InfoHub Logo

ق ر ءبىلىم جانە عىلىم مينيسترلىگىنە جۇرگىزىلگەن مەملەكەتتىك اۋديت بارىسىندا جالپى سوماسى 26،7 ملرد تەڭگە بولاتىن پروسەدۋرالىق بۇزۋشىلىقتاردىڭ 147 فاكتىسى اشكەرەلەندى.

سونداي-اق 16،9 ملرد تەڭگە كولەمىندە قارجىلىق بۇزۋشىلىقتار مەن 43،2 ملرد تەڭگە بيۋدجەت قاراجاتىنىڭ ءتيىمسىز جۇمسالۋى انىقتالعان.

 بۇل تۋرالى رەسپۋبليكالىق بيۋدجەتتىڭ اتقارىلۋى جونىندەگى ەسەپ كوميتەتىنىڭ باسپا ءسوز قىزمەتى حابارلايدى

باسپا ءسوز قىزمەتى كەلتىرگەن دەرەكتەرگە سايكەس، مەكەمە ق ر ءبىلىم جانە عىلىم مينيسترلىگىندە جەكەلەگەن بيۋدجەتتىك باعدارلامالار بويىنشا بولىنگەن رەسپۋبليكالىق بيۋدجەت قاراجاتىن جانە كۆازيمەملەكەتتىك سەكتور سۋبەكتىلەرىنىڭ اكتيۆتەرىن  ءتيىمدى جۇمساۋعا قاتىستى جۇرگىزگەن مەملەكەتتىك ءاۋديتتىڭ قورىتىندىسىن كەلتىرگەن.

جوعارى جانە جوعارىدان كەيىنگى، تەحنيكالىق جانە كاسىبي، ورتا جانە مەكتەپكە دەيىنگى ءبىلىم بەرۋدى دامىتۋعا بولىنگەن بيۋدجەتتىك قاراجاتتى پايدالانۋدا ءبىرقاتار جۇيەلى ماسەلەلەردىڭ بار ەكەنى انىقتالعان. اتاپ ايتقاندا، 2016 جىلى بۇكىلالەمدىك ەكونوميكالىق فورۋمنىڭ جاھاندىق باسەكەگە قابىلەتتىلىك يندەكسى رەيتينگىندە قازاقستاننىڭ ءبىلىم بەرۋ جۇيەسىنىڭ ساپاسى جونىندەگى كورسەتكىشتەرى ءتۇسىپ كەتكەن. «ءبىلىم بەرۋ جۇيەسىنىڭ ساپاسى»، «مەنەدجمەنت مەكتەپتەرىنىڭ ساپاسى» جانە «جوعارى بىلىممەن قامتۋ» ماقساتتى ينديكاتورلارى ورىندالماعان.

«2016 جىلدىڭ قورىتىندىسى بويىنشا مينيسترلىك ءبىلىم بەرۋدى جانە عىلىمدى دامىتۋدىڭ 2016-2019 جىلدارعا ارنالعان مەملەكەتتىك باعدارلاماسىنىڭ ءۇش اۋىسىمدا ساباق وتكىزەتىن مەكتەپتەردىڭ ۇلەسىن تومەندەتۋ جانە مەملەكەتتىك-جەكەشەلىك ارىپتەستىك جوبالارىنىڭ سانىن ۇلعايتۋ بولىگىندە جوسپارلاعان كورسەتكىشتەرىنە قول جەتكىزبەگەن»، - دەلىنگەن حابارلامادا.

سونىمەن بىرگە، ورتا بىلىمنەن كەيىنگى، جوعارى جانە جوعارىدان كەيىنگى ءبىلىم بەرۋ سالاسىندا ماماندار دايىنداۋ بويىنشا مەملەكەتتىك ءبىلىم بەرۋ تاپسىرىسىن ورنالاستىرۋدا مينيسترلىك رەسپۋبليكا وڭىرلەرىندەگى قاجەتتىلىكتەردى ەسەپكە الماعان. بەلگىلەنگەن كريتەرييلەر دە مەملەكەتتىك تاپسىرىستى ۇزدىك وقۋ ورىندارىنا تولىققاندى ورنالاستىرۋدى قامتاماسىز ەتپەيدى. 

«ۋاكىلەتتى مەملەكەتتىك جانە جەرگىلىكتى اتقارۋشى ورگانداردىڭ ءتيىستى دەڭگەيدە ءوزارا ارەكەتتەستىگىنىڭ بولماۋىنان جوعارى، جوو-دان كەيىنگى، تەحنيكالىق جانە كاسىپتىك ءبىلىم بەرەتىن وقۋ ورىندارى تۇلەكتەرىنىڭ جۇمىسقا ورنالاسۋ دەڭگەيى تومەن كۇيىندە قالىپ وتىر. كادرلاردى دايارلاۋ بويىنشا مەملەكەتتىك-جەكەشەلىك ارىپتەستىك جۇيەسىن دامىتۋعا باعىتتالعان ءتيىستى شارالار قابىلدانباعان، بارلىق مۇددەلى تاراپتاردى تارتۋدى كوزدەيتىن ينستيتۋسيونالدى تەتىك ازىرلەنبەگەن»، - دەپ حابارلادى ەسەپ كوميتەتى.

ق ر بعم كاسىپتىك ءبىلىم بەرەتىن جەتەكشى مەكەمەلەردىڭ جەلىسىن قۇرۋدى قولعا الماعان. اتاپ ايتقاندا، 2013 جىلدان بەرى وسكەمەن، ەكىباستۇز جانە شىمكەنت قالالارىندا ءوڭىرارالىق كاسىپتىك ورتالىقتاردىڭ، 2015 جىلدان بەرى - استانا جانە الماتى قالالارىنداعى الەمدىك دەڭگەيدەگى كوللەدجدەردىڭ قۇرىلىسى توقتاپ تۇر.

ءوز كەزەگىندە، «اقپاراتتىق-تالدامالىق ورتالىق» اق 2016 جىلى جالپى سوماسى 10،4 ملن تەڭگە بولاتىن «ۇشتىلدىلىكتى ەنگىزۋ جونىندەگى الەمدىك تاجىريبەنى زەرتتەۋ جانە تىلدەردى ۇيرەتۋ ءادىسناماسىن ازىرلەۋ» مەملەكەتتىك تاپسىرماسىن ورىنداۋ بويىنشا ءوز مىندەتتەمەلەرىن تولىق جانە تيىسىنشە ورىنداماعان.

«پاۆلودار، وڭتۇستىك قازاقستان وبلىستارىنىڭ جانە استانا، الماتى قالالارىنىڭ قۇرىلىس جانە ءبىلىم باسقارمالارى، شىمكەنت قالاسىنىڭ جانە سايرام اۋدانىنىڭ قۇرىلىس بولىمدەرى جالپى سوماسى 208،6 ملن تەڭگەنى قۇرايتىن تاۋارلاردى جەتكىزۋدى جانە جۇمىستاردىڭ ورىندالۋىن تەكسەرمەگەن»، - دەپ مالىمدەدى كوميتەت.

مەملەكەتتىك اۋديت قورىتىندىسى بويىنشا جالپى سوماسى 16،9 ملرد تەڭگە بولاتىن قارجىلىق زاڭ بۇزۋشىلىقتار، 43،2 ملرد تەڭگە بيۋدجەت قاراجاتىن ءتيىمسىز پايدالانۋ جانە جالپى سوماسى 26،7 ملرد تەڭگەنى قۇرايتىن 147 راسىمدىك قۇقىق بۇزۋشىلىق فاكتىلەرى انىقتالدى.

سونداي-اق، مەملەكەتتىك اۋديت بارىسىندا 5،9 ملرد تەڭگە قالپىنا كەلتىرىلگەن جانە وتەلگەن، ونىڭ ىشىندە رەسپۋبليكالىق بيۋدجەت كىرىسىنە 285،1 ملن تەڭگە قايتارىلىپ، بۋحگالتەرلىك ەسەپ بويىنشا 5،1 ملرد تەڭگە جۇمىستاردى ورىنداۋ، قىزمەتتەر كورسەتۋ، تاۋارلاردى جەتكىزۋ ارقىلى قالپىنا كەلتىرىلدى.

وتىرىس قورىتىندىسى بويىنشا ءبىلىم جانە عىلىم مينيسترلىگىنە انىقتالعان بۇزۋشىلىقتاردى جويۋ بويىنشا شارالار قابىلداۋ، بيۋدجەت جانە وزگە دە زاڭناما تالاپتارىنىڭ ساقتالۋىن قامتاماسىز ەتپەگەن لاۋازىمدى ادامداردىڭ جاۋاپكەرشىلىگىن قايتا قاراۋ جانە وزگە دە تاپسىرمالار بەرىلدى.

مەملەكەتتىك ءاۋديتتىڭ ءبىرقاتار ماتەريالى پروسەستىك شەشىمدەر قابىلداۋ ءۇشىن قۇقىق قورعاۋ ورگاندارىنا جانە اكىمشىلىك قۇقىق بۇزۋشىلىقتار تۋرالى ىستەردى قاراۋعا ۋاكىلەتتى ورگاندارعا جىبەرىلەدى.

---