مادەنيەتتىڭ قاينار بۇلاعى – كىتاپحانا
تاۋەلسىزدىكتىڭ 30 جىلدىعى قارساڭىندا پرەزيدەنت قاسىم-جومارت توقايەۆ قازاقستان حالقىنا كەزەكتى جولداۋىن جاريالادى. جولداۋ بارىسىندا پاندەميادان كەيىنگى ەكونوميكالىق دامۋ جولدارىن ايقىنداي كەلە، جاڭا كەزەڭدەگى ەلىمىزدىڭ تۇرمىسى مەن ءال-اۋقاتىنا كوڭىل ءبولۋ، دەنساۋلىق ساقتاۋ مەن ءبىلىم سالاسى ساپاسىنىڭ جايى، سونىمەن قاتار اۋىل شارۋاشىلىعىنداعى احۋالداردى ەسكەرە كەلە ناقتى باستامالاردى اتاپ ءوتىپ، باسىم باعىتتار ۇسىنىلدى. مەملەكەت باسشىسى قوعامدى سيفرلاندىرۋ ماسەلەسىنە توقتالىپ، بۇل باسەكەلەستىكتىڭ ارتۋىنا ايتارلىقتاي ىقپال ەتەتىنىن اتاپ ءوتتى. وسى رەتتە پاندەمياعا بايلانىستى داعدارىس جاعدايىندا 85 پايىزعا جۋىق قىزمەت ءتۇرى قاشىقتان قىزمەت كورسەتۋ فورماتىن پايدالانعانىن ايتا كەتۋ كەرەك. ارينە، سيفرلى ەكونوميكاداعى مۇنداي پروگرەسس ادامداردىڭ ءومىرىن ەداۋىر جەڭىلدەتتى دەي الامىز. سونىمەن قاتار، الەمدىك ەكونوميكادا ەلىمىز ءوز ورنىن ايقىن بەكىتۋ دەپ وسى باعىت¬تارداعى تاۋەلسىزدىكتىڭ 30 جىلىندا جەتكەن جەتىستىكتەردى دامىتۋ، قازىرگى الەمدىك ساياساتتا قالىپتاسقان جاعدايعا جەدەل جانە كاسىبي تۇردە جاۋاپ بەرۋ قاجەت ەكەندىگىن ايقىندايدى. سونداي-اق، 2022 جىلدان باستاپ ەڭ تومەنگى جالاقى مولشەرىن جوعارى دەڭگەيگە كوتەرەتىندىگى تۋرالى شەشىم شىعارا وتىرىپ، رۋحاني قازىناعا اينالعان كىتاپحانا سالاسىن ەرەكشە اتاپ ءوتتى. مادەنيەتتىڭ قاينار بۇلاعى كىتاپحانا سالاسىنىڭ دامۋىنا كوڭىل ءبولۋ – كىتاپحانانىڭ بولاشاعى ءۇشىن ۇلكەن جاۋاپكەرشىلىك. قازىرگى تاڭدا كىتاپحانا سالاسىن دامىتۋ بارىسىندا ەلىمىزدىڭ ىرگەلى جوعارى وقۋ ورىندارى باكالاۆر، ماگيستر دارەجەسىندە جاس ماماندار دايارلاپ كەلەدى. جوعارى وقۋ ورىندارىن بىتىرگەن جاس ماماندار ءوز بىتىرگەن سالالارى بويىنشا مامان بولىپ قالىپتاسىپ، جاناشىرلىقپەن ەڭبەك ەتۋى كەرەك. سوندىقتان دا، كىتاپحانا بولاشاققا باعدار بەرىپ، ۇلتتى ۇيىستىرىپ، ۇلى ماقساتتارعا جەتەلەيتىن «ماڭگىلىك ەل» يدەياسىن جۇزەگە اسىراتىن بىردەن-بىر سالالاردىڭ ءبىرى بولعاندىقتان بۇل ماماندىقتىڭ ابىرويىن كوتەرەتىن ىستەر جاسالىنۋى ءتيىس دەپ ويلايمىن. سول كەزدە عانا ماماندىق ءوز قۇندىلىعىن كوتەرەدى. قازىرگى ۋاقىتتا الىپ جۇرگەن جالاقىعا كوڭىل تولماي باسقا سالاعا اۋىسىپ جاتقان ءوز ءىسىنىڭ مامانى، ساپالى ءبىلىمدى جاستارىمىز قانشاما؟! سول سەبەپتى دە كىتاپحانا قىزمەتكەرلەرى ءۇشىن كۇش-جىگەر بولىپ، كوز قۋانتارلىق جاڭالىقتاردىڭ بىرىنە اينالدى. وسى وراي دا مۇمكىندىگى شەكتەۋلى ەرەسەكتەرمەن قوسا بالالاردى دا ءبىلىم نارىمەن سۋسىنداتىپ قويماي، ولاردىڭ ومىرگە، قوعامعا بەيىمدەلۋىنە ءوز ۇلەسىن قوسىپ كەلە جاتقان زاعيپ جانە ناشار كورەتىن ازاماتتارعا ارنالعان رەسپۋبليكالىق كىتاپحانانىڭ ەڭبەگىن اتاپ وتكىم كەلەدى. جاس ۇرپاقتىڭ ساناسىنا ۇلتتىق قۇندىلىقتىڭ اسىل ءدانىن ەگۋ – قوعام الدىنداعى نەگىزگى مىندەتتەردىڭ ءبىرى. ال، كىتاپحانا سالاسىنا قولداۋ كورسەتۋ ادامزاتتىڭ رۋحاني كەمەلىنىڭ وسۋىنە قوسقان ۇلەستىڭ ءبىرى دەپ بىلەمىن. جالپاق الەمدى اۋزىڭا قاراتۋ ءۇشىن − رۋحاني ەرلىك كەرەك، جالپاق الەمگە قىسىلماي، قىمتىرىلماي قاراۋ ءۇشىن − رۋحاني بايلىق كەرەك،- دەپ ءابىش كەكىلباي ۇلى ايتقانداي، رۋحاني بايلىق كىتاپحانا ورداسىنا كەلگەن ءاربىر وقىرماننىڭ جان-دۇنيەسىنەن تابىلارى ءسوزسىز! مەملەكەت باسشىسى كەزەكتى جولداۋ سوڭىندا: «ءبىزدىڭ باعىتىمىز – بەلگىلى، ماقساتىمىز – ايقىن. ەڭ باستىسى، سول ماقساتقا جەتۋ ءۇشىن نە ىستەۋ قاجەتتىگىن جاقسى بىلەمىز» دەپ حالىقتىڭ جۇرەگىنە ۇلكەن سەنىم ورناتتى. جولداۋدان تەك جاقسىلىق كۇتەيىك! جانسايا قوسمىرزا زاعيپ جانە ناشار كورەتىن ازاماتتارعا ارنالعان رەسپۋبليكالىق كىتاپحانا قىزمەتكەرى، «كىتاپحانالىق اقپاراتتىق جۇيە» ماماندىعىنىڭ ماگيسترى
You Might Also Like
