تورى جورعانىڭ بوگەلەك قاقپايى
قازانعاپپەن سىيلاس، قادىرلەس بۇركىتباي دەگەن باي بولعان. مال تەگىن ادامعا بىتپەيدى عوي، بۇركىتباي ءتورت تۇلىكتىڭ ءتىلىن بىلەتىن، شارۋانىڭ ىعىن تاپقىش، تابيعات سىرىن تانىعىش زەرەك جان بولسا كەرەك.
ءبىر جىلى جاز ورتاسى اۋعاننان-اق ءشوپ بۋىنى ەرتە قاتىپ، قۇس ەرتە قايتىپ، جىلقى مالى ءىشىن تارتىپ، الداعى قىستىڭ قولايسىز بولاتىن سىڭايى بايقالادى. تابيعات سىرىنا زەرەك بۇركىتباي شيراق قيمىلداپ ءجۇرىپ، ۇساق مالى مەن قارا مالىن بازار شىعارىپ، اقشاعا اينالدىرىپ ۇلگەرەدى. ال جىلقىسىن سەنىمدى جىگىتتەرگە تاپسىرىپ، ارالدىڭ قۇلاندى دەپ اتالاتىن قۇراقتى، قامىستى قورىعىنا ايداتادى.
بۇركىتباي قاتەلەسپەگەن ەكەن، قىلىشىن سۇيرەتىپ قىس كەلەدى. قارا كۇزدەن باستاپ كوك يىق ەتىپ ۇزاق جاۋعان قارا جاۋىننىڭ اياعى ساقىلداعان سارى ايازعا ۇلاسادى. دالا ءتوسىن كوك ساۋىت مۇز قۇرسايدى. جەردەن قىلتاناق تەرىپ جەي الماعان ءتورت تۇلىكتىڭ از كۇندە جىلىك مايى ءۇزىلىپ، اقسۇيەك جۇت بولادى.
ابدەن، كۇيزەلىپ كوكتەمگە «شىقپا، جانىم، شىقپا!» دەپ ازەر جەتكەن ەل بار ءۇمىتىن قۇلاندىداعى جىلقىعا ارتادى. سودان، كوكتەم جىلت ەتىپ شىعىپ، ەل-جۇرت بىرىنە-بىرى سۇيەنىپ، جايلاۋعا تۇياق ىلىكتىرگەندە بۇركىتبايدىڭ قالىڭ جىلقىسى دا كورىنەدى. جاي كورىنبەيدى، ءبىر باسى ەكەۋ بولعان كوپ جىلقى شۇرقىراپ، سۇلىق جاتقان دالا توسىنە جان بىتىرەدى. جەر قايىسقان جىلقىنىڭ الدىندا بۇركىتبايدىڭ مالىنىڭ باسى تورى جورعا ايعىر، جال-قۇيرىعى جەر سىزىپ، كەكىلىن سىلكي شۇلعىپ، ۇيرەنشىكتى جايلاۋىن بەتكە الىپ كەلە جاتسا كەرەك.
وسىناۋ كورىنىسكە ءسۇيسىنىپ، ىشتەي شۇكىرلىك ەتكەن قازانعاپتىڭ قولىنداعى دومبىراسىنان تىڭ سارىن لەكىلدەي توگىلىپ قويا بەرگەن ەكەن. سوندا جاڭا كۇيگە ەلەڭ ەتە قالعان بۇركىتباي دا قۋانىشىن جاسىرا الماي: «قازانعاپ-اۋ، مىنا كۇيىڭ سوناۋ كورىنگەن تورى جورعانىڭ بوگەلەك قاقپايى سياقتى عوي!» — دەپسە كەرەك. قازانعاپ بولار-بولماس جىميىپ قويىپ: «بولسا، بولار!» — دەگەن ەكەن.
ەل قۋانىشىن ءوز باعىنا بالايتىن قازانعاپتىڭ بۇل كۇيى كەشىكپەي-اق «تورى جورعانىڭ بوگەلەك قاقپايى» دەگەن اتپەن ءدۇيىم جۇرتقا تاراپ ەدى دەيدى.
You Might Also Like
-
«كوكىل» كۇيىنە قاتىستى ەل ىشىندە اڭىز-اڭگىمە كوپ. سونىڭ ءبىرى قازانعاپ پەن ۇسەن تورەنىڭ العاش كەزدەسۋىنە بايلانىستى ايتىلادى. بىردە قازانعاپ ەل ارالاپ ءجۇرىپ قاراقامىستا وتىرعان ۇسەن تورە...
