InfoHub Logo

مىسىق پەن تىشقان دوس بولىپتى. ءبىر كۇنى ەكى دوس كەلە جاتىپ، ءبىر قۇمىرا ماي تاۋىپ الىپتى.

          مىسىق بىلگىرسىنىپ:

          — قۇمىراداعى مايدى قىستا جەيىك، – دەپ، شۇڭقىر قازىپ، كومىپ تاستاپتى. كۇندەر وتە بەرەدى. قىس كەلەدى. اياز قىسىپ، قارنى اشىپ جاتقان مىسىقتىڭ ەسىنە ءوزى كومىپ قويعان قۇمىراداعى ماي ءتۇسىپتى. ەندى مىسىق سىلتاۋراتىپ:

          — تىشقان، مەنىڭ اپام ۇل تاۋىپتى، سوعان توي جاسايدى ەكەن، مەنى شاقىرىپ كەتتى، – دەيدى دە كەتىپ قالادى. سونان سوڭ قۇمىراداعى مايدىڭ توبەسىن عانا ويىپ جەپ قايتادى. الدىنان تىشقان شىعادى.

          — بوبەكتىڭ اتىن كىم قويدىڭدار؟ – دەپ سۇرايدى.

          — توبەلشە قويدىق، – دەيدى مىسىق.

          كەلەسى كۇنى مىسىقتىڭ تاعى دا قارنى اشادى. قۇمىراداعى ماي ەسىنە تۇسەدى. تىشقانعا كەلىپ:

          — مەنىڭ تاعى ءبىر اپام ۇل تاۋىپتى، تويعا شاقىرتىپتى، بارايىن، – دەپ، كەتىپ قالعان مىسىق مايدى ورتالاي جەپ الادى. تىشقان تاعى دا الدىنان شىعادى.

          — ە، بوبەكتىڭ اتىن كىم قويدىڭدار؟ – دەپ سۇرايدى.

          — بەلدەمشە قويدىق، – دەي سالادى مىسىق. بىرنەشە كۇننەن كەيىن مىسىقتىڭ تاعى دا قارنى اشىپ، قۇمىراداعى مايعا بارماق بولىپ، تىشقانعا كەلەدى:

          — مەنىڭ تاعى ءبىر اپام بار ەدى، سول ۇل تاپقان ەكەن، شاقىرتىپتى، – دەپ، كەتىپ قالادى. مىسىق قۇمىراداعى مايدىڭ قالعانىن جەپ كەلە جاتادى. الدىنان تىشقان شىعادى:

          — ە، بوبەكتىڭ اتىن كىم قويدىڭدار؟ – دەپ سۇرايدى.

          — قالدىقشا قويدىق، – دەيدى مىسىق.

          ءبىر كۇنى قىسقى اياز قىسادى. دالاعا شىعۋعا داتتەرى شىدامايدى. تىشقان مەن مىسىقتىڭ قارنى اشادى، اشىعا باستايدى. سول كەزدە تىشقاننىڭ ەسىنە وزدەرى تىعىپ قويعان قۇمىراداعى ماي ءتۇسىپ، مىسىققا ايتادى.

          مىسىق پەن تىشقان كومگەن مايلارىنا كەلسە، قۇمىراداعى مايدىڭ جۇعىنى دا قالماپتى. سوندا تىشقان:

          — ءىم-م... ءبىلدىم، ءبىلدىم، – دەيدى رەنجىپ، – سەن ءۇش رەت ۇيدەن شىعىپ كەتىپ ەدىڭ. ءبىرىنشى كەلگەندە، توبەسىن جەپ، توبەلشە، ەكىنشىسىندە ورتاسىن جەپ، بەلدەمشە، ۇشىنشىسىندە قالعانىن جەپ، قالدىقشا دەدىڭ عوي، ءا؟ – دەيدى.

          ءوز قۋلىعىن تىشقان ءبىلىپ قويعان سوڭ، دويىر مىسىق اشۋعا بۋلىعىپ، تىشقاندى باس سالىپ تالايدى. تىشقان ءبىر تەسىككە كىرىپ كەتىپ ارەڭ قۇتىلادى. مىسىق پەن تىشقاننىڭ دوستىعى سونىمەن بىتكەن ەكەن.

---