InfoHub Logo

ءبىر كەپتەر ۇلكەن قايىڭنىڭ سالالى بۇتاعىنداعى قالىڭ كوك جاپىراقتاردىڭ اراسىندا بەيقام وتىر ەكەن، ەنتىگە جالپىلداپ، جوعارعى جاعىنداعى بۇتاققا مونتىق قارا قارعا كەلىپ قونىپتى. سودان كەيىن موينىن ءبىر جوعارى، ءبىر تومەن سوزعىلاپ، وڭەشىن قىرناي قارقىلداي باستايدى. قارعانىڭ بارقىلداق داۋسىنان كەپتەردىڭ قۇلاعى ءبىتىپ، باسى زەڭىپ، مازاسى كەتەدى. سوندا دا ءوزى بىلەر دەپ، ۇندەمەي شىداپ باعادى. ءبىراق قارا قارعا قارقىلداۋىن توقتاتپايدى. دەنەسى تۇرشىگىپ، بەرەكەسى قاشقان كەپتەر:

          — وۋ، قارعا، تاڭ اتقالى بالاپاندارىما جەم تاسىپ، ابدەن شارشاپ، مىنا قايىڭنىڭ ساياسىنا ازداپ دەمالايىن دەپ وتىر ەدىم. مۇمكىن بولسا، ءبىراز قويا تۇرشى، مازانى الماي، – دەپ وتىنەدى.

          ءوزىنىڭ انىنە تۇسىنبەگەنىنە قارعانىڭ قاباعى ءتۇسىپ كەتەدى. تۇمسىعى سورايىپ، كىلميە قارايدى:

          — ەي، وسىلاي شارشاپ وتىرعاندا، كوڭىلىڭدى كوتەرەيىن دەپ، ادەيى سايراپ وتىرعان جوقپىن با؟! – دەيدى.

          كەپتەر ءوز ءوتىنىشىن ۇقپاعان قارعاعا تاڭدانا قارايدى دا ءارى ۇشىپ كەتەدى.

---