كورىسۋ
قازاقستاننىڭ باتىس وبلىستارىندا كەڭ ءۇردىس العان — كورىسۋ. جىل سايىن ناۋرىزدىڭ 14-ىنەن باستاپ جازىلماعان زاڭ بويىنشا جاسى كىشىلەر ۇلكەندەرگە كورىسە بارىپ، باتاسىن الادى.
بۇل اركىمنىڭ ءوز ۇيىنەن باستالادى. تاڭەرتەڭ تۇرا سالىپ، اكە-شەشەڭە، ۇيدەگى وزىڭنەن ۇلكەن ادامدارعا قول بەرىپ امانداساسىڭ. ولار: «جاس قايىرلى بولسىن، ءومىرىڭ ۇزاق بولسىپ، ءالى تالاي كورىسۋگە جازسىن!» — دەپ باتا بەرەدى. بۇل ءداستۇرلى كورىسۋ، ياعني جىل جاڭارعانداعى ءبىرىنشى كەزدەسۋ، ادامداردىڭ بىلتىردان بەرگى ءبىرىنشى كورىسكەن كۇنى. وسى كۇننەن باستاپ بىلتىردان بەرى كورىسپەگەن ادامدار بىر-بىرىمەن قول بەرىپ، ۇلكەن ادامدار قۇشاقتاسىپ، ءتوس ءتۇيىستىرىپ، امانداسىپ، كورىسۋ ىرىمىن جاسايدى. ۇلكەنى كىشىسىنە مىندەتتى تۇردە «جاس قايىرلى بولسىن!» ايتادى. ياعني «جالپى قاۋىمعا جاڭا جىل كەلدى، ادامدارعا ءبىر جاس قوسىلدى، وسى جاس قايىرلى بولىپ كەلسىن، كەلەر جىلعا امان-ەسەن جەتەيىك» دەگەن تىلەۋ. ال، وتكەن جىلدان بەرى كەزدەسپەگەن ادامدار قاشان كەزدەسسە دە (ناۋرىز باستالعاننان كەيىن اپتا، اي ءوتۋى مۇمكىن) ءبىر رەت كورىسۋى شارت. ءبىر جىلعا جەتەرلىك ءبىر كورىسۋ. بۇل الىستا تۇراتىندار نەمەسە جولاۋشىلاپ جۇرگەن حاقىندا.
ال، اۋىل ادامدارى ناۋرىزدىڭ بىرىنەن (قازىرگىشە 14-ىنەن) جاس بالالاردى «اۋىلداعى قاريا ادامعا، ءوز اۋلەتىنىڭ ۇلكەنىنە بارىپ كورىسىپ كەل» دەپ باعىتتاپ وتىرادى. سوعان وراي ول ۇلكەن كىسىنىڭ ءۇيى دە: «جىل كەلدى عوي، ەرتەڭ كورىسۋگە بالالار كەلىپ قالار»، — دەپ داستارقانىن قامداپ، ءۇي ءىشىن قوناق كۇتكەندەي جيناپ وتىرادى. بۇنىڭ ناۋرىز كوجەگە، ايتقا ەشقانداي قاتىسى جوق. تازا جىل باسىنداعى تۇڭعىش كەزدەسۋ كۇنى. اقساقال ادامدارعا بالالار عانا ەمەس، جاس جىگىتتەر، ەرەسەك ادامدار دا بارادى. بالالار باتاسىن الىپ، كامپيت، باۋىرساق، قۇرتىن قولىنا ۇستاپ، كەلەسى ۇلكەن ۇيگە شىعىپ كەتسە، جىگىتتەر نەمەسە ۇلكەندەر جاعى تىزە بۇگىپ، ءۇي يەسىنە وتكەن جىلدان بەرگى بىتىرگەن ءىسىن، نەمەسە قولعا العالى جۇرگەن شارۋاسىن ايتىپ، اڭگىمە-دۇكەن قۇرىپ قالۋى مۇمكىن. ال بويجەتكەن قىزدار اۋىلداعى ىسمەر، كوپتى كورگەن انالارعا، جەڭگەلەرگە كورىسە بارادى. سول ۇيدە توقۋ، تىگۋ، اسپازدىق ونەر جايلى، تاياۋدا ۋاقىتى بەلگىلەنىپ قويىلعان قىز ۇزاتۋ تويى بولسا، ونىڭ جاساۋ-جابدىعى جايلى ءسوز قوزعالادى. مۇنداي بەلگىلى شەبەرلەر دە كورىسۋشىلەردى ارناي كۇتىپ وتىرادى.
ۇلىس كۇنى كارى-جاس قۇشاقتاسىپ كورىسكەن،
جاڭا اعىتقان قوزىداي جامىراسىپ كەلىسكەن.
شالدار باتا بەرىسكەن، ساقتاي گور دەپ تەرىستەن!
جاس قايىرلى بولسىن اعايىن!
وقۋعا كەڭەس بەرەمىز:
You Might Also Like
-
ناۋرىز كەلىپ، قار كەتتى، اق قار، كوك مۇز جۇتاتقان، شارۋا ەلىنەن زار كەتتى. ناۋرىز كەلىپ، جاز كىردى، جاز حابارشى «ءاز» كىردى. كۇنگە توسىپ ارقاسىن، ...
-
بالاباقشاعا مەملەكەتتىك تاپسىرىستى ورنالاستىرۋ قۇقىعى اتا-اناعا بەرىلەدى. بۇل جايىندا ق ر پرەمەر-مينيسترى اسقار ءماميننىڭ ءماجىلىس دەپۋتاتتارىنىڭ ساۋالىنا بەرگەن جاۋابىندا ايتىلعان.
