InfoHub Logo

ۇلتتىق ءبىرىڭعاي تەستىلەۋ. وسى ءۇش اۋىز ءسوز ءاربىر 11-سىنىپ وقۋشىسىنىڭ بويىنا قورقىنىش، ساناسىنا ۇرەي ۇيالاتادى. 11 جىل بويى وقىعان ەڭبەگىم اقتالادى ما، تەستىلەۋدەن ءوزىم قالاعان ۇپايدى جيناي الامىن با دەگەن سانسىز ويلار وقۋشى ساناسىن جاۋلايدى. تەستىلەۋدەن كەيىن ءبىرى ءوزى ويلاعان ۇپايدى جيناپ ماساتتانسا، ەندى ءبىرى دايىندالماي-اق جوعارى ناتيجە كورسەتەدى. كەيبىر تۇلەكتەر جىل بويى دايىندالىپ، وسى تەستىلەۋدە جولى بولماي، تومەن كورسەتكىشكە يە بولادى. سونداي تۇلەكتەرگە ايتارىم: بۇل ءومىردىڭ سوڭى ەمەس!

ءوزىم ۇبت-نى بيىل تاپسىردىم. جىل بويى 5 پانگە دايىندالىپ، سوڭعى 2 ايدا 2 پانگە عانا زەيىن قويىپ، تەستىلەۋدى ويداعىداي تاپسىردىم. قورىتىندىسى دا كوڭىل قۋانتتى. مەجەلى 40 ۇپايدىڭ 38ء-ىن جينادىم. گرانتقا تۇسۋىمە دە مۇمكىندىك جەتكىلىكتى. ءباز بىرەۋلەر وسى ۇپايدى ۇيالى تەلەفون، شپارگالكانىڭ كومەگىمەن العان شىعار. ال مەنىڭ ناتيجەم تازا ءوزىمنىڭ ەڭبەگىم بولاتىن. سىزدەرگە كەڭەس كەلەر جىلعى تۇلەكتەر، 11-سىنىپ وقۋشىلارى:

– جاراتقانعا سەنىڭىزدەر. ول ءسىزدىڭ ناتيجەڭىزدى وڭ نەمەسە تەرىس قىلاتىن كۇشكە يە. ۇبت ءۇشىن ورازا تۇتۋ قاتە پىكىر سەكىلدى. ۇيىقتار الدىندا جۋىنىپ، تازارىپ جاتىپ، تىلەك تىلەسەڭىز، ول قابىل بولادى. ماڭىزدىسى اللاعا دەگەن سەنىمىڭىزدى جوعالتپاڭىز. تومەن ناتيجە كورسەتسەڭىز نالىماڭىز، قۋانىڭىز. ءسىزدى الدا جاقسى جاڭالىق كۇتىپ تۇر؛

– ءوزىڭىزدى كەز كەلگەن جاعدايعا مورالنو دايىنداڭىز. ءسىز الدىڭىزدا نە بولاتىنىن بىلمەيسىز. ءبىراق ۇبت جايلى ەڭ الدىمەن ويلايتىنىڭىز جاعىمسىز پىكىرلەر (وتە الماسام نە بولادى، اتا-انامنىڭ الدىندا ۇياتقا قالام با ت.س.س.) وسى ويلاردى جاعىمدىعا وزگەرتىڭىز. ءاردايىم ويلايتىنىڭىز جاقسىلىق بولسا، ول مىندەتتى تۇردە ورىندالادى؛

– بارلىق ناتيجەگە ءوز كۇشىڭىزبەن جەتىڭىز. ايانباي ەڭبەكتەنىڭىز. تۇندەرىڭىز ۇيقىسىز وتسە دە، دايىندىقتان باس تارتپاڭىز. ءقازىر قينالىپ وقيسىز، الايدا ناتيجەسىن بولاشاق كورسەتەدى؛

– جاس تۇلەك ۇيالى تەلەفون، شپارگالكاعا مۇلدەم سەنبەڭىز. وزىڭىزگە، ءوزىڭىزدىڭ تۇيسىك، سانا-سەزىمىڭىزگە سەنىڭىز. ۇبت سىزگە مەكتەپتە وتەتىن تەستىلەۋ ەمەس. ول جەردە ءبارى باسقاشا. شپارگالكادان ىزدەگەن سۇراعىڭىز شىقپاۋى، گلۋشيتەلدىڭ كەسىرىنەن تەلەفوندا بايلانىس بولماۋى مۇمكىن. ال ءسىز بارلىق جاعدايعا دايىن بولۋ كەرەكسىز؛

– جانىڭىزداعى دوستارىڭىز تەستىلەۋگە دايىندىق جۇرگىزبەسە، ولارعا ەرمەڭىز. ءوزىڭىز جەكە دايىندالىڭىز. ءسىز جەكە تۇلعاسىز، جەكە تۇلعا بىرەۋگە ەرۋگە مىندەتتى ەمەس. كەرىسىنشە، ولاردى سوڭىڭىزدان ەرتە ءبىلىڭىز. دايىندىققا قىزىقتىرىڭىز. دايىندىق ۋاقىتىندا ءبىر باستان ەكى باس جاقسى؛

– مەكتەپ وقۋلىقتارىن وقىڭىز، سودان سوڭ عانا تەست جاساڭىز، بىلمەيتىن سۇراقتارىڭىزدى ىزدەپ، تاۋىپ، ءبىر جەرگە ءتۇرتىپ قويىڭىز. وقۋلىقتى تۇگەل وقۋعا شامام جەتپەيدى، ۋاقىتىم جوق دەسەڭىز، لوگيكاعا سالاتىنداي ەتىپ وقىڭىز؛

– كەز كەلگەن وقيعا ەسىڭىزدە جاقسى ساقتالۋ ءۇشىن وقۋلىقتىڭ جانىنا قاعاز بەن قالام الىپ، تۇسىنگەنىڭىزدى قاعازعا ءتۇسىرىڭىز. جازباڭىز، سۋرەتىن سالىڭىز. بۇل – ەستە ساقتاۋدىڭ ەڭ ءتيىمدى ءتاسىلى.

وسى كەڭەستەر سىزگە وڭ پايداسىن تيگىزەدى دەپ سەنەمىن. ساتتىلىك وقىرمان، ساتتىلىك جاس تۇلەك!

---