ورىندالعان تىلەك
كىشكەنتاي داۋلەت بازار قايداسىڭ دەپ ۇشىپ كەلەدى. ماقساتى سوڭعى ساتكە بولسا دا ۇلگەرۋ. ال كوڭىلىندە كەزەكتەسكەن ءبىر ءۇمىت، ءبىر كۇدىك. ءۇمىتى — جانقالتاسىنداعى وتىز تەڭگە. ال كۇدىگى — قاجەتتى اقشا تولىق ەمەس، تەك جارتىسىنان ارەڭ اسادى. كۇتە تۇرۋ كەرەك ەدى، ءبىراق وعان تاعاتى جەتپەدى. ويتكەنى ەرتەڭ — جارىس. ءارى وعان قاتىسام دەپ ۋادە بەرىپ قويعان. ودان قالۋ — جۇرتتا قالۋ دەگەن ءسوز. ولىممەن بىردەي. سونى ويلاپ، نە دە بولسا بارىپ كورەيىن دەپ كۇننىڭ كەش كىرگەنىنە قاراماي زىتىپ كەلەدى. شامالاۋىنشا، بازار ەندى-ەندى جابىلۋعا ءتيىس. مىنە، ەكى اياعى جەرگە تيمەي ۇشىپ كەلەدى. جۇرەگىندە ەپتەگەن قوبالجۋ بار. ءبىراق، سوعان قاراتپاي، ءوزى دە بىلمەيتىن الدەنە دەدەكتەتىپ جەتەكتەپ كەلەدى. تەز جەتپەسە، كەرەكتى زاتىن بىرەۋ كەلىپ الىپ كەتەتىندەي. ءتىپتى، الىپ كەتكەن بولۋى دا مۇمكىن، ويدا جوقتا كورىپ، «الام» دەپ بەكىنگەنىنە قاشان. اپاسىمىن بىرگە بازار ارالاپ جۇرگەن بولاتىن، توسىن كوزى ءتۇستى. جانارى جارق ەتتى. جاقىنداپ بارىپ قاراپ ەدى، استىنداعى قاتتى قاعازدا باعاسى جازۋلى تۇر ەكەن. ەلۋ تەڭگە. سۇمدىق كوپ اقشا. ەكى الدە ءۇش ناننىڭ قۇنى. ءوزى بىلەتىن جانە قاعىستىرىپ-سوعىستىرىپ شەتىنەن بولماشى تيىن-تەبەن تۇسىرەتىن بەلگىلى زاتتىڭ قۇنىمەن ولشەدى. ءبىراق العاشقى قۋانىشى سۋ سەپكەندەي باسىلا بەردى. مىنانداي اقشا جيۋ ءۇشىن از دەگەندە ءبىر اي كەرەك. اپاسى بەرەتىن ءبىر ناننان ۇزاسا ءبىر نە ەكى تەڭگە ۇنەمدەۋى مۇمكىن. ودان كوپ ەشقاشان بولا قويمايدى.
«اپاما ايتىپ كورسەم بە ەكەن» دەپ ءبىر وقتالدى ارتىنشا. ءبىراق ول ويىنان تەز اينىدى. ءمۇعالىم اكەلۋدى تاپسىراتىن ەكى ءجۇز تەڭگەنىڭ ءوزىن قالتالارىن اقتارىستىرىپ ءجۇرىپ ارەڭ تاۋىپ بەرەتىن ادامدا قايداعى ارتىق اقشا. سونى ەسكە الىپ، سالى سۋعا كەتكەندەي باسىلا بەردى. ارتىنان بايقادى، قيال سوعىپ تۇرعاندا اپاسى الدەقاشان ۇزاپ كەتىپتى. ارتىنان تۇرا جۇگىردى.
سودان بەرى ويىندا ەلۋ تەڭگە. كۇندىز ەسىنەن، تۇندە تۇسىنەن شىقپايدى. تالاي رەت كوكەيتەستى ارمانىنا قول جەتكىزدى. ءبىراق، ويانا كەلگەندە، ونىسى جاي كورگەن ءتۇسى بولىپ شىعىپ، جەر سيپاپ قالىپ ءجۇردى.
ءسويتىپ جۇرگەن كۇندەردىڭ بىرىندە ەلۋ تەڭگە تابۋدىڭ جولى دا تابىلدى-اۋ، ايتەۋىر. اۋىلعا ءومىرى كەلمەيتىن بوتەلكە جيناۋشى كەلدى. وزانداي ايعايلاپ كوشە-كوشەنى باسىنا كوتەردى. ءبىراق نە ايتىپ جاتقانى تۇسىنىكسىز. سول ۇعىنىقسىز سوزدەردىڭ اراسىنان «بۋتىلكا» دەگەن ءسوزدى قۇلاعى شالعاندا بارىپ، ءبارى سايراپ جۇرە بەردى. قۋانىپ كەتتى. ءبىراق بەرەتىن اقشاسى ماردىمسىز ەكەن. ونى ارتىنان ءبىلدى. اۋىلدىڭ تۇكپىر-تۇكپىرىن ءتىنتىپ شىعىپ، ارەڭ تاپقان بوس قۇمىرالارىن اكەپ وتكىزىپ ەدى، بار-جوعى وتىز تەڭگە بولدى. ءۇش ون تەڭگەلىك سىلدىر ەتىپ الاقانىنا تۇسكەندە اسا شاتتانا قويعان جوق. ونىڭ تاعى ءبىر سەبەبى بوتەلكە ىزدەپ تەنتىرەۋدى ارى جالعاستىرۋعا ۋاقىت جوق ەدى — كۇن ەڭكەيىپ، كەش كىرىپ بارادى. كەرەكتى دۇنيەسىن بۇگىن بارىپ الماسا، ەرتەڭ كەش. تاڭ اتسا — جارىس. كەشىگۋگە بولمايدى. كوپ ويلانىپ تۇرعان جوق، بازار قايداسىڭ دەپ تارتىپ وتىردى. سودان كەلە جاتقان بەتى وسى. كوڭىلىندە ءبىر ءۇمىت، ءبىر كۇدىك.
بازارعا تاياپ قالعاندا كۇدىگى مۇلدە باسىم ورىنعا شىقتى. كوڭىلى قوبالجىپ، قايمىعا بەردى. ال مەزگەۋلى جەرگە تاقاپ بارعاندا مۇلدە دارمەنى قۇرىپ، بويىن ۇرەي الدى. ءبىراق سوندا دا توقتاماي قىبىرلاي بەردى. جىلجي بەردى. جوق، كورگەن زاتى ورنىندا ەكەن. الىستان كوز سالىپ، كادىمگىدەي قۋانىپ قالعانىمەن، باعاسى جازىلعان قاعازدىڭ ورنىندا جوعىن كورگەندە جۇرەگى ءبىر اۋناپ ءتۇستى. «ءتىپتى دە قىمباتتاپ كەتتى مە» دەگەن قورقىنىش ەدى ونىسى. جانىن ەلجىرەتكەن ءبىر مۇقتاج سەزىم بيلەدى بويىن. «ءبىر تىلەگىمدى بەرە كور!» دەدى ىشىنەن كىمنەن وتىنگەنىن ءوزى بىلمەي. جاقىنداي بەرە ساتۋشىدان ءزارۋ زاتتىڭ باعاسىن سۇرادى. «وتىز تەڭگە» دەدى ساتۋشى. دۇنيە نۇرلانىپ جۇرە بەردى. سول ءسات كوزىنەن ەكى تامشى جاستىڭ ىرشىپ كەتكەنىن ارتىنان ءبىلدى. ءبىر ءتاۋىرى ساتۋشى ونى بايقاعان جوق. بىرەۋمەن سويلەسىپ تۇر ەكەن، سول كۇيى نازار اۋدارمادى. قولىنداعى اقشانى ورنىنا قويدى دا، كەرەگىن قولىنا الدى. ارتىنا قاراي بۇرىلعاندا جەر بەتىندەگى جالعىز باقىتتى ادامداي سەزىندى ءوزىن.
You Might Also Like
-
سالەم، دوستار! بۇل مەن عوي، قالتافون! قالايسىڭدار؟ ومىردە جاقسى ادامدار كوپ قوي، كەزەكتى اڭگىمە دە سونداي ءبىر ىزگى جان جايىندا.
-
مەن باقىتتى كورسەم دەۋشى ەدى. ءبىزدىڭ قاقپانىڭ الدىنداعى ۇلكەن قارا جولمەن كۇندە ءبىر قايىرشى شال وتەتىن ەدى. شال ۇزىن اساسىن جوعارى كوتەرىپ الىپ: — ە، ازاماتتار، باقىتتى بولىڭدار! — دەيت...
