وتتى ارقادا «وتارقا»!
سەبەپسىز سالدار جوق، قوعامداعى سان قيلى جاعداياتتار گازەت سيپاتىنىڭ وزگەرۋىنە مۇمكىندىك جاسادى. بۇعان دەيىن «العا» - «ۆپەرەد» گازەتتەرىن قارجىلاندىرىپ تۇرعان ەكىباستۇز اۋدانىنىڭ بيۋدجەتى ناشارلاي باستادى. مىنە، وسى كەزەڭدە امانكەلدى قاڭتارباي ۇلى ءالى ەشكىم ويعا الا قويماعان تىڭ قادام جاسادى. «ۆپەرەدتى» جاۋىپ تاستاپ، «العانىڭ» نەگىزىندە قالا مەن اۋدانعا بىردەي تارايتىن قازاق گازەتىن اشۋدى قولعا الدى. «ۆپەرەدتىڭ» جابىلىپ قالۋىنان ەشتەڭە جوعالمايتىن ەدى، ويتكەنى ەكىباستۇز قالاسىندا سول جىلدارى قالالىق «زاۆەتى يليچا»، «شاحتاستروي»، «لەنينسكايا يسكرا»، «ۋگولنىي ەكيباستۋز»، «وگني ەكيباستۋزا» دەيتىن سالالىق ورىس ءتىلدى گازەتتەر بار. رەداكتوردىڭ بۇل ۇسىنىسىن سول كەزدەگى بەدەلدى، ۇلتجاندى ازاماتتار مەن اقساقالدار - ادام مۇحامەدجان ۇلى، كوبەن تولەپبەرگەن ۇلى، سەرىك جاقسىبايەۆ، نۇرجان تيشپايەۆ، ىرگەباي ساتانوۆتار قۇپتاپ، قولداۋ جاساعانمەن بۇل نيەت باسشىلار تاراپىنان ۇلكەن قارسىلىقتارعا ۇشىرادى.
ايتسە دە سول جىلدارداعى ساياسي وقيعالار، وداقتا، ونىڭ ىشىندە قازاقستاندا كومپارتيانىڭ تاراتىلۋى باسشى قىزمەتتەردە وتىرعانداردىڭ بەتپەردەسىن وزگەرتۋگە دۋشار ەتتى. ءيا، ادىلدىك سالتانات قۇردى، اۋداندىق، قالالىق كەڭەستىڭ «قازاق گازەتى اشىلسىن» دەگەن شەشىمى شىقتى. ولكەتانۋشى، بەلگىلى قالامگەر، ەكونوميكا عىلىمدارىنىڭ كانديداتى سەرىك يمانتاي ۇلى جاقسىبايەۆ جاڭا اشىلعالى وتىرعان گازەتكە «وتارقا» دەگەن تاريحي ماڭىزى بار اتتى ۇسىنىپتى. ونىڭ ءمانىسى بىلاي: بىردە بۇقار جىراۋ بابامىز ابىلاي حانعا: «ورداڭدى ۋاقىتشا باسقا جەرگە كوشىر»،- دەيدى. سارىارقانى، اسىرەسە كوكشەتاۋدى قيماعان حان بۇل سوزگە نەمكەتتى قارايدى. سول كەزدە قىتايمەن اراداعى جاعداي قاتتى ۋشىعىپ تۇرسا كەرەك، بۇقار سودان ساقتانعان عوي.
سول ساقتىعىن حانعا:
...بۇرىنعىداي باي ەل دەپ،
وتارقادا قالماڭىز،
ءشۇرشىت كەلسە جاراماس،
اي-تۇيىڭە قاراماس،-دەگەن ەكەن.
ۇلى جىراۋدىڭ سارىارقانى وتارقا اتاۋى تەگىن ەمەس. سەرىك يمانتاي ۇلى: «سارىارقا ايماعى تاس كومىردىڭ ۇستىندە تۇر. تاس كومىر – وت، ەكى بىردەي الىپ ەلەكتر ستانساسى دا - وتتىڭ ۇستىندە تۇر، سوندىقتان گازەتتى «وتارقا» دەپ اتاۋ كەرەك» دەگەن ءۋاجدى ءسوزى قۇپتالىپ، اقىرى 1991 جىلدىڭ جەلتوقسان ايىنىڭ اياعىندا باسپا ءسوز جانە بۇقارالىق اقپارات مينيسترلىگىنە تىركەلىپ، تاۋەلسىز ەلدىڭ العاشقى قارلىعاشتارىنىڭ بىرىندەي بولىپ، ەكىباستۇزدىڭ تۇڭعىش «وتارقا» اتتى گازەتى دۇنيەگە كەلدى.
سايا مولدايىپ
You Might Also Like
-
ءيا، شىن مانىندە سولاي بولدى. «وتارقا» جاڭادان اشىلعان تۇستا قالادا كاسىبي ءجۋرناليستى اشىق كۇندە شاممەن ىزدەسە دە تابىلمايتىن. ءبىراق امانكەلدى اعا ادەبيەتتەن از كەم حابارى بارلاردى گازەت...
