كۇندەلىك جازعان كەلىنشەك
(كۇندەلىك جازعان كەلىنشەكتىڭ اڭگىمەسى)
– مەكتەپ قابىرعاسىندا وقىپ جۇرگەندە-اق كۇندەلىك جازۋمەن اينالىسۋشى ەدىم. مەن ونى ءوزىمنىڭ ىشكى ءبىر قۇندىلىعىم دەپ سانادىم. كۇندەلىكتەرىمدى ەشكىمگە كورسەتپەيتىنمىن. ونى جۇرت كوزىنەن جاسىرىن ۇستايمىن. ءبىراق ءبىر كۇنى وسى داپتەرلەردى بىرەۋ وقىپ كورەتىن سياقتى بولاتىن دا تۇراتىن. ول ادام تەك قانا ءوزىمنىڭ بولاشاق جارىم بولادى دەپ ويلادىم. بولاشاق جارىمنان جاسىرار قانداي سىرلارىم بولماق؟
مەكتەپتى ءبىتىرىپ، ۇلكەن قالاعا وقۋعا باردىم. بۇل 90-جىلداردىڭ ءىشى ەدى. ءبىراق تۇسە المادىم. كوپ ۇزاماي ءوزىم قالاعان جىگىتكە تۇرمىسقا شىعىپ كەتتىم.
ءومىر ءبىرقالىپتى ەدى. كۇندەلىكتەرىمدى دە وزىممەن بىرگە الا كەلگەنمىن. ونى رەتى كەلگەندە جۇبايىما كورسەتە قويماقپىن عوي. سوندا ول تاڭعالاتىن بولادى. «سەنىڭ مەنەن جاسىرعان سىرلارىڭ دا بار ما؟ – دەيدى ول تاڭعالىپ. – ال ولاردى وقىپ كورۋگە بولادى ما؟» «ەگەر قالاساڭ...»، – دەيمىن مەن كۇلىپ.
بولمەگە كىرگەنىمدە كۇيەۋىمنىڭ وزىمە ادەتتەگىدەن تىس مىسقىلداي قاراپ وتىرعاندىعىن بايقادىم. ونىڭ قولىندا مەنىڭ كۇندەلىك جازىلعان داپتەرلەرىم تۇر ەدى. «سەن... – دەيمىن مەن. – كۇندەلىكتەردى...» مۇمكىن مەن كۇندەلىكتەردى ءوزىم دە ساعان وقىتقىم كەلىپ ءجۇر ەدى دەگىم كەلگەن شىعار. جاعىما شاپالاق شارت ەتە ءتۇستى. «بىلدىك مەنەن دە بۇرىن جىگىتىڭنىڭ بولعاندىعىن!» – دەدى كۇيەۋىم. «ول جىگىتىم ەمەس، – دەيمىن مەن. – ۇلكەن قالاعا وقۋعا بارعانداعى جاي، اشەيىن ابيتۋريەنت قىز-جىگىتتەردىڭ تانىستىعى عانا جازىلعان». «وقۋعا باردىم» دەگەن ءسوز كۇيەۋىمە ودان سايىن جاعىمسىز اسەر ەتتى. «دالاعا شىق، – دەدى كۇيەۋىم. – كۇندەلىكتەردى ءوز قولىڭمەن ورتە».
ول كۇندەلىك جازىلعان داپتەرلەردى اۋلانىڭ ورتاسىنا اپارىپ قويدى. «كانە، ورتە ءوز قولىڭمەن!» ول قولىما سىرىڭكە ۇستاتتى.
مەنىڭ الدىمدا تالاي كۇن مەن تۇنگى سىرلاسىما اينالعان داپتەرلەرىم جاتتى. سىرىڭكەنى تۇتاتىپ، داپتەرلەردىڭ شەتىنە تيگىزدىم. پاراقتار لاۋلاپ الا جونەلدى. سول ءسات مەن قىز قيالى مەن ناقتى ءومىردىڭ مۇلدە الشاق بولۋى مۇمكىن ەكەندىگىن دە اڭعارىپ ۇلگەردىم. مەنىڭ قۇندىلىعىم ورتەنىپ جاتتى...
– بىردە، – دەدى كەلىنشەك. – قوجايىن ايەلدىڭ ءۇيىن جيناستىرىپ جۇرگەنىمدە، ونىڭ كىشكەنتاي، ەكىنشى سىنىپتا وقيتىن قىزىنىڭ جازعان كۇندەلىگىن تاۋىپ الدىم. ول كۇندەلىگىن جاسىرىپ قويۋدى ۇمىتىپ كەتسە كەرەك. ۇستەل ۇستىندە قالدىرىپتى.
قىزدىڭ اتا-اناسى – ءبىلىمدى ورىس تىلىندە العان كىسىلەر. وزدەرى ۇلكەن ءبىر مەكەمەلەردە جاۋاپتى، باسشى قىزمەتتەردە ىستەيدى. كەيدە وزدەرى ءبىلىم العان تىلدەرىندە دە سويلەسىپ جۇرەدى. ءبىراق ولار – جاقسى ادامدار. ەكەۋى دە اداممەن سويلەسكەندە كىشىپەيىل، مادەنيەتتى تۇردە سويلەسەدى. ولاردى جاقسى اتا-انالار دەپ ويلايمىن. ال ولاردىڭ قىزدارى قازاق تىلىندە ءبىلىم بەرەتىن مەكتەپكە بارادى. ەندى سول قىز قازاقشا كۇندەلىك جازادى ەكەن.
بىرەۋدىڭ زاتىن رۇقساتسىز وقۋ، مەيلى ول ءتىپتى كىشكەنتاي قىز بولسا دا، ۇيات قوي، ارينە. ءبىراق مەنىڭ بويىمدى ءبىر اۋەستىك سەزىم بيلەپ الدى. مۇمكىن مەن قولىمداعى نارسەنىڭ، شىنىندا دا، كۇندەلىك نەمەسە كۇندەلىك ەمەستىگىنە كوزىمدى جەتكىزگىم كەلگەن بولۋى كەرەك. داپتەردىڭ كەز كەلگەن ءبىر پاراعىن اشىپ قالىپ، ودان مىناداي جازۋلاردى وقىدىم:
«كۇندەلىگىم! مەن قۇپيا سانداردى ۇمىتىپ قالىپ، سەنى جاسىرىپ قويعان جەرىمنەن الا الماي قالعان ساتىمدە قانداي قينالعاندىعىمدى بىلسەڭ عوي!.. سەنسىز ءومىر ءسۇرۋ ماعان اۋىر ەكەن».
مەن كىشكەنتاي قىزدىڭ كۇندەلىك جازاتىندىعىنا كوزىم جەتتى. داپتەردى ورنىنا قويدىم.
ءومىر مەنىڭ ىشكى قۇندىلىعىما جارىقشاعىن ءتۇسىرىپ ەدى. كىشكەنتاي قىزدىڭ ىشكى قۇندىلىعىنا سىزات تۇسپەسە ەكەن دەپ تىلەدىم.
You Might Also Like
-
جيدە – اعاشتا وسەتىن ورتاسىندا ءدانى بار جيدەك. جيدە اعاشى وتە ءتوزىمدى، ءشول، قۇرعاقشىلىق سەكىلدى كوپتەگەن شارتتاردا وسە الاتىن قاسيەتكە يە. وسى ەرەكشەلىگىمەن الەمنىڭ كوپ جەرلەرىندە جانە ەلىمىز...
