InfoHub Logo

قازاقستاندا كەڭەستەر سايلاۋى كەي جەرلەردە بولىپ جاتىر. كەي جەرلەردە بولايىن دەپ جاتىر.

كەڭەس ۇكىمەتى جالپى ەڭبەكشىل تابىنىڭ ۇكىمەتى ەكەندىگى ريەۆوليۋسيادان بەرى ايتىلىپ تا كەلەدى، جازىلىپ تا كەلەدى. قازاق ەڭبەكشىل تابى ءتارىزدى ءبىلىم رەتىندە ارتتا قالىپ، ءوز تىزگىنىن ءوزى تولىق قىلىپ الا الماي كەلە جاتقان حالىققا: «كەڭەس ۇكىمەتى جالپى ەڭبەكشىل تابىنىڭ ۇكىمەتى، ءوز ۇكىمەتىڭدى ءوز قولىنا ال، كەڭەس سايلاۋلارىندا ساق بول. بايلاردان قورعالاما، اۋىلدىق، بولىستىق ءام ودان جوعارعى كەڭەستەرگە بايلار ءام بايلاردى جاقتاۋشىلار كىرىپ كەتپەسىن» دەپ ءار ۋاقىتتا ايتىپ وتىرۋ تەرىس بولمايدى.

كەڭەس ۇكىمەتى ورناعاننان بەرى بۇل ءسوز ايتىلىپ كەلە جاتسا دا، قازاقتىڭ ەڭبەكشىل تابىنىڭ كوبىنىڭ ناداندىعىنان، بىلىمسىزدىگىنەن، قورعالاقتىعىنان اۋىلدىق، بولىستىق ءام جوعارعى كەڭەستەرگە بايلار ءام بايلاردى جاقتاۋشىلار سايلانىپ ءوتىپ كەتىپ، ەل ىشىندە ۇكىمەت بايلاردىڭ قولىندا بولىپ كەلەدى.

باياعىدان بەرى ەل بيلىگى بايلاردىڭ قولىندا بولىپ كەلدى. سول زاماننان بەرى بايلاردىڭ قولىندا بەكىنىپ قالعان بيلىكتى از ۋاقىتتىڭ ىشىندە جۇلىپ الۋ، ارينە، وڭاي ءىس ەمەس تە. ءبىراق ولاي بولعانىمەن بوس وتىرۋعا بولمايدى. ەل بيلىگىن بايلاردىڭ قولىنان ابدەن تۇبىنەن قوپارىپ جۇلىپ الۋ ءۇشىن ەڭبەكشىل تاپتىڭ ەكپىندى رۋحى، جالپى ۇيىمى، كۇش-قايراتى كەرەك. ەڭبەكشىل تاپتىڭ كوزى اشىق شىن ازاماتتارىنىڭ قاجىماس قايراتى، تىزە قوسقان بىرلىگى ءام وتە قاتتى ساقتىعى كەرەك.

قاي زاماندا بولسا دا ءبىر تاپتىڭ ۇكىمەتى قۇرىلعاندا، سول ۇكىمەتتىڭ نەگىزى، ىرگەسى مىقتى بولسا، ىرگەسى، تابانى ورنىقتى، بەرىك بولسا، سول ۇكىمەت كۇشتى، يكەمدى بولماق ءام ونداي ۇكىمەت ءوزىنىڭ تابىنا تاياۋىراق بولماق. اۋىلدىق، بولىستىق ءام ۋەزدىك يسپولكومدار، — ەڭبەكشىل تابىنىڭ ۇكىمەتى كەڭەس ۇكىمەتىنىڭ نەگىزى، كەڭەس ۇكىمەتىنىڭ ىرگەسى. ءۇيدىڭ ىرگەسى مىقتى بولسا، جوعارعى ءۇستى دە مىقتى بولماق. ىرگەسى ناشار بولسا، ول ىرگەگە سالىنعان ءۇستى دە ناشار بولماق.

مىنە، وسىنى ەسكە الىپ قازىرگى بولىپ جاتقان كەڭەس سايلاۋلارىندا قازاق ەڭبەكشىل تابى ەندى قورعانباي، جالپى جۇمىلىپ سايلاۋ ىستەرىنە كىرىسىپ ءام ەڭبەكشىل تابىنىڭ «شىن قورعاۋشىسىمىن» دەپ جۇرگەن ازاماتتار يسپولكومدارعا بايلاردى قورعايتىن ءبىر ادامدى دا كىرگىزبەۋلەرى كەرەك.

ەڭبەكشىل تاپ، ءوزىڭ بەرىك بولساڭ، ءوزىڭ ءبىراۋىزدى بولساڭ، ءوز تىزگىنىڭدى، ەل بيلىگىن ءوز قولىڭا الا الاسىڭ! كەڭەس سايلاۋى — ەڭبەكشىل تابىنىڭ شىن قورعاۋشىسىمىن دەپ جۇرگەندەرگە ۇلكەن سىن.

1923 جىل

---