InfoHub Logo

قازاقستان رەسپۋبليكاسى پرەزيدەنتتىگىنە كانديدات ن.ءا.نازاربايەۆتى جاقتاۋشىلار فورۋمىندا سويلەگەن ءسوز

الماتى. رەسپۋبليكا سارايى. 04.01.1999 جىل

ءبىز جاقىندا جازۋشى، جۋرناليست كامال ەكەۋمىز جەزقازعان جازيراسىنا، قارت قارساقباي، ۇلىتاۋ وڭىرىنە بارىپ كايتتىق. مىڭ-سان سايلاۋشىلارمەن كەزدەستىك.

مەن ءقازىر تەك سول حالىقتان ەستىگەنىمدى ايتامىن.

سايلاۋشىلار امانات ايتتى:

— دۇنيەگە كەلگەن جاس ءسابي جەتىگە جەتكەنشە جەردەن تاياق جەيدى. ودان كەيىن ءشىنجاۋ، دىمكاس، مەشەل بولماسا جۇگىرىپ ءجۇرىپ كەتەدى، — دەدى.

— قازاقستان اتتى جاس مەملەكەت ازاتتىق العالى جەتى جىل ءوتتى. جەتى جاستان اسقانشا قازاقستان جەردەن تاياق جەگەن جوق. جەمقورلاردان، پاراقورلاردان، قورقاۋلاردان قورلىق كوردى، — دەدى.

سايلاۋشىلار وكپە ايتتى:

— جەر — ءبىزدىڭ انامىز. اناسى بالاسىن قورلامايدى، — دەدى.

—ءبىزدى قورقاۋلاردان قورعاي الماعان پروكۋراتۋراعا، ميليسياعا، كاۋىپسىزدىك قىزمەتكەرلەرىنە، سوتقا، كەدەنگە وكپەلىمىز، — دەدى.

— ولار تەك مايدا-شۇيدە شاباقتاردى اۋلايدى. شورتاندار مەن جايىندار ءالى تايراڭداپ ءجۇر، — دەدى.

سايلاۋشىلار امانات ايتتى:

— پرەزيدەنت نۇرسۇلتان قورقاۋلارمەن كۇرەستى كۇشەيتۋ تۋرالى جارلىق جاريالادى. ەندى سودان ناقتى ناتيجە شىعارسىن دەدى. سوندا جەر — انانىڭ داۋلەتى وزىمىزگە بۇيىرادى. سوندا ءبىز قينالمايمىز، — دەدى.

سايلاۋشىلار ايتتى:

— كەزىندە تۇركيا حالقى مۇستافا كەمال اتاتۇرىككە قانداي سەنسە، ءبىز دە نۇرسۇلتانعا سونداي سەنەمىز، — دەدى.

— قازىرگى كەزەڭ — بۋىرقانعان، تولقىعان تەلەگەي تەڭىز سياقتى. قازاقستان سول تەڭىزدە ءجۇزىپ بارا جاتقان الىپ كەمە سياقتى، دەدى. ال كاپيتان — نۇرسۇلتان، — دەدى.

— قازاقستاندا نۇرسۇلتانداي باسقا دا ۇل-قىزدار بار، — دەدى. نۇرسۇلتاننان باسقا جارامدى ازامات تۋماسا، ۇلتقا ۇيات، — دەدى.

— ءبىراق ءدال ءقازىر كەمە كاپيتانىن اۋىستىرۋعا بولمايدى، — دەدى.

— قازاقستان كەمەسىن كوپ جىلدان بەرى نۇرسۇلتان باسقارىپ كەلەدى، قالاي باسقارۋدى بىلەدى. ول — تەڭىزدىڭ قىر-سىرىن جاقسى مەڭگەرگەن. جاڭادان باسقا بىرەۋ كەلسە، ول تەڭىز استىنداعى جاسىرىن جارتاستارعا، جاۋ تاستارعا كەمەنى سوعىپ الۋى مۇمكىن، — دەدى.

سايلاۋشىلار سەنىم ايتتى:

— الىپ كەمەنى داۋىلدان امان الىپ شىعاتىن پرەزيدەنت نۇرسۇلتان، — دەدى.

— قازاقستان ەسىمدى الىپ كەمەنى نۇح پايعامبار سياقتى جارتاستارعا، جاۋ تاستارعا سوعىپ الماي، اشىق ايدىنعا، قوي ۇستىنە بوزتورعاي جۇمىرتقالايتىن جاسىل جاعالاۋعا الىپ شىقسىن نۇرسۇلتان، — دەدى.

تاعى دا سايلاۋشىلار ايتتى:

— نۇرسۇلتان ءبىزدى بالە-جالادان، قارانيەت قاقتىعىستاردان امان الىپ قالدى، — دەدى. ءبىزدىڭ دۇعامىز: ءوزىن ولمە، وزگەنى دە ولتىرمە!

— نۇرسۇلتان ءبىزدى الەمگە تانىتتى. الەم ءبىزدى مويىندادى. الدەنىپ الساق، الەم ءبىزدى سىيلاي تۇسەتىن بولادى، —دەدى.

سايلاۋشىلار امانات ايتتى:

— نۇرسۇلتان حالىقارالىق، ۇلتارالىق دانا دانەكەر. شەكارامىزدى تاسپەن دە، دوسپەن دە قورشاي بەرەيىك، — دەدى.

سايلاۋشىلار وكىنىش ءبىلدىردى:

— رەسپۋبليكا اۋىل شارۋاشىلىعىنىڭ كوسەمدەرى كوزىمىزگە كوك شىبىن ۇيمەلەتە جازدادى. نۇرسۇلتان وسىعان قاتتى نازار اۋدارسىن، — دەدى.

— اۋىل مادەنيەتىن، جالپى مادەنيەتتى ولىمسىرەتپەسىن،—دەدى. اتاتۇرىك ايتقان: «مادەنيەتى كەم ەل — ءبىر كوزى سوقىر، ءبىر اياعى اقساق كەمتار ادام سياقتى» دەگەن.

ءبىز كورگەن، ءبىز تىڭداعان حالىقتىڭ تالاپ-تىلەگى، اماناتى وسىنداي.

لايىم دا وسى تىلەك قابىل بولعاي!

---