كوزدىڭ سۋى
بالا كەزىمنەن دەنساۋلىقتىڭ جوقتىعىنان زارداپ شەككەن مەن، تۇرمىسقا شىققاننان كەيىن دە، ونىڭ كەمدىگىنەن از قورلىق كورگەن جوقپىن. قىزمەتكە ورنالاسقاننان كەيىن، ايتەۋىر ءتۇرلى ەمدەلۋ ورىندارىندا بولىپ، جىل سايىن ارنايى ەم الۋدىڭ ارقاسىندا، قاتارىمنان قالماي، جىل ساناپ، ازاپقا سالعان اۋىر سالماقتىڭ ازايا بەرگەنىنە ءتاۋبا دەيمىن. العاشقى جىلدارى، ءوزىمدى مۇگەدەكتىكتەن الىپ قالعان، شيپالى سۋى بىردەن ەم بولىپ قونعان، سەمەي وبلىسىنىڭ ماقانشى اۋدانىنداعى "بارلىق-اراسانعا" ءجيى باردىم. جولداسىم جولامان ەكەۋمىز، جاز ايلارىندا جانارىمىزدى كەزەك باعىپ، ەمدەلىپ جۇرگەنبىز.
"بارلىق-اراساندا" ەمدەلىپ ءجۇرىپ، ءتۇس كوردىم. ەكى جاسار قىزىم گورشوگىندا وتىر. ەكى كوزى بىلشىقتان كورىنبەيدى. قوس جۇدىرىعىن كەزەك كوزىنە اپارىپ، ءسۇرتىپ تاستاعىسى كەلەتىندەي،
— ماما، مەنىڭ كوزىم اۋىرىپ ءجۇر، — دەيدى.
قايتۋىمىزعا بىرەر كۇن قالعان. كورگەن ءتۇسىمدى جانىمدا ءبىر بولمەدە جاتقان ۇلكەن اپاعا ايتىپ ەدىم، ول كىسى:
— قىزىڭنىڭ شىنىمەن كوزى اۋىرىپ جۇرگەن شىعار. ءبىر تازا بوتەلكە تاپ تا، كوزدىڭ سۋىن تولتىرىپ الا كەت. ارتىق بولماس، - دەدى.
"بارلىق-اراسان" بارلىق تاۋى باۋرايىنداعى ەڭ ءبىر اسەم، تابيعاتى باي سايعا ورنالاسقان. سىلدىراپ اققان سۋ، ءتۇرلى جيدەكتەر، ەمدىك شوپتەر مەن الۋان اعاش – ءبارى وسىندا.
ءبىر كەزدەرى شىڭعىسحاننىڭ اسكەرلەرى وسى ارادا بىرنەشە كۇن ات شالدىرىپ، دەم العان جەر دەيدى. ءساناتورييدىڭ توڭىرەگىندە، الۋان ءتۇرلى اڭىزدارعا وزەك بولعان جەرلەر كوپ. ءوزى جەتى اۋليەنىڭ جەرى دەپ اتالادى. جەتى اۋليەنىڭ ءبىرى يت ەكەنى ەسىمدە قالىپتى. جەتى توبە باسىندا سولاردىڭ سۇيەكتەرى جاتىر دەيدى. سول اۋليەنى تاۋدىڭ ءبىر بەتكەيىندەگى كوك تاستاردىڭ بەتىنە، تامىرلارى سويداق-سويداق شىعىپ جاتقان، ءبىر عاجايىپ زور اعاش ءوسىپ تۇر. كوكپەن كوك، تاستى جارىپ قالاي شىققانىنا، تاڭ قالماۋ قيىن. ال الگى سويداق-سويداق تامىرلاردان اينالا تامعان تامشىلار جينالا-جينالا، جىپ-جىڭىشكە جىلعاعا اينالىپ، تومەن قاراي اعىپ جاتادى. وسى سۋدى جۇرت "كوزدىڭ سۋى" دەيدى. قاجەت ەتكەندەر ىدىسقا تامىزىپ جيناپ، الىپ كەتىپ جاتادى، كەلگەن ادام كوزىن جۋادى، بەت-اۋزىن شايادى.
مىنە، الگى اپايدىڭ ايتىپ وتىرعانى سول سۋ ەدى، مەن كەتەتىن كۇنى ادەيى ەرتەرەك بارىپ، ءبىر بوتەلكەگە سۋ الدىم...
ول كەزدەرى، اقتاۋعا سامولەت تاڭ اتا كەلىپ قوناتىن. ساعات التى جەتىنىڭ شاماسىندا ۇيگە جەتتىم. كىرسەم، قىزىم ءدال سول تۇسىمدە كورگەندەگىدەي، گارشوكتا وتىر. ەكى جۇدىرىعىمەن ەكى كوزىن ۋقالاي بەرەدى، كوزى بىلشىقتانىپ، بىتەلىپ قالعان.
چەمودانىمدى اشا سالىپ، "كوزدىڭ سۋىنا" جارماسقانىم تۇسىنىكتى شىعار. تازا كەسەگە قۇيىپ، "ءبىسمىللا" — دەپ، تازا ماقتانى سۋعا شىلاپ، بىلشىعىنان ابدەن تازارتتىم. كوزى جارقىراپ، قالپىنا كەلدى.
ەرتەڭىنە تاعى دا جۋايىن دەسەم، جۋاتىن ەشتەڭە دە جوق. كوزدەرى تاپ-تازا. دەگەنمەن جانە ءبىر رەت بەتىن شايىپ، جۋعان ىرىمىن جاسادىق
سودان قايتىپ كوزى بىلشىقتانىپ كورگەن جوق. مىنە، قاسيەتتى بارلىقتاعى "كوزدىڭ سۋى"، ءسويتىپ، ماڭگىلىك ەستە قالىپ قويدى. ال تۇسىمدە كورمەسەم، ونىڭ قاجەت بولارىن مەن بىلمەس تە ەدىم...
You Might Also Like
-
ادام نەلىكتەن ءتۇس كورەدى؟ ودان كەيدە جۇرەك تىتىركەنىپ، جاماندىق كەلە جاتقانداي سەسكەنىپ، ال كەيدە قۋانىش ەسىك قاققالى تۇرعانداي قاناتتانۋىمىز نەلىكتەن؟ ال (جانى ءجانناتتا بولسىن) ارۋاقتاردىڭ تۇستە ا...
-
نالچيكتە (كاباردينا بالكاريا) ەمدەلىپ جاتقانمىن. جاز ايلارى بولعان سوڭ، جەڭىل كيىممەن، پلاشش الا سالىپپىن. كۇندىز-تۇنى توپەلەپ جاڭبىر جاۋعاندا توڭازىپ، جىلىلاۋ كەۋدەشە الماعانىما وكىنىپ جۇرگەنمىن. ...
