ءوت قابىنا تاس بايلانۋ
ءوت قابىنا تاس بايلانۋدى كەيدە حولەليتياز دەپ تە اتايدى.
ءوت قابى – باۋىردىڭ الدىڭعى جاعىندا ورنالاسقان قاپشىق تارىزدەس اعزا. ول – باۋىردا تۇزىلەتىن جانە مايلاردى قورىتۋعا قاتىساتىن سۇيىق ءوتتىڭ «ىدىسى». ءوت قابىنداعى تاستار حولەستەرين كريستالدارىنان نەمەسە سيرەك جاعدايلاردا تۇزداردان تۇزىلەدى. بۇل تاستار قۇم ءتارىزدى ۇساق نەمەسە گرەك جاڭعاعىنىڭ كولەمىندەي ۇلكەن بولۋى مۇمكىن. ءوتتى ءوت قابىنان اش ىشەككە جەتكىزەتىن ءوت جولىن تاس بىتەپ تاستاعاندا حولەسيستيت نەمەسە ءوت قابىنىڭ شانشۋى بىلىنەدى.
سەبەپتەرى
ءوت قابىنداعى تاستار ءوت تۇزىلەتىن زاتتاردىڭ تەپە-تەڭدىگى بۇزىلعاندا پايدا بولادى دەپ ەسەپتەلەدى. سونداي-اق وتتەگى حولەستەرين مولشەرىنىڭ كوپ بولۋى دا ماڭىزدى. وتكە تاس بايلانۋدان بولاتىن ۇستاما كوبىنە مايلى تاعامنان كەيىن بايقالادى.
بەلگىلەرى
ءوت قابىنىڭ شانشۋى كوبىنە وزدىگىنەن جويىلادى. تاس ءوت جولى ارقىلى اش ىشەككە وتكەندە اۋىرسىنۋ مەن باسقا بەلگىلەر تىيىلادى. ەگەر تاس ورنىنان جىلجي المايتىنداي ۇلكەن بولسا، اۋىرسىنۋ جالعاسا بەرەدى جانە بۇنداي جاعدايلاردا تەز ارادا حيرۋرگيالىق شارالار قولدانۋ كەرەك. ەگەر جالپى ءوت جولىندا تۇرىپ قالسا، سارعايۋ بايقالىپ (تەرى مەن كوزدىڭ اعى سارعايادى)، باۋىر زاقىمدانۋى مۇمكىن.
اسقىنۋلارى
ءوت قالتاسىنا بايلانعان تاستاردىڭ كوبى ءوت جولى بىتەلىپ قالعانشا ءقاۋىپتى ەمەس. ءوت جولى تاسپەن بىتەلگەن جاعدايدا ينفەكسيا قوسىلىپ، ءوت قابى، باۋىر جانە ۇيقى بەزى قابىنادى. ءوت قابىنىڭ جارىلۋى پەريتونيتكە الىپ كەلۋى مۇمكىن. سوزىلمالى ءوت تاسى سىرقاتى سونداي-اق ءوت قابىنىڭ وبىرىنا الىپ كەلۋى مۇمكىن. اۋىرسىنۋ كەزىندە ناۋقاس ادام جاتىپ، تاماقتان باس تارتۋى كەرەك. اۋىرسىنۋدى باسۋ ءۇشىن انالگەتيكتەر ىشۋگە بولادى. ەگەر ءوت قابىنىڭ ۇستاماسى 2 ساعاتتان ۇزاققا سوزىلسا، مىندەتتى تۇردە دارىگەرگە جۇگىنۋ كەرەك. وڭ جاق قابىرعا استىندا ۇنەمى اۋىرسىنۋ نەمەسە جاعىمسىز اسەرلەر سەزىنسەڭىز، دارىگەرگە كورىنگەنىڭىز ابزال.
ناقتامالانۋى
ءوت قابىنداعى تاستار، ادەتتە، رەنتگەنولوگيالىق جانە ۋلترادىبىستىق زەرتتەۋ ارقىلى ناقتامالانادى.
ەمى
تاستاردىڭ كوبى «مىلقاۋ» كەلەدى، ياعني ەش بەلگى بەرمەي جۇرە بەرەدى. بۇنداي جاعدايلاردا كوبىنە ەشقانداي ەم قاجەت ەمەس. ەگەر اۋىرسىنۋ ۇستاما تۇرىندە بولسا، حولەسيستوەكتوميا (ءوت قابىن وتالاۋ ارقىلى الىپ تاستاۋ) جاسالادى. كەي جاعدايلاردا ءوت تاستارىن ەرىتەتىن پرەپاراتتار تاعايىندالادى. ءبىراق تاستار تولىعىمەن ەرىپ كەتۋى ءۇشىن بۇل دارىلەردى بىرنەشە جىل بويى ىشەدى. سونداي-اق جاڭا تاستاردىڭ وسۋىنە جول بەرمەيتىن شارالار قولدانۋ كەرەك.
الدىن الۋ
ءوت قالتاسىنا تاس بايلانۋعا جول بەرمەس ءۇشىن تومەندەگى شارالاردى ەسكەرگەن ءجون:
- ارتىق سالماق بولعان جاعدايدا قۋاتتىلىعى تومەن تاعام جەپ، دەنە جاتتىعۋلارىن جاساۋ؛
- مايلى تاعامنان ساقتانۋ؛
- ءوت قابىندا تاستىڭ بارى انىقتالعان جاعدايدا ايەل ادامداردىڭ ەستروگەندەرمەن ەمدەلۋدەن ساقتانۋى ءتيىس، ويتكەنى ەستروگەندەر تاستىڭ پايدا بولۋىنا ىقپال ەتەدى.
- اعزاعا حولەستەريننىڭ ءتۇسۋىن شەكتەۋ.
حيرۋرگ دارىگەرلەر: ۋ. ۆالحانوۆ، ۆ.م. كيم، ر. اجيبييەۆ.
You Might Also Like
-
اتاقتى ساۋلەت ەسكەرتكىشتەرىن ينتەرنەت پەن كىتاپ ارقىلى كوپشىلىك كورگەن بولار. ءبىراق، ءبىر قىزىعى — سىرتتاي قاراعاندا ولاردىڭ بار قىرىن بىلەتىن سياقتىمىز، ال ىشكى كورىنىسى قانداي دەگەندە بىلەرى...
-
استانادان ءبىر ميلدەي جەردەگى ەسكى ۋسادبانىڭ ناق ورتاسىندا شومبال قابىرعالى ەتىپ، ايشىقتاندىرىپ سالعان بايدىڭ مۇنارالى، ءساندى ءۇيى تۇرۋشى ەدى. بۇل ۇيدە اينالاعا ايگىلى ەرلى-زايىپتى باي دۆوريان مەكەن...
