InfoHub Logo

«ادام – ءوز ءومىرىنىڭ سۋرەتشىسى. ول ءومىردى سىرلاپ بوياۋعا، وعان اجار، ءتۇر بەرۋگە، ونى اشەكەيلەپ، ورنەكتەۋگە ەڭبەك ەتەدى»،-دەپ ب.بۇلقىشيەۆ ءدال تاۋىپ ايتقان ەكەن. راسىمەن دە، ءومىرىمىزدىڭ  ءساندى دە ءماندى  بولۋى تەك قانا وزىمىزگە بايلانىستى. جەر باسىپ جۇرگەن ادام بالاسىنىڭ ءارقايسىسى ءوز تاعدىرىنىڭ الدىندا اسا ۇلكەن جاۋاپكەرشىلىككە يە. ءبارىمىزدىڭ كوكسەگەنىمىز ءبىر- بۇرالاڭى مەن سوقپاعى كوپ وسىناۋ ءومىر جولىندا اڭساعان ارمانعا اداسپاي جەتىپ، باقىتتى بولۋ. وكىنىشكە وراي، بۇل كەز كەلگەننىڭ قولىنان كەلە بەرەتىن وڭاي ءىس ەمەس. ناعىز باقىتقا قول جەتكىزۋ ءۇشىن بويىمىزدا سارقىلماس ءتوزىم، قايتپاس قايسارلىق، جاسىماس جىگەر ءتارىزدى قاسيەتتەردىڭ بولۋى ماڭىزدى ەكەنى  بەلگىلى. الايدا، مەنىڭ ويىمشا، ەڭ الدىمەن تالاپ ەتەرلىك قاسيەت - ءوز ومىرىنە دەگەن جاۋاپكەرشىلىكتى سەزىنە ءبىلۋ. ءيا، ءوز موينىڭداعى ومىرلىك ماقسات-مىندەتىڭدى دۇرىس ءتۇسىنىپ، ىسىڭە جاۋاپتى بولعاندا عانا ءتۇرلى كەدەرگىلەردەن  سۇرىنبەي وتەسىڭ. كورنەكتى عالىم قانىش ساتبايەۆتىڭ: «ىسىڭىزگە، ەڭبەگىڭىزگە، وقۋىڭىزعا ناعىز ادامگەرشىلىكپەن قاراساڭىز، ءسوز جوق، جەڭىسكە جەتەسىز» دەگەن ءسوزى بارشامىزعا ۇلگى بولارلىق.   
ادام بالاسى ەسەيگەن سايىن  تاعدىردىڭ سىناقتارى دا كوبەيە بەرەدى ەمەس پە؟! مەن ءۇشىن مۇنداي سىناقتاردىڭ العاشقىسى  ءبىلىم بايگەسى ۇبت بولاتىن.  ءوزىم قالاعان  وقۋ ورنىنا ءتۇسىپ، اڭساعان ماماندىعىمنىڭ يەسى اتانۋ ءۇشىن بۇل ءىستىڭ مەنەن ۇلكەن جاۋاپكەرشىلىكتى تالاپ ەتەتىنىن ءتۇسىندىم.سوندىقتان دا ءوز-وزىمدى قولعا الىپ، جالقاۋلىعىمدى جەڭىپ، كۇندىز-تۇنى وقۋمەن بولدىم. اقىرى، تالپىنىسىم مەن ىزدەنىسىم، تىنىمسىز ەڭبەگىم جەمىسىن بەرىپ، بۇل سىناقتان سۇرىنبەي ءوتتىم. جوعارى ناتيجەگە قول جەتكىزىپ، عىلىم- ءبىلىمنىڭ قاراشاڭىراعى قازۇۋ-دىڭ ستۋدەنتى اتاندىم. ارينە،  نەگىزگى ايتپاعىم بۇل ەمەس، سىناقتاردىڭ ءبارى ءالى الدا. تاڭداعان كاسىبىم - جۋرناليستيكا ناعىز مىقتىلاردىڭ عانا اينالىساتىن ءىسى بولعاندىقتان، الدا تالاي «مايداننىڭ» ورتاسىندا جۇرەتىنىم ايتپاسام دا بەلگىلى.. تۇسىنگەنىم- ءومىردىڭ تالابى- باسقا تۇسكەن كەز كەلگەن قيىندىققا مويىماي،  ايانباي كۇرەسۋ. ال مەنىڭ باستى ءۇستانىمىم-اردايىم ماقساتىما مىعىم، ارمانىما ادال بولۋ. اركىم ءوز ءومىرىنىڭ قوجايىنى، سوندىقتان ونىڭ جاقسى نە جامان بولۋىنا تەك قانا ءوزىمىز  سەبەپشىمىز. قانداي ىستە بولماسىن، ونى ابىرويمەن اتقارىپ،سەنىمدى اقتاپ شىعۋعا بارىنشا تىرىسامىن. سەبەبى، مەن ءوز ومىرىمە جاۋاپتىمىن!
 

---