ورىستىڭ مالى
جەتپىسىنشى جىلداردىڭ بەل ورتاسى. تۇرىكمەنستاننىڭ كراسنوۆودسك اۋداندىق گازەتىندە قىزمەت ىستەپ جۇرگەن كەز ەدى. بىردە اۋداندىق پارتيا كوميتەتىنەن "جەبەل" كەڭشارىندا قۇرىلعان كومسومول-جاستار شوپان بريگاداسى جايىندا ماقالا جازۋ قاجەت دەگەن نۇسقاۋ ءتۇستى. ورتالىقتان ءۇش ءجۇز شاقىرىمداي جەردەگى شارۋاشىلىققا قوناعا جەتتىم. قازاعىنان تۇرىكمەنى كوپ كەڭشاردىڭ باسشىسى اسەن نازاروۆ دەگەن تۇرىكمەن ەدى. جاستار بريگاداسىنا ءوزى ەرتىپ اپاراتىن بولدى. ەرتەڭىنە ەرتەلەتىپ جولعا شىقتىق.
دالانىڭ ويلى-قىرلى جولىمەن ءىلبىپ جەتەمىز دەپ جۇرگەندە كۇن ارقان بويى كوتەرىلىپ قالدى. دوڭگە كوتەرىلە قيالاي قۇلاعانىمىزدا شوپتەن سالىنعان باستىرمالى قارانىڭ توبەسىنەن تۇستىك. تاياپ كەلىپ توقتاعانىمىزدا قورا تولى قوي ماڭىراپ قويا بەردى. ءالى ورىسكە شىقپاعان ەكەن. مۇنى كورگەن اسەن اعاي اشۋدان تۇتىگىپ كەتتى. جىلدامداتا بارىپ قورانىڭ ەسىگىن اشتى. سول-اق ەكەن اشقۇرساق مال لاپ قويدى. توقتى وتارى ەكەن ءبىرىن-بىرى باستىرمالاپ قۇلاپ جاتىر.
قىردان كوكتەم ءيسى اڭقيدى. قىرات-بەلدەر كوكپەڭبەك. مۇندايدا مال شىدار ما، كوك قۋىپ بەزىپ بارادى.
— ءاي، جۇگىرمەك يتتەر-اي، بۇلار قايدا ءجۇر، مالدى تال تۇسكە دەيىن قاماپ، — دەگەن اسەن قورا ىرگەسىندەگى شوپاندار ۇيشىگىنە باردى دا، ەسىگىن جۇلقي اشتى. ءۇي ءىشى استان-كەستەن. تەمەكى مەن اراق ءيسى قولقا قابادى. جامىلعىلارى باسىنا كەتىپ، سيراقتارى ءقوستيىپ ايقۇش-ۇيقىش جاتقان ءتورت بوزىمباي بالاڭ جىگىت ءبىرىن-بىرى وياتىپ الەك.
قاتتى اشۋلانعان باستىق ولاردىڭ جەر-جەبىرىنە جەتتى. قايتار جولدا اسەن دە، مەن دە ءۇنسىزبىز. "ماقتاعان قىزدىڭ..." كەبىن كيگەن كومسومول شوپاندار ارتتا قالدى.
— جاڭاعى كورگەندەرىڭدى جازاسىڭ عوي، — دەدى اسەن كەنەت تۇيەدەن تۇسكەندەي.
— ارينە، — دەدىم.
— وسىنى جازباي-اق قويساڭ قايتەدى؟..
— نەگە مەن جازۋ ءۇشىن كەلدىم عوي...
— وي، تەمەكە، قايتەسىڭ سونى، ءسىرا ورىستىڭ مالى عوي. ەرتەڭ-اق ۇكىمەت ەتكە ايدايدى، يت بولىپ ازابىن كورەتىن ءبىز داعى.
مەن ويلانىپ قالدىم. اڭقىلداعان اق كوڭىل ازامات اسەن نازاروۆتىڭ ءسوزىن جەرگە تاستاي المادىم. ماقالا جازىلمادى، ءبىراق ونىڭ " ورىستىڭ مالى" دەگەنى ەسىمدە قالدى.
You Might Also Like
-
— تاكە، قۇدالارىڭىز قاي جاقتان؟ — دەدى كورشىم ەلەۋسىن. ۇلىم ۇيلەنگەلى جاتىر دەگەن حاباردى ەستىگەن بولۋى كەرەك.
-
ەسىك الدىندا اقجاۋلىقتى انا وتىر. كيىم كيىسىنەن، وتكەن-كەتكەنگە جالتاقتاپ قاراعانىنان-اق اۋىلدان كەلگەنىن بايقاۋ قيىن ەمەس. ناۋرىز مەرەكەسىنىڭ كەزى ەدى. سالەم بەرىپ، كورىستىم. سالعان جەردەن سالدىرل...
