قاعاناقباس، قىلكەڭىردەك، شيبورباي
باياعى وتكەن زاماندا قاعاناقباس، قىلكەڭىردەك، شي بورباي ۇشەۋى جولداس ەكەن.
ءبىر كۇنى بۇلار ءبىر توقتى ۇرلاپ، ايدالاعا اپارىپ سويىپتى. توقتىنى سويىپ، ەتىن قازانعا سالايىن دەپ جاتىپ، قاعاناق باسقا:
— جىنىن توگىپ كەل، – دەپ، قارىندى بەرىپتى.
قاعاناقباس قارىندى تىسقا الىپ شىققاندا، قارا شىبىن قارىنعا دا، قاعاناقباستىڭ باسىنا دا قاپتاي ۇيمەلەپتى. باسىنداعى شىبىندى قورىپ، قاعامىن دەپ، قاعاناق باس قولىن قاعىس سىلتەپ، ءوزىنىڭ باسىن ۇرىپ الىپتى. پيالاداي جۇقاتوبەسى ويىلىپ، شارانا شەكەسى شارتكەتىپتى. جۇمىرتقاداي جۇقا باس جارىلىپ، جان بەرىپتى.
«قاعاناق باس قالايشا كەشىكتى؟» – دەپ، شيبورباي دالاعا شىعا كەلسە، ءولىپ جاتقان قاعاناقباستى كورە سالىپ:
— ءاي، اتتەگەن-اي! – دەپ، ەكى قولىمەن ەكى سانىن سالىپ قالعاندا، شيدەي بوربايى شورت ەتىپ، ول دا مۇردەم كەتىپتى.
شيبوربايدىڭ داۋىسىن ەستىپ، قىلكەڭىردەك سىرتقا جۇگىرىپ شىعادى دا، ءولىپ جاتقان ەكى جولداسىن كورىپ:
— ويباي، باۋىرلارىم-اي! – دەپ داۋىستاي بەرگەندە، ءوزىنىڭ قىل كەڭىردەگى قىلعىنىپ، تىنىس الا الماي ءۇزىلىپ كەتىپتى.
You Might Also Like
-
بار ەكەن دە، جوق ەكەن، اش ەكەن دە، توق ەكەن. ەرتەگىم ەرتەك ەكەن، ەشكىلەرى بورتە ەكەن، قىرعاۋىلى قىزىل ەكەن، قۇيرىق ءجۇنى ۇزىن ەكەن، مۇزعا مىنگەن ەكەن، بۇتى توڭعان ەكەن. وتكەن زاماندا ءبىر پاتشا بولىپ...
