەيىن حابارلايتىنىن ايتىپ، جۇمىس تەلەفونىن جازىپ الدى.
***
ەكەۋى كەشكى قالا كوشەسىمەن ءجۇرىپ كەلەدى.
- قۇرالايعا، بالا باقشاعا بارامىز عوي؟ - دەدى، جىگىت كەلىنشەكتىڭ قولتىعىنان ەپپەن ۇستاپ. ءاليا ءۇنسىز باسىن يزەدى. ءالى ۇيلەنبەگەن جاپ-جاس جىگىتتىڭ قۇلىندى بيەدەي بالالى كەلىنشەككە ىقىلاسى قۇلاپ ىنتىققانىنا اۋەلى ءمان بەرمەي، اشەيىن وتكىنشى سەزىم داعى دەپ قاراعان. ءبىراق ساعىنبەك بار ىقىلاس-ىلتيپاتىمەن، ادال كوڭىلىمەن بىرتە-بىرتە مۇنىڭ جان دۇنيەسىنە ەنىپ بارا جاتقانداي. دۇنيەدەگى ەڭ جاقىن ادامىنان وپىق جەگەن كوڭىلى جۇدەۋ ادامعا جالعىزدىق قاسىرەتىنەن قۇلازۋدان اسقان ازاپ پەن قايعى جوق قوي. وسىنداي كۇيدە جۇرگەن ءاليانىڭ جانىن جىگىت ءۇنسىز-اق ۇعاتىنداي. ىلعي ۋاقىت تاۋىپ، كوڭىل ءبولىپ، اماندىق-ساۋلىعىن سۇراپ تۇرادى. سوڭعى كەزدە ءتىپتى ونىڭ تەلەفون سوعۋىن كۇتىپ قالاتىنداي ما، قالاي. «جاقسى كورەم، سۇيەم-كۇيەم» دەمەسە دە، بار بولمىسىندا ءبىر ەرەكشە تابيعي جىلىلىق پەن جاقىندىق بار سەكىلدى. مۇنىڭ وتكەن جولىن تاپتىشتەپ سۇرامايدى دا.
- اعا، كەشە نەگە كەلمەدىڭ ماماممەن بىرگە؟
كىشكەنە قۇرالايدىڭ العاشقى سۇراعى ساعىنبەكتى ءارى قۋانتىپ، ءارى ۇيالتىپ تاستادى. قۋانعانى - باسىندا اناسىنان بەتەر توسىرقاي قارايتىن كىشكەنتاي قۇرالايدىڭ مۇنىڭ كەلگەن-كەلمەگەنىن ءتۇيىپ جۇرگەنى - ءسابيدىڭ بۇعان نەمقۇرايلى قارامايتىنى دەگەن ءسوز. ۇيالعانى - كەشە جينالىستان كەش شىعىپ كەلە الماعانى.
- اعا، بىزبەن وتىراسىز عوي، ۇيدە اجەم جىبەرگەن الما بار! - دەگەن قۇرالايدى ءاليا تىيىپ تاستادى:
- اعا ۇيىنە بارادى، ماماسى كۇتىپ وتىر عوي. كەيىن كەلەدى.
قۇرالاي كوڭىلسىز بۇرتيىپ قالدى. جىگىت ءاليانىڭ ىڭعايسىزدانىپ تۇرعانىن سەزىپ، ەسىك الدىندا قوش ايتىستى...
- ماما، ساعىنبەك اعا ءبىزدىڭ تۋىسىمىز با؟ - دەپ، قايتا-قايتا سۇراعان قۇرالايعا اناسى جاي «ءيا» دەي سالعان. قىزىن ۇيىقتاتىپ، ءوزى وي ۇستىندە وتىر. ونىڭ كوز الدىنان ءوز ءومىرىنىڭ وتكەلدەرى ءوتىپ جاتتى.
...وندا ءاليانىڭ كوكىرەگى كۇيىككە تولى ەدى. اققۇبا وڭىندە ميزامنىڭ اياق شەنىندەگى الماداي البىراپ تۇراتىن قىزعىلت شىراي، قۇرىق كورمەگەن قۇلىنداي دىرىلدەگەن بالعىن، بۇلا دەنە ءبارى دە باستان قاپەلىمدە كوشكەن باقىتپەن بىرگە كەتكەندەي-تىن. جاعى سۋالعان، شىمىر دەنەسى دە سالبىراڭقى. مىناۋ وسەكشىل جۇرتقا قانشاما سىر بەرمەيىن دەسە دە، قۇدايىم-اۋ، وسىنداي تاعدىرعا تاپ بولعان جالعىز مەن ەمەسپىن، ەكىنىڭ ءبىرى بولماعانىمەن، وپاسىز جانداردان قاسىرەت شەككەندەر از ەمەس قوي بۇل ومىردە دەپ ءوزىن-وزى قانشا جۇباتسا دا، باياعى اق جارقىن مىنەز، اناۋ قوڭىرقاي كوزدەردەگى مىنا تىرشىلىك-دۇنيەگە دەگەن قۇشتارلىق جالىنى - ايتەۋىر، الەم دە، ادامدار دا كىرشىكسىز پاكتىك دەپ ۇعاتىن كەشەگى كەزگى قادىر-قاسيەت ۇستاتپاي-اق قويدى. ادامدار تۇرعان ءبىر زۇلىم، جاساندى مىنەزبەن، جاساندى ومىرمەن كۇن كەشەتىن ءتارىزدى. بۇل جۇرتتىڭ ءبارى دە شىنشىلدىق، شىندىق، ادال سەزىم، اق كوڭىل دەگەندەردەن جۇرداي ءبىر ماقۇلىقتار سەكىلدى. ءبىر ادامنىڭ جالاڭ اياقتىعى ءۇشىن نەگە مەن باسقالار تۋرالى دا وسىنداي پىكىردەمىن دەپ ءبىر مەزگىل وپىناتىن. سويتەتىن دە وزىنەن ءبىر كلاسس بۇرىن وقىعان ەلدەگى ايشانى ەسكە الاتىن. ايشانىڭ كۇيەۋى قايىرجان - اگرونوم. ەكى بالاسى بار. قايىرجان - اراق ىشسە، بىلاپىت، اۋزىنان اق يت كىرىپ، كوك يت شىققان بەرەكەسىز ادام. كارى اكە-شەشەسى، ەكى ءسابي، ايشا - كەشكە قايىرجان ساۋ كەلەر مە ەكەن، ءىشىپ كەلەر مە ەكەن دەپ تاڭەرتەڭنەن ۇرىككەن قويداي ءۇرپيىسىپ جۇرگەندەرى. ءتىپتى الىپ-ۇشقان العاشقى سەزىمىنىڭ كۇنى ءوتتى عوي دەگەننىڭ وزىندە، بالالارىمنىڭ اناسى، جار-جولداسىم عوي دەپ سىيلامايتىن دا ءتارىزدى ايشانى.
- اتا-ەنەمدى قيمايمىن. ءارى بالالاردى قالاي تىرىلەي جەتىم ەتەم، - دەپ جىلايدى ايشا. ال وسىنىڭ ءوزى ءوزىن دە، ءومىرىن دە الداۋ ەمەي نەمەنە؟.. ءاليا قايىرجاندى دا، ايشانى دا، اتا-انالارىن دا جاقسى بىلەدى. ەكەۋى دە تاربيەلى دەگەن سەميادان شىققان. ءبىر اۋىلدا ءوستى. ءبىر مەكتەپتەن بىردەي تاربيە الدى. اۋىلداعى مۇعالىمدەردىڭ كەيبىرى ءالى كۇنگە ارتتا قالعان عوي. بالاعا باعىنىشتىسىنداي قارايدى. ول ءوسىپ كەلە جاتقان ءبىر مەملەكەت-اۋ، ءوزىنىڭ وي-پىكىرى، ءار نارسە حاقىندا وزىندىك شەشىمى، كوز-قاراسى بار-اۋ دەپ ويلامايدى. ءمۇعالىم نە ايتسا، سوعان باس شۇلعي بەرەتىن ءبىر ماۋباس بولعانىن ادەپتىلىك، قازاق تابيعاتىنداعى يناباتتىلىق دەپ ۇعىنادى. بۇلار وقىعان مەكتەپتە عيباتوللا، اقليما، ءمادينا دەگەن اعاي-اپايلار ءالى بار. ول كەزدە ولار دا جاس بولاتىن. ءدال قازىرگى وزىندەي جاندار ەدى. قىز بالا مەن ەر بالا بىرگە كەلە جاتسا، نە كينوعا بارسا، ەرتەڭىنە قىزدار سوۆەتىنىڭ وتىرىسىن شاقىرىپ، تۇسىنىكتەمە الىپ، بۇكىل مەكتەپ قىزدارىنىڭ (تومەنگى 5-6 كلاستاعىلار دا تىڭداپ وتىرادى) الدىندا، الگى قىز ءبىر ۇلكەن مەملەكەتتىك قىلمىس ىستەگەندەي، جەر-جەبىرىنە جەتىپ، ەكىنشىلەي كلاستاس بالا تۇگىلى، ءوزىنىڭ اعاسىمەن قاتار جۇرمەستەي قىلاتىن. ءوزىڭنىڭ ەش قىلمىس جاساماعانىڭدى ايتساڭ، نە ساباقتا ولار ايتپاعان، ءبىراق ءوزىڭ (رەتتى جەرىندە) جاۋابىڭدى تولىقتىرىپ ايتا قالساڭ، جاراتپاي، «ءمۇعالىمنىڭ ايتپاعانىن ايتىپ بىلگىشسىنۋىن، كورەرمىز ەمتيحاندا» دەپ ءسوز سالماعىن كەيىنگە قالدىراتىن.
مىنە، وسىنداي مەكتەپتە وقىعان بۇلار وقۋ، جاز بولسا كولحوز جۇمىسىنا كومەكتەسۋ، بولماسا كەيبىرەۋلەردەي «ماحابباتىمىز مەكتەپتەن باستالعان» دەيتىندەي قىز-بوزبالالىق حيكايالاردان اۋلاق وسكەن. ۇشەۋى دە ينستيتۋتتى قالادا ءبىتىردى. ول كەزدە قايىرجان دا قوي اۋزىنان ءشوپ المايتىنداي كورىنەتىن. ءاليانىڭ تولەنگە كەزدەسكەنى دە ءۇشىنشى كۋرستا. قالادا وسكەن، دۇنيەتانىم، ونەر-عىلىم سالاسىندا كىممەن بولسا دا تايتالاسا الاتىن، جۇزىكتىڭ كوزىنەن ءوتىپ تۇرعان سىمباتتى جىگىت ون ەكىدە ءبىر گ ۇلى اشىلماعان قىز جانىن بىردەن باۋراپ العان. اتا-اناسى دا ۇلكەن قىزمەتتەگى ادامدار. قۇرتتايىنان ۇلدە مەن بۇلدەگە ورانىپ، قاراعىم-شىراعىممەن وسكەن تولەن بىربەتكەي، قايسار (ءاليانىڭ تۇسىنىگىندە، وسىنداي قاسيەتتەرىمەن جىگىت جىگىت بولماق، ايتپەسە، ءيى قانعان تەرىدەي ۋماشتالىپ، رەتتى-رەتسىز قالبالاقتاعان ەركەكتە ايەل تابىنارداي نە قادىر-قاسيەت بولادى)، ءوزىن دە، قاسىنداعى جارىن دا ەشكىمگە رەنجىتتىرمەيتىن، سۇيە دە، سۇيدىرە الاتىن ناعىز يدەالدىڭ ءوزى بوپ كورىنگەن. ءاليا ينستيتۋتىن ءبىتىرىپ، اۋىلعا اتا-انا جانىنا بارىپ ءبىر جىل قىزمەت ەتكەنگە دەيىنگى ەكى جىلدا دا، ءوز الدارىنا وتاۋ تىگىپ (قالانىڭ شەت جاعىنان جالداپ العان جالعىز بولمە - وندا تولەننىڭ اسپيرانتۋرانى جاڭا بىتىرگەن، ءۇي الۋعا ءالى قولى جەتە قويماعان كەزى - التىن سارايدان دا ىستىق ەدى-اۋ!) تۇرعان ەكى جىل دا بۇلاردىڭ بىر-بىرىنە دەگەن تازا دا ادال سەزىمدەرىنە كىرشىك ءتۇسىرىپ كورمەگەن. ءبىر-بىرىن قاس-قاباق، ءار قيمىلدان ۇعىسقان كوڭىلدەر قاز قالپىندا قالا بەرمەس پە ەدى، ەگەر اراعا زاعيپا تۇسپەسە... العاشقىدا ءاليا تۇك تە سەزگەن ەمەس. بۇرىن جۇمىستان جارقىلداپ، كىشكەنە قۇرالايىن كوتەرگەنشە اسىق بوپ ورالاتىن تولەن بىرتە-بىرتە سۇلەسوقتانىپ، جابىرقاڭقى ما الدە ىزالى ما - ايتەۋىر، ءبىر سالقىن، سىزدى قاباقپەن كەشتەتىپ كەلەتىندى شىعاردى. ءاليانىڭ نازدى، ەركە قىلىقتارىن كورمەسە، كوڭىلى ورتا بوپ وتىراتىن تولەننىڭ ەندى ءتىپتى ونىڭ اياق باسىسى، ءجۇرىس-تۇرىسىنا دەيىن جىنىنا تيەتىن ءتارىزدى.
- پاپا! - دەپ اياعىنا وراتىلعان قۇرالايعا:
- بار، ماماڭا بار، - دەپ ماڭدايىنان يىسكەگەن بولىپ، ىسىرا سالاتىن. «بالا عوي، نە بىلەدى» دەگەن قاتە ۇعىم ەكەن-اۋ. اكە تاراپىنان بۇرىنعى مەيىرىم، بۇرىنعى جىلى الاقان جوق ەكەنىن قۇرالاي دا سەزگەندەي، جاۋتاڭداپ قارايتىنى بولماسا، بۇرىنعىداي قۇلاپ-تۇرىپ شىقىلىقتاپ جۇگىرمەيدى. الدەنەگە مازاسىزدانىپ، شىر ەتىپ جىلاپ قالادى. مۇندايدا تولەن:
- نە بوپ قالدى؟ جۇباتساڭشى! - دەپ تەپسىنە، جيىركەنىشتى كوزقاراسپەن ءاليانى اتادى. ءسابيدىڭ جىلاعان ءۇنى ونىڭ جانىن اۋىرتقاننان ەمەس، مازاسىن، وزىمەن-وزى بوپ جاتقان تىنىشتىعىن بۇزعاندىقتان ەكەنى سەزىلىپ-اق تۇرادى. قۇرالاي دا ءۇنسىز كەمسەڭدەپ، اناسىنىڭ باۋىرىنا تىعىلىپ ءۇنسىز قالادى. مىناۋ شۋلى دۇرمەگى مول ومىردە ءسابي جانىنا تۇسكەن العاشقى سىزات وسى شىعار. ەرتەڭ ول وسكەندە «اكەسىز وسكەن»، «باقىتسىز»، «اكەسى تاستاپ كەتكەن» دەپ كوزىنە بولماسا دا، كوز تاسالاپ ايتاتىندار تابىلادى عوي. ومىرگە دەگەن وكسىك، ىزا وسىندايدان باستالادى ەكەن-اۋ. ءاليا وسىنى ويلايدى. زاعيپانىڭ دا بۇرىننان قىزى بار ەكەنىن ءبىلىپ العان-دى. تولەن دە ءسابيىن جەتىم ەتىپ، بوتەن بىرەۋگە اكە بولعان ابىروي دەپ ويلاي ما ەكەن الدە. «وسىلاي ىستەسەم، مۇنىم ەرلىك» دەپ ويلاپ جاتپايدى، ارينە. سوندا كوڭىل، سەزىم دەگەندەرىڭ تۇراقسىز، الدامشى بىردەڭە بولعانى ما؟ ال وشاق-سەميا الدىنداعى، بالا مەن جار الدىنداعى پارىز شە؟
ساتتىك سەزىمدەردى اقىلعا، پاراساتقا سالماي ما ەكەن بۇل ادامدار. الدە العاشقى لاپىلداعان قۇشتارلىق سايابىر تارتقان سوڭ، باسقا ءبىر قىزىق ىزدەي مە. ەندەشە جەر بەتىندە سانالىلىعىمەن عانا ەرەكشەلەنەتىن ادامزاتتىڭ باسقا ماقۇلىقتان ايىرماسى نەدە؟ تولەن زاعيپانى ءبارى-بىر و باستا ءاليانى سۇيگەندەي سۇيمەيدى. زاعيپا سوندا دا بارىنە ريزا. ايتەۋىر، تولەن سول ءۇيدىڭ ەرى اتانىپ جۇرسە بولدى (زاعيپانىڭ ءوزى ءالياعا سولاي دەدى). سوندا ول ءدال وزىندەي قۇربىسىنىڭ تاعدىرىنا شىمىرىكپەي قالاي قارايدى؟ زاعيپانىڭ اتا-اناسى تاربيەلى ادامدار بولىپ ەسەپتەلەدى. اكەسى ءمۇعالىم، ءتىپتى ءبىر مەكتەپتى باسقارادى. تولەننىڭ كىم ەكەنىن، سەمياسى بارىن بىلەدى. سوندا ولار نە ويلايدى ەكەن. ادام تاعدىرى بىرەۋلەر ءۇشىن ويىنشىق ءتارىزدى شىعار، تەگى. ەگەر زاعيپا:
- ايەلىڭنىڭ كوز جاسىن ارقالامايمىن. اۋرە بولما ماعان! - دەسە، تولەننىڭ جۇگىرە بەرمەيتىنى انىق. جوق، جوق، ءاليانىڭ مۇنداي ومىرگە كونە كەتەرى دە جوق ەدى. ءتىپتى زاعيپا سويتكەن كۇننىڭ وزىندە دە باياعى كىرشىكسىز سەنىم، ادال سەزىم، سىيلاستىق-قيماستىق قايتا ورالا ما؟ ال ولار بولماعان جەردە قانداي سەميا بولماق؟ ايتەۋىر، كۇيەۋى بار، بالاسىنىڭ اكەسى بار دەگەن اتاق ءۇشىن بە؟ وندا ايشا سەكىلدى «باسقا سالسا باسپاقشى» بولىپ، بارىنە دە كونىپ جۇرە بەرسە مە. جوق، جىرتىلعان كوڭىل ءبارىبىر جامالمايدى.
ءبىراق وسىندايلار قايدان شىعادى؟ اتا-انانىڭ ءبارى دە بالاسىنىڭ باقىتتى بولۋىن تىلەيدى. باسقانىڭ باقىتىن تالقاندايتىن، «شايناعانىڭنان جۇتقانىڭ جاقىن» دەگەن پرينسيپتەگى كورسەقىزارلار اسپاننان تۇسپەيدى عوي. وندايلار ءوز ارامىزدان - ءوزىمىز وسىپ-ونگەن ورتادان قاناتاتتانادى. سوندا بۇنىڭ سەبەبى نەدە؟
ءاربىر اتا-انا بالاسىنىڭ جاقسى بولعانىن قالامايدى دەيمىسىز. ادامنىڭ ادامدىق قاسيەتى ونىڭ قىزمەت بابى، اتقاراتىن جۇمىسى، الاتىن جالاقىسىمەن ولشەنبەسە كەرەك. سەميالى بولۋ، ادال جار، ابزال اكە، نەمەسە انا بولۋ - ەڭ ءبىرىنشى، ماعىنالى، تابيعات زاڭى. ەندەشە، ءار اتا-انا وسى جايدى، ياعني ۇلى مەن قىزىنىڭ بولاشاق جاڭا سەميانىڭ مۇشەلەرى ەكەنىن دە ەستەن شىعارماسا عوي. ەگەر بالانىڭ سەميادان، اتا-انا تاربيەسىنەن قانىنا سىڭگەن ادالدىق، پاراساتتىلىعى بولسا، تولەن مەن زاعيپالار سونشالىقتى تۇراقسىز، ار الدىندا دا، ادام الدىندا دا جاۋاپسىز، جالتاق بولار ما ەدى... الپەشتەپ ءوسىرىپ، ۇل-قىزىنىڭ بولاشاعىنان ءۇمىت كۇتكەن اتا-انا تاربيەسىنىڭ جەمىسى وسىلارداي بولسا، ول اتا-انا ەل بەتىنە تۋرا قاراپ، «مەنىڭ بالام ادال، ابزال جان» دەي الار ما... دەمەك، بالام جاقسى بولسا دەگەن جالاڭ تىلەكتەن تاعىلىمدى تاربيە شىقپايدى ەكەن؛ ءبىز بالامىزدى تاربيەلەۋ پروسەسىندە تولەن مەن زاعيپالاردىڭ وسۋىنە جول بەرەتىن كەمشىلىكتەردى ءوزىمىز جىبەرەدى ەكەنبىز.
بالانىڭ تاربيە الار ەكىنشى ءۇيى - مەكتەپ، ەكىنشى اتا-اناسى - مۇعالىمدەر. ءبىراق كەيدە ساباق ۇلگەرىم، كلاستان-كلاسقا قالماۋ سياقتى ءبىرجاقتى تالاپتار تاربيە نەگىزى سانالادى دا، بالانىڭ جەكە قاسيەتى، مىنەز-قۇلقى، پاراساتتىلىق، تۇراقتىلىعى ەكىنشى ساتىدا قارالادى. وسى بالادان قانداي ادام ءوسىپ كەلەدى. مۇمكىن وزات جۇمىسشى، ۇلكەن عالىم، ونەر يەسى بولار ول بولاشاقتا. ال سونىمەن قاتار (ءتىپتى ەڭ الدىمەن دەسەك تە ارتىق ەمەس) ونىڭ ادال جار، تاربيەلى اتا-انا بولۋى ءتيىس ەكەندىگىن مۇعالىمدەر دە ەستەن شىعارماۋ قاجەتتىلىگى ەسكەرىلە بەرمەيدى-اۋ...
...ءاليا قۇرالايىن جەتەلەپ كەتىپ بارا جاتاتىن. ويلى دا سالماقتى جۇزىنەن ەرتە كەلگەن بايسالدىلىق سەزىلەتىن. كىشكەنە قۇرالاي اۋزى تىنىم تاپپاي انانى-مىنانى سۇراي بەرەدى. ءومىردىڭ كوپ سۇراعى ءاليانىڭ ءوزىن دە تولعانتىپ بارادى.
مەن جۋرنالدىڭ تاپسىرماسىمەن شيەۆچەنكو قالاسىندا جۇرگەن ەدىم. مۇناي ۋچاستوكتارىن ارالاپ، تۇندەلەتە ورالعان مەن ەرتەڭگىسىن كەشىرەك تۇرىپ جاتقانىمدا، قوناق ءۇي بولمەسىنىڭ ەسىگى ادەپپەن، باياۋ تىقىلدادى.
- الماتىدان كەلگەن ءتىلشى ءسىز بولاسىز با؟
الدىمدا كوزى كەگىلدىر اسپانداي مولدىرەگەن قىز تۇر.
- ءسىز ءبىر عاجاپ ادام تۋرالى جازساڭىز ەكەن؟ ول - دارىگەر. تاماشا ادام. ءبىز ۋكراينادان كوشىپ كەلگەنبىز.اكەم قۇرىلىسشى. ءوزىم جەتىباي مۇناي باسقارماسىندا وپەراتورمىن. ءبىزدىڭ سەميامىزعا ەشكىمنەن كورمەگەن جاقسىلىق جاسادى، ءۇي الۋعا كومەكتەستى، پاپام وقىس اۋىرعاندا ەمدەدى. مەن سىزگە ءبارىن ايتىپ جەتكىزە المايمىن...
ءتورتىنشى ميكرواۋداندىق پوليكلينيكاعا تەلەفون سوعىپ ەم، ءاليا كارامەرگەنوۆا دەگەن دارىگەر بار، ءبىراق ءقازىر قابىلداۋىندا اۋرۋلار كوپ، جولىعا المايدى دەپ جاۋاپ بەردى.
ەكەۋمىز جۇمىس اياعىندا پوليكلينيكادان بىرگە شىقتىق. اققۇبا ءوڭدى، قوڭىر كەزدەرى ويلى، سۇڭعاق بويلى جاس كەلىنشەك نازىك جاندى ادام ەكەن.
- ءبىز وسىندا تۇرامىز، ۇيگە كىرە كەتىڭىز. قوناق ۇيدەن جالىققان شىعارسىز، ءۇيدىڭ شايىن ساعىنعان جوقسىز با؟ - دەپ ءاليا قوياردا-قويماي جابىستى.
ەسىك شىلدىراعاندا ارعى جاعىنان اسىعا باسقان دىبىستار ەستىلدى دە، ارتىنشا ۇزىن بويلى، قالىڭ قاباقتى، بيداي ءوڭدى جىگىت پەن بەس جاستار شاماسىنداعى اقسارى قىز بالا قول ۇستاسقان كۇيدە قاتار تۇرا قالدى. بوتەن ادامدى كورىپ، ەكەۋى دە اۋەلى توسىرقاعانداي بولىپ ەدى.
- مەنىڭ كۇيەۋىم ساعىنبەك، - دەدى ءاليا ماعان. ءوزى كۇلىمدەپ تۇردى.
You Might Also Like
-
كوپىر ساكايميناتو جانە ماسۋە قالالارىن قوسىپ تۇر. ونىڭ ۇزىندىعى 1،7 كيلومەتر، ال ەنى — 11،3 مەتر.
-
اڭشىلار ۇشەۋ ەدىك. بىرەۋى مينيستر، بىرەۋى عالىم، ءۇشىنشىسى مەن - جازۋشىمىن.
