تۇلكى، قويشى، ايۋ
قاتىسۋشىلار:
قويشى
تۇلكى
ايۋ
قويشى. ءبىر تۇلكىنى ءبىر ايۋ قۋىپ كەلەدى ەكەن. تۇلكى ءبىر تامعا تار تەسىگىنەن كىرىپ كەتەدى. ايۋ دا تامعا كىرەيىن دەگەندە تەسىككە كەپتەلىپ قالدى. ءيا ءارى، ءيا بەرى شىعا المادى. تۇلكى ونى مازاقتاپ، كۇلىپ، قاشىپ كەتتى.
ايۋ (تەسىكتەن ازەر شىعىپ). ەي، قويشى، سەن نە كوردىڭ؟
قويشى. كورگەنىمدى ايتايىن... ءبىر ايۋدى ءبىر تۇلكى مازاقتاپ، قاشىپ كەتتى.
ايۋ (اشۋلانىپ). ەگەر دە وسىنى بىرەۋگە ايتساڭ، سەنى جەپ قويامىن!
قويشى. ويباي، وندا ايتپايمىن!
ايۋ. ماقۇل، سەندىم. ءبىراق بىرەۋگە ايتساڭ، مەنەن جاقسىلىق كۇتپە!
قويشى(زالعا قاراتا). بۇل قىزىقتى جۇرتقا قالاي ايتپا-يىن... ءىشىمدى تەسىپ بارادى. بارىنە ايتتىم. ءبارى كۇلدى. ال ايۋ ونى ەستىپ قويىپتى. ەرتەڭىنە ماعان كەلدى. ءوزى اشۋلى.
ايۋ. ەي، قويشى، سەنىڭ ەشكىمگە ايتپايمىن دەگەنىڭ قايدا؟ سوزىڭدە تۇرمادىڭ. سوندىقتان مەن سەنى جەيمىن!
قويشى (جىلامسىراپ). ءۇش كۇنگە رۇقسات بار. ءۇي ىشىممەن، اعايىن-تۋىسقانمەن قوشتاسىپ كەلەيىن...
ايۋ. جارايدى، جىلاما! ءۇش كۇنگە رۇقسات بەردىم.
قويشى (زالعا قاراپ). دالادا جىلاپ وتىرسام، جانىما ايۋدى مازاقتاپ كەتكەن تۇلكى كەلدى.
تۇلكى. ە، قويشىم، نەگە جىلاپ وتىرسىڭ؟
قويشى. ءوي، قاڭعىعان قۋ تۇلكى! ءبارى سەنىڭ كەسىرىڭ. ايۋدى سەنىڭ مازاق قىلعانىڭدى اۋىلداعىلارعا ايتىپ قويىپ... ايۋ مەنى جەيمىن دەيدى...
تۇلكى. سول دا ءسوز بولىپ پا؟! مەن ءبىر امالىن تابامىن. ايۋدان قۇتقارسام نە بەرەسىڭ؟
قويشى. ويباي، قالاعانىڭدى ال!
تۇلكى. ايۋعا جەم بولمايىن دەسەڭ، ماعان ءبىر بۇيرەگىڭدى بەر.
قويشى. باستان قۇلاق ساداعا. بۇيرەگىمدى بەرەيىن.
تۇلكى. ال، قويشى، ءبىر قاپ تاپ. ايۋ كەلگەندە اناۋ جەردە شاڭدى بۇرقىراتىپ مەن جۇرەيىن. ايۋ: «اناۋ نە؟» دەسە، «حاننىڭ بالاسى دا، سەنىڭ ەتىڭدى جەيمىن دەپ ءجۇر» دە.
قويشى. قالاي ايتام؟ قورقام. سەنىمەن قوسا مەنى جەپ قويسا قايتەم.
تۇلكى. ءوي، اقىماق! مەنىڭ ايت دەگەنىمدى ايتساڭ، ايۋ قورقادى: «ويباي، مەنى جاسىر. قايدا تىعىلامىن؟» دەيدى.
قويشى. سوندا نە ىستەيمىن؟
تۇلكى. انا قولىڭداعى قاپتىڭ اۋزىن اش تا. «مىندا تىعىل!» دە.
قويشى (ۇرەيلەنىپ). سوسىن...
تۇلكى. سوسىن قورقاق ايۋ قاپقا كىرەدى. سول كەزدە قاپتىڭ اۋزىن مىقتاپ بايلا. شوقپارمەن ۇر. سەسپەي قاتادى.
قويشى (زالعا قاراپ). تۇلكى قۋ وسىنى ايتتى دا، تىعىلىپ قالدى. ايۋ كەلدى. تۇلكىنىڭ ايتقانىنىڭ ءبارىن ىستەپ ەدىم، سەسپەي قاتتى. دايىن اسقا تىك قاسىق، ىرجالاڭداپ، انە، تۇلكى دە كەلە جاتىر.
تۇلكى. ەي، قويشى! ءىس ءبىتتى. باعاناعى ۋادە بويىنشا ەندى ماعان بۇيرەگىڭدى بەر!
قويشى(قيپاقتاپ، جىلامسىراپ). ءىشىم شۇرىلداي ما، قۇرىل-داي ما، ىرىلداي ما؟ بىلمەيمىن... بۇيرەگىمدى ءبىر نارسە تالاپ جەپ جاتقان سياقتى.
تۇلكى (ۇرەيلەنىپ، قويشىنىڭ ىشىنە قۇلاعىن تىگە قويىپ). ول نە قىڭسىلاعان؟
قويشى. تۇنەۋكۇنى ءبىر تازىنىڭ كۇشىگىن جۇتىپ قويىپ ەدىم. سول ەندى ۇلكەن تازى بولىپ، ىشىمنەن شىعايىن دەپ، قىڭسىلاپ جاتىر. ءاستى سەنىڭ ءيسىڭدى سەزىپ تۇرسا كەرەك.
تۇلكى. ويباي، قويشى، دوس ەدىك قوي! تازى شىقپاي تۇرعاندا، مەن زىتايىن! دوس ەدىك قوي، شىعارماي تۇرا تۇر!
قويشى. ءاپ، بالەم! قۋ تۇلكى! ادامنىڭ اقىلىنا قۇرىق تا بوي-لاماعان، وعان قۋلىعىڭ دا تەڭ كەلمەس! ايت، ايت، ايتاق، الىپ-سوعىم.
You Might Also Like
