تايلاقتىڭ ءجۇنى
نالچيكتە (كاباردينا بالكاريا) ەمدەلىپ جاتقانمىن. جاز ايلارى بولعان سوڭ، جەڭىل كيىممەن، پلاشش الا سالىپپىن. كۇندىز-تۇنى توپەلەپ جاڭبىر جاۋعاندا توڭازىپ، جىلىلاۋ كەۋدەشە الماعانىما وكىنىپ جۇرگەنمىن. الدە سول توڭىرەكتەگى "الاگير" ساناتوريىندە مە ەكەن، ءقازىر ايىرىپ ايتا المايمىن. ايتەۋىر جاتىن كورپۋسى بولەك، دەمالۋشىلار جان-جاقتان جينالىپ، تاماقتاناتىن ۇلكەن اسحاناسى بار. اسحانانىڭ الدى ۇلكەن الاڭ، اينالاسىنا جاعالاي تال ەگىلگەن.
بىردە تاماقتانىپ بولىپ، دالاعا شىقتىم. ءقازىر، جۇبىمىزدى جازباي بىرگە جۇرەتىن، بولمەلەس ايەلدەردىڭ، سول جولى نەگە جانىمدا بولماعانىنا تۇسىنبەيمىن. مىڭداعان ادام ءبىرى كىرىپ، ءبىرى شىعىپ ساپىرىلىسىپ جاتاتىن اسحانانىڭ توڭىرەگىندە جان جوق الاڭ بوس. تەك قانا، وڭ جاقتى بويلاي وسكەن بيىك، تالداردىڭ كەلەسى شەتىندە ءبىر ايەل تۇر ەكەن. جانىنا جاقىنداي بەرگەندە، ماعان قارسى ءجۇردى. قولىندا ءبىر وراۋلى زاتى بار. ايەلدىڭ ءتۇرى كاۆكازدىق ەكەنىن ءبىلدىرىپ تۇر. ماعان:
— امانسىڭ با؟ — دەپ، قازاقشا ءتىل قاتتى. مەن دە سالەمدەستىم.
— مىناۋ تايلاقتىڭ جۇنىنەن توقىلعان كەۋدەشە ەدى. الاسىڭ با؟ — دەپ، قولىنداعىسىن نۇسقادى.
ءوزىم ازداپ توڭازىپ جۇرگەن مەنىڭ دە كورگىم كەلگەن. اشىپ قاراسام، توقۋى قاراپايىم، تۇيە جۇننەن توقىلعان شاعىن كەۋدەشە. ەرەكشە ءساندى ەمەس، ءبىراق جىلى سياقتى. الدى ءسال ءۇشبۇرىشتاپ ويىلعان، كوستيۋمنىڭ ىشىنەن دە كيۋگە بولادى.
— تايلاقتىڭ ءجۇنىنىڭ ەمدىك قاسيەتى بار. الىپ ال، — دەدى ايەل.
مەن الدىم. ەكەۋمىز ءبىراز اڭگىمەلەستىك.
— قازاقشا قايدان بىلەسىڭ، — دەيمىن.
— قاراچايلاردىڭ ءتىلى قازاقشا مەن ۇقساس قوي — دەپ، كۇلدى...
...سودان بەرى كوپ جىل ءوتتى. بالكىم 20، ءتىپتى ودان دا كوپ جىل وتكەن شىعار. ول كەۋدەشە جاي عانا كيىم ەمەس، مەنىڭ ءبىرىنشى دارىگەرىم بولدى دەسەم دە ارتىق بولماس. سىرقات سۇيەگىمدى سىزداتقاندا، باسا قويسام اۋىرعانى ساپ بولادى. سۋىقتاپ قالعاندا كيە قويسام، تيگەن سالقىندى سولقىلداتىپ تۇرىپ سورىپ الادى. ون بەس جاسىمنان باستاپ ازاپتان كوز اشپاعان، جانىما جاي تاپتىرعان وسى كەۋدەشە. بۇل، بەينە، تىرشىلىكتە اۋرۋ ازاسىن كوپ تارتقان ماعان، اللا تاعالانىڭ ءوزى جىبەرگەن ءبىر ەمى-اۋ دەگەن ويعا كەلەمىن. شىنىندا، سولاي ەمەس پە ەكەن...
You Might Also Like
-
بالا كەزىمنەن دەنساۋلىقتىڭ جوقتىعىنان زارداپ شەككەن مەن، تۇرمىسقا شىققاننان كەيىن دە، ونىڭ كەمدىگىنەن از قورلىق كورگەن جوقپىن. قىزمەتكە ورنالاسقاننان كەيىن، ايتەۋىر ءتۇرلى ەمدەلۋ ورىندارىندا بولىپ، ...
-
1998 جىلدىڭ كوكتەمىندە ارۋاقتاردىڭ كومەگىمەن ەمدەيتىن تاعى دا ءبىر ەمشىمەن تانىستىم. جاڭاوزەن قالاسىنداعى تۋىستارىمىز ءبىر كەرەمەت ەمشى ايەل كەلىپ جاتقانىن ايتىپ، شاقىرا بەرگەن سوڭ، جۇمىستى سىلتاۋرات...
