ماقتاقىز بەن مىسىق
قاتىسۋشىلار:
ماقتاقىز
مىسىق
سيىر
اعاش
قىزدار
ساتۋشى
تاۋىق
تىشقان
داۋىس. باياعىدا ماقتاقىز بەن مىسىق دوس بولادى. بىردە ماقتاقىز ءۇيىن جيناپ ءجۇرىپ، مەيىز تاۋىپ الادى.
ماقتاقىز. مىسىعىم، مىسىعىم، مەن مەيىز تاۋىپ الدىم. كەل، ەكەۋمىز جەيىك!
داۋىس. مىسىعى كەلمەيدى. سوسىن مەيىزدى ءوزى جەپ قويادى.
مىسىق (سالدەن سوڭ كەلىپ). نەگە شاقىردىڭ؟
ماقتاقىز (قىرسىعىپ). ءوزىڭ شاقىرعاندا كەلمەدىڭ. ەندى ايتپايمىن.
مىسىق. ەندەشە، قاتىعىڭدى توگەم!
ماقتاقىز. مەن قۇيرىعىڭدى كەسىپ الامىن!
مىسىق. ال مەن قاتىقتى توكتىم.
ماقتاقىز. ال مەن سەنىڭ قۇيرىعىڭدى كەسىپ الدىم.
مىسىق. Aپa، اپا، قۇيرىعىمدى بەرشى!
ماقتاقىز. مەنىڭ قاتىعىمدى تاۋىپ بەر!
مىسىق (سيىرعا). سيىر، سيىر، ماعان قاتىق بەرشى.
سيىر. مەنىڭ قارنىم اشىپ تۇر. ماعان جاپىراق اكەلىپ بەرشى.
مىسىق (اعاشقا بارىپ). اعاش، اعاش، جاپىراعىڭدى بەرشى!
اعاش. مەن شولدەپ تۇرمىن. سۋ اكەلسەڭ، جاپىراق بەرەمىن.
مىسىق. قىزدار، قىزدار! اعاش شولدەپ تۇر ەكەن. ماعان سۋ بەرىڭدەرشى. اعاشقا اپارىپ بەرەيىن.
قىزدار. بىزگە ساعىز اكەلىپ بەرسەڭ، ءبىز ساعان سۋ بەرەمىز.
مىسىق (دۇكەندەگى ساتۋشىعا). ءاي، ساتۋشى، ماعان ساعىز بەرشى!
ساتۋشى. ماعان جۇمىرتقا اكەلىپ بەر. سوسىن ساعىز بەرەم.
مىسىق (تاۋىقتارعا بارىپ). تاۋىق، تاۋىق، ماعان جۇمىرتقا بەرشى!
تاۋىق. بىزگە جەم اكەلىپ بەرسەڭ، ءبىز ساعان جۇمىرتقا بەرەمىز.
مىسىق. ەندى ءقايتتىم؟ ونى قايدان تابام؟ ءا، بالەم، مىنا ءبىر تىشقان ءىن قازىپ جاتىر ەكەن. قامبادان ءدان ۇرلاعىش قوي. جەم تاۋىپ بەر دەپ جانىن شىعارايىن. (تىشقانعا باس سالادى.) جانىڭنىڭ بارىندا ايت، ۇيىندە نە بار؟
تىشقان (قاتتى قورقىپ). ۇيىمدە ءبىر تاباق تارىم بار.
مىسىق. ماعان ءبىر ۋىس تارى بەر!
تىشقان. قۇپ، تاقسىر، كازىر، ءقازىر! (تىشقان جۇگىرىپ بارىپ، ءبىر توستاعان بيداي اكەلىپ بەرەدى.)
مىسىق (ماساتتانىپ). ءا، قورقاق تىشقان، اكەلدىڭ بە؟ مەن مۇنى تاۋىققا اپارىپ بەرەيىن.
تاۋىق. جارايسىڭ، مىسىعىم! ءما، جۇمىرتقامدى الا عوي.
مىسىق. راقمەت، تارعىل تاۋىق! مەن مۇنى ساتۋشىعا بەرەيىن.
ساتۋشى. ءما، ساعىزىڭدى الا عوي.
مىسىق. قىزدار، قىزدار، سەندەرگە ساعىز اكەلدىم. شايناڭدار ءماز بولىپ...
قىزدار. پىرىلداق مىسىق، ءما، سۋىڭدى ال.
مىسىق. اعاش، اعاش، سۋىڭدى اكەلدىم.
اعاش. قالاعانىڭشا جاپىراعىڭدى ال.
مىسىق. سيىر، سيىر، مەن جاپىراق اكەلدىم.
سيىر. جارايسىڭ، پىرىلداق! قاتىعىمدى قالاعانىڭشا ال.
مىسىق. ماقتاقىز-اۋ، ماقتاقىز، ۋادە بويىنشا ساعان قويۋ قاتىق اكەلدىم.
ماقتاقىز. كوردىڭ بە، مىسىقان، (ونى ەركەلەتە قولىنا الادى) ءبىز بىر-بىرىمىزگە وسىلاي كومەكتەسۋىمىز كەرەك. سوندا ءبارى بولادى. ءما، قۇيرىعىڭدى الا عوي. ءبارىمىز دە ەندى دوس بولدىق.
You Might Also Like
-
ءۇي تاپسىرمالارىن ورىنداپ بولامىن دا، تىسقا شىعامىن. پودەزد الدىنداعى ۇزىن اعاش ورىندىقتىڭ ورتا تۇسىندا اپ-ادەمى بوپ، اپپاق كيمەشەك كيگەن اجەم وتىر. مەن ونىڭ قولىنداعى تاسپىسىنە قارايمىن. ءار تاستى ...
