ناۋرىزعا ارنالعان باتا، تىلەك، قۇتتىقتاۋ
ناۋرىز كەلىپ قار كەتتى،
اق قار، كوك مۇز جۇتاتقان
شارۋا ەلىنەن زار كەتتى.
ناۋرىز كەلىپ جاز كىردى،
جاز پەرىشتە «ءاز» كىردى
كۇنەسكە توسىپ ارقاسىن،
جان بىتكەنگە ناز كىردى.
ارىق-تۇراق ءتورت تۇلىك،
كوك جەپ جاپا-تارماعاي
قابىرعا جاپپاي قالماعاي.
كوتەرەمنىڭ ءتورت بۇتى،
ەربەگەي دە سەربەگەي
ەندى شىعىن بەرمەگەي.
بىزگە كەلگەن بالەكەت –
قارمەن بىرگە قاڭعىرىپ،
تاۋدان ارى ورلەگەي،
مۇسىلمان بەتىن كورمەگەي.
*** *** *** ***
جاراپازان باتاسى
قوناقتاسىن بەرەكەت،
قاشا بەرسىن پالەكەت.
قيىن دەيدى قيامەت،
جاقىن دەيدى اقىرەت.
اقىرەتكە بارعاندا،
قىل كوپىردەن امان ءوت!
*** *** *** ***
مىنە، باتا، اق نيەت،
بولا بەرسىن بەرەكەت.
قيىن دەيدى قيامەت،
جاقىن دەيدى اقىرەت،
قۇلشىلىق قىل اللاعا،
قىل كوپىردەن تايماي ءوت.
كىرسىن داۋلەت،
شىقسىن بەينەت.
اللا اتىمەن بەينەت ەت.
جوق-جىتىككە راقىم ەت.
ءتاڭىر سەنى قولداسىن،
ۋايىم-قايعى بولماسىن.
قابىل بولسىن ورازاڭ،
اۋلەتىڭدى وڭداسىن!
*** *** *** ***
مۇزافار الىمبايەۆ
قارىق قىپ قۇتتى ناۋرىز،
قازانعا تولسىن سارى ۋىز.
قايناسىن ناۋرىز كوجە دە،
تولتىرىپ ىشكەي كەزەڭە.
ۇلىستىڭ ۇلى كۇنىندە،
كوپپەنەن بىرگە كۇلىمدە.
كوبەيسىن جاڭا دوستارىڭ،
مولايسىن ەلگە قوسقانىڭ.
جاراسىپ كوڭىل حوشتىعى،
بەكىسىن حالىق دوستىعى.
ىشىندە جۇرسە ازعانا،
شايىلسىن وكپە، ناز-نالا.
الدىعا سىيماي سابيلەر،
قۇشاعىن جايسىن جاڭا ۇيلەر.
جاستاردىڭ سامساپ وتاۋى،
مەيىرىم توكسىن وتانى.
اسپەتتەپ اتا ءداستۇرىن،
اسەم بوپ ءوسسىن جاس بۋىن.
كىربىڭ تارتپاسىن كارىلەر،
بارىڭنىڭ ءدامدى ءنارىن بەر!
دۇرلەگەن قازاقستانعا
تاڭعالسىن دوس تا، دۇشپان دا!
*** *** *** ***
ۇلىس كۇنى قۇتتى بولسىن،
اق كەتپەسىن تاڭدايدان!
ەل ىرگەسى مىقتى بولسىن،
ب ا ق كەتپەسىن ماڭدايدان!
اللاھۋ اكپار!
*** *** *** ***
ورازاقىن اسقار
نيەتتەرىڭ اق بولسىن،
ناۋرىزدىڭ اقشا قارىنداي.
باستارىڭا ب ا ق قونسىن،
شاشىڭنىڭ بارلىق تالىنداي.
ساناسى ءوسىپ ادامنىڭ،
كوڭىلدە كىر قالماسىن.
قۇتى قاشىپ جاماننىڭ،
جاقسى تاپسىن جالعاسىن.
تىنىش بولسىن دالامىز،
تۇگەل بولسىن نۋىمىز.
تازا بولسىن اۋامىز،
تۇنىق بولسىن سۋىمىز.
قاتىگەزدىك جوق بولسىن،
ورالماسىن كەز وگەي.
كىرىسىمىز كوپ بولسىن،
بۇگىنگى ناۋرىز كوجەدەي.
اللاھۋ اكپار!
*** *** *** ***
ۇلىس كۇنى قازان تولسا،
ول جىلى اق مول بولار.
ۇلى كىسىدەن باتا السا،
سوندا ولجالى جىل بولار.
*** *** *** ***
ۇلىس وڭ بولسىن،
اق مول بولسىن.
قايدا بارسا جول بولسىن!
ۇلىس باقتى بولسىن،
ءتورت تۇلىك اقتى بولسىن!
ۇلىس بەرەكە بەرسىن،
ءبالى-جالا جەرگە ەنسىن!
*** *** *** ***
جاڭا جىل باقىت جىلى بولسىن،
مالىڭ توق،
ۋايىم-قايعى جوق بولسىن.
كوگەن تولى قوزى،
جەلى تولى قۇلىن بولسىن.
مالىڭ بازارلى،
ۇلىڭ نازارلى،
قىزىڭ اجارلى بولسىن!
*** *** *** ***
اۋەلى، قۇداي وڭداي كور،
وڭ جولىنا باستاي كور،
اداسسا جولعا سالا كور،
سۇرىنسە قولدان الا كور!
كەزدەسسە شايتان قاعا كور!
جۇلدىزدارمەن جالعاستىر،
جاقسىلارمەن جاناستىر،
جامانداردان اداستىر!
*** *** *** ***
باي قىلسىن،
ءتورت تۇلىك ساي قىلسىن،
كەتپەس داۋلەت بەرسىن،
وتاۋىڭا ساۋلەت بەرسىن.
باستارىڭا باقىت قونسىن،
قاستارىڭا نوكەر تولسىن.
دۇشپاندارىڭ جوق بولسىن.
كورە الماعان قاسكويدىڭ،
ءىشى كۇيىپ شوق بولسىن.
ريزىق، ءناسىبىڭ تاسىپ،
كوڭىلدەرىڭ توق بولسىن.
تۋعان بالالارىڭ ەر جەتىپ،
ءوسىپ ۇلكەن ەل بولسىن،
باقتالاسىڭ كەم بولسىن.
داۋلەتىڭ شالقىپ، سەل بولسىن،
داستارقانىڭ كەڭ بولسىن!
*** *** *** ***
حالايىق تەز سەرپىلىپ، ءوڭى كىرەر،
شارۋاسى تالاپتى ەردىڭ ورلەي بەرەر.
ۇلىستىڭ ۇلى كۇنى جايلى بولىپ،
قۇدايىم الاش جۇرتتىڭ قولداپ جۇرەر!
قازاعىم، ناۋرىز ايىڭ قۇتتى بولسىن،
مالدارىڭ امان تولدەپ ءسۇتتى بولسىن.
اعايىن ءارقاشاندا قوعامداسىپ،
ءوزارا ىلعي ءتاتۋ-تاتتى بولسىن!
كوز جاسى جەتىم-جەسىر يە بەرسىن،
ۇلىس كۇنى داۋلەتتى ۇيە بەرسىن.
ەسىركەپ عارىپتاردى قادىر اللا،
ولارعا بيە مەنەن تۇيە بەرسىن!
الەۋمەت، ب ا ق، ورناتسىن ناۋرىز ايى،
وڭدى بوپ ەل جۇرتىمنىڭ، حال-جاعدايى.
قار كەتىپ، جەر قارايىپ، كۇن جىلىندى،
ءار ءۇيدىڭ ويناقتاسىن تايلاق-تايى.
*** *** *** ***
ءيا، قۇدايىم!
داۋلەتتى باس بەرسىن،
باقىتتى اس بەرسىن.
ۇلىستىڭ ۇلى كۇنىندە!
ۇلىڭ وڭعا قونسىن.
قىزىڭ قىرعا قونسىن.
مالىڭ ورىسكە تولسىن،
داۋلەتىڭدى اسىرسىن،
دۇشپانىڭ باسىلسىن.
مەنىڭ بەرگەن بۇل باتام –
ۇلىس كۇنگە ساقتاپ جۇرگەن ءسۇر باتام.
مىنگەندەرىڭ بالالار،
جورعا-جورعا تاي بولسىن،
جورعالاتىپ كەلگەنگە
كوپتىڭ كوڭىلى جاي بولسىن!
اي جاعىڭا قاراساڭ،
التىننان تەرەك ورناسىن
ايىندا كەلگەن مەيمانىڭ،
سوعان اتىن بايلاسىن.
كۇن جاعىڭا قاراساڭ،
كۇمىستەن تەرەك ورناسىن.
كۇندە كەلگەن مەيمانىڭ،
سوعان اتىن بايلاسىن.
تاڭ مەزگىلى بولعاندا،
ناۋرىز كۇنى تۋعاندا،
بوز توعايداي شۋىلداپ،
بودەنەدەي پىرىلداپ،
بەرەكەلى قۇت بولىپ،
قىدىر كەلىپ دارىعاي!
استىر-تاستىر،
جۇلدىزدارمەن جالعاستىر،
جاقسىلارمەن جالعاستىر،
جامانداردان اداستىر!
ءاۋمين
*** *** *** ***
ۇلىسىڭ وڭ بولسىن،
اق مول بولسىن،
قايدا بارسا دا جول بولسىن!
ۇلىس باقتى بولسىن،
ءتورت تۇلىك اقتى بولسىن!
ۇلىس بەرەكە بەرسىن،
بالە-جالا جەرگە ەنسىن!
ءاۋمين
*** *** *** ***
وركەنىڭ ءوسسىن،
ءورىسىڭ كەڭەيسىن.
ات جالىن تارتىپ ءمىنىپ،
حالقىڭنىڭ قامىن جەگەيسىڭ.
تىلەۋىڭدى بەرىپ،
باعىڭدى اشسىن.
اينالىپ كەلىپ اي مەن جىل،
امان-ەسەن كورۋگە جازسىن!
ءاۋمين
*** *** *** ***
ءتاڭىرىم جازداي بەرسىن،
جازداي بەرسە جازىلىپ،
كوكىرەگىندە يمان وتى مازداي بەرسىن،
ءتاڭىرىم كۇزدەي بەرسىن،
كۇزدەي بەرسە قۇتايىپ،
ريزدىعىن ماڭداي تەرمەن ىزدەي بەرسىن.
ءتاڭىرىم قىستاي بەرسىن،
قىستاي بەرسە، قىسىلماي
ىنساپپەنەن تىزگىنىڭ تەڭ ۇستاي بەرسىن.
ءتاڭىرىم كوكتەمدەي بەرسىن،
كوكتەمدە كوكتەي ءونىپ،
تالابىڭ كوككە ورلەي بەرسىن!
تىشقان جىلى تىنىشتىق بەر،
سيىر جىلى ىرىس-قۇت بەر،
بارىس جىلى مال-باسىمدى ءوسىر،
قويان جىلى جايلى قونىسقا كوشىر.
قويان جىلى جۇرتتان جىلۋ سۇراتپا،
ۇلۋ جىلى ۇل-قىزىمدى جىلاتپا،
جىلقى جىلى جەتكىزە گور مۇراتقا.
ءاۋمين
*** *** *** ***
ۋا، جاراتقان يەم!
حالقىمدى دالاسىمەن ساقتا.
ەلىمىزدى داناسىمەن ساقتا،
ءسابيدى اناسىمەن ساقتا
ازاماتتى ساناسىمەن ساقتا
جۇرتىمدى قاسىرەت-قايعىدان ساقتا
حالىققا تونگەن قاۋىپتەن ساقتا
تابيعي اپاتتاردان ساقتا.
ۋا، حالقىم باۋىرىڭ ءبۇتىن بولسىن!
سارقىلماس قۇتىڭ بولسىن!
كۇنىمىز ۇلىستى بولسىن!
جەرىمىز ىرىستى بولسىن!
ەلباسى بىرلىككە سەبەپتى بولسىن!
جاپپار يەم جار بولىپ
بۇل باتا قابىل بولسىن!
ءاۋمين، اللاھۋ اكبار!
*** *** *** ***
ۇستىڭنەن قاز قاڭقىلداپ وتپەسىن،
بۇراما تەمىر، سوم التىن،
سۋعا سالساڭ باتپاسىن،
ءتاڭىر بەرگەن نەسىبەڭ
تەپكىلەسەڭ، كەتپەسىن.
جەلىڭنىڭ ءبىر شەتىنە
وق شىرقاساڭ، جەتپەسىن،
سەنەن بايلىق وتپەسىن.
ەسىگىڭنىڭ الدىنان
ەلۋ ىنگەن بوزداسىن،
قوراڭنان بەس ءجۇز ساۋلىق قوزداسىن.
قويشىڭدى ماقتاپ سالعايسىڭ،
بۇلتتى كۇن جاۋىن جاۋعاندا،
ادىرلى جەرگە جايعاندا،
قويىنان ايرىلىپ قالماسىن.
قاسقىرعا قويىن بەرمەسىن.
ءسويتىپ قۇداي وڭداسىن،
جىلقىڭ سەنىڭ مىڭ بولسىن،
جىلقى دەگەن جاقسى مال،
بەس اۋلىڭا باقتىرىپ،
بەس ايدىننان سۋارىپ
بەتەگەلى تاۋعا جابا سال،
سيىرىڭ سەنىڭ مىڭ بولسىن،
قىسىڭ قاتتى بولعاندا
قامىستى جەرگە ايداپ سال،
ءاۋمين!
*** *** *** ***
اللاھ سەنى قولداسىن!
كوپكە باسشى كوسەم بول،
سويلەر سوزگە شەشەن بول،
ءقاۋىپ پەنەن قاتەردەن
ءارقاشان دا امان بول.
ۇلى سوزگە قىسقا بول،
لۇقپانداي حاكىم بول،
ەڭبەك ەتىپ ەلىڭە
حالقىڭا سونداي جاقىن بول.
تولە بيدەي ءادىل بول،
ايتەكەدەي توپ جارعان
ەلىڭە سونداي ءمالىم بول.
پاناسىزعا پانا بول،
بالاسىزعا بالا بول،
ءادىل شەشىپ ءار ءىستى
اقىلىڭ اسقان دانا بول!
ءاۋمين، اللاھۋ اكبار!
*** *** *** ***
قولىڭدى جاي جاماعات،
مەن ءبىر باتا بەرەيىن،
اۋەلى اللاھ وڭداسىن!
بار ءىستى ءوزى قولداسىن.
كورگەن قىزىق مەرەيىڭ
تويدان تويعا ۇلاسسىن.
اۋلەتىڭە باسىڭا
ەش جاماندىق بولماسىن.
ۇيدە، تۇزدە بولساڭ دا
پەرىشتەلەر بولسىن جولداسىڭ.
ءتاتۋ-تاتتى تىرشىلىك
ەلىمىزگە ورناسىن.
بولاشاقتى الاڭسىز
جاراتقان يەم جولداسىن.
ءار ازامات وسىعان
ۇلەس قوسۋدى ويلاسىن.
ءبىز تىلەكتەس ادامبىز
پەرىشتەلەر ءاۋمين دەپ
ءبىر اللاھ ءبىزدى قولداسىن!
ءاۋمين اللاھۋ اكبار!
*** *** *** ***
ۇلىس باقتى بولسىن،
ءتورت تۇلىك اقتى بولسىن!
ۇلىس بەرەكە بەرسىن،
بالە-جالا جەرگە ەنسىن!
ۇلى حالقىم توق بولسىن،
كويلەكتەرىڭ كوك بولسىن!
قايعى ۋايىم جوق بولسىن،
قۋانىشتارىڭ كوپ بولسىن!
*** *** *** ***
ۇلىس باقتى بولسىن!
ءار كۇنىمىز جاقسى بولسىن!
دوستىعىمىز بەرىك بولسىن!
ونەر-بىلىم سەرىك بولسىن!
*** *** *** ***
ءيا، قۇدايىم!
داۋلەتتى باس بەرسىن،
باقىتتى اس بەرسىن،
ۇلىستىڭ ۇلى كۇنىندە!
ۇلىڭ وڭعا قونسىن،
قىزىڭ قىرعا قونسىن.
مالىڭ ورىسكە تولسىن،
داۋلەتىڭدى اسىرسىن،
دۇشپانىڭ باسىلسىن.
مەنىڭ بەرگەن بۇل باتام –
ۇلىس كۇنگە ساقتاپ جۇرگەن ءسۇر باتام.
مىنگەندەرىڭ، بالالار،
جورعا-جورعا تاي بولسىن.
جورعالاتىپ كەلگەندە
كوپتىڭ كوڭىلى جاي بولسىن.
اي جاعىڭا قاراساڭ،
التىننان تەرەك ويناسىن.
ايىڭدا كەلگەن مەيمانىڭ،
سوعان اتىن بايلاسىن.
كۇن جاعىڭا قاراساڭ،
كۇمىستەن تەرەك ويناسىن،
كۇندە كەلگەن مەيمانىڭ
سوعان اتىن بايلاسىن.
تاڭ مەزگىلى بولعاندا
ناۋرىز كۇنى تۋعاندا
بوز تورعايداي شۋىلداپ،
بودەنەدەي پىرىلداپ،
بەرەكەلەرى قۇت بولىپ،
قىدىر كەلىپ دارىعاي!
استىر-استىر،
جۇلدىزدارمەن جالعاستىر،
جاقسىلارمەن جاناستىر،
جامانداردان اداستىر.
ءاۋمين
*** *** *** ***
ە، پاتشا قۇداي، ەسىڭە ال!
ءوزىڭ جارىلقاساڭ، بىلايعىنىڭ نەسى بار؟
ە، پاتشا قۇداي، اۋەلى ءوز كارىڭنەن ساقتا،
شايتاننىڭ شەرىنەن ساقتا،
پاتشانىڭ كارىنەن ساقتا.
قادامى قاتتىدان ساقتا،
قاتتى تونگەننەن ساقتا،
جيىلعان نۋدان ساقتا،
تاسىعان سۋدان ساقتا.
ۇيىتقىپ جانعان ورتتەن ساقتا،
ىڭىرانىپ جاتقان دەرتتەن ساقتا!
ءاۋمين
*** *** *** ***
تىشقان جىلى تىنىشتىق بەر،
سيىر جىلى ىرىس-قۇت بەر،
بارىس جىلى مال-باسىمدى ءوسىر،
قويان جىلى ايلى قونىسقا كوشىر.
قويان جىلى جۇرتتان جىلۋ سۇراتپا،
ۇلۋ جىلى ۇل-قىزىمدى جىلاتپا،
جىلقى جىلى جەتكىزە گور مۇراتقا!
جىلان جىلى جۇت كورىپ،
جىراق كەتسە بوسقان ەل:
جىلقى جىلى جۇرت بولىپ،
ەلدىڭ باسىن قوسقان ەل.
ات سابىلتىپ بارىسسىن!
قوي جىلىندا قوپاڭداپ،
ات قۇيرىعىن كەسكەن دوس،
مەشىن جىلى ءماز بولىپ،
ءتۇيىستىرىپ ءتوس پەن ءتوس،
قۇدا بولىپ تابىسسىن!
تاۋىق جىلى شىققان داۋ –
يت جىلىندا ەل ۇيىپ،
تويعا ۇلاسىپ جونەلسىن.
دوڭىز جىلى شاپقان جاۋ –
تىشقان جىلى ءشوميىپ،
دومالانىپ ول ءولسىن!
جىلان جىلعى ۇرىستا
شەيىت بولعان باتىردىڭ
بەسىكتە قالعان بالاسى
مۇشەلگە تولىپ جاس بولسىن،
اعايىنعا باس بولسىن.
اكەگە تارتىپ تۋسىن ول،
ادىلەت جولىن قۋسىن ول.
اتىنا قامشى سالسىن ول،
اتانىڭ كەگىن السىن ول!
قويان جىلى تاقىردا
جەسىر قالعان پاقىردىڭ
جەتەكتەگەن جالعىزى
مۇشەلگە تولىپ بوي جەتسىن،
ءار قيانعا وي كەتسىن،
كوپ بوپ قورعاپ تەپكىدەن،
قۇتتى كەلىن اتانسىن،
اقساقالدان باتا السىن.
تۇرمىس كۇيى قۇرۋلى،
ەل بوپ ءونسىن رۋلى!
You Might Also Like
-
جولىڭدى اللا قولداسىن، جامانشىلىق بولماسىن. سەنىمدى بولسىن جولداسىڭ، جولىڭدى كەسكەن وڭباسىن. ءساتتى بولسىن ىستەرىڭ، جاقسى بولسىن تۇستەرىڭ، جۇمساق بولسىن ىشكەنىڭ. كورمەگەن جەردى كورىپ قايت، ى...
-
بىردە اۋقاتتى وتباسىنىڭ وتاعاسى كىشكەنتاي ۇلىن اۋىلعا، مالشىلاردىڭ ورتاسىنا الا بارىپتى. ادامداردىڭ تۇرمىسىنىڭ قانشالىقتى كەدەي ەكەندىگىن ءوز كوزىمەن كورسىن دەگەن ويى بولعان. ولار وتە كەدەي تۇراتىن ...
