قازاقستاندا كەڭەس سايلاۋ مەزگىلى تاياندى
قازاقستاندا كەڭەس سايلاۋ مەزگىلى تاياندى. ورتالىق قالادان الىس كەيبىر جەرلەردە بولىستىق يسپولكومداردىڭ سايلاۋلارى بولىپ تا ءوتتى. ءبىراق بۇل سايلاۋلاردىڭ قالاي وتكەنىن بىلمەيمىز. كەڭەس ۇكىمەتىنىڭ ۇلى جوباسى، ۇلى باعىتى بولىستىق سايلاۋدان باستاپ — جالپى ەڭبەكشىل تابىنىڭ ماقساتىن كوزدەمەيتىن ادامدى، باي ءام جۋان جۇدىرىق ادامدى سايلاۋعا كىرگىزبەي، ەل بيلەۋ تىزگىنىن ەڭبەكشىل تابىنىڭ جالپى باعىتىمەن جۇرەتىن، ەڭبەكشىل تابىنىڭ پايدالارىن عانا كوزدەيتىن ادامدارعا بەرۋ. ەڭبەكشىل تابىنىڭ ءوز بيلىگىن وزىنە بەرۋ. ەل بيلەۋ تىزگىنىن بايلارعا، كۇشتى جۇدىرىقتارعا بەرمەي ءوز قولىنا الىپ، قىزمەت باسىنا ءوز كىسىلەرىن قويۋ ءۇشىن ەڭبەكشىل حالىق تىزە قوسىپ، جۇمىلىپ بۇل ىسكە كىرىسۋلەرى كەرەك.
بۇرىنعى پاتشانىڭ زامانىنداي ەندى بايلاردان، كۇشتى جۇدىرىقتاردان قورقاتىن ەمەس، بۇرىنعى بۇعىپ قالعان ەڭبەكشىل حالىق ەندى بۇكشەڭدەمەي توردەن ورىن الۋلارى كەرەك. ەڭبەكشىل حالىقتىڭ كۇشتى قورعانى — كەڭەس ۇكىمەتى.
راس، كەيبىر سايلاۋعا شىققان كەڭەس ۇكىمەتىن سىرتىنان الداپ جۇرگەن ادامداردىڭ بايلارعا، كۇشتى جۇدىرىقتارعا بولىسىپ كەتەتىندەرى دە بولاتىن، ءبىراق ول ءۇشىن كەڭەس ۇكىمەتىنىڭ ىستەگەنى وسى عوي دەپ ەڭبەكشىل حالىق قورقىپ، بۇكشەڭدەپ بايلارعا، كۇشتى جۇدىرىقتارعا بيلىكتى بەرىپ جىبەرمەۋى كەرەك. قانداي ايلامەن بولسا دا سايلاۋدان وتكەن ەڭبەكشىل تابىنا جات ادامدار بىلىنسە كەڭەس ۇكىمەتى ولاردى قويمايدى. ونداي ارام ويلى، ەڭبەكشىل تابىنىڭ ماقساتىن كوزدەمەيتىن ادامداردى ەل بيلەۋ ىسىنە يە قىلمايدى.
ەڭبەكشىل تابىنىڭ شىن ازاماتتارى، ءار جەردە جۇمىلا ساق بولىڭدار!
1928 جىل
You Might Also Like
-
تەمىر جول سالىنىپ، وتاربا جۇرگەنىنە، سۋدىڭ ۇستىمەن پاروحود جۇرگەنىنە، سۋدىڭ استىمەن سۇڭگۋىر قايىق جۇرگەنىنە، قۇرعاق جاي عانا جولمەن اۆتوموبيل جۇرگەنىنە ەداۋىر ۋاقىت بولدى. بۇل ايتىلعان زاتتار العا...
-
قازاقستاننىڭ ءاربىر جەرلەرىنەن كەلگەن حابارلارعا قاراعاندا، بۇرىنعى ەل ىشىندە بىلەگىنىڭ كۇشىنە سەنىپ، بىلەك كۇشىن ارامدىققا جۇمسايتىن بۇزىقتار تاعى دا باستارىن كوتەرە باستاعان كورىنەدى. كۇشىن بۇزىقت...
