كىتاپ
بىردە جاقسى تانيتىن ءبىر جاس اقىن جىگىت كەلىپ:
— اعا، مەنىڭ جىر جيناعىم شىققالى دا ءبىراز بولدى، ءوزىڭىز بىلەسىز عوي، — دەدى.
— ارينە، قولتاڭباڭدى قويىپ، اكەلىپ سىيلاعانىڭ ەسىمدە. وقىپ تا شىقتىم، تۇشىمدى دۇنيەلەر بارشىلىق. ماعان كىتابىڭدى بەرگەنىڭدى ۇمىتتىڭ با؟
— جوع...ءا، ءبارى ەسىمدە عوي. ايتايىن دەگەنىم ءبىر مىڭ عانا دانامەن شىققان سول كىتاپ ءالى تارالعان جوق. ءتورت جىلدا تابانىمنان توزا جۇگىرىپ ءجۇرىپ، قارىزدانىپ-قاۋعالانىپ شىعارىپ ەم، ەندى بۋىلىپ-تۇيىلگەن وراۋىمەن ءالى جاتىر، كىمگە بارىپ، كىمگە ايتارىمدى بىلمەيمىن...
وسى ورايدا مەنىڭ ەسىمە ءبىر مىسال ەرتەگى ءتۇستى. يت پەن مىسىق ەرتەدە بىرگە تۇراتىن كورىنەدى. بىردە يت فوتواپپارات ساتىپ الىپتى. ونداعى ويى جان-جانۋارلاردى سۋرەتكە ءتۇسىرىپ، ونى ساتىپ، تابىس تابۋ ەكەن. فوتواپپاراتىن اسىنىپ، ورمانعا بارسا، قارسى الدىنان قويان شىعا كەلىپتى. بۇل فوتواپپاراتىن ازىرلەگەنشە قورقاق قويان زىتا جونەلەدى. يتەكەڭ قۋىپ بەرەدى. ءسويتىپ ەرتەدەن كەشكە دەيىن قۋىپ ءجۇرىپ، ىمىرت ۇيىرىلگەندە عانا سۋرەتكە ءتۇسىرىپ ۇلگەرەدى. ابدەن دىڭكەلەپ، سۇيرەتىلىپ ۇيىنە جەتىپ ەسىكتەن كىرە قۇلايدى. ءبىرازدان كەيىن باسىن كوتەرىپ:
— ۋف، قۋىپ ءجۇرىپ ارەڭ دەگەندە نىساناما ىلىكتىردىم-اۋ، ايتەۋىر، — دەيدى.
— وۋ، يتەكە، بۇل سەنىڭ شارۋاڭنىڭ جارتىسى عانا، قيىنى ءالى الدا. ەرتەڭ قوياندى ىزدەپ تاباسىڭ، سودان سوڭ سۋرەتىن بەرۋ ءۇشىن تاعى كۇنى بويى قۋالايسىڭ، — دەگەن ەكەن سوندا مىسىق.
سول ايتقانداي، ونسىز دا ازابى ءبىر باسقا جەتىپ-ارتىلاتىن قالامگەرلىكتىڭ موينىنا زىلدەي بولىپ نارىق ارتىلدى. ەندى تالانتتىڭ ەمەس، كۇندە ءبىر كىتاپتى "سۇيكەي" سالىپ، ولارىن دومداپ-دومداپ تاراتا الاتىن پىسىقايلىقتىڭ كۇنى تۋدى.
ءاي، زامان-اي، دەسەڭشى؟!.
You Might Also Like
-
بەكتۇردى بالا كەزىنەن بىلەتىنمىن. اكە-شەشەسى تاعدىر تاۋقىمەتىن كوپ كورگەن، قاراپايىم، شارۋا جاندار ەدى. ءوزى دە جوقشىلىقتىڭ شەتىن كورىپ ءوسىپتى. "مەكتەپكە جاماۋ شالبارمەن، كوكەم تىگىپ بەرگەن شوق...
-
جاڭعاقتىڭ ويى، شاعادام، نەبيتتاۋ قالالارىنىڭ توڭىرەگى قاشاننان اداي قازاق پەن ءجاۋمىت تۇرىكمەننىڭ اۋىلى ارالاس، قويى قورالاس قونىسى. گۇرجى، ەرىكتى، وعىلاندى سياقتى كىشىگىرىم ەلدى مەكەندەردى اتاعاندا...
