كۇشىك پەن مىسىق
قاتىسۋشىلار:
كۇشىك
قاسقىر
مىسىق
بۇزاۋ
تۇيە
قاسقىر. ەي، كۇشىك، مەن سەنى جەيمىن!
كۇشىك. قوي، قاسقىر كوكەشىم، قويا تۇر! اۋەلى مەنى تويعىز. سوسىن بارىپ جەسەڭ، ءتاتتى بولامىن.
قاسقىر. جارايدى، ايتقانىڭ بولسىن. مەنىڭ سوڭىمنان ەر، قىزىق كورسەتەم... كوردىڭ بە، انا سيىردى؟
كۇشىك. ءيا، كوردىم!
قاسقىر. ەندى ماعان قاراشى! كوزدەرىم، قۇلاقتارىم، اۋزىم، قۇيرىعىم قانداي ەكەن؟!
كۇشىك. سەنىڭ ەكى كوزىڭ شوقتاي جايناپ تۇر، ەكى قۇلاعىڭ جىميىپ كەتىپتى. اۋزىڭ ارانداي اشىلىپتى. قۇيرىعىڭ ارتقى ەكى اياعىڭنىڭ اراسىنا قىستىرىلىپ قالىپتى. ءوزى جاس شىبىقتاي بولىپ مايىسىپ كەتىپتى.
قاسقىر. اپ-بارەكەلدى! دۇرىس ايتاسىڭ. ەندى مەنىڭ نە ىستەيتىنىمە قارا دا تۇر.
كۇشىك. قاسەكە، قانداي كۇشتىسىڭ؟! مىنا بۇزاۋدى الىپ ۇردىڭ-اۋ! ەكەۋمىز دە ەت جەپ، مارە-سارە بولدىق.
قاسقىر. مەن تويدىم. سەنىڭ ەتىڭدى ەندى جەمەيمىن. قوش بول!
كۇشىك تويىپ جاتقاندا وعان ءبىر اش مىسىق كەلەدى.
كۇشىك. ەي، مەن سەنى جەيمىن!
مىسىق. قوي، كۇشىك، قويا تۇر. اۋەلى مەنى تويعىز. سونان سوڭ جەرسىڭ.
كۇشىك. جارايدى، ايتقانىڭ بولسىن. مەنىڭ سوڭىمنان ەر، قىزىق كورسەتەم!
مىسىق. ماقۇل، ەرسەم ەرەيىن. قىزىق كورگەن قانداي جاقسى!
كۇشىك. ءاي، مىسىق، كوردىڭ بە انا تۇيەنى؟
مىسىق. كوردىم. ول قىزىق ەمەس قوي.
كۇشىك. ءقازىر قىزىق بولادى. ماعان قاراشى: مەنىڭ كوزدەرىم، قۇلاقتارىم، اۋزىم، قۇيرىعىم قانداي ەكەن؟
مىسىق. كەرەمەت! قورقىنىشتى. كوزدەرىڭ بوزارىپ، قۇلاقتارىڭ سالپيىپ تۇر. اۋزىڭ اڭقيىپ تۇر. ءتىلىڭ سالاقتاپ كەتكەن. قۇيرىعىڭ سالبىراپ تۇر.
كۇشىك. ءتىپتى جاقسى! دەمەك كۇشتىمىن. ەندى مەنىڭ نە ىستەيتىنىمدى كور دە تۇر! (تۇيەنىڭ اياعىن تىستەيدى.)
تۇيە. ءما، ساعان! اياعىمدى تىستەيتىن باتىرسىڭ عوي. دالدەپ تەپتىم، سەسپەي قاتتىڭ. تارت سازايىڭدى.
مىسىق. ءاي، اقىماق كۇشىگىم-اي! تۇيمەدەي بولىپ تاۋداي تۇيەدە نەڭ بار ەدى! الىنە قاراماعان الەك دەگەن. مەنىڭ ەتىمدى جەمەك بولىپ ەدىڭ... سەنىڭ ەتىڭدى ەندى مەن جەيمىن. حا-حا-حا!
You Might Also Like
-
الماتىعا تاۋلىگىنە ءبىر قاتىنايتىن ۇلكەن اۆتوبۋس تاڭ اتا وسى اۋىلدىڭ ۇستىنەن وتەتىن بەلگىلى ايالداماسى بولماعان سوڭ، ءار جەردە قول كوتەرىپ تۇرعانداردىڭ ەشبىرىن قالدىرماي، جيناپ-تەرىپ الىپ كەتەتىن. الد...
