InfoHub Logo

بۇل وقيعانى مەكتەپتە ءمۇعالىم بولىپ قىزمەت ىستەيتىن ءبىر تانىسىم ايتقان ەدى. ال، تىڭداڭىز...

"سىنىقتان باسقانىڭ ءبارى جۇعادى" دەگەندەي، اسىرەسە، ون تورت-ون بەس جاستاعى جاسوسپىرىمدەر ەلىكتەگىش كەلەدى. تەلەديداردان، كوشەدەن كورگەنىن ىستەيدى. بايقايسىز با، سوڭعى كەزدەرى تالدىرماش قىز بالالار قارنىن جارقىراتىپ، كىندىگىن كورسەتىپ ءجۇرۋدى شىعاردى. كورگەندە ءوزىڭ ۇيالاسىڭ. مەن جەتەكشىلىك ەتەتىن توعىزىنشى سىنىپتا دا سونداي ءبىر وقۋشىنى بايقاپ قالدىم. اسىرە قىزىل جۇققىش كەلەدى، بىرىنەن ءبىرى كورىپ ەرتەڭ سىنىپ جارقىراعان قارىن مەن كىندىككە تولىپ كەتپەسە نەعىلسىن، مۇنىڭ الدىن الماسا بولماس دەگەن ويمەن الگى كىندىگىن جالاڭاشتاپ كەلگەن وقۋشىنىڭ ورتاعا شىعارىپ ەسكەرتۋ جاسادىم:

— ينديرا قامزايەۆا، مىنا سىنىپتاستارىڭنىڭ الدىندا ساعان ەسكەرتەمىن، ەرتەڭنەن باستاپ كىندىكتى جالاڭاشتاپ كەلۋدى قوياتىن بول، وقۋشىعا لايىق، مىنا وزىڭدەي قىزدار كيىپ جۇرگەن كيىممەن كەلەتىن بول، ۇقتىڭ با؟ — دەدىم.

ينديرا تومەن قاراپ، باسىن يزەگەندەي بولدى. ەندى تۇسىنگەن بولار، كوپتىڭ كوزىنشە بالانىڭ ساعىن سىندىرمايىن دەگەن ويمەن ورنىنا وتىرعىزدىم.

ەرتەڭىنە بۇل سىنىپتا ساباعىم جوق-تى، سوندىقتان اسىقپاي ساباق بىتەتىن كەزدە مەكتەپكە كەلدىم. ءبىر كەزدە كوزىم ءتۇسىپ كەتتى... ينديرا... سول باياعى قالپى، ەشتەڭەدەن قاپەرسىز، كۇلىپ-ويناپ ءجۇر. مۇنداي رەنجىمەسپىن، شاقىرىپ الىپ، ۇرىستىم دا، ەرتەڭ ساباققا اتا-اناسىز كەلمەۋىن ەسكەرتتىم. ەرتەڭىنە ينديرا ساباققا كەلمەدى. ساباق ءبىتىپ، وقۋشىلار تاراعاننان كەيىن، مۇنى مەكتەپ ديرەكتورىنا مالىمدەگەن ءجون شىعار دەگەن ويمەن كىدىرىستەپ قالدىم. ورنىمنان قوزعالا بەرگەنىم سول ەدى ەسىك اشىلىپ، ينديرا كورىندى. ءالى سول باياعى، كىندىگى كورىنگەن قالپى. مۇنداي اشۋلانباسپىن، قالشىلداپ كەتتىم. سودان مەكتەپ وقۋشىسىنىڭ ەتيكاسى مەن ەستەتيكاسىنان باستاپ ءسوز تيەگىن اعىتتىم-اي كەپ، مىنا كيىم كيىسىنىڭ وقۋشىعا لايىقسىز ەكەنىن، ال قازاق قىزدارىنا ءتىپتى دە جاراسپايتىنىن ۇقتىرىپ-اق باقتىم.

— ادامدا ۇيات، يبا دەگەن بولۋى كەرەك عوي، نەگە ايتقاندى تىڭدامايسىڭ، كەشە ساعان اتا-اناڭنىڭ ءبىرى مەكتەپكە كەلسىن دەگەنىم قايدا؟ — دەدىم.

سوندا عانا بايقادىم ونىڭ سىرت جاعىنان بىرەۋ قوزعالاقتاعانداي بولدى. ينديرادان ەداۋىر ەرەسەكتەۋ، شاشىن قىزىل تۇسكە بوياعان، شالبارلانىپ، قارنىن جالتىراتقان تاعى ءبىر قىز تۇر، كىندىگىنە مونشاق تاعىپ الىپتى. "توقال ەشكى ءمۇيىز سۇرايمىن دەپ، قۇلاعىنان ايىرىلىپتى" دەگەن ەكەن، ەندىگى جەتپەگەنى وسى ەدى؟ بۇل نە دە بولسا قۇربىسى بولدى عوي، بىر-بىرىنەن اينىماۋىن بۇلاردىڭ، دەگەن وي كەلدى.

— اتا-اناڭنىڭ ءبىرى ەرتەڭنەن قالماي مەكتەپكە كەلەتىن بولسىن، بۇل سوڭعى ەسكەرتۋ، ەگەر كەلمەسە ساباققا جىبەرىلمەيسىڭ، — دەدىم ينديراعا قاراپ، ءار ءسوزىمدى ەجىكتەپ جەتكىزدىم.

— اعاي، انام كەلدى عوي، — دەدى ول.

— قاشان كەلدى، قايدا ول؟

ينديرا جانىندا تۇرعان ءوزى سياقتى "قىزدى" كورسەتتى. نە ايتارىمدى بىلمەي ورىندىققا سىلق ەتىپ، وتىرا كەتىپپىن...

بالا كورگەنىن ىستەيدى دەگەن وسى-اۋ..

---