InfoHub Logo

ق ر پرەمەر-مينيسترى باقىتجان ساعىنتايەۆ «سيفرلى قازاقستان» باعدارلاماسىن جۇزەگە اسىرۋ بويىنشا جاۋاپتى باسشىلارعا مىندەتتەر جۇكتەدى.

«ەلباسىنىڭ بيىلعى جولداۋىندا ۇكىمەتكە سيفرلىق ءبىلىم بەرۋ رەسۋرستارىن ارى قاراي دامىتۋ بويىنشا تاپسىرما بەرگەن بولاتىن. وسى باعىتتا قابىلدانعان «سيفرلى قازاقستان» باعدارلاماسىنىڭ شەڭبەرىندە ءبىلىم جانە عىلىم مينيسترلىگى كوپتەگەن شارۋالاردى اتقارىپ جاتىر. ءقازىر عانا ءمينيستردىڭ (ەرلان ساعادييەۆ - اۆت.) بايانداماسىن تىڭدادىڭىزدار. اقپاراتتىق جۇيەلەردى ينتەگراسيالاۋ ماسەلەسى، كوپتەگەن موبيلدىك قوسىمشالاردى شىعارۋ، ماماندارمەن حالىققا ءالى دە ءتۇسىندىرۋ ماسەلەسى بويىنشا كوپ جۇمىس جۇرگىزىلىپ جاتىر»، - دەدى ۇكىمەت باسشىسى.

باقىتجان ساعىنتايەۆ دەگەنمەن نەگىزگى ماسەلەلەردىڭ بىرىنە نازار اۋدارۋ كەرەكتىگىن ەسكە سالدى.

«ءبىلىم بەرۋ مەكەمەلەرىن كومپيۋتەرمەن قامتاماسىز ەتۋگە نازار اۋدارۋ كەرەك. قازاقستانداعى بىردە-بىر وبلىستا باياندامادا كورسەتىلگەندەي 100 پايىز قامتاماسىز ەتىلمەگەن (مەكتەپتەر كومپيۋتەرلەرمەن -اۆت.). الماتى مەن استانا قالالارىندا دا سونداي. اقمولا وبلىسى 29 پايىز، جامبىل وبلىسى 22 پايىز، وقو 38 پايىز، قىزىلوردا وبلىسى 40 پايىز... ەڭ جوعارعى كورسەتكىش 82 پايىز - اتىراۋ وبلىسىندا. جىلدىڭ سوڭىنا دەيىن بۇل ماسەلە شەشىمىن تابادى دەپ ويلايمىن»، - دەدى ول بۇگىنگى ۇكىمەت وتىرىسىندا.

ۇكىمەت باسشىسى كەڭ جولاقتى ينتەرنەتكە قول جەتكىزۋ ماسەلەسىن دە ۇمىت قالدىرعان جوق.

«بۇل جەردە دە سۇراقتار بار. دەگەنمەن، مينيسترلىكتەردىڭ باياندامالارىنا بايلانىستى 2020 جىلدىڭ سوڭىنا دەيىن بەكىتىلگەن كەستەگە سايكەس، ءبىز الىستاعى ەلدى مەكەندەردىڭ بارىنە كەڭ جولاقتى ينتەرنەت جەتكىزەمىز. سول بويىنشا جۇمىستىڭ ءبارى شەشىلەتىن بولادى. دەگەنمەن، وبلىس ورتالىقتارىن، قالالار مەن اۋدان ورتالىقتارىنا كەلەتىن بولساق، بۇگىنگى قول جەتكىزىلىپ وتىرعان مۇمكىندىگىمىز - 85 پايىز. 85 پايىزدى 100 پايىز كومپيۋتەرمەن قامتاماسىز ەتسەك، كوپ ماسەلە شەشىلەدى. قالىپ وتىرعانى - 15 پايىز عانا. 15 پايىز 2020 جىلدىڭ سوڭىنا دەيىن شەشىلەدى»، - دەدى پرەمەر-مينيستر.

ءسوز سوڭىندا باقىتجان ساعىنتايەۆ قالالاردى Wi-Fi-مەن قامتۋ ماسەلەسى تۋرالى ايتتى.

«نەگىزى قالالاردا بۇنىڭ ءبارىن شەشۋگە بولادى. استانادا Wi-Fi-مەن قامتاماسىز ەتۋ دەڭگەيى 54 پايىز عانا. الماتى وبلىسىندا 22 پايىز، اقمولا وبلىسىندا 18 پايىز. بۇل وڭاي شەشىلەتىن سۇراقتار. بۇنى اكىمدىكتەر قولعا الۋ كەرەك دەپ ويلايمىن. قالالىق مەكتەپتەردىڭ ءبارى كەڭ جولاقتى ينتەرنەتكە - Wi-Fi-مەن قامتاماسىز ەتىلەتىن بولسا، ءبىزدىڭ نەگىزگى سۇراقتاردىڭ ءبارى تەز ارادا شەشىلەدى دەپ ويلايمىن»، - دەپ ءتۇيدى ۇكىمەت باسشىسى.

قازاقپارات

---