InfoHub Logo

ەلىمىزدىڭ ءونىپ، وركەندەۋىنىڭ باستى قوزعالتقىشى بولاتىنداي ماڭىزدى فاكتورلاردىڭ ءبىرى حالىقتىڭ بويىندا ەلىنە، وتانىنا دەگەن پاتريوتتىق سەزىمنىڭ بولۋى. پايعامبارىمىز «وتاندى ءسۇيۋ – يماننان» دەگەن ەكەن. ەلىمىزدىڭ ءاربىر ازاماتى وتانىن، ءتىلىن، ءدىنىن قاستەرلەپ قۇرمەتتەۋى، وتانىنىڭ گۇلدەنۋى ءۇشىن ات سالىسۋى قاجەت. ەلباسىمىز نۇرسۇلتان نازاربايەۆ: «تۋعان جەرىڭنىڭ تاريحىن، انا ءتىلىڭدى، ءوز تەگىڭدى بىلمەي تۇرىپ، ناعىز پاتريوت بولا المايسىڭ. قازاقستاندىقتاردىڭ تۋىپ-وسكەن جەرى بار، بۇل ءبىزدىڭ وتانىمىز. ەلىمىزدىڭ تاريحى تۋرالى بارلىق مالىمەتتى جۇيەلەندىرىپ، ونىڭ ءبىرتۇتاس نۇسقاسىن ازىرلەۋ قاجەت.» دەگەن. قانداي دا ءبىر حالىقتىڭ ادەت-عۇرپىن، اسىرەسە تاريحىن ۇمىتتىرۋ – ولاردى قۇردىمعا جىبەرۋدىڭ، الەم ساحناسىنان جويۋدىڭ وڭاي جولى. ۇلتتىق قۇندىلىقتارىنان، ەلدىك تاجىريبەلەرىنەن ماقرۇم قالعان حالىق، بولاشاعىن قۇرۋ ءۇشىن مىقتى نەگىز تابا الماي، جويىلۋعا بەيىم بولادى. مۇنىڭ مىسالىن ءوز ءتۇبىن، ءوز ءتىلىن جوعالتىپ باسقا ۇلتتارعا ءسىڭىسىپ كەتكەن قانشاما مادەنيەتتەردەن كورۋگە بولادى. سوندىقتان سان-عاسىرلىق تاريحىمىزدى، ءتۇبىمىزدى، ادەبيەتىمىزدى، تاريحي تۇلعالارىمىزدى، پاتشالارىمىز،  شەشەندەرىمىز، كوسەمدەرىمىز، بيلەرىمىز بەن باتىرلارىمىزدى، مادەنيەتىمىزدى، ادەت-عۇرپىمىزدى ءبىلىپ، كەلەشەك بۋىننىڭ ساناسىنا سىڭىرە ءجۇرۋ قاجەت. ءاربىر وتانداسىمىزدىڭ، ءار قازاقتىڭ ءوز ەلىنىڭ، اتا-بابالارىنىڭ الدىن­داعى جاۋاپكەرشىلىكتى تەرەڭ سەزىنە ءبىلۋى، وسى جولدا ەتەنە ەڭبەكتەنە ءبىلۋى، كۇرەسە ءبىلۋى كەرەك. ءاسى­رەسە، وقۋ ورىندارىنداعى وقۋ-تاربيە جۇمىستارىنا جاۋاپتى ادامداردىڭ دا مۇنى تەرەڭ تۇسىنگەندەرى ءجون. جاس وسپىرىمدەردى اقىلدى، پاراساتتى، رۋحاني ويلاۋ دارەجەسى بيىك، ار- وجدانى مول، ەڭبەكقور، ىسكەر، تالعامى جوعارى جانە بويىندا ت.ب. ىزگى قاسيەتتەرى بار پاتريوت ازامات ەتىپ تاربيەلەۋدى نەگىزگە الۋ كەرەك.  

اتا-بابامىزدىڭ سەگىز قىرلى ءبىر سىرلى تاربيە بەرۋدى ءجون ساناعان. قانشا كوپ ءتىلدى بىلسەك ارتىق ەتپەيدى. الايدا انا ءتىلىن نازاردان تىس قالدىرۋ ادەپكە دە ار-ۇجدانعا دا جات تىرلىك. ءقادىر مىرزالييەۆ اعامىزدىڭ: «وزگە ءتىلدىڭ ءبارىن ءبىل، ءوز ءتىلىڭدى قۇرمەتتە!» دەگەن دانالىق ءسوزى ەستە بولۋى ءتيىس. الماتى قالاسىنداعى بىرنەشە ءمۇعالىمنىڭ مىنا ايتقاندارى جادىمىزدا قالىپ قويدى: «قازاق مەكتەبىندە ساباق بەرەمىز. وقۋشىلار ءوز ارالارىندا ورىسشا سويلەيدى. ساباق ايتقاندا قازاقشانى ازەر سويلەپ، ويىن دۇرىس جەتكىزە المايدى.» بۇل ورايدا مۇعالىمدەر مەن قوسا، اتا-انالاردىڭ دا نەگىزگى ءرولى باسىم. اتا-انالار، جالپى حالىق انا ءتىلىن بىلمەۋدىڭ ۇيات ەكەندىگىن جاس-وسپىرىمدەردىڭ بويىنا ءسىڭىرىپ، اڭىز-ەرتەگىلەرىن، تاريحىن جاڭعىرتىپ، جاستاردىڭ وتانىنا دەگەن ماحابباتىن وياتۋى، وتانسۇيەتىن پاتريوت ەتىپ وسۋىنە كۇش جۇمىلدىرۋى ءتيىس.  

وتانشىلدىق – ەلجاندىلىق تۋعان وتباسىنا، تۋىپ-وسكەن ورتاعا، تۋعان توپىراعى مەن تابيعاتىنا دەگەن قۇرمەتتەن باستالادى. سوندىقتان وتانشىلدىقتىڭ قاينار كوزى ادامگەرشىلىك قاسيەتتەر بولماق. وتانسۇيگىشتىك، ءتىل، ءدىن، ۇلتتىق سانا-سەزىم، مادەنيەتى مەن تاريحىن، ونەرىن ءسۇيۋ، وزگە ۇلتتارمەن بەيبىت قاتىناستا ءومىر ءسۇرۋ ءاربىر ازاماتتىڭ باستى ۇستانىمىنا اينالۋى ءتيىس. ءوز ۇلتىن، وتانىن ءسۇيىپ، ونىڭ مۇڭىن مۇڭداپ، جوعىن جوقتايتىن ازامات قانا وتانشىل، پاتريوت بولادى.   

جەر استى، جەر ءۇستى بايلىقتارىنا قانىق، كليماتى زور، سۋى مول، جەرى كەڭبايتاق وتانىمىز قازاقستاننىڭ بۇدان ءارى دە كوركەيۋى، دامۋى ءۇشىن شىنايى وتانسۇيەر پاتريوتتارعا مۇقتاج. شىنايى وتانسۇيەرلەر بىرلىك پەن ىنتىماقتى تيەك ەتىپ، ءبىر-بىرىن قۇرمەتتەپ، قولداپ، قورعاپ، جىك-جىككە بولۋگە تىرىسىپ، ىرىتكى سالىپ، بىر-بىرىنە ايداپ سالۋعا تىرىساتىن سىرتقى دۇشپانداردىڭ ويىنىنا الدانباي، تاباندى ەڭبەك ەتىپ، جيىرما ءبىرىنشى عاسىردىڭ وزىق تەحنولوگيالارىن يەمدەنىپ، ءتىپتى ونى اسىپ ءوتىپ قاسيەتتى وتانىمىزدى لايىقتى دارەجەدە كوتەرۋگە كۇش سالۋى ءتيىس.

---