InfoHub Logo

بۇل ەسكەرتۋلەر قىسقى مەزگىلدە بولاتىن كوكتايعاقتا قۇلاپ، جاراقات الىپ نەمەسە دەنە مۇشەلەرىنىڭ سىنۋىن الدىن الۋعا كومەك بولا الادى.

كيىمدى قالاي دۇرىس تاڭداۋ كەرەك؟

اياق كيىم

نەگىزگى ماسەلە وكشەسى بيىك نەمەسە پلاتفورما اياق كيىمگە بايلانىستى بولادى. اياق كيىم وكشەسى 3–4 سانتيمەتردەن اسپاۋى ءتيىس. سونداي-اق، كوكتايعاق كەزىندە ىڭعايلى بولاتىن اياق كيىمدەردى تاڭداعان دۇرىس.

اياز كەزدە قاتىپ قالاتىن، تابانى تەپ تەگىس اياق كيىمدى تاڭداماعان ءجون. ەڭ دۇرىسى كوكتايعاقتا تۇمسىعى كەڭ، تابانى بەدەرلى (ءىرى بەدەرلەر ۇساق بەدەرمەن ۇيلەستىرىلسە) ەتىك قولايلى.

كيىم

قىسقى كيىم وتە ىڭعايلى بولۋى ءتيىس. سايكەسىنشە مەزگىلدىك كيىمنىڭ كاپيۋشونى نەمەسە جاعاسىنىڭ ۇزىن بولعانى ءجون. جۇقالاۋ كۇرتەشەگە قاراعاندا، جۇمساق پۋحوۆيكتى تاڭداۋ ورىندى.

باۋى ۇزىن اۋىر سومكەنى تاڭداماعان دۇرىس. ول قوزعالىس كەزىندە تەپە-تەڭدىكتىڭ بۇزىلۋىنا الىپ كەلۋى مۇمكىن. ەگەر ءسىز زاتتاردى پاكەتپەن الىپ جۇرەتىن بولساڭىز، وندا زاتتاردى ەكىگە ءبولىپ ەكى قولعا ۇستايتىنداي ەتىپ الىڭىز. كوكتايعاق كەزىندە ەڭ ىڭعايلىسى ارتقا تاعاتىن سومكە بولىپ ەسەپتەلەدى.

قۇلاپ قالماس ءۇشىن قالاي ءجۇرۋ كەرەك؟

•    ءوزىڭىزدى پينگۆين سياقتى ەلەستەتىڭىز. ماسەلەن، تابانىڭىزدى جەرگە نىق باسىپ، اياعىڭىزدى ءسال بۇگىپ، بۋىنعا كۇش تۇسىرمەي ادىمداڭىز. بۇل ءجۇرىس سىرتتاي كۇلكى شاقىرعانىمەن، ول قولايسىز اۋا رايىندا ءقاۋىپسىز.

•    جىلدام جۇرمەڭىز، اياعىڭىزدى تىم جوعارى كوتەرمەڭىز. قادامدار اراسى ءجيى بولعانى ابزال. ءقاۋىپتى جەرلەردەن تايىپ كەتۋىڭىز ابدەن مۇمكىن.

•    كوكتايعاق كەزدە ەشقاشاندا قولىڭىزدى قالتاڭىزعا سالماڭىز. قولىڭىز قالتاڭىزدا بولىپ قۇلاعان كەزدە قاتتى جاراقات الىپ قالۋىڭىز مۇمكىن. قۇلاپ بارا جاتقان كەزدە قولمەن كومەكتەسىپ، قيمىلدى تەپە-تەڭدىكتە ۇستاي الاسىز.

•    تايىپ كەتسەڭىز نەمەسە ونشا بيىك ەمەس جەردەن قۇلاساڭىز، ءسال وتىرىپ ەس جيناپ الىڭىز. قولىڭىزدا بار بارلىق زاتتاردى بوساتىڭىز. بۇل قيمىلدار اياقتان قالىپتى تۇرۋعا مۇمكىندىك بەرەدى.

كوشەدە قۇلاپ قالماس ءۇشىن ءوزىڭدى قالاي ۇستاۋ كەرەك؟

•    ءجۇرىپ بارا جاتقان كەزدە تەلەفونمەن سويلەسپەڭىز.

•    بۇكىل نازارىڭىزدى جولعا اۋدارىڭىز. باسقا ادامدار جۇرگەن جولمەن نەمەسە تروتۋار شەتىمەن ءجۇرىڭىز. كوپشىلىك جاعدايدا تروتۋار شەتى قاتتى تايعاناق بولمايدى. قاردىڭ استىندا مۇز بولىپ، ودان كەز كەلگەن ۋاقىتتا اياعىڭىزدىڭ تايىپ كەتۋى مۇمكىن ەكەندىگىن ەسىڭىزدەن شىعارماڭىز.

•    جولدا بارىنشا ىجداقاتتى جانە سىپايى بولىڭىز. قاسىڭىزدان ءوتىپ بارا جاتقاندار ابايسىزدا قۇلاپ قالسا، ولاردى دەمەپ ورنىنان تۇرعىزىپ جىبەرىڭىز.

•    باسپالداقتار (بۇل جەردە باسپالداق ساتىسىنا ەكى اياقتى بىردەي قويىپ كوتىرىلگەن نەمەسە تۇسكەن ءقاۋىپسىز)،  جولدىڭ شەتى، ليۋكتاردىڭ تەمىر قاقپاعى، سونداي-اق ءتۇرلى بۇرىلىستار ەڭ ءقاۋىپتى جانە تايعاناق جەر بولاتىندىعىن ەسىڭىزدەن شىعارماڭىز. مۇنداي جەرلەردەن جۇرمەۋگە تىرىسىڭىز.

•    ۇيدەن شىعار الدىندا كوورديناسيانى جاقسارتۋ ءۇشىن بىرنەشە جاتتىعۋ جاساۋ ابزال. ماسەلەن، اياقتىڭ ۇشىمەن 20 رەت وتىرىپ-تۇرۋ.

•    تايعاق جولمەن قاتتى ءجۇرىپ كەلە جاتقان كولىكتىڭ الدىن كەسىپ وتپەڭىز. دۇرىسى كولىكتىڭ ءوتىپ كەتۋىن كۇتىپ، اسىقپاي جولدان ءوتۋ كەرەك. ءسىز جولدان ءوتىپ بارا جاتقان كەزدە ابايسىزدا اياعىڭىز تايىپ، قۇلاساڭىز جۇرگىزۋشى ابىرجىپ، تەجەگىشتى باسىپ ۇلگەرمەي قالۋى مۇمكىن.

قالاي دۇرىس قۇلاي ءبىلۋ كەرەك؟

ەگەر ءسىز قۇلاپ بارا جاتساڭىز بۇلشىق ەتتەرگە سالماق ءتۇسىرىپ، دەنەڭىزدى جيناپ الىڭىز.

ەگەر ءسىز ارتقا قاراي قۇلاساڭىز، شىنتاقپەن تۇسپەس ءۇشىن قولىڭىزدى بۇرىپ جىبەرىڭىز. ارقاڭىزدى باسقا جاققا بۇرىپ، يەگىڭىزدى كەۋدە تۇسىڭىزعا قاراي ءيىڭىز – بۇل جەلكەڭىزگە قاتتى سوققى ءتيۋىن الدىن الادى. ەگەر مۇمكىندىك بولىپ جاتسا بارلىق دەنەڭىزدى بۇرىپ قۇلاڭىز. شالقادان قۇلاعاننان گورى بۇل قيمىل بارىنشا قاۋىپسىزدەۋ.

ەگەر ەكپەتىڭىزدەن قۇلاۋ جاعدايلارىندا بىلەگىڭىزگە كۇش ءتۇسىرىپ، قولىڭىزدى تىرەڭىز. بۇل قاتتى سوققى الۋدى الدىن الادى. قۇلاۋ كەزىندە ءسال دە بولسىن جەرگە اقىرىن ءتۇسۋ ءۇشىن اياعىڭىزدى العا قاراي سوزىڭىز.

ەگەر ءسىز ءبىر جاق بۇيىرگە قاراي قۇلاساڭىز، قولىڭىزدى جەرگە تىرەپ قۇلاماڭىز. كەرسىنشە قولىڭىزدى دەنەڭىزگە تيگىزىپ ۇستاڭىز.

ەگەر باسپالداقتان قۇلاعان جاعدايلاردا قولدارىڭىزبەن باسىڭىز بەن بەتىڭىزدى جابۋعا تىرىسىڭىز. باسپالداقتان قۇلاپ بارا جاتقان كەزدە تەجەۋ ارەكەتتەرىن جاساماۋ كەرەك، ايتپەسە ونىڭ زارداپتارى اۋىر بولۋى مۇمكىن.

قانداي دەنە مۇشەسىمەن قۇلاۋعا بولمايدى؟

•    بوكسەمەن. بۇل قۇيمىشاق نەمەسە ومىرتقانىڭ جاراقات الۋ قاۋىپتەرىن تۋعىزادى.

•    قولدى سوزىپ الاقانمەن. بۇل قولدىڭ بىرنەشە جەردەن سىنۋ قاۋىپتەرىن ۇلعايتادى.

•    تىزەمەن. بۇل تىزەنىڭ قاتتى جاراقات الۋىنا الىپ كەلەدى.

•    بىلەكپەن. بۇل بۇعانالاردىڭ سىنۋىنا ءقاۋىپ تۋعىزادى.

قۇلاپ قالساڭىز نە ىستەۋ كەرەك؟

دارىگەرلىك كومەك كورسەتۋ پۋنكتىنە بارىڭىز. ويتكەنى بارلىق جاراقاتتار بىردەن بىلىنبەۋى مۇمكىن. ياعني، قۇلاۋدىڭ زارداپتارى كەيىن دە شىعىپ جاتادى.

اۋىرسىنىپ قالعان جەرگە بەس مينۋتتان ءۇزىلىس جاساپ، 20 مينۋتتان سۋىق زات باسىڭىز. ەگەر ءبىر تاۋلىك وتكەننەن كەيىن ىسىك باسىلسا، وندا وعان قىزدىراتىن نەمەسە كوگەرگەندى باساتىن جاقپا ماي جاعۋعا بولادى.

اياق كيىمنىڭ تايعاناق بولماۋى ءۇشىن نە ىستەۋگە بولادى؟

•    اياق كيىم جوندەيتىن شەبەرگە بارىپ، اياق كيىم تابانىنا تايعانامايتىن رەزەڭكە توسەمە جاپسىرتۋ.

•    ءوزىڭىز تابانىڭىزعا پلاستىردىڭ بىرنەشە بولىگىن جاپسىرساڭىز بولادى. بۇل ءتاسىل بىرنەشە ساعاتقا اياق كيىمدى بارىنشا ءقاۋىپسىز ەتەدى.

•    پلاستىردىڭ ورنىنا جاقسى كيىز تارىزدەس نەمەسە ءزىمپار (بەتىن الىپ تاستايتىن) قاعازداردى جاپسىرۋعا دا بولادى.

•    ەسكى اياق كيىمنىڭ تابانىن زىمپارمەن (بەتىن الىپ تاستايتىن) تەگىستەۋ.

•    قالىڭ بۇدىرلى تابانعا ۇساق شۋرۋپتاردى بۇراپ قويۋعا بولادى.

•    سپورت زاتتارىن ساتاتىن ارنايى دۇكەننەن تايعاناپ كەتۋگە قارسى ارنايى تابان جاپسىرماسىن ساتىپ الىڭىز.

•    ەگەر ءسىزدىڭ جاپسىرۋعا نەمەسە تايعاناپ كەتۋگە قارسى جاپسىرمالاردى ساتىپ الۋعا ۋاقىتىڭىز بەن مۇمكىندىگىڭىز بولماسا، ەتىگىڭىزگە نەمەسە باتەڭكەڭىزگە ماقتا-ماتادان جاسالعان شۇلىقتى سىرتىنان كيگىزىپ قويىپ، جۇرسەڭىز بولادى. بۇل ىڭعايسىز بولسا دا، ءسىزدىڭ قاۋىپسىزدىگىڭىزدى بارىنشا قامتاماسىز ەتەدى.

---